ᒨᓯᓯ ᐱᖓᔪᖏᑦ 10

ᓁᑕᐱᐅᑉ ᐊᐱᕼᐅᓪᓗ ᐊᔪᕐᑐᓕᓂᖓᒃ

1ᐂᕉᓂᐅᓪᓗ ᐃᕐᓂᖏᒃ ᓁᑖᑉ ᐊᒻᒪᓗ ᐊᐱᕼᐅ ᐃᓯᕐᓗᐊᕐᓂᑎᑦᓯᑦᔪᑎᑎᒃ ᑎᒍᕔᑦ, ᐃᑭᓪᓗᒋᓪᓗ ᑎᐱᑦᓯᐊᕆᒃᑐᒥᒃ ᐃᓐᓴᓐᓯᒥᒃ ᐃᓗᓪᓕᕐᓗᒋᑦ; ᑐᓂᕐᕈᓯᕐᐳᒡᓗ ᐃᑯᒪᔪᒥᒃ ᐊᑕᓂᕐᒧᑦ, ᑍᒫᒃ ᐱᖁᔭᐅᓯᒪᓇᑎᒃ. 2ᐃᑯᒪᓗ ᐊᓂᕗᖅ ᐊᑕᓂᐅᑉ ᓇᔪᒐᖓᓂᑦ ᐃᓅᒃ ᑖᒃᑯᐊᒃ ᓄᖑᓪᓗᒋᒃ, ᑖᒃᑯᐊᒃ ᑐᖁᕘᒃ ᐊᑕᓂᐅᑉ ᓵᖓᓂ. 3ᑕᕝᕙ ᒨᓯᓯᐅᑉ ᐂᕉᓂ ᐅᖃᐅᑎᕚ, “ᑕᒪᑦᔭ ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᐅᖃᕋᒥ; ‘ᐅᕙᓐᓄᑦ ᖃᒡᓕᔪᓄᑦ ᐃᑦᔪᕐᓁᓐᓂᓐᓂᒃ ᓇᓗᓁᕐᓯᓂᐊᕐᐳᖓ; ᐃᓄᐃᑦ ᑕᒃᑯᐊᓐᓂ ᐅᐱᒋᔭᐅᓂᐊᕐᐳᖓ.’” ᐂᕉᓂᓗ ᓂᓪᓕᓐᖏᓚᖅ.

4ᒨᓯᓯᐅᑉ ᒥᓮᐅᓪ ᐃᐅᓪᓴᕚᓐᓗ ᕾᖁᕚᒃ ᐊᑦᔧᐆᑉ ᐃᕐᓂᖏᒃ ᐂᕉᓂᐅᑉ ᐊᒃᑲᖓᑕ ᐅᖃᐅᑎᓪᓗᒋᒃ, “ᕾᒋᑦᓯᒃ ᖃᑕᓐᖑᑎᓯᓗ ᐅᑯᐊᒃ ᓄᓇᓖᑦ ᓯᓚᑖᓄᐊᓚᐅᕐᓯᒋᒃ ᐃᑦᔪᕐᓁᑦᑐᕕᐅᑉ ᓵᖓᓂᑦ.” 5ᑖᒃᑯᐊᒡᓗ ᕾᕘᒃ ᐊᒡᔭᕐᓗᒋᒡᓗ ᑐᓂᕐᕈᓯᕐᑎᑦᓯᔨᓯᐅᑎᓂᒃ ᐊᓐᓄᕌᕐᓯᒪᑎᓪᓗᒋᒃ, ᓄᓇᓖᑦ ᓯᓚᑖᓄᑦ ᐊᒡᔭᕐᐹᑦ, ᒨᓯᓯᐅᑉ ᐱᖁᔨᓂᖓ ᒪᓕᒡᓗᒍ.

6ᒨᓯᓯᓗ ᐅᖃᕆᕗᖅ ᐂᕉᓂᒧᑦ ᐃᕐᓂᖏᓐᓄᓪᓗ ᐃᓕᓯᕆᒧᑦ ᐃᑕᒫᕐᒧᓪᓗ, “ᓄᔭᓯ ᐃᓪᓔᕐᓯᒪᔪᓐᓃᕐᑎᓐᓂᐊᕋᓯᒋᒃ, ᐊᓐᓄᕌᓯᓗ ᐊᓕᖕᓂᐊᕐᓇᒋᑦ, ᑍᒤᓕᐅᕈᑦᓯ ᑐᖁᓂᐊᕆᕗᓯᒃ ᐊᑕᓂᕐᓗ ᓂᓐᖓᐅᒪᓂᐊᕐᐳᖅ ᓄᓇᓕᖕᓄᑦ ᑖᒃᑯᓄᖓ. ᐃᓚᓯᓕ ᐃᓴᕆᐊᓕᒥᐅᓪᓗ ᕿᒃᓵᒍᓐᓇᕐᐳᑦ ᐊᑕᓂᐅᑉ ᐃᑯᒪᒧᑦ ᑐᖁᑕᖏᑦ ᐱᑦᔪᑎᒋᓗᒋᑦ. 7ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓ ᕿᒪᒃᑍᓕᓯᐅᒃ, ᑐᖁᖁᓇᓯᒃ, ᐊᑕᓂᐅᑉ ᐅᕐᓱᖅ ᒥᖑᐊᕈᑎᖓ ᐃᓕᑦᓯᓐᓃᒻᒪᑦ.” ᑖᒃᑯᐊᒡᓗ ᒨᓯᓯᐅᑉ ᐅᖃᐅᓯᕆᔭᖓ ᒪᓕᒡᓗᒍ ᑍᒤᓕᐅᕐᐳᑦ.

ᒪᓕᒊᑦ ᑐᓂᕐᕈᓯᕐᑎᑦᓯᔩᑦ ᐱᓪᓗᒋᑦ

8ᐊᑕᓂᐅᑉ ᐂᕉᓂ ᐅᖃᐅᑎᕚ, 9“ᐃᕝᕕᑦ ᐃᕐᓂᑎᓪᓗ ᕔᓂᒥᒃ ᐃᒥᕆᐊᖃᓐᖏᓚᓯ, ᐊᓯᐊᓂᒡᓘᓐᓃᑦ ᐃᒥᐊᓗᓕᐊᕆᓯᒪᔪᒥᒃ ᐃᒥᕆᐊᖃᓐᖏᓚᓯ ᑐᐱᐅᑉ ᑲᑎᒪᕕᐅᑉ ᐃᓗᐊᓃᑎᓪᓗᓯ, ᑍᒤᓕᐅᕈᑦᓯ ᑐᖁᔪᒫᕐᐳᓯ, ᑕᒪᓐᓇ ᒪᓕᒐᐅᓂᐊᕐᐳᖅ ᑭᖑᕚᒃᓴᑦᓯᓐᓄᑦ.

10“ᓇᓗᓁᕐᓯᑦᓯᐊᕆᐊᖃᕐᐳᓯ ᐃᑦᔪᕐᓁᑦᑐᒥᒃ, ᐃᑦᔪᕐᓁᑦᑑᖏᑦᑐᒥᒡᓗ ᐃᓄᑐᐃᓐᓇᕐᓯᐅᑎᒥᒃ, ᓴᓗᒤᑦᑐᒥᒃ, ᓴᓗᒪᔪᒥᒡᓗ. 11ᐃᓴᕆᐊᓕᒥᐅᓕᒫᑦ ᐃᓕᓐᓂᐊᕐᑎᑦᓴᕆᐊᖃᕐᐸᓯ ᐊᑕᓂᐅᑉ ᐱᖁᔭᖏᓐᓂᒃ ᒨᓯᓯᒃᑯᑦ ᑐᓂᔭᖏᓐᓂᒃ.”

12 # ᒨᓯᓯ ᐱᖓᔪᖏᑦ 6:14-18. ᒨᓯᓯᓗ ᐅᖃᕆᕗᖅ ᐂᕉᓂᒧᑦ ᐃᕐᓂᖏᓐᓄᓪᓗ ᐃᓕᓯᕆᒧᑦ ᐃᑕᒫᕐᒧᓪᓗ ᐊᒥᐊᒃᑰᔫᖕᓄᑦ, “ᑎᒍᓯᓕᕆᑦᓯ ᓂᐊᖂᔭᒥᒃ ᑐᓂᕐᕈᑕᐅᓯᒪᔪᒥᒃ ᑐᓂᕐᕈᑎᓂᒃ ᐊᑕᓂᕐᒧᑦ ᐃᑯᐊᓪᓚᒃᑕᐅᓗᑎᒃ ᑐᓂᕐᕈᑎᕕᓂᕐᒥᒃ ᓴᓇᓯᒪᔪᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᕆᓗᒍᓗ ᑐᓂᕐᕈᓯᕐᕕᐅᑉ ᓴᓂᐊᓂ, ᑖᓐᓇ ᐃᑦᔪᕐᓁᓐᓂᕐᐹᖑᖕᒪᑦ. 13ᑖᓐᓇ ᓂᕆᓯᐅᒃ ᐃᑦᔪᕐᓁᑦᑑᑉ ᐃᓂᖓᓂ ᑖᓐᓇ ᓂᕿᒃᓴᕆᒐᕕᐅᒃ ᐃᕐᓂᕐᐱᓪᓗ ᓂᕿᒃᓴᕆᖕᒪᑦᔪᒃ ᑖᒃᑯᓇᓐᖓᑦ ᑐᓂᕐᕈᑎᓂᒃ ᐃᑯᐊᓪᓚᒃᑕᐅᓯᒪᔪᓂᒃ ᐊᑕᓂᕐᒧᑦ ᐃᓕᖓᖕᒪᑦ; ᑍᒫᒃ ᑕᕝᕙ ᐱᖁᕙᑦᓯ. 14#ᒨᓯᓯ ᐱᖓᔪᖏᑦ 7:30-34.ᑭᓯᐊᓂᓕ ᐆᒪᔫᑉ ᓴᑭᐊᖏᓐᓂᒃ ᐃᕝᕕᓪᓗ ᐃᕐᓂᑎᓪᓗ ᐸᓂᒃᑎᓪᓗ ᐊᐅᓪᓚᕐᑎᑕᐅᓪᓗᓂ ᑐᓂᕐᕈᑕᐅᓯᒪᔪᖅ ᒥᒥᖏᒡᓗ ᑐᓂᕐᕈᑕᐅᓯᒪᔪᖅ ᓂᕆᔭᒃᓴᕆᕙᓯ, ᑖᒃᑯᐊ ᓂᕆᓯᐅᒃ ᐅᒃᐱᕐᓂᐅᑉ ᐃᓕᖅᑯᓯᖓᑕ ᐃᑦᔪᕐᓁᓐᓂᕋᕐᑕᖓᓃᓪᓗᓯ ᑖᒃᑯᐊ ᑐᓂᔭᐅᖕᒪᑕ ᐃᓕᖕᓄᑦ ᕿᑐᕐᖓᕐᓄᓪᓗ ᐃᓴᕆᐊᓕᒥᐅᑦ ᑐᓂᕐᕈᑎᖏᓐᓂᑦ ᐱᔪᑦ. 15ᒥᒥᖅ ᑐᓂᕐᕈᑕᐅᓯᒪᔪᖅ ᓴᑭᐊᒡᓗ ᐊᐅᓪᓚᕐᑎᑕᐅᓗᓂ ᑐᓂᕐᕈᑕᐅᓯᒪᔪᖅ ᐃᓚᖃᕐᓗᓂ ᑐᓐᓄᕐᓂᒃ ᐃᑯᐊᓚᑦᓯᓂᒃᑯᑦ ᑐᓂᕐᕈᑕᐅᓯᒪᔪᓂᒃ, ᐊᐅᓪᓚᕐᑎᑕᐅᓗᑎᒃ ᑐᓂᕐᕈᑎᒃᓮᑦ ᐊᑕᓂᕐᒧᑦ. ᑖᒃᑯᐊ ᑕᕝᕙ ᐃᕝᕕᑦ ᐱᑖᕆᔭᕆᐊᖃᕐᑕᑎᑦ ᕿᑐᕐᖓᕐᓄᓪᓗ, ᐊᑕᓂᖅ ᑍᒫᒃ ᐱᖁᔨᓚᐅᕐᒪᑦ.”

16ᒨᓯᓯᓗ ᐊᐱᖅᑯᑎᖃᕐᒪᑦ ᒎᑦᓯᒥᒃ ᐊᔪᕐᓃᑦ ᐱᓪᓗᒋᑦ ᑐᓂᕐᕈᑕᐅᓯᒪᔪᒥᒃ ᖃᐅᔨᑎᑕᐅᓪᓗᓂᓗ ᐃᑯᐊᓪᓚᒃᑕᐅᔪᕕᓂᐅᖕᒪᑦ, ᐃᓕᓯᕆᓗ ᐃᑕᒫᕐᓗ ᓂᓐᖓᒡᕕᒋᕔᑦ, ᐂᕉᓂᐅᑉ ᐃᕐᓂᖏᒃ ᐊᒥᐊᒃᑰᒃ, ᐊᐱᕆᓪᓗᒋᒡᓗ, 17#ᒨᓯᓯ ᐱᖓᔪᖏᑦ 6:24-26.“ᓱᖕᒪᑦ ᐊᔪᕐᓂᖅ ᐱᓪᓗᒍ ᑐᓂᕐᕈᑎᕕᓂᖅ ᓂᕆᓚᐅᖏᑉᐱᓯᒃᑰᒃ ᐃᑦᔪᕐᓁᑦᑐᕕᐅᑉ ᐃᓚᖓᓂ? ᐃᑦᔪᕐᓁᓐᓂᕐᐹᖑᖕᒪᑦ; ᐃᓕᑦᓯᖕᓄᑦ ᑐᓂᔭᐅᓚᐅᕐᑐᖅ ᐃᓄᐃᑦ ᓄᓇᖅᑲᑎᒌᑦ ᐸᓯᔭᒃᓴᐅᓂᖏᑦ ᐲᕐᑕᐅᖁᓪᓗᒋᑦ ᐃᓱᒪᒋᔪᓐᓁᕐᕕᐅᖁᓪᓗᒋᑦ ᐊᑕᓂᐅᑉ ᓵᖓᓂ. 18ᐊᐅᖓ ᐋᑕᐅᓚᐅᖏᒻᒪᑦ ᐃᑦᔪᕐᓁᑦᑐᕕᖕᒧᑦ, ᑍᒤᒻᒪᑦ ᐃᑦᔪᕐᓁᑦᑐᕕᐅᑉ ᖃᓂᒋᔭᖓᓂ ᓂᕆᔭᕆᐊᖃᓚᐅᕐᐸᓯ, ᐱᖁᔨᓂᕋ ᒪᓕᒡᓗᒍ.”

19ᐂᕉᓂᓗ ᑭᐅᕗᖅ ᒨᓯᓯᒧᑦ, “ᐅᓪᓗᒥ ᐃᓄᐃᑦ ᐊᔪᕐᓂᑎᒃ ᐱᓪᓗᒍ ᑐᓂᕐᕈᓯᕐᐳᑦ ᐃᑯᐊᓪᓚᒋᐊᓕᖕᓂᒡᓗ ᑐᓂᕐᕈᓯᕐᐳᑦ ᐊᑕᓂᕐᒧᑦ; ᑭᓯᐊᓂᓕ ᐅᕙᓐᓄᑦ ᑕᒪᓐᓇ ᐃᓱᒪᔮᕐᓇᕐᑐᖅ ᑎᑭᑉᐳᖅ! ᐅᓪᓗᒥ ᓂᕆᓚᐅᕈᒪ ᐊᔪᕐᓂᖅ ᐱᓪᓗᒍ ᑐᓂᕐᕈᑎᕕᓂᕐᒥᑦ, ᐊᑕᓂᐅᑉ ᑕᒪᓐᓇ ᓈᒻᒪᒋᒐᔭᕐᐸᐅᒃ?” 20ᒨᓯᓯ ᑕᒪᑐᒥᖓ ᑐᓴᕋᒥ ᓈᒻᒪᒃᓴᓕᕐᐳᖅ.

اکنون انتخاب شده:

ᒨᓯᓯ ᐱᖓᔪᖏᑦ 10: EAIB

های‌لایت

کپی

مقایسه

به اشتراک گذاشتن