Marike 9
9
1Ɛ́ Yiezu ɛ́ bĩniɛ zɔn bie ɛ́ nɛ làa: «Nin bie hɔ lɛ́ miɛ ǹ àá bɔ̀bín nɛ ɓɛpe lɛ ɛ́ dɛ̃̀ hũ̀nún, ɛ́ ɓɛ́dɔ̀ ɛ́ yá ɓen hí kɛ́ yí bòo lɛ ɛ́ ɓɛ́ mɔn Dɔfĩn bɛ́záanú kɛ́ lé ɓɛrɛ àá pánkɛ́ vɔ́ wɛ̀.»
Yiezu tɛkɛ̀a zɛ̀nírɔ́ bòo
Mat 17.1-13; Lik 9.28-36
2Ɛ́ pehɔ̀ sítĩnlɔ́ huiezĩ́ khíirɔ́ máahṹ, ɛ̀ Yiezu ɛ́ fɔ́ Piɛre àá Zaake àá Zãn ɛ́ dàa van yòó lé ɓúkìe dɛ̀bɛ́hɔ́ dɔ̀ lɔ̀n ɓɛ́ dòonún. Ɛ́ Yiezu ɛ́ yòó zɛ̀niɛ peɓɛ̀ híɛhɔ́. 3Piè tĩ̀ɛ ɛ́ yòó zɛ̀niɛ ɛ́ wɔ́ bɔ̀può ɛ́ hɛ̀ ɛ́ ɲiiníkɛ àá ɲiiníkɛà lɛ ɛ́ nìnbírɔ dɔ̀ lɛ wi sṹsùnù lɔ̀n lɛ dɛ̀ ɛ́ lɛ́ ɛ́ hɔ́ ɛ́ ɲiiníkɛ kɛ̀amu ɛ́ mí wɛ̀. 4Ɛ́ ɓɛ́ kɛ̀ránzɛ̀ɓɛ̀ nìɛ ɓɛ̀ tĩ sɔ ɛ́ ɓɛ ɛ̀ húi ɛ̀ Elii àá Moyiize ɛ́ ɓɛrɛ ɛ́ dìkìmú àá Yiezu. 5Ɛ́ Piɛre ɛ́ zɔn bie lɛ́ Yiezu ǹ ɛ́ nɛ làa: «Kɛ̀ránlɔ, hɔ̀ ɛ́ sãa ɛ̀ kè kań hũ̀nún. Nɛ ke ɓɔn kùdàhɛ̃ ɓɔ̀nɓɔ̀ tĩ: lèdɔ̀ ɛ́ kɔ́pe ɛ́ te, ɛ̀ lèdɔ̀ á Moyiize ɛ́ te, ɛ̀ lèdɔ̀ á Elii ɛ́ te.» 6À den yí dũ bòo lɛ á mii bie wɛ̀, iè hɔ̀ lɛ ɛ́ ɓɛ́ hɛ̀ zɛ́rɛ cɛ̃̀un. 7Ɛ́ dùndùí dɔ̀ ɛ́ van ɓɛrɛ ɛ́ ɓen ɓúrɛ ɓà ǹ àá mí ńtìɛrún, ɛ́ tɛmu dɔ̀ ɛ́ zɔn tɛ̀ lèpe dùndùí sɔ hũn ɛ́ nɛ làa: «Àpe lɛ iè niǹ Zuú lɛ ɛ́ ń wɛ cɛ̃̀un, ɛ́ mí ɲí pìe bòo!» 8Ɛ́ mí laà hũn, ɛ́ ɓɛ́ kɛ̀ránzɛ̀ɓɛ̀ ɛ́ ɓɛ́ húi ɛ́ ɓɛ́ yí bĩní mi nìnbírɔ dɔ̀ kɛ́ á wɔ́ Yiezu mí dòonún ɛ́ temu ɛ́ dɛ̃̀ àá ɓɛ́.
9Ɛ́ bòo lɛ ɛ́ ɓɛ́ yòó lɔ́ lé ɓúkìe lɔ́n ɛ́ síɛ, ɛ́ Yiezu ɛ́ bie hièniɛ ɛ́ lɛ́ ɓà ǹ nɛ ɓɛ bí lɛ́ nɛ nìnbírɔ dɔ̀ ɛ̀ ɲí hɔ́ hùúu, fúu kɛ́ yí bòo á nìnbírɔ Zuú ɛ́ van húrun ɛ́ vìé lɔ́ hɔ́ húmú hũn vɔ́. 10Ɛ́ ɓɛ́ kɛ̀ránzɛ̀ɓɛ̀ sɔ ɛ́ dɔ́ lépe bienù sɔ ɓɛ́ tĩɛ̀ hũn, kɛ́ ɓɛ́ den pɛ́wi ɛ́ dìekɛ ɓán nɛ hɔpe ńvìé ɛ̀ lé hɔ́ húmú hũn ɛ́ den iè ńɓùo? 11Ɛ́ ɓɛ́ khie ɛ́ Yiezu dìenin ɛ́ nɛ làa: «Ɛ́ hɔ́ iè ńɓùo á Moyiize làndɛ́ kɛ̀ránliè ɛ́ dàa wóò nɛ a Elii ɛ́ fɔ́ɓán à ɓen vé?» 12Ɛ́ Yiezu zɔn kɔ̃́niɛ ɓɛ̀ ɛ́ nɛ làa: «Hɔ̀pe wo bɔn kɛ́ á Elii ɛ́ fɔ́ɓán à ɓen vé, ɛ̀ ɓen wookɛ hɔ́ bòo míkùi ɛ̀ dĩ̀ní. Kɛ́ hɔ́ ɓiɛ̀ iè ńɓùo ɛ́ hɔ́ dàa ɛ́ wɛ̃́ lé Dɔfĩn bienù vɛ̃hṹ hũn ɛ́ nɛ a nìnbírɔ Zuú ɛ́ fɔ́ɓán à lɔ̀n ɛ̀ bé cɛ̃̀un, ɛ̀ ɓɛ̀ nìnbirìe ɛ̀ khɛ̀ránkɛ a? 13Kɛ́ ńpe nin bie lɛ́ miɛ̀ ǹ nɛ a Elii ɛ́ ɓɛrɛ vɔ́, kɛ́ ɓɛ́ nìnbirìe ɛ́ wɔ́ á àá bòo lɛ ɛ́ ɓɛ́ wɛ, kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn piè bòo hũn.»
Zĩncáahɔ́ dɔ̀ lɛ ɛ́ ńɲíkĩ́rɔ ɛ́ lɔ̀n ɛ̀ biení wiɛnírɔ́
Mat 17.14-21; Lik 9.37-43
14Ɛ́ bòo lɛ ɛ́ ɓɛ́ van siɛ lúwi ɓɛ̀ kɛ̀ránzɛ̀ɓɛ̀ lɛ kɛ́ ǹ, ɛ́ ɓɛ́ mɔn ɓɛ̀ nìzã̀amáa àá ɔ̀ Moyiize làndɛ́ kɛ̀ránliè kɛ́ ɓɛ́ kírie ɓà ǹ ɛ́ wũ̀aní àá ɓɛ́. 15Ɛ́ bòo lɛ ɛ́ ɓɛ́ nìnbirìe ɛ́ mɔn Yiezu, ɛ́ hɔ́ hɛ̀ yòokɛa peɓɛ̀ lɔ̀n; ɛ́ ɓɛ́ wo zɔ̀ van sɛ̃́ piè híɛhɔ́ ɛ̀ ɓɛ̀ ɛ́ ɔ̀ fòoní. 16Ɛ́ Yiezu ɛ́ khie ɛ́ mí kɛ̀ránzɛ̀ɓɛ̀ ɛ̀ dìenin ɛ́ nɛ làa: «Hɔ̀ iè ńɓùo ɛ́ mí ɛ́ wũ̀aní lɔ̀n àá ɓɛ́?» 17Ɛ́ nùún dɔ̀ ɓɛ̀ nìzã̀amáa hũn ɛ́ zɔn bie ɛ́ nɛ làa: «Kɛ̀ránlɔ, ń dàa niǹ zuú lɛ ɛ́ ńɲíkĩ́rɔ dɔ̀ ɛ́ wi nin, lɛ ɛ́ lɛ́ á yí dɛ̀ yàá bie ɛ́ dàa ɓɛrɛ kɔ̀ viì. 18À ńɲíkĩ́rɔ sɔ ɛ́ ɓen hĩ́nà ɔ̀ ǹ vìi yée viì lɛ, à mìí ɔ́ síɛ lɔ̀nsí lé sṹsùnù, ɛ̀ piè ńɲɛntíní ɛ̀ síɛ khùbán lé, kɛ́ piè ɲiɛ̀ ɛ́ ɓɛ́ ɓán, à yòó he dìń. Ɛ́ ń hɛ̃nnɛ kɔ̀ kɛ̀ránzɛ̀ɓɛ̀ ǹ nɛ ɓɛ ɲɛ a ńɲíkĩ́rɔ sɔ ɛ̀ líení-ɛ ǹ, kɛ́ ɓɛ́ den yí dàń hɔ́ ɛ́ yí wé wɛ̀.» 19Ɛ́ Yiezu ɛ́ zɔn khɛ́ lɛ́ ɓà ǹ ɛ́ nɛ làa: «Nìnbirìe lɛ ńdɛsĩ̀nlɔ́ ɛ́ mí! Nin kan àá miɛ fúu ɛ̀ vɛ dɛ̃ wuàwurù? Nin hè niǹ hũn àá miɛ fúu ɛ̀ vɛ dɛ̃ wuàwurù? Mì dàá ɔ́ zĩncáahɔ́ sɔ dàá ɓen.» 20Ɛ́ ɓɛ́ dàa ɔ̀ dàa khie van. Ɛ́ hɔ́ lɛ á ńɲíkĩ́rɔ ɛ́ mɔn Yiezu, á hĩ́nà ɔ̀ zĩncáahɔ́ ǹ ɛ́ ɔ̀ zɛ̀kɛ̀ní àá pànkɛ́, á kùerɛ ɛ́ siɛ ɛ́ bìríkɛ́ le sṹsùnù kɛ́ piè ńɲɛntíní ɛ́ khùɓán lé. 21Ɛ́ Yiezu ɛ́ khie ɛ́ ɓà yàá ɛ̀ dìenin nɛ làa: «Hɔ̀pe lɛ ɛ́ ɔ̀ wénin fìi ɛ́ ɓɛ́ wuàwurù?» Ɛ́ ɓà yàá ɛ́ zɔn nɛ làa: «Hɔ̀ fìi ɛ́ ɓɛ́ piè zĩncɛ́mu hũn. 22Àá yìe cɛ̀rìɛɛ kɛ́ ápe ńɲíkĩ́rɔ sɔ ɛ́ wóò mìí ɔ́ ɛ̀ tɛ́ dé hɔ́ dṹn hũn tàá hɔ̀ ɲumu hũn, ɛ́ cɛ̀ ɛ́ mii ɓí-e. Kɛ́ kɔ́ ɓen dɛ̀ bòo dɔ̀ ɛ́ wé, ɛ̀ kɔ̀ mɛ ke miinɛ̀ ɛ̀ kɔ̀ yíiní kie.» 23Ɛ́ Yiezu zɔn bie lɛ́ à ǹ ɛ́ nɛ làa: «Kɔ́ nɛ kɛ́ ń ɓen dɛ̀? Bòo dɔ̀ lɛ ɛ́ wóò wé tɛ nìnbírɔ lɛ dũmuasɛ̃̀ viì ɛ́ mí lò!» 24Ɛ́ mí laà hũn, á zĩncáahɔ́ ɓà yàá ɛ́ zɔn bérɛ nɛ làa: «Ń dũmuasɛ̃̀, sĩiní mi niǹ ńbídɛsĩ̀nlɔ́ hũn.» 25Ɛ́ Yiezu ɛ́ mii húi ɛ̀ ɓɛ̀ nìzã̀amáa ɛ́ van zè vaá-ɓen àá peɓɛ̀ viì; á zɔn tĩ́nɛ à ńɲíkĩ́rɔ sɔ ɲún hũn ɛ́ nɛ làa: «Kɔ̀pe ńɲíkĩ́rɔ lɛ ɛ́ lɛ́ ápe zĩncáahɔ́ lɛ dàa yí dɛ̀ yáà bie àá lò ɲɛkɛ̃̀a yáà bòo ɛ̀ ɲí, ń nɛ kɔ lé piè hũn, ɛ̀ kɔ̀ bí bĩní khũ̀a ɓen yán hùúu!» 26Á ńɲíkĩ́rɔ sɔ ɛ́ zɔn wũama, à zɛ̀kɛ̀niɛ ɔ̀ zĩncáahɔ́ àá pànkɛ́ à lɔ́. Á zĩncáahɔ́ ɛ́ wɔ́ kɛ̀ à wìe ɛ́ húrun; ɛ́ nìnbirìe bìkuì ɛ́ yɛ̀rɛ́ bie nɛ a húrun. 27Kɛ́ Yiezu den siɛ zɛ̃nkɛa piè núnú ǹ, à hóoniɛ ɔ̀ yòoniɛ á hĩ́nà yòó dɛ̃̀.
28Ɛ́ bòo lɛ ɛ́ Yiezu ɛ́ van zɔn lè zũnù àá mí kɛ̀ránzɛ̀ɓɛ̀, ɛ́ hɔ́ lɛ ɛ́ ɓɛ̀ zɔn wi ɓɛ́ dòonún àá ɔ́, ɛ́ ɓɛ́ ɛ́ ɔ̀ dìenin ɛ́ nɛ làa: «Hɔ ńɓuò ɛ́ ké dàa ɛ́ yí dàń ɔ́pe ńɲíkĩ́rɔ sɔ ɛ́ yí ɲɛ?» 29Ɛ́ Yiezu zɔn bie lɛ́ ɓà ǹ nɛ làa: «Àpe ńɲíkĩ́rɔ sɔ sí ɓà ńmaà ɛ́ yáà lé kɛ́ Dɔfĩn hɛ̃nnɛ̀ ɛ́ ɓen bòo mí.»
Yiezu ɛ́ sĩ̀n ɛ́ mí húmú àá mí vìerɔ́ bòo ɛ̀ bie
Mat 17.22-23; Lik 9.43-45
30Ɛ́ Yiezu àá mí kɛ̀ránzɛ̀ɓɛ̀ ɛ́ khie lɔ́ yán ɛ́ cánkɛa hɔ̀ Kalile ɛ́ van lɔ́. Ɛ́ Yiezu ɛ́ den yí wɛ nɛ nìnbírɔ dɔ̀ ɛ́ dũń lé viì lɛ mí wi hũn wɛ̀; 31iè hɔ̀ lɛ á hṹn mí kɛ̀ránzɛ̀ɓɛ̀ ɛ̀ kɛ̀rán, ɛ́ bie àá ɓɛ́ ɛ́ nɛ làa: «À nìnbírɔ Zuú ɛ́ ɓɛ ɛ̀ dé ɓɛ́ nìnbirìe núnú hũn, ɛ̀ ɓɛ̀ ɓí-e, kɛ́ pehɔ̀ sítĩnlɔ́ bɔ̀nbɔ̀tĩlán zɔn, à ɛ́ vìé.» 32Kɛ́ piè kɛ̀ránzɛ̀ɓɛ̀ ɛ́ den yá lèpe bienù sɔ ɲún ɛ̀ dũń wɛ̀; ɛ̀ ɓɛ̀ lò ɛ́ zán ɛ̀ ɓɛ̀ dìe ɔ̀ ǹ.
À nìnbírɔ lɛ ɲún ɛ́ lì ɛ́ pɔ ɓɛ lɛ kɛ́ bòo
Mat 18.1-5; Lik 9.46-48
33Ɛ́ Yiezu àá mí kɛ̀ránzɛ̀ɓɛ̀ ɛ́ van dɛ̃un Kapɛrɛnayiimu lóo. Ɛ́ bòo lɛ ɛ́ ɓɛ́ zɔn wi lè zũnù hũn, ɛ́ Yiezu ɛ́ mí kɛ̀ránzɛ̀ɓɛ̀ ɛ̀ dìenin ɛ́ nɛ làa: «Hɔ̀ iè ńɓùo ɛ̀ mí hṹn wũ̀aní lɔ̀n lè wṹn lɔ̀n?» 34Ɛ́ ɓɛ́ hĩɛ iè hɔ̀ lɛ ɛ́ lé wṹn lɔ̀n, ɛ́ ɓɛ́ den hṹn wũ̀aní ɓán hũn ɛ́ nɛ ɓɛ dũń ɔ́lɛ ɛ́ ɲún lì ɛ́ pɔ ɓɛ lɛkɛ́. 35Ɛ́ Yiezu ɛ́ síɛ kɛsí à vɔn mí kɛ̀ránzɛ̀ɓɛ̀ pírú àá nìɛ ɓɛ̀ ɲu sɔ à ɛ́ bie àá ɓɛ́ ɛ́ nɛ làa: «Nìnbírɔ kɛ́ á wɛ nɛ mí wé hándí, ɛ̀ ɓàasɔ ɛ̀ wé ɓɛ́ nìnbirìe ɓɛ́kùi mɛ́ndí àá peɓɛ̀ tɔntɛ́.» 36À khie ɛ́ mɔ̀ zĩncáahɔ́ dɔ̀ ɛ́ ɓen dĩ̀niɛ peɓɛ̀ tĩ́ihṹ, à mɔ̀ a ɛ́ yòó dàa mí bàanì hũn, à zɔn bie lɛ́ ɓà ǹ nɛ làa: 37«Nìnbírɔ kɛ́ á perɛ àpe zĩncáahɔ́ sɔ lɛ ɓà ńmaà ǹ niǹ yèrè lɔ̀n, ɛ̀ hɔ̀ iè ǹpe kùusɔ ɛ́ ɓàasɔ ɛ́ perɛnin; àlɛ ɛ́ perɛ mi ǹ, ɛ̀ hɔ́ yí ńpe niǹ dòonún á perɛnin, kɛ́ á lò ɓiɛ̀ ɛ́ perɛ ɔ̀lɛ ɛ́ te nin ɛ́ tɔrɛ ǹ.»
Àlɛ ɛ́ yí pĩ́ ké bòo ɛ́ wi ɓań lɔ̀n àá kie
Lik 9.49-50
38Ɛ́ Zãn ɛ́ zɔn bie lɛ́ Yiezu ǹ ɛ́ nɛ làa: «Kɛ̀ránlɔ, ké mɔn nùún dɔ̀ kɛ́ á ɛ́ ɓɛ̀ ńɲíkĩ́nìɛ ɛ̀ ɲɛ kɔ yèrè lɔ̀n, ɛ́ ké pɛ̃́ nɛ a bí wé hɔ́ wɛ̀, iè hɔ̀ lɛ á mí àá kie wɛ̀.» 39Ɛ́ Yiezu zɔn bie nɛ làa: «Mì bí pĩ́ ɛ̀ bie nɛ a bí wé hɔ́ wɛ̀, iè hɔ̀ lɛ ɛ́ nìnbírɔ ɛ́ yí dɛ̀ yéréké bòo ɛ́ yá wé niǹ yèrè lɔ̀n, à ɛ́ bĩní khũ̀á ɛ́ khíi yaa le wɛ̀. 40Ɛ́ nìnbírɔ lɛ ɛ́ yí pĩ́ ké bòo ɛ́ wi àá kie. 41Ɛ̀ nìnbírɔ kɛ́ á lɛ́ ɲumu miɛ ǹ ɛ́ mí ɲun, iè hɔ̀ lɛ ɛ́ mí bòo ɛ́ sɛ̃̀ ǹpe Kirisa ǹ, ɛ̀ nin bie hɔ lɛ́ miɛ ǹ àá bɔ̀bín nɛ ɓàasɔ ɛ́ ɓén yí pehɔ̀ sàanín.»
Ńɓɛ́ɓɛ́ kɔ́te ǹ ɛ̀ kɔ̀ dàá bí wé bɔ̀koohɔ́
Mat 18.6-9; Lik 17.1-2
42Ɛ́ Yiezu ɛ́ bĩniɛ zɔn bie ɛ́ nɛ làa: «Kɛ́ nìnbírɔ dɔ̀ ɛ́ lɛ́ ɛ́ ɓɛ́pe zĩncãahɛ̃ sɔ lɛ ɛ́ dũmuasɛ̃̀ mi ǹ, ádɔ̀ ɛ́ khɔn Dɔfĩn wṹn, ɛ̀ hɔ̀ bòo ɛ́ hṹn tṹ ɓàasɔ viì ɛ̀ ɓɛ̀ cɛ niihṹ dɛ̀bɛhɔ́ piè fɔnù hũn ɛ̀ mii ɔ́ tɛ́ dé hɔ́ ɲun-bɛhɔ́ hũn. 43Kɛ́ kɔ́ núnú ɛ́ temu wóò lɛ́ ɛ̀ kɔ̀ dàa wé bɔ̀koohɔ́, ɛ̀ kɔ̀ ɓúu lé; hɔ̀ bòo ɛ́ tṹ kɔ́ viì ɛ̀ kɔ̀ vɛ zɔ le mɛkɛ̃nì lɛ yá vé hũn àá nín-cóoní, àá bòo lɛ ɛ́ kɔ dàá kɔ́ níhĩ́ bɔ̀nbɔ̀ ɲu kɛ́ ɓɛ vɛ mìí kɔ ɛ̀ tɛ́ dé cã̀ámìnɛ́ hũn, hɔ̀ dṹn lɛ yáà hí hũn. [ 44Yán sɔ, ɛ́ ɓɛ́ bṹa ɛ́ yáà hí, ɛ̀ hɔ̀ dũń ɛ́ lò yáà hí mi wɛ̀.] 45Kɛ́ lé ɓen iè kɔ̀ zeǹ ɛ́ temu wóò lɛ́ ɛ̀ kɔ̀ dàá khe Dɔfĩn wṹn, ɛ̀ kɔ̀ ɓúu lé; hɔ̀ bòo ɛ́ tṹ kɔ́ viì ɛ̀ kɔ̀ vɛ zɔ le mɛkɛ̃nì lɛ yá vé hũn àá zen-cóoní, àá bòo lɛ ɛ́ kɔ dàá kɔ́ zehĩ́ bɔ̀nbɔ̀ ɲu kɛ́ ɓɛ vɛ mìí kɔ ɛ̀ tɛ́ dé cã̀ámìnɛ́ hũn. [ 46Yán sɔ, ɛ́ ɓɛ́ bṹa ɛ́ yáà hí, ɛ̀ hɔ̀ dũń ɛ́ lò yáà hí mi wɛ̀.] 47Ɛ̀ lè ɓen iè kɔ̀ yìi ɛ́ temu wóò lɛ́ ɛ̀ kɔ̀ dàá khe Dɔfĩn wṹn, ɛ̀ kɔ̀ mun lè; hɔ̀ bòo ɛ́ tṹ kɔ́ viì ɛ̀ kɔ̀ vɛ zɔ Dɔfĩn bɛ́záanú hũn àá yiì dìcóoní, àá bòo lɛ ɛ́ kɔ dàá kɔ́ yìe bɔ̀nbɔ̀ ɲu, kɛ́ ɓɛ vɛ mìí kɔ ɛ̀ tɛ́ dé cã̀ámìnɛ́ hũn. 48Yán sɔ, ɛ́ ɓɛ́ bṹa ɛ́ yáà hí, ɛ̀ hɔ̀ dũń ɛ́ lò yáà hí mi wɛ̀. 49Ɛ́ nìnbirìe ɓɛ́kùi ɛ́ ɓɛ́ ɓén koo hɔ́ dṹn hũn kɛ̀a bòo lɛ ɛ́ ɓɛ́ dàa wóò koo hɔ́ yɔ́mú hɔ̀ díe hũn.
50Hɔ̀ yɔ́mú ɛ́ iè bòo lɛ sãa. Kɛ́ hɔ́ yɔ́mú ɛ́ tĩmù ɛ́ ɓen vɔ́, ɛ̀ mì dɛ̀ ńɓùo ɛ́ wé ɛ́ hɔ́ ɛ́ dàá bĩní yí mí tĩmù? Mì lɛ́ nɛ hɔ̀ yɔ́mú ɛ̀ wé miɛ ǹ, ɛ̀ mì kań hũn-wiɛ̀ hũn àá mì ńkɔhĩ́.»
اکنون انتخاب شده:
Marike 9: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation