Marike 11
11
Yiezu lɛ ɛ́ yòo ńnɛ̀kɛ̃́nɓiì ɛ́ dàa vaá-zɔ Zerizalɛɛmu lóo
Mat 21.1-11; Lik 19.28-40; Zãn 12.12-19
1Ɛ́ Yiezu àá mí kɛ̀ránzɛ̀ɓɛ̀ ɛ́ van lúwi Zerizalɛɛmu lòo ǹ. Ɛ́ bòo lɛ ɛ́ ɓɛ́ van ɛ́ hɔ̀ Bɛtefaaze àá hɔ́ Betani lóoniɛ̀ ɛ̀ dɛ̃, hɔ̀ Olive vɛ̃̀hɛ̃ ɓúkiè sɛnù, ɛ́ Yiezu ɛ́ khie tɔrɛ mí kɛ̀ránzɛ̀ɓɛ̀ nìɛ ɓɛ̀ ɲu dɔ̀ ɛ́ viɛniɛ ɓɛ́ híɛhɔ́, 2à bie lɛ́ ɓà ǹ ɛ́ nɛ làa: «Mì lan vɛ zɔ hɔ lóo yéni ɛ́ wi mi híɛhɔ́. Mí ɓen van dɛ̃un ɛ́ mí ɓén mi ńnɛ̀kɛ̃nɓi-fìɛ dɔ̀ kɛ́ á can dɛ̃̀, lɛ ɛ́ nìnbírɔ ɛ́ ɲɛùn yí yòó yí mi wɛ̀. Ɛ̀ mì fuen ɔ̀ ɛ̀ dàá ɓen hũ̀nún. 3Kɛ́ nìnbírɔ dɔ̀ ɛ́ mì dìenin nɛ mí wiɛ dàa ɛ́ hɔ̀ wé, ɛ̀ mì zɔ bie lɛ́ ɓàasɔ ǹ nɛ làa: “À Ɲunsɔ ɛ́ mɛ̀kóo wi-è ǹ, kɛ́ á ɓén fùansí è ǹ á ɛ́ khũ̀á ɓen sáalɛ.”» 4Ɛ́ ɓɛ́ kɛ̀ránzɛ̀ɓɛ̀ sɔ ɛ́ cɔ́ van mɔn ɔ̀ ńnɛ̀kɛ̃nɓi-fìɛ dɔ̀ kɛ́ á can dɛ̃̀ ɛ́ lúwi lè zĩinù ɲunù dɔ̀ ǹ lè fɔ́nú hũn, ɛ́ ɓɛ́ van fuerɛ-à. 5Ɛ́ ɓɛ́ nìnbirìe lɛ wi yán, ádɔ̀ ɛ́ ɓɛ̀ dìenin nɛ làa: «Hɔ ńɓùo ɛ́ mí wé? Mí wiɛ dàa ɛ́ ɔ̀pe ńnɛ̀kɛ̃nɓi-fìɛ ɛ̀ fuen?» 6Ɛ́ ɓɛ́ zɔn bie hɔ̀ bòo lɛ ɛ́ Yiezu hṹn bie lɛ́ ɓà ǹ. Ɛ́ ɓɛ́ fùɛrɛ̀sí ɓà ǹ ɛ́ ɓɛ́ cɔ́. 7Ɛ́ ɓɛ́ dàa ɔ̀ ńnkɛ̃nbi-fìɛ sɔ ɛ́ ɓɛrɛ lɛ́ Yiezu ǹ; ɛ̀ ɓɛ̀ yòó bɔ̀ ɓɛ́ pɔnkɔ̀nìɛ piè lɔ̀n, ɛ́ Yiezu ɛ́ yóò kɛsí lɔ̀n. 8Ɛ́ ɓɛ́ nìnbirìe bìkuì ɛ́ síɛ bɛ́ ɓɛ́ pɔnkɔ̀nìɛ lè wṹn lɔ̀n, ɛ̀ ɓɛ̀ dɔ̀ ɛ́ zɔn ɛ́ khɔ́ hɔ́ vɛ̃̀hɛ̃ ńnɛ́n-tiè ɛ́ ɓen lɔ́ bɛ́ hɔ́ wṹn lɔ̀n. 9Ɛ́ ɓɛ́ nìnbirìe lɛ ɛ́ hṹn dú Yiezu híɛhɔ́ àá ɓɛ́ lɛ ɛ́ wi piè máahṹ ɛ́ benkɛ ɛ́ nɛ làa: «Nɛ Dɔfĩn yèrè ɓàaní! Nɛ Ɲunsɔ Dɔfĩn ɛ̀ dúɓɛ́ á lɛ ɛ́ ɓen piè yèrè lɔ̀n. 10Nɛ Dɔfĩn ɛ̀ dúɓɛ́ lé bɛ́záanú lɛ ɛ́ ɓen ǹ, kiè yàá Daviide bɛ́záanú. Nɛ Dɔfĩn yèrè ɛ̀ yóò ɓàaní hɔ́ hóohũn!» 11Ɛ́ Yiezu ɛ́ van zɔn Zerizalɛɛmu lóo; á van zɔn lè Dɔfĩn zũ-bɛhɔ́ hũn, ɛ́ zɔn húikɛa hɔ̀ bòo míkùi, à lɔ́ cɔ́ van Betani àá mí kɛ̀ránzɛ̀ɓɛ̀ iè hɔ̀ lɛ ɛ́ hɔ́ sí ɛ́ hĩ.
Boo lɛ ɛ́ Yiezu dàa dánkɛ́niɛ ńluunù dɔ̀
Mat 21.18-19
12Ɛ́ sí ɛ́ van tɛ̃un; ɛ́ bòo lɛ ɛ́ Yiezu àá mí kɛ̀ránzɛ̀ɓɛ̀ ɛ́ zɔn ɛ́ lé hɔ́ Betani hũn, ɛ́ hĩni ɛ́ yòó ɛ́ Yiezu ɛ̀ ɓé. 13Á mɔn ńluunù dɔ̀ kɛ́ lé viì ɛ́ van ni, kɛ́ lé dàa ɲɛkɛ̃̀a; á nɛ mii vɛ húi nɛ bòo ɛ́ mí ɓén yí biè lè ǹ yée. Á van lúwiniɛ lè ǹ, kɛ́ hɔ́ den wɔ́ ɲɛkɛ̃̀a mí dòonún á van tɛ̀rɛa iè hɔ̀ lɛ ɛ́ ńɓinɓi-tɔ̀rɔ́ hanlɔ́ pɛ̃̀hṹ ɛ́ hṹn ɲɛùn yí dɛ̃ wɛ̀. 14Ɛ́ Yiezu ɛ́ zɔn bie ɛ́ lɛ́ lé ńluunù mu ǹ ɛ́ nɛ làa: «Nɛ nìnbírɔ ɛ̀ bí bĩní dí kɔ́ biè ɛ̀ mi wɛ̀.» Ɛ́ piè kɛ̀ránzɛ̀ɓɛ̀ ɛ́ ɲɛ́ hɔ́.
Yiezu ɛ́ ɓɛ̀ bɔ̀yìɛníriè ɛ̀ ɲɛ líení lé Dɔfĩn zũ-bɛhɔ́ dànkɔ̀ hũn
Mat 21.12-17; Lik 19.45-48; Zãn 2.13-22
15Ɛ́ ɓɛ́ van dɛ̃un Zerizalɛɛmu. Ɛ́ Yiezu ɛ́ yòó zɔn lè Dɔfĩn zũnù dànkɔ̀, ɛ́ zɔn ɛ́ ɓɛ̀ nìnbirìe lɛ ɛ́ hɔ̀ bòo ɛ̀ yìɛní yán àá ɓɛ́ lɛ ɛ́ yɛ̀ yànlɔ́ ɛ̀ ɲɛ líení; à súukɛa ɓɛ̀lɛ ɛ́ hɔ̀ màa ɛ̀ zɛ̀ní tɛ̀bɛ́hĩ́ àá ɓɛ́lɛ ɛ́ ɓɛ̀ ńmɛǹɓóohɛ̃ ɛ́ yìɛní wànlɛ̀a ɛ́ kóokaasí. 16À yí fùansí nɛ nìnbírɔ dɔ̀ ɛ̀ yí bòo dɔ̀ ɛ̀ mìí ɛ̀ dàá zɔ̀ cánkɛ́ lépe Dɔfĩn zũnù dànkɔ̀ ɛ̀ dàá vɛ lé wɛ̀. 17À khie ɛ́ ɓɛ̀ kɛ̀rán kɛ́ á ɛ́ bie àá ɓɛ́ ɛ́ nɛ làa: «Dɔfĩn ɛ́ bie mí bienù vɛ̃hṹ hũn ɛ́ nɛ làa: “Niǹ zũnù ɛ́ ɓɛ́ wóo ɓén ve nɛ viì lɛ ɛ́ hɔ́ dàa míkùi nìɛ ɛ́ wóo hɛ̃un mi ǹ hũn.” Kɛ́ mípe ɛ́ den wɔ́ lé àá kɛ̃̀múa te tànkɔ̀níkɛlén zũnù.» 18Ɛ́ Dɔfĩn khɛ̃́ndàariè hándíe àá Moyiize làndɛ́ kɛ̀ránliè ɛ́ ɲɛ́ hɔ́, ɛ́ ɓɛ́ ɛ́ hɔ̀ bòo lɛ ɛ́ ɓɛ ɛ̀ wé ɛ̀ dàá yí Yiezu ɛ̀ ɓé ɛ̀ cɛ̀; kɛ́ ɓɛ́ den ɛ́ ɔ̀ zán iè hɔ̀ lɛ ɛ́ ɓɛ́ nìzã̀amáa ɓɛ́kùi ɛ́ ɲɛkɛ̃̀a ɛ́ hṹn tɛ́ àá piè viì, piè kɛ̀ránlɔ́ lɛ á hṹn lɛ́ ɓɛ́ nìnbirìe ǹ bòo hũn. 19Ɛ́ bòo lɛ ɛ́ hɔ́ zĩ́ihṹ ɛ́ van dɛ̃un, ɛ́ Yiezu àá mí kɛ̀ránzɛ̀ɓɛ̀ ɛ́ zɔn lɔ́ hɔ́ lóo hũn ɛ́ lɔ́ cɔ́.
Lè ńluunù lɛ ɛ́ Yiezu ɲuhṹ dánkɛ́niɛnin ɛ́ hɔn
Mat 21.20-22
20Ɛ́ pehɔ̀ sí lɛ ɛ́ tĩ ɲɛǹbín, ɛ́ hɔ́ lɛ ɛ́ ɓɛ́ bɔ̀ lè wṹn ɛ́ khíi, ɛ́ Yiezu kɛ̀ránzɛ̀ɓɛ̀ ɛ́ mɔn lè ńluunù kɛ́ lé hɔn fúu ɛ́ van síɛ dɛ̃un mí nɛhĩ́. 21Ɛ́ Piɛre ɛ́ síɛ lieniɛ hɔ̀ bòo lɛ ɛ́ ɲuhṹ wɔ́ ǹ, á zɔn bie lɛ́ Yiezu ǹ nɛ làa: «Kɛ̀ránlɔ, húi, lè ńluunù lɛ ɛ́ kɔ́ ɲuhṹ dánkɛ́niɛnin ɛ́ sí hɔn.» 22Ɛ́ Yiezu ɛ́ zɔn bie lɛ́ mí kɛ̀ránzɛ̀ɓɛ̀ ǹ nɛ làa: «Mì dɛsĩ̀ Dɔfĩn. 23Nin bie hɔ lɛ́ miɛ ǹ àá bɔ̀bín nɛ kɛ́ nìnbírɔ ɛ́ zɔn khɛ́ ɛ́ lɛ́ lépe ɓúkìe sɔ lɛ ǹ nɛ: “Bùín kɔ́te ɛ̀ lé yán ɛ̀ khíi vɛ zɔ hɔ ɲún-bɛhɔ́ hũn!” Kɛ́ ɓàasɔ ɛ́ yí titikɛ mí tĩì hũn, kɛ́ á dũmuasɛ̃̀ àá bɔ̀bín nɛ hɔ bòo lɛ ɛ́ mí bie ɛ́ ɓén wé, ɛ́ hɔ́ ɛ́ wé ɛ́ lɛ́ ɓàasɔ ǹ. 24Ɛ́ sí iè hɔ̀pe ɛ́ ń dàa ɛ́ hɔ̀ bie ɛ̀ lɛ́ miɛ ǹ nɛ kɛ́ mí ɛ́ Dɔfĩn ɛ̀ hɛ̃nnin nɛ hɔ lɛ́ bòo dɔ̀ miɛ ǹ, ɛ̀ mì dɛsĩ̀ nɛ mí yú hɔ́ vɔ́, ɛ́ Dɔfĩn ɛ́ wé hɔ́ ɛ́ lɛ́ miɛ ǹ. 25Kɛ́ mí ɓen dɛ̃̀ ɛ́ Dɔfĩn ɛ̀ hɛ̃nnin, ɛ̀ ɓɛ̀ nìnbirìe lɛ ɛ́ wɔ́ miɛ àá bɔ̀koohɔ́ ɓɛ́kùi ɛ́ mí dé sɛ́wɛ́rí ɛ̀ lɛ́ nin, bòo lɛ ɛ́ wé ɛ̀ mì Yàá lɛ yòó wi hɔ hóohũn ɛ̀ ɓiɛ̀ dàá dé sɛ́wɛ́rí ɛ̀ lɛ́ miɛ ǹ mì bɔ̀koohɛ̃ bòo hũn. [ 26Kɛ́ mí ɓen yáà dé sɛ́wɛ́rí ɛ̀ lɛ́ ɓɛ́lɛ ɛ́ wɔ́ miɛ khɔn ǹ, ɛ́ mì Yàá lɛ yòó wi hɔ hóohũn ɛ́ ɓiɛ̀ yá dé sɛ́wɛ́rí ɛ́ lɛ́ miɛ ǹ mì bɔ̀koohɛ̃ bòo hũn wɛ̀.]»
Yiezu pànkɛ́ lénlén bòo
Mat 21.23-27; Lik 20.1-8
27Ɛ́ Yiezu àá mí kɛ̀ránzɛ̀ɓɛ̀ ɛ́ sĩ̀n khũ̀a ɓɛrɛ Zerizalɛɛmu. Ɛ́ hɔ́ lɛ ɛ́ Yiezu ɛ́ múakɛ khíi lé Dɔfĩn zũ-bɛhɔ́ dànkɔ̀ hũn, ɛ́ Dɔfĩn khɛ̃́ndàariè hándíe àá Moyiize làndɛ́ kɛ̀ránliè àá ɓɛ́ Zuifuɓɛ nìkĩ́ɛ ɛ́ ɓɛrɛ lúwiniɛ ɔ̀ ǹ, 28ɛ̀ ɓɛ̀ ɛ́ ɔ̀ dìenin nɛ làa: «Kɔ́ yú hɔ́ pànkɛ́ yí ɛ́ dàa ɛ́ hɔ̀pe bòo lɛ ɛ́ kɔ́ ɛ́ wé ɛ̀ wé? À iè wieni ɛ́ te le ɲunù ɛ́ lɛ́ kɔ ǹ ɛ́ kɔ́ dàa ɛ́ hɔ̀ wé?» 29Ɛ́ Yiezu ɛ́ zɔn kɔ̃́niɛ ɓɛ̀ nɛ làa: «Ń ɓiɛ nin dìe miɛ ǹ àá bɔ̀cóoní dɔ̀; kɛ́ mí dɛ̀rɛ́ mi kɔ̃́níɛ, ɛ́ nín zɛ̃́ní ɛ́ lɛ ɛ́ te lé ɲunù ɛ́ lɛ́ mi ǹ ɛ́ ń dàá ɛ́ hɔ̀ bòo sɔ lɛ ɛ̀ wé. 30À iè wíeni ɛ́ ti-e Zãn ɛ́ tɔrɛ nɛ a ɓen líiníkɛ ɓɛ́ nìnbirìe hɔ̀ ɲumu hũn? Hɔ̀ iè Dɔfĩn yée kɛ́ ɓɛ́ iè ɓɛ̀ nìnbirìe? Nín ɲí àá mí viì.» 31Ɛ́ ɓɛ́ khie van bie ɓán hũn ɛ́ nɛ làa: «Kɛ́ ké nɛ hɔ iè Dɔfĩn ɛ́ ti-e Zàn ɛ́ tɔrɛ, á zɔ́ bie nɛ ké wiɛ dàa ɛ́ yí dɛsĩ̀-ɛ ǹ? 32Ɛ́ ké wo sũn ɛ́ zɔ bie nɛ ɓɛ iè ɓɛ̀ nìnbirìe ɛ́ ti-e tɔrɛ yée?» Ɓɛ̀ den lò ɛ́ ɓɛ̀ nìzã̀amáa ɛ̀ zán iè hɔ̀ lɛ ɛ́ ɓɛ́pe ɓɛ́kùi ɛ́ dũmuasɛ̃̀ nɛ ape Zãn iè Dɔfĩn bɔ̀háanírɔ àá bɔ̀bín. 33Ɛ́ ɓɛ́ zɔn bie lɛ́ Yiezu ǹ nɛ ɓɛ́ yí dũ wɛ̀. Ɛ́ Yiezu ɛ́ ɓiɛ̀ zɔn bie lɛ́ ɓà ǹ nɛ: «Ɛ́ ńpe ɓiɛ̀ yí nin zɛ̃́ní-ɛ lɛ ɛ́ te le ɲunù ɛ́ lɛ́ mi ǹ ɛ́ ń dàá ɛ́ hɔ̀pe bòo sɔ lɛ ɛ̀ wé wɛ̀.»
اکنون انتخاب شده:
Marike 11: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation