Marike 6
6
Yiezu ɓà lóo nìɛ yí dɛsĩ̀-ɛ ǹ wɛ̀
Mat 13.53-58; Lik 4.16-30
1Ɛ́ Yiezu zɔn lɔ́ yán ɛ́ lɔ́ van ɓá lóo; ɛ́ piè kɛ̀ránzɛ̀ɓɛ̀ ɛ́ bɔ̀ɓán àá ɔ́. 2Ɛ́ lé ńvũùnín sí zɔn, á van zɔn lè ńkóobánlɔ̀n zũnù, ɛ́ zɔn ɓɛ̀ nìnbirìe ɛ̀ kɛ̀rán. Ɛ́ ɓɛ́ nìnbí-kuì lɛ ɛ́ piè kɛ̀ránlɔ́ ɛ̀ ɲí ɓɛ́kùi ɛ́ hɔ́ hɛ̀ yòokɛa lɔ̀n, ɛ́ ɓɛ́ ɛ́ biekɛ ɛ́ nɛ làa: «Hɔ̀pe sí míkùi á wo yú àá yí? Ɛ̀ hɔ̀pe bɔ̀dũmunù sí á wo lɔ́ àá yí? Á wo wiɛ dàa dɛ̀ hɔ̀pe miike yéréké bòo sí ɛ́ wé? 3À sũǹ yí-e pe dãakhìɛrɔ wɛ̀? À yí-e pe Maari yɛ̀nù wɛ̀? À yí-e pe Zaake àá Zooze àá Zuude àá Simɔn ɓà zúu wɛ̀? Ɛ̀ ɓà hĩ́ini ɛ́ sũǹ yí ɓɛ́pe lɛ ɛ́ wi ké tĩ́ihṹ?» Ɛ́ hɔ́pe sí ɛ́ lɛ́, ɛ́ ɓɛ́ yí dɛsĩ̀-ɛ ǹ wɛ̀. 4Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Dɔfĩn bɔ̀háanírɔ ɛ́ ɓɛ́ wóò ɓàanínin viì míkùi kɛ́ ɓà kùrú lóo hũn àá ɓà nìɛ tĩ́ihṹ àá ɓà zũnù hũn iè pe ɛ́ ɓɛ́ yìe ɛ́ yáà tí-e hũn wɛ̀.» 5Ɛ́ Yiezu ɛ́ yí dàń yéréké bòo dɔ̀ ɛ́ yí wé yán, kɛ́ ɓɛ́ ɓen yí ɓɛ́ dɔriè bìɛ yiɛní dɔ̀ lɛ á bɔ̀kɛ mí níhĩ́ lɔ̀n ɛ́ wiɛníkɛa ɛ́ ɓen bòo mí. 6Ɛ́ ɓɛ́pe ɓà lóo nìɛ ńbídɛsĩ̀nlɔ́ ɛ́ hɛ̀ yòokɛa piè lɔ̀n.
Bòo lɛ ɛ́ Yiezu ɛ́ tɔrɛ mí kɛ̀ránzɛ̀ɓɛ̀ pírú àá nìɛ ɓɛ̀ ɲu nɛ ɓɛ vɛ wé
Mat 10.5-15; Lik 9.1-6
Ɛ́ Yiezu ɛ́ wo khie ɛ́ bɔ̀ hɔ̀ lóoniɛ̀ ǹ ɛ́ ɓɛ̀ nìnbirìe ɛ̀ kɛ̀rán àá Dɔfĩn bienù. 7Á wo khie vɔn mí kɛ̀ránzɛ̀ɓɛ̀ pírú àá nìɛ ɓɛ̀ ɲu, à ɛ́ ɓɛ̀ tɔnkɛ àá nìɛ ɓɛ̀ ɲu ɲu, à lɛ́ hɔ́ pànkɛ́ ɓà ǹ nɛ ɓɛ dàá dàń ɓɛ́ ńɲíkĩ́nìɛ. 8À nɛ ɓɛ bí mii bòo dɔ̀ ɛ̀ dàá bè lè wṹn kɛ́ lé ɓen yí lànlè; ɛ̀ ɓɛ̀ lò bí dàá díe tàá lɔ̀kɔ̀ àá màa ɓɛ́ zúkɛ̀a hũn wɛ̀. 9À nɛ ɓɛ kóo hɔ́ naahĩ́ kɛ́ ɓɛ́ bí zɔ pɔnkɔ̀nìɛ bɔ̀nbɔ̀ ɲu ɲu wɛ̀. 10À bĩniɛ ɛ́ bie lɛ́ ɓà ǹ ɛ́ nɛ làa: «Kɛ́ mí ɓen van dɛ̃un lóo lɛ, ɛ̀ lè zũnù lɛ ɛ́ ɓɛ́ perɛ miɛ ǹ hũn iè pe ɛ́ mí kań hũn fúu ɛ̀ mí zɔ̀ lé lé viì sɔ hũn lɔ̀n. 11Kɛ́ mí van dɛ̃un viì dɔ̀, kɛ́ pelè nìɛ ɛ́ pɛ̃́ ɛ́ yí pen miɛ ǹ, tàá kɛ́ ɓɛ́ pɛ̃́ ɛ́ yí ɲí mí bòo, ɛ̀ mì zɔ lé, ɛ̀ lé ɓánɓɛ́ mí zehĩ́ khũnkhũnù ɛ̀ kóosí yán, ɛ̀ dàá zɛ̃́ní lɛ́ ɓà ǹ kɛ́ ɓɛ́ wɔ́ khɔn.» 12Ɛ́ ɓɛ́ kɛ̀ránzɛ̀ɓɛ̀ ɛ́ cɔ́ ɛ́ van buie lè Dɔfĩn bienù ɛ́ lɛ́ ɓɛ́ nìnbirìe nɛ ɓɛ zɛ̀ní ɓɛ́ tĩɛ̀ ɛ̀ ɓɛ̀ fùansí hɔ́ bɔ̀koohɛ̃ wénlɔ́ ǹ. 13Ɛ̀ ɓɛ̀ lò ɲɛùn ńɲíkĩ́nìɛ bìkuì, ɛ̀ ɓɛ̀ lúuníkɛa hɔ̀ yurɔ́ ɛ́ kóo ɓɛ̀ dɔriè bìkuì ɲúuhɛ̃ lɔ̀n ɛ́ wiɛnikɛa ɓɛ̀.
Zãn Batiisi húmú bòo
Mat 14.1-12; Lik 3.19-20; 9.7-9
14Á bɛ́zuú Herɔɔde ɛ́ ɲɛ́ kɛ́ ɓɛ́ nìnbirìe ɛ́ Yiezu bòo ɛ̀ biè, iè hɔ̀ lɛ ɛ́ piè yèrè ɛ́ wo hṹn lé vĩì míkùi. Ɓɛ̀dɔ̀ ɛ́ nɛ a iè Zãn Batiisi ɛ́ temu vìé, á dàa ɛ́ yú hɔ́pe pànkɛ́ sí ɛ́ dàa hɔ̀ yéréké bòo ɛ̀ wé. 15Ɛ̀ ɓɛ̀dɔ̀ ɛ́ nɛ a iè Elii, ɛ̀ ɓɛ̀dɔ̀ ɛ́ nɛ a iè ɓɛ̀ Dɔfĩn bɔ̀háaníriè lɛ khie hũn, ádɔ̀. 16Ɛ́ hɔ́ lɛ á Herɔɔde ɛ́ ɲɛ́ hɔ́pe bòo lɛ ɛ́ ɓɛ́ nìnbirìe ɛ́ bie, á nɛ a iè pe Zãn lɛ ɛ́ mí lɛ́ ɛ́ ɓɛ́ ɓúo ɲún ɛ́ temu ɛ́ vìé.
17Hɔ̀ den iè ɔ̀pe Herɔɔde míte ǹ ɛ́ temu hàarí lɛ́ lé ɲunù nɛ ɓɛ ɓaà ɔ̀ Zãn ɛ̀ cɛ ɛ̀ zɔ dé lé kɛ̀sí hũn, à Herodiade yènsénín. Àpe Herodiade ɛ́ den iè ɔ̀pe Herɔɔde ɓà zuú Filiipu ɓà hũnu, kɛ́ Herɔɔde ɛ́ den hàarí vua ɔ̀ ɛ́ yan. 18Ɛ́ pehɔ̀ bòo hũn ɛ́ Zãn ɛ́ den hàarí ɛ́ bie lɛ́ ápe Herɔɔde ǹ nɛ a yí fɔ́ɓán à fé ɓá zuú ɓà hũnu ɛ̀ yɛ wɛ̀. 19Á Herodiade ɛ́ hàarí tĩì ɛ́ cɛ̃̀ à Zãn, á wɛ̀ ɛ́ mii ɓí-e kɛ́ á den ɛ́ yí dɛ̀ hɔ̀ yá wé wɛ̀; 20iè hɔ̀ lɛ á Herɔɔde ɛ́ den ɛ́ ɔ̀pe Zãn ɛ̀ zań. À dũ kɛ́ á iè nìnbírɔ lɛ ɛ́ cã̀aní à lò ɛ́ cé. Á wo hàarí ɓɛ́ɓɛa ɔ̀ ǹ. À ɓen ɛ́ piè biehĩ́ ɛ̀ ɲí, à kɛ́bí, kɛ́ á lò den pɛ́wi wɛ piè biehĩ́ ɲínlɔ́. 21Kɛ́ á Herodiade ɲúntĩ̀nù wurù dɔ̀ ɛ́ hàarí van dɛ̃un. Hɔ̀ hàarí wɔ́ ápe Herɔɔde tenlɔ́ sí sɛ́rí zɔn. Ɛ́ pehɔ̀ zɔn, ɛ́ Herɔɔde ɛ́ sɛ́sɛ́a lè sɛ́-ɓɛhɔ́ à vɔn mí bɛ́záanú ní-bɛ̃hɛ̃ àá ɓɛ́ sɛ̃̀nɛ̀dɔ́síɓɛ́ ɲúuhɛ̃siè àá hɔ́ Kalile nì-bɛ̃hɛ̃. 22Á Herodiade hãá ɛ́ yòó zɔn lè zũnù lɛ ɛ́ ɓɛ́ zɔn wi hũn, ɛ́ zɔn yɔn yɔn, á Herɔɔde àá ɓɛ́pe lɛ á perɛnin ɛ́ hɛ̀ wɛniɛ ɔ̀. Ápe bɛ́zuú Herɔɔde ɛ́ zɔn bie lɛ́ à ǹ ɛ́ nɛ làa: «Hɛ̃un, hɔ́ bòo lɛ ɛ́ kɔ́ ɛ́ cɛ̀ nin viì ɛ́ nín lɛ́ hɔ́ kɔ ǹ.» 23À wĩ́ɛ ɛ́ lɛ́ à ǹ nɛ: «Zɛ̃́ní hɔ́ bòo lɛ ɛ́ kɔ́ ɛ́ cɛ̀ nɛ ń lɛ́ kɔ ǹ; hɛ̀rí kɛ́ lé yɛ̀rɛ́ hṹn iè niǹ bɛ́záanú tĩ́ihṹ ńsãankɛa!» 24Á hãací ɛ́ van lɔ́ ɛ́ ɓá nín ɛ̀ dìenin nɛ ńɓùo iè pe mí fɔ́ɓán ɛ̀ mí hɛ̃un? Ɛ́ ɓà nín ɛ́ bie lɛ́ à ǹ nɛ làa: «Vɛ bie nɛ Zãn ɲún iè pe á lɛ́ kɔ ǹ.» 25Á hãací ɛ́ khɔ́sí hĩ́nà hɔ̀ lɔ̀n ɛ́ van zɔn yú-o bɛ́zuú à bie lɛ́ à ǹ nɛ làa: «Ń wɛ nɛ kɔ dàá ɔ́ Zãn Batiisi ɲún lè tɛ́sɛ́ hũn ɛ̀ ɓen lɛ́ mi ǹ hɔ̀pe lɛ lɔ̀n.» 26Á bɛ́zuú tĩì ɛ́ hɛ̀ yòó yáa míkùi; kɛ́ hɔ́ lɛ á wĩ́ɛ ɓɛ̀ nìnbirìe lɛ á pɛrɛnin yìe hũn vɔ́, á yí wɛ nɛ mí pĩ́ wɛ̀. 27Ɛ́ pehɔ̀ lɔ̀n á khie tɔrɛ mí sɛ̃̀nɛ̀dɔ́sí dɔ̀ nɛ a vɛ dàá ɔ́ Zãn Batiisi ɲún ɛ̀ dàá ɓen. Á sɛ̃̀nɛ̀dɔ́sí ɛ́ cɔ́ van zɔn lè kɛ̀sí hũn, ɛ́ zɔn ɓúo ɔ̀ Zãn ɲún, 28ɛ́ dɔ́ lé tɛ́sɛ́ hũn ɛ́ dàa ɓen lɔ́, ɛ́ lɔ́ lɛ́ á hãací ǹ, á fɔ́ van lɛ́ ɓá nín. 29Ɛ́ hɔ́ lɛ á Zãn kɛ̀ránzɛ̀ɓɛ̀ ɛ́ ɲɛ́ hɔ́, ɛ́ ɓɛ ɓɛrɛ ɛ́ ɓen mɔ̀ piè nìheemu ɛ́ van ɛ́ wùnɛ.
Bòo lɛ ɛ́ Yiezu dàa díiniɛ nìnbí-dũmu
Mat 14.13-21; Lik 9.10-17; Zãn 6.1-14
30Ɛ́ ɓɛ́ tɔnkɛriè ɛ́ van khũà ɓɛrɛ Yiezu viì, ɛ́ ɓɛrɛ bie hɔ̀ bòo lɛ ɛ́ ɓɛ́ van wɔ́ míkùi, àá hɔ́ lɛ ɛ́ ɓɛ́ van kɛ̀rɛa àá ɓɛ́ nìnbirìe míkùi ɛ́ lɛ́ à ǹ. 31Ɛ́ ɓɛ́ nìnbirìe lɛ ɛ́ ɓenkɛ kɛ́ ɓɛ́ ɛ́ lankɛ ɛ́ hɛ̀ buò buò ɛ́ lɛ́ ɛ́ Yiezu àá mí kɛ̀ránzɛ̀ɓɛ̀ ɛ́ yá ɓɛ́ díe ɛ̀ dí yínin wɛ̀. Ɛ́ sí iè hɔ̀pe ɛ́ Yiezu dàa bie lɛ́ mí kɛ̀ránzɛ̀ɓɛ̀ ǹ ɛ́ nɛ làa: «Mì ɓen nɛ ke vɛ le viì lɛ ɛ́ nìnbirìe ɛ́ mí hũn, ɛ̀ mì vɛ yí vũùní bìcínbóo.» 32Ɛ́ ɓɛ́ yòó zɔn lè ɲumu wiè ɛ̀ ɓɛ̀ cɔ́ ɛ́ vaá-vɛ le viì lɛ ɛ́ nìnbirìe ɛ́ mínɛ hũn. 33Ɛ́ nìnbirìe cɛ̀rìɛɛ ɛ́ mɔn ɓɛ̀ kɛ́ ɓɛ́ ɛ́ lan ɛ́ ɓɛ́ dũnɛ ɓɛ̀, ɛ́ ɓɛ́ van lɔ́kɛ hɔ̀ lóoniɛ̀ míkùi àá ɓɛ́ zehĩ́ ɛ́ dú peɓɛ̀ híɛhɔ́ ɛ́ van lè viì lɛ ɛ́ ɓɛ́ vaá-vɛ hũn.
34Bòo lɛ ɛ́ Yiezu ɛ́ zɔn lɔ́ lé ɲumu wiè hũn ɛ́ síɛ, á mɔn ɓɛ̀ nìnbí-dũmu, ɛ́ peɓɛ̀ miinɛ̀ ɛ́ yòó ɓaa ɔ̀ iè hɔ̀ lɛ ɛ́ ɓɛ́ kɛ kɛ̀a pirìe lɛ sierɔ mí wɛ̀. Á khie ɛ́ ɓɛ̀ kɛ̀rán àá bòo bɔ̀kuì. 35Ɛ́ bòo lɛ ɛ́ lé wurù ɛ́ van síɛ mii lí, ɛ́ Yiezu kɛ̀ránzɛ̀ɓɛ̀ ɛ́ van lúwiniɛ ɔ̀ ǹ ɛ̀ ɓɛ̀ bie lɛ́ à ǹ ɛ́ nɛ làa: «Lè wurù ɛ́ lí siɛ cɔ́, ɛ̀ lèpe viì sɔ lɛ ɛ́ bòo dɔ̀ ɛ́ lò mí hũn wɛ̀. 36Ɛ́ kɔ́ fùansí ɓɛ́ nìnbirìe ǹ nɛ ɓɛ lan vɛ hɔ mɛ-zĩhĩ́ɛ hũn àá hɔ́ looniɛ hũn, ɛ̀ vɛ zɔ yɛ̀ hɔ̀ bɔ̀díe.» 37Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Mìpe mìte ǹ ɛ̀ lɛ́ hɔ́ bɔ̀díe ɓà ǹ nɛ ɓɛ dí.» Ɛ́ ɓɛ́ zɔn nɛ làa: «Kɔ́ wìe ɛ́ cɛ̀ nɛ ke vɛ yɛ̀ denie#6.37 Denie dìcóoní ɛ́ hàarí wóo wé tɔntɛ́ wu-kùi tɔnlɔ́ sàanín. Ɛ́ denie khĩɛ-ɲu ɛ́ wo ɛ́ wé tɔntɛ́ wihĩ́ khĩɛ́-ɲu tɔnlɔ́ sàaní. khĩɛ́-ɲu (200) búrú ɛ́ ɓen lé lɛ́ ɓà ǹ ɛ̀ ɓɛ̀ dàá yí dí?» 38Ɛ́ Yiezu ɛ́ ɓɛ̀ dìenin nɛ làa: «Hɔ̀ iè búrú yɛ ɛ́ mí dàá? Mì lan vɛ húi.» Ɛ́ ɓɛ́ khie dìekɛa ɓán ɛ̀ ɓɛ̀ zɔn nɛ: «Hɔ̀ iè búrú hùanú àá ciè bìɛ ɲu ɛ́ ké dàa.» 39Ɛ́ Yiezu ɛ́ bie lɛ́ ɓà ǹ nɛ ɓɛ bie nɛ ɓɛ nìnbirìe ɓɛ́kùi ɛ̀ kóokɛ ɓánlɔ̀n ɛ̀ kankɛsí hɔ́ ɲíi-tiè lɔ̀n. 40Ɛ́ ɓɛ́ nìnbirìe ɛ́ síɛ ɛ́ kɛkɛsí àá ɲúuhɛ̃ ɲúuhɛ̃. Ɓɛ̀dɔ̀ ɛ́ iè khĩminù khĩminù, ɛ̀ ɓɛ̀dɔ̀ ɛ́ iè dɛ̀wɛ́ àá pírú pírú. 41Ɛ́ Yiezu ɛ́ khie fɔ́ hɔ́ búrú hùanú àá ɓɛ́ ciè bìɛ ɲu sɔ, à hooniɛ mí yìe yòoniɛ àá hɔ́ hóohũn, à dɔ́ Dɔfĩn bɛrikɛ à ɓùenkɛa hɔ́ búrú ɛ́ lɛ́ mí kɛ̀ránzɛ̀ɓɛ̀ ǹ nɛ ɓɛ sankɛ ɛ̀ lɛ́ ɓɛ́ nìnbirìe ǹ. À lò ɛ́ sankɛa ɓɛ̀pe ciè bìɛ ɲu ɛ́ lɛ́ ɓɛ́pe nìnbirìe ǹ ɓɛ́kùi. 42Ɛ́ ɓɛ́pe ɓɛ́kùi ɛ́ dú tù. 43Ɛ̀ hɔ̀ búrú ɲúnkṹuhɛ̃ àá ɓɛ́ ciè lɛ kɛ́ ɛ́ khuie tíiniɛ sìkíe pírú àá bɔ̀nbɔ̀ ɲu. 44Ɓɛ̀ nìnbirìe lɛ ɛ́ hàarí lɛ̀ hɔ̀pe búrú sɔ ɛ́ ɓɛ́ báa ɛ́ hàarí ɛ́ iè muasíe hɔ̀nú (5 000).
Yiezu ɛ́ vɛ hɔ ɲumu lɔ̀n
Mat 14.22-33; Zãn 6.15-21
45Ɛ́ pehɔ̀ lɔ̀n, ɛ́ Yiezu ɛ́ nɛ mí kɛ̀ránzɛ̀ɓɛ̀ ɛ́ yòó zɔ le ɲumu wiè ɛ̀ dí mí híɛhɔ́ ɛ̀ cankɛ́ hɔ́ ɲumu ɛ̀ lé vɛ hɔ́ Bɛtesayida lóo, kɛ́ mípe ɛ́ bie lɛ́ ɓɛ́ nìzã̀amáa ǹ nɛ ɓɛ lan ɓɔ. 46Ɛ́ bòo lɛ ɛ́ ɓɛ́ nìzã̀amáa ɛ́ cɔ́ vɔ́, ɛ́ Yiezu ɛ́ khie van yòó lé ɓúkìe lɔ̀n ɛ́ mii yòó vɛ hɛ̃un Dɔfĩn yán. 47Ɛ́ hɔ́ sí ɛ́ van mii hi, ɛ̀ lè ɲumu wiè ɛ́ zɔn wi hɔ ɲumu tĩ́ihṹ àá ɓɛ́ kɛ̀ránzɛ̀ɓɛ̀, kɛ́ Yiezu ɛ́ pe wi le sṹsùnù mí dòonún. 48Á mii húi ɛ̀ piè kɛ̀ránzɛ̀ɓɛ̀ ɛ́ lɔ̀n ɛ́ be àá lé ɲumu wiè iè hɔ̀ lɛ ɛ́ lé pinpinù lɛ ɛ́ zè ɛ́ peɓɛ̀ híɛhɔ́ ɛ̀ sĩ́. Ɛ́ bòo lɛ á hán kɔ̀bíɛ ɛ́ van mii wírí, ɛ́ Yiezu ɛ́ hĩ́nà ɛ́ vɛ hɔ ɲumu lɔ̀n ɛ́ kãa ɓɛ̀, ɛ́ van mii pɛ̃́un ɓɛ́. 49Ɛ́ hɔ́ lɛ ɛ́ ɓɛ́ mɔn ɔ̀ kɛ́ á ɛ́ vɛ hɔ ɲumu lɔ̀n, ɛ́ ɓɛ́ tĩì ɛ̀ ɓɛ̀ nɛ a iè ńɓɔrɔ ɛ́ ɓɛ́ ɛ́ wũamɛkɛ. 50Ɓɛ̀pe ɓɛ́kùi ɛ́ den loo ɔ ɛ́ peɓɛ̀ hũn ɛ́ yerɛ. Ɛ́ pehɔ̀ lɔ̀n, ɛ́ Yiezu ɛ́ zɔn bie lɛ́ ɓà ǹ nɛ làa: «Mì hiení mí tĩɛ̀ mì bí zán wɛ̀, hɔ̀ iè ǹpe.» 51À yòó zɔn lè ɲumu wiè ɛ́ zɔn kɛsí àá ɓɛ́, ɛ́ lé pinpinù ɛ́ yòó dɛ̃̀. Ɛ́ hɔ́ hɛ̀ yòokɛa ɓɛ̀ kɛ̀ránzɛ̀ɓɛ̀ lɔ̀n cɛ̃̀un. 52Ɓɛ̀ den iè biè lɛ ɛ́ hṹn yí dũń hɔ́ yéréké bòo lɛ wɔ́ hɔ́ búrú bòo hũn ɲún iè hɔ̀ lɛ ɛ́ peɓɛ̀ bɔ̀dũmunù ɲunù ɛ́ hṹn híɛ.
Dɔriè cɛ̀rìɛɛ wiɛnírɔ́ Zenezarɛte cɛ̃̀mɛ̀nɛ́ hũn
Mat 14.34-36
53Ɛ́ ɓɛ́ cánkɛa hɔ̀ ɲumu ɛ́ van lɔ́ dɛ̃un hɔ̀ Zenezarɛɛte cɛ̃̀mɛ̀nɛ́ ɛ́ síɛ ɛ́ can ɓɛ́ ɲumu wiè hɔ̀ ɲumu ɲunù. 54Ɛ́ peɓɛ̀ ńzɔ lé lé wiè hũn lòo, ɛ̀ ɓɛ̀ nìnbirìe ɛ́ dũnɛ a Yiezu. 55Ɛ́ ɓɛ́ khie ɛ́ bɔ̀ lè cɛ̃̀mɛ̀nɛ́ sɔ míkùi ǹ ɛ́ wóò vɛ dáà ɓɛ́ dɔriè lɛ ɛ́ ɓɛ́ daaníkɛasí ɓɛ́ kàatɛ́a lɔ̀n ɛ̀ dàá ɓen lè viì lɛ ɛ́ ɓɛ́ ɲɛ́ ɛ̀ ɓɛ̀ nɛ Yiezu ɛ́ van wi hũn. 56Ɛ́ viì yée viì lɛ ɛ́ Yiezu ɛ́ wóò vɛ zɔ hũn, hɔ̀ lɔ́-bɛ̃hɛ̃ hũn yée, hɔ̀ lɔ́-cíini hũn yée, hɔ̀ mɛ-zĩhĩ́ɛ hũn yée, ɛ̀ ɓɛ̀ wóò dàá ɓɛ́ dɔriè ɛ́ ɓen lé bìsí lé viì lɛ ɛ́ ɓɛ́ nìzã̀amáa wóò kań hũn, ɛ̀ ɓɛ̀ ɓɔ́nɓɔ́ní-ɛ ǹ nɛ a lɛ́ nɛ ɓɛ hɛ piè pɔnkɔ̀rɔ̀ ɲunú ǹ mí dòonún. Ɛ́ ɓɛ́ lɛ ɛ́ wóò yí lé hɛnin ɓɛ́kùi ɛ́ wóò wɛ.
اکنون انتخاب شده:
Marike 6: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation