Ohabolana 10
10
Amboaran’ohabolana momba ny fiainana môraly
1Ohabolan’i Salômôna.
Ny zanaka hendry mahafaly ny rainy;
fa ny zanaka adala mampalahelo ny reniny.
2Ny fananana azo tamim-pomba ratsy, dia tsy mitondra soa;
fa ny fahamarinana no manafaka amin’ny fahafatesana.
3Tsy avelan’ny TOMPO ho noana ny marina,
fa laviny kosa ny fanirian’ny olon-dratsy.
4Ny tanana tsy miasa no mampahantra;
fa ny tanana mazoto kosa mampanan-karena.
5Izay manangom-batsy amin’ny fararano dia olo-misaina;
fa izay matory amin’ny fotoam-pijinjana kosa tebahina.
6Fitahiana no ho amin’ny tenan’ny olo-marina;
fa ny tenin’ny olon-dratsy kosa mifono herisetra.
7Hotahîna ny fahatsiarovana ny olo-marina;
fa ho hadino hatramin’ny anarany kosa ny olon-dratsy.
8Ny hendry am-po dia mandray torolalana;
fa ny adala miteniteny foana kosa ho very.
9Izay mizotra ho olom-banona no mizotra amim-pitokiana;
fa izay manan-toetra miolikolika kosa hiharan-doza.
10Izay manafina ny zava-nitranga dia mahatonga alahelo;
fa izay mananatra tsy misorona kosa mitondra fiadanana#10.10 Ny dkt amin’ny and 10b dia manaraka ny dkt tranainy grika. Ny RM eto dia mamerina ny and 8b..
11Ny tenin’ny olo-marina dia loharanon’aina#10.11 Jereo 12.28 ary 3.18 sy nta.
fa ny tenin’ny olon-dratsy kosa mifono herisetra.
12Ny fankahalana dia manetsika ady;
fa ny fitiavana manarona ny hadisoana rehetra#10.12 Jereo Jak 5.20; 1Pt 4.8..
13Ahitana fahendrena ny tenin’ny manan-tsaina;
fa tsorakazo kosa no ho an’ny lamosin’ny bado.
14Harem-pahalalana no voaangon’ny hendry;
fandringanana antomotra kosa no hateraky ny tenin’ny adala.
15Ny fananan’ny mpanankarena no toy ny manda miaro azy;
fa ny fahantran’ny ory kosa no hiteraka fandringanana azy.
16Ny karaman’ny olo-marina dia hivelomany;
fa ny vola azon’ny olon-dratsy kosa hahotany.
17Izay mitandro fifehezan-tena dia mizotra ho amin’ny fiainana;
fa izay mandà anatra kosa no haniasia.
18Mpihatsaravelatsihy izay manafina ny fankahalany;
fa adala izay mampiely endrikendrika.
19Ny teny maro tsy ilaozam-pahadisoana;
fa olo-misaina kosa ny mahatam-bava.
20Volafotsy voafantina ny tenin’ny olo-marina;
fa ny fon’ny olon-dratsy kosa tsisy vidiny.
21Mampianatra ny maro ny tenin’ny olo-marina;
fa matin’ny habadoana kosa ny adala.
22Ny fitahian’ny TOMPO no mampanankarena;
ary tsy manampy inona amin’izany ny ezaky ny olona.
23Ny fanaovan-dratsy no lalaon’ny adala;
fanehoam-pahendrena kosa no an’ny mahay manavaka.
24Izay ahîn’ny olon-dratsy no ho tonga aminy;
fa izay irîn’ny olo-marina kosa no homena azy.
25Rehefa mipaoka ny rivo-maherin’ny fitsapana,
dia indaosiny tsy ho eo intsony ny olon-dratsy;
fa mahatanty lalandava izany kosa ny olo-marina.
26Mampangirifiry nify ny vinaingitra,
mampangirifiry maso ny setroka;
toy izany koa ny olona kamo
dia mampangirifiry ny mpampiasa azy.
27Izay manaja ny TOMPO ho ela velona;
fa ny olon-dratsy kosa malaky maty#10.27 Jereo 11.31; 13.21; 14.26-27; 19.23 ary ampit Sal 73; Kôh 8.12-13..
28Miteraka fifaliana ny fanantenàn’ny olo-marina;
fa ny fanampoizan’ny olon-dratsy kosa ho levona.
29Fialofana ho an’ny olom-banona ny lalan’ny TOMPO,
fa fandringanana kosa ho an’ny mpanao ratsy.
30Tsy hihontsona na oviana na oviana ny olo-marina,
fa ny olon-dratsy kosa tsy hahajanona amin’ny tany.
31Fahendrena no mikoriana avy eo am-bavan’ny marina;
fa ny lela fandainga kosa tokony hotapahina.
32Ny molotry ny olo-marina dia miboiboika halemem-panahy,
fa fitaka no mameno ny vavan’ny olon-dratsy.
اکنون انتخاب شده:
Ohabolana 10: DIEM
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Dikanteny Iombonana Eto Madagasikara © Malagasy Bible Society, 2004.