Marike 3
3
Nùún dɔ̀ lɛ núnú hɔn wiɛnírɔ́
Mat 12.9-14; Lik 6.6-11
1Ɛ́ Yiezu sĩ̀n cɔ́ van zɔn ɓɛ̀ Zuifuɓɛ ńkóoɓánlɔ̀n zũnù. Ɛ̀ nìnbírɔ dɔ̀ hṹn wi yán kɛ́ piè núnú hɔn dɛ̃̀. 2Ɛ́ ɓɛ́ Farizĩɛɓɛ lɛ hṹn wi yán ɛ́ Yiezu ɛ̀ húi nɛ a wìe ɛ́ ɓén wiɛní ɛ́ nùún sɔ hɔ̀ ńvũùnín sí zɔǹ, ɛ̀ ɓɛ̀ dàá yí bie nɛ a wɔ́ khɔn. 3Ɛ́ Yiezu zɔn bie lɛ́ á nùún sɔ lɛ núnú hɔn nɛ làa: «Hĩ́ní zɔ dìń hũ̀nún ɓɛ̀ nìnbirìe tĩ́ihṹ.» 4Ɛ̀ Yiezu khie ɓɛ̀ dìenin nɛ làa: «Hɔ̀ kè làndɛ́ ɛ́ nɛ wɛrɛ̀? Hɔ̀ nɛ hɔ ńvũùnín sí zɔǹ ɛ̀ kɔ̀ wé bɔ̀tente yée kɛ́ kɔ́ wé bɔ̀koohɔ́? Ɛ̀ hɔ̀ kɔ fuení nìnbírɔ mɛkɛ̃nì ǹ yée kɛ́ kɔ́ fùansí ɓàasɔ ǹ à hí?» Ɛ́ ɓɛ́ hĩɛ. 5Ɛ́ Yiezu tĩì hĩ́nà ɓà ǹ, á huie ɓɛ̀ khie fɔ̀. Peɓɛ̀ hũn hìerɔ́ hɛ̀ lɛ́ ɛ́ Yiezu hũn yàá míkùi, á zɔn bie lɛ́ á nùúǹ lɛ núnú hɔn ǹ nɛ làa: «Niiní kɔ́ núnú líení.» Á niiniɛ lè ɛ́ líeniɛ, ɛ́ lé khũ̀a yòó dɛ̃̀ sãa. 6Ɛ́ ɓɛ́ Farizĩɛɓɛ ńhĩ́ní lé lòo, ɛ̀ ɓɛ̀ zĩ̀níkɛa lɔ́ lɔ̀ tɔ̀ àá ɔ́ Herɔɔde máahṹ nìɛ, ɛ́ hɔ̀ bòo lɛ ɛ́ ɓɛ́ wé ɛ̀ dàá dań Yiezu ɓé ɛ̀ cɛ̀.
Ɓɛ̀ nìzã̀amáa lɛ ɛ́ ɓen àá Yiezu viì bòo
7Ɛ́ Yiezu ɛ́ munɛ míte àá mí kɛ̀ránzɛ̀ɓɛ̀ ɛ́ van lɔ́ hɔ́ Kalile ɲun-bɛhɔ́ ɲunù. Ɛ́ ɓɛ́ nìzã̀amáa ɛ́ khie bɔ̀ piè máahṹ. Ɓɛ̀ ɲɛ́ hɔ́ bòo lɛ á hṹn wé míkùi, ɛ́ ɓɛ́ van lɔ́kɛ vuò cɛ̀rìɛɛ hũn, ɛ́ ɓɛrɛ bɔ̀ piè máahṹ. Ɓɛ̀dɔ̀ ɛ́ lɔ́ hɔ́ Kalile àá hɔ́ Zudee pɛ̃̀hɛ̃, 8ɛ̀ ɓɛ̀dɔ̀ ɛ́ van lɔ́ àá Zerizalɛɛmu lóo, ɛ̀ ɓɛ̀dɔ̀ ɛ́ lɔ́ hɔ́ Yidumee pɛ̃̀hɛ̃ àá hɔ́ pɛ̃̀hɛ̃ lɛ ɛ́ cánka van lɔ́ wi àá lé vṹn lɛ ɛ́ ɓɛ́ wóò ve nɛ Zurudɛ̃n máahṹ, ɛ̀ ɓɛ̀dɔ̀ ɛ́ lɔ́ hɔ́ Tiire àá Sidɔn pɛ̃̀hɛ̃. 9Ɛ́ Yiezu ɛ́ bie lɛ́ mí kɛ̀ránzɛ̀ɓɛ̀ ǹ nɛ ɓɛ sɛ́sɛ́ lé ɲumu wiè dɔ̀ ɛ̀ lɛ́ mí ǹ bòo lɛ ɛ́ wé ɛ̀ ɓɛ̀ nìzã̀amáa dàá bí súukɛ mi wɛ̀. 10Ɛ́ hɔ́ lɛ á den ɓɛ̀ nìnbirìe bìkuì ɛ̀ wiɛníkɛ, ɛ́ ɓɛ́ nìnbirìe lɛ ɛ́ hɔ́ duò wi nin ɓɛ́kùi ɛ́ wóò nɛ ɓɛ zè zɔ hɛ à ǹ. 11Kɛ́ ɓɛ́ nìnbirìe lɛ ɛ́ ɓɛ́ ńɲíkĩ́nìɛ wi nin ɛ́ ɓen mɔn ɔ̀, ɛ̀ ɓɛ̀ vɛ kùenkɛ síɛ piè híɛhɔ́ kɛ́ ɓɛ̀ ɛ́ bénkɛ nɛ: «Kɔ́ iè Dɔfĩn Zuú.» 12Kɛ́ Yiezu dén wóò fi àá ɓɛ́ cɛ̃̀un nɛ ɓɛ bí bie mí bòo wɛ̀.
Yiezu kɛ̀ránzɛ̀ɓɛ̀ pírú àá nìɛ ɓɛ̀ ɲu leńlɔ́
Mat 10.1-4; Lik 6.12-16
13Ɛ́ Yiezu ɛ́ khie van yòó lé ɓukìe lɔ̀n, à vɔn ɓɛ̀lɛ á cɛ̀ nɛ ɓɛ̀ ɓen mí viì, ɛ́ ɓɛ́ van. 14Á lerɛ peɓɛ̀ píru àá nìɛ ɓɛ̀ ɲu ɛ́ cɔ́ yèrè nɛ tɔnkɛriè. À munɛ ɓɛ̀ nɛ ɓɛ kań àá mí, ɛ̀ mí tɔn ɓɛ̀ ɛ̀ ɓɛ̀ vɛ buie Dɔfĩn bienù, 15à lɛ́ hɔ́ pànkɛ́ ɓà ǹ nɛ ɓɛ̀ dàá ɲɛ ɓɛ ńɲíkĩ́nìɛ ɛ̀ líení ɓɛ́ nìnbirìe ǹ. 16Lɛ iè ɓɛ̀pe nìɛ pírú àá nìɛ ɓɛ̀ ɲu lɛ á munɛ yèhĩ́: Simɔn lɛ ɛ́ Yiezu cɔ́ yèrè nɛ Piɛre, 17àá Zebede nìɛ Zaake àá ɓá zuú Zãn lɛ ɛ́ Yiezu cɔ́ yèrè nɛ Boanɛrizɛɛsi, ié bòo ɛ́ ɓɛ́ nɛ hóo nɛ̀mɛ́kɛà nìɛ; 18Andere àá Filiipu àá Batelemii àá Matiye àá Toma àá Alife yɛ̀nù Zaake àá Taade àá Simɔn lɛ hàarí wi àá ɓɛ́ lɛ ɛ́ sɛ ɓá cɛ̃̀mɛ̀nɛ́ ɲunù lɔ̀n, 19àá Zudaasi Yisikariyɔɔte, àpe lɛ ɛ́ te Yiezu ɛ́ ɓén dé ɓɛ́ nìnbirìe núnú hũn.
Yiezu àá Bɛlizebuule bòo
Mat 12.22-32; Lik 11.14-23; Lik 12.10
20Ɛ́ Yiezu àá mí kɛ̀ránzɛ̀ɓɛ̀ ɛ́ van khũà ɓɛrɛ lè yíe; ɛ́ ɓɛ́ nìzã̀amáa ɛ́ sĩ̀n ɓen koo ɓánlɔ̀n, ɛ́ Yiezu àá mí kɛ̀ránzɛ̀ɓɛ̀ ɛ́ wo yí dɛ̀ ɓɛ́ díe ɛ́ yá khíi dí wɛ̀. 21Ɛ́ hɔ́ lɛ ɛ́ Yiezu ɓà nìɛ ɛ́ ɲɛ́ hɔ́, ɛ́ ɓɛ́ hĩ́nà ɛ́ nɛ ɓɛ́ ɓen fí-e, iè hɔ̀ lɛ ɛ́ ɓɛ́ nìnbirìe hṹn biekɛ nɛ piè ɲún mínɛ yán wɛ̀.
22Ɛ́ Moyiize làndɛ́ kɛ̀ránliè lɛ van yòó lɔ́ àá Zerizalɛɛmu ɛ́ ɓɛrɛ ɛ́ bie nɛ làa: «À iè Bɛlizebuule lɛ iè ɓɛ́ ńɲíkĩ́nìɛ bɛ́zuú ɛ́ temu wi è ǹ. À iè ɔ̀pe te mí pànkɛ́ á dàá ɓɛ̀ ńɲíkĩ́nìɛ ɛ̀ ɲɛ.» 23Ɛ́ Yiezu vɔn ɓɛ̀ ɛ́ hɔ̀ wũ̀a ɛ̀ wĩ̀ lɛ́ nin nɛ làa: «Sitũanɛ ɛ́ wìe dɛ̀ míte ɛ́ ɲɛ? 24Kɛ́ bɛ́záanú dɔ̀ nìɛ ɛ́ sankɛa ɓán, ɛ́ hĩ́nà ɛ́ fi ɓán hũn, ɛ́ lé bɛ́záanú sɔ ɛ́ yí dɛ̀ yá kań yɔń lò. 25Ɛ̀ zũnù nìɛ, kɛ́ ɓɛ́ hĩ́nà ɛ́ fi ɓán hũn, ɛ́ lépe zũnù sɔ ɛ́ wua lò. 26Kɛ́ Sitũanɛ ɛ́ hĩ́nà fi àá mí máahṹ nìɛ, à sankɛa lò, ɛ́ piè pànkɛ́ ɛ́ yí dɛ̀ yá bĩní wé lò. 27Ɛ̀ nìnbírɔ ɛ́ yí dɛ̀ yá vɛ zɔ nìnbírɔ lɛ pánkɛ́ wi zũnù, ɛ́ zɔ́ dí piè zũnù tĩ̀ɛ míkùi kɛ́ á yí sɛ̃̀nɛ̀hã̀á cɛ ɓàasɔ ve wɛ̀. À ɓen can ɔ̀ vɔ́, á den zɔ́ dí piè zũnù. 28Nin bie hɔ lɛ́ miɛ ǹ àá bɔ̀bín nɛ ɓɛ nìnbirìe bɔ̀koohɛ̃ àá peɓɛ̀ bòo lɛ ɛ́ ɓɛ́ dàa wóò tòokɛ Dɔfĩn míkùi, ɛ́ Dɔfĩn ɓén dé sɛ́wɛ́rí ɛ́ lɛ́ nin. 29Kɛ́ nìnbírɔ ɛ́ tòo Mɛkɛ̃n-Sãanu, ɛ́ Dɔfĩn yá dé sɛ́wɛ́rí ɛ́ lɛ́ ɓàasɔ hùúu, iè hɔ̀ lɛ ɛ́ ɓàasɔ iè bɔ̀koohɔ́ lɛ yá vé á wɔ́.» 30Yiezu ɛ́ khɛ́ kɛ̀amu lɛ́ ɓà ǹ, iè hɔ̀ lɛ ɛ́ ɓɛ́ nɛ ńɲíkĩ́rɔ́ ɛ́ wi-è ǹ.
Yiezu ɓà nín àá ɓà zɛ̀ɓɛ̀ bòo
Mat 12.46-50; Lik 8.19-21
31Ɛ́ Yiezu ɓà nín àá ɓà zɛ́ɓɛ ɛ́ van ɓɛrɛ ɓen dɛ̃̀ lè yíe ɛ̀ ɓɛ̀ khie tɔrɛ nìnbírɔ dɔ̀ nɛ a vɛ vi-e lɛ́ ɓá ǹ. 32Hɔ́rɔsí ɛ̀ nìnbí-kuì ɛ́ kɛsí kíríkɛa Yiezu ǹ. Ɛ́ ɓɛ́ khie bie lɛ́ à ǹ nɛ làa: «Mì nín àá mì zɛ̀ɓɛ̀ àá mì hĩ́ini ɛ́ lɔ́ dɛ̃̀ hɔ̀ yíe ɛ́ kɔ̀ cɛ̀.» 33Ɛ́ Yiezu zɔn kɔ̃́niɛ ɓɛ̀ nɛ làa: «Kìe nín iè wie, ɛ̀ kè zɛ̀ɓɛ̀ iè ɓɛ̀ bɛ́sɔ?» 34À huie ɓɛ̀ nìnbirìe lɛ kɛsí kíríkɛa ɔ̀ ǹ ɛ́ khie fɔ̀ à zɔn nɛ làa: «Lɛ iè kìe nín, ɛ̀ lɛ iè kìe zɛ̀ɓɛ̀. 35Nìnbírɔ yée nìnbírɔ lɛ ɛ́ Dɔfĩn tĩì bòo ɛ̀ wé, ɛ̀ ɓàasɔ iè kìe zuú, àá kìe hãá àá kìe nín.»
اکنون انتخاب شده:
Marike 3: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation