San Juan 3
3
Káꞌan Jesús xiꞌin ra Nicodemo
1Ndi̱xiyo iin ra fariseo náni ra Nicodemo, ta kúu mií ra chiñu ndee ni nuu na judío. 2Ta iin ñûu ke̱e ra ndi̱xaꞌan ra nuu Jesús káꞌan ra xiꞌin ra, káchi ra saa:
―Rabí, xíni nde yóꞌo̱ ku Maestro ra ti̱ꞌvi Ndioxi vaxi sinaꞌa un ndeꞌe ñuu ivi yóꞌó, saa chi nda iin naꞌa ta küchiñu na ikan na taꞌan ya íkan un tá tu köo Ndioxi íyo xiꞌin na ―káchi ra xiꞌin Jesús.
3Saa ndi̱kuiin Jesús káꞌan ra:
―Ya ndaa ni káꞌan i xiꞌin un, ndiꞌi na täꞌan kaku uvi, ta küchiñu na kiꞌvi na nuu xáꞌnda chiñu Ndioxi ―káchi Jesús xiꞌin ra.
4Ta saa ndi̱ndakan tuꞌun ñaꞌa ra, káchi ra saa:
―¿Ta unkua ikan iin na xa yata ndikaku tuku na? ¿Án kuchiñu ndiꞌvi uvi tuku na tixin siꞌí na, saa ndikaku tuku na? ―káchi ra xiꞌin Jesús.
5Saa ndi̱kuiin Jesús káꞌan ra, káchi ra saa:
―Ya ndaa ni káꞌan i xiꞌin un, ndiꞌi na täꞌan kaku xiꞌin tikuii ni xiꞌin Tachi I̱í Ndioxi ta küchiñu na kiꞌvi na koo na nuu xáꞌnda chiñu Ndioxi. 6Ndiꞌi na káku tá kuꞌva káku na ñuu ivi yóꞌó ta kuenta na ñuu ivi yóꞌó ku na. Ta ndiꞌi na káku tixin Tachi I̱í Ndioxi, ta kuenta Tachi I̱í Ndioxi ku na. 7Ta ndïkanda ini un xaꞌa ya káꞌan i xiꞌin un ya xíniñuꞌu ndikaku uvi tuku naꞌa. 8Chi tachi ta nda nuu kúni mií ya níꞌi xíka ya, vani xíni soꞌo yo xíka ya, sundi köo xíni yo mií chí vaxi ya ni mií chí kuaꞌan ya. Tá íkan tachi, saa íin ndiꞌi na ndíkaku uvi tixin Tachi I̱í Ndioxi ―káchi Jesús xiꞌin ra Nicodemo.
9Saa ndi̱kaꞌan tuku ra Nicodemo xiꞌin Jesús, káchi ra saa:
―¿Ndá kuꞌva íyo ya ñaa, Tata? ―káchi ra.
10Saa ndi̱kuiin Jesús, káꞌan ra:
―Maestro nuu na Israel ku un. ¿Ta ndachu köo kúndaa ini un xaꞌa ya káꞌan i xiꞌin un? 11Ya ndaa káꞌan i xiꞌin un, ndeꞌe ta káꞌan nde xaꞌa ya xíni̱ nde xiꞌin ya xíni xiꞌin nuu nde. Ya yóꞌó kua ndíkuiin nde xaꞌa káꞌan nde xiꞌin ndo. Ta köo xíin ndo kandixa ndo ya káꞌan nde xiꞌin ndo. 12Nda vitin ta ndítuꞌun i xiꞌin ndo xaꞌa ñaꞌa ya íyo ñuu ivi yóꞌó, ta köo xíin ndo kandixa ndo ya káꞌan i. Ta ¿unkua ikan ndo kandixa ndo tá ná kaꞌan i xiꞌin ndo xaꞌa ya íyo nuu ndivi?
13’Nda iin naꞌa köo ndi̱ndaa nuu ndivi, iindaa mituꞌun Taa ra xa̱a ñuu ivi yóꞌó ku ra nu̱u nuu ndivi, chi ikán íyo ra. 14Tá i̱kan ra Moisés iku yuyu xinaꞌa, si̱kuaꞌa ra iin ko̱ó chi̱nuu ra nuu itun sukun ni, ta saa xíniñuꞌu na ñuu ivi chinuu sukun na yeꞌe, Taa ra xa̱a ñuu ivi yóꞌó. 15Yakan kua ndiꞌi na ndáa ni ini xíni yeꞌe, ta ndïꞌi xaꞌa na, sundi kutaku na xiꞌin Ndioxi ndiꞌi saa kivi ya vaxi.
Kúꞌvi ni ini Ndioxi xíni ra na ñuu ivi
16’Saa chi yáꞌa ni kúꞌvi ini Ndioxi xíni ra na ñuu ivi, xaꞌa ya ikán kua ta̱xi ra Seꞌe ra, ra iindaa mituꞌun nuu ra, yakan ndiꞌi na kándixa ra ta ndïꞌi xaꞌa na, sundi taxi ra kutaku na xiꞌin ra ndiꞌi saa kivi. 17Chi köo ndi̱tiꞌvi Ndioxi Seꞌe ra vaxi ra ñuu ivi ya sitixuꞌvi ra na ñuu ivi, sundi ti̱ꞌvi ñaꞌa ra vaxi ra sikaku ra na.
18’Ta ndiꞌi na kándixa Seꞌe Ndioxi ta küꞌun na nuu ndoꞌo ni na, sundi na köo xíin kandixa Seꞌe ra ta xa chi̱tuni Ndioxi ndiꞌi xaꞌa na, chi xïin na kandixa na kivi Seꞌe Ndioxi, ra iindaa mituꞌun nuu ra. 19Ta ya yóꞌó ku kuachi na ya síndiꞌi xaꞌa na, chi ki̱xi ñu̱ꞌu̱ ya ndituun ya nuu na, ta köo ndi̱xiin na ndikiꞌin na ya, ku̱too ni ka na xi̱ni na ya naá, chi ñaꞌa íkan na ta süvi ya vaꞌa kua. 20Chi ndiꞌi na íkan ya väꞌa ta kúndasi nuu na xíni na ya yéꞌe̱, yakan köo xíin na kuyati na nuu yéꞌe̱, chi köo kúni na ndituvi ndiꞌi ya väꞌa íkan na. 21Sundi na íkan ya ndaa ta kúyati na nuu ya yéꞌe̱ ya ná ndituvi ndiꞌi ya íkan na, chi íkan na tá kuꞌva kúni Ndioxi ―káchi Jesús.
Káꞌan tuku ra Juan ra síkuchi naꞌa xaꞌa Jesús
22Saa ku̱u ndi̱yaꞌa sava kivi, ta ke̱e Jesús kuaꞌan ra xiꞌin nda ítaꞌan xiꞌin ra ñuꞌú Judea. Saa ndi̱xiyo nda uvi ndaá kivi xiꞌin na ñuu ikán, ta si̱kuchi ra na. 23Saa síkuchi ra Juan naꞌa ñuu Enón ya ndíkaa yati ñuu Salim, saa chi kuaꞌa ni tikuii ndíkaa ikán, ta ndi̱xaa naꞌa nuu ra síkuchi ra na. 24Ya yóꞌó ku̱u tá täꞌan tiin na ra Juan kuꞌun ra veꞌe kàà.
25Saa ku̱u ta iin kivi xa̱á sava nda ítaꞌan xiꞌin ra Juan, káni taꞌan nda xiꞌin tuꞌun xiꞌin inka nda judío xaꞌa kuꞌva ya xáa súvi na mií na tá kúu kuꞌva chíchi na xiꞌin ya ndóo ndaꞌa na, ya xáa súvi na ley na, chi saa ini na. 26Saa ndi̱kaꞌan nda xiꞌin ra Juan, káchi nda saa:
―Tata Rabí: koto un ra taa xi̱ni taꞌan xiꞌin un inka ñaꞌñu yuꞌu ita Jordán, síkuchi ni ra naꞌa, ta kuaꞌa ni na kuaꞌan nuu ra ―káchi nda xiꞌin ra Juan.
27Ta saa ndi̱kuiin ra Juan káchi ra saa:
―Nda iin ñaꞌa küvi ikan naꞌa tá tu süvi Ndioxi ku ra táxi ndee ndaꞌa na. 28Xa xi̱ni soꞌo vaꞌa mií ndo tá ndi̱kaꞌan i xiꞌin ndo, “Süvi yeꞌe ku Cristo’’, takua ti̱ꞌvi Ndioxi yeꞌe ínuu i nuu ra vaxi i ndituꞌun i xiꞌin naꞌa ya koo tuꞌva na ndikiꞌin na ra. 29Ta vitin ná kundaa ini ndo chi tá kúu nuu íyo viko tíndaꞌa, ta ra íin xiꞌin ñaꞌa yá tíndaꞌa ikán kuu ií yá, sundi ra íyo yati xiín ií yá, tá xíni soꞌo ra ya káꞌan ra ta kúsini ni ra tá xíni soꞌo ra tachi ra. Ta saa ndóꞌo yeꞌe, kúsini ni i chi xa xa̱a ra vitin. 30Ta ra ikán ku ra xíniñuꞌu nduu chee ka nuu i ta yeꞌe xíniñuꞌu i xaa ni̱nu̱ i mií i nuu ra ―káchi ra Juan xiꞌin nda ítaꞌan xiꞌin ra.
Taa ra ke̱e nuu ndivi
31Saa xa̱á káꞌan ka ra Juan, káchi ra saa:
―Ra ke̱e nuu ndivi ku ra chee ni ka nuu ndiꞌi ni kuu ñaꞌa ya íyo ñuu ivi. Ta ra íyo ñuu ivi yóꞌó, ra ivi yóꞌó kú ra, ñaꞌa ya íyo ñuu ivi yóꞌó ndítuꞌun ra xaꞌa. Sundi ra ke̱e nuu ndivi ta ra íkan ku ra chee ni nuu ndiꞌi ñaꞌa. 32Ta ra ikán káꞌan ra xaꞌa ñaꞌa ya xi̱ni soꞌo ra tin ya xi̱ni ra, ta nda iin na köo xíin kandixa ya káꞌan ra. 33Sundi tá kúu na kándixa tuꞌun káꞌan ra, na yóꞌó ku na ndíkuiin xaꞌa Ndioxi, ya kúu ra, ra ndaa ni. 34Saa chi ra ti̱ꞌvi Ndioxi vaxi ñuu ivi yóꞌó, ta káꞌan ra tuꞌun Ndioxi, chi Ndioxi ta köo táxi loloꞌo ra ndee Tachi I̱í ra ndaꞌa na, iin táxi ndiꞌi ra ya ndaꞌa na. 35Iva yo Ndioxi ta kúꞌvi ni ini ra xíni ra Seꞌe ra, yakan kua ta̱xi ndiꞌi ra ñaꞌa ndaꞌa Seꞌe ra. 36Ta ndiꞌi na kándixa Seꞌe ra, ta táku na xiꞌin Ndioxi ndiꞌi saa kivi, sundi na köo xíin kandixa Seꞌe ra ta küchiñu na kutaku na, ndiꞌi saa kivi saá ini Ndioxi kuni ñaꞌa ra ―káchi ra Juan.
اکنون انتخاب شده:
San Juan 3: xta
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Active: ©Wycliffe Bible Translators, Inc. All rights reserved.