ᒨᓯᓯ ᐱᖓᔪᖏᑦ 8

ᐂᕉᓂᐅᑉ ᐃᕐᓂᖏᑕᓗ ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᓂᖏᑦ

ᒨᓯᓯ ᐂᑉᐸᖏᑦ 29:1-37

1ᐊᑕᓂᐅᑉ ᒨᓯᓯ ᐅᖃᐅᑎᕚ, 2“ᐂᕉᓂᓗ ᐃᕐᓂᖏᓪᓗ ᐊᓐᓄᕌᒃᓴᖏᓐᓂᒃ ᑐᓂᓯᕕᒋᒃᑭᑦ, ᐅᕐᓱᒥᒡᓗ ᒥᖑᐊᕐᓯᑦᔪᑎᒥᒃ, ᐃᒻᒧᒃᓯᐅᒐᐅᓪᓗ ᐸᖕᓂᖓᓂᒃ, ᒪᕐᕉᖕᓂᒡᓗ ᓰᐱᐅᑉ ᐊᖑᓴᓪᓗᖏᖕᓂᒃ, ᐃᕕᐅᔭᒥᒡᓗ ᓂᐊᖂᔭᓂᒃ ᐆᓯᒪᔪᓂᒃ ᐳᕙᓪᓚᕐᓴᐅᑎᖃᖏᑦᑐᓂᒃ ᐃᓗᓕᓕᖕᒥᒃ. 3ᓄᓇᖃᑎᒌᓕᒫᓪᓗ ᑲᑎᖁᒃᑭᑦ ᑐᐱᐅᑉ ᑲᑎᒪᕕᐅᑉ ᐹᖓᑕ ᓴᓂᐊᓂ.”

4ᒨᓯᓯ ᑍᒤᓕᐅᓚᐅᕐᐳᖅ ᐊᑕᓂᐅᑉ ᐱᖁᖕᒪᒍ, ᓄᓇᖃᑎᒌᑦ ᑲᑎᓚᐅᕐᐳᑦ ᑐᐱᐅᑉ ᑲᑎᒪᕕᐅᑉ ᐹᖓᑕ ᓴᓂᐊᓂ. 5ᒨᓯᓯᐅᑉ ᐃᓄᐃᑦ ᐅᖃᐅᑎᕔᑦ, “ᐃᒫᒃ ᑕᕝᕙ ᐊᑕᓂᖅ ᐱᖁᔨᕗᖅ.”

6ᒨᓯᓯᐅᑉ ᐂᕉᓂ ᐃᕐᓂᖏᓪᓗ ᐃᓄᐃᑦ ᓵᖏᓐᓄᑦ ᐱᑎᑉᐰᑦ, ᐃᒥᕐᒧᓪᓗ ᓴᓗᒻᒪᕐᓴᕐᓗᒋᑦ. 7ᐂᕉᓂᓗ ᐅᕕᓂᕈᕐᒥᒃ ᑕᑭᔪᒥᒃ ᐊᑎᑎᑉᐹ ᓯᓕᒃᑐᒥᒡᓗ ᑕᑦᓯᕈᓯᕐᓗᒍ, ᐅᓕᒡᔪᐊᒥᒡᓗ ᐊᑎᑎᑉᐹ, ᑐᓂᕐᕈᓯᕐᑎᑦᓯᔨᓯᐅᑎᒥᒡᓗ ᖃᑯᕐᑕᒥᒃ ᓵᓕᑕᕐᒥᒃ ᐊᑎᑎᑉᐹ ᐃᐹᑎᒥᒃ ᐊᑎᓕᖕᒥᒃ, ᐃᐹᑎᓗ ᕿᓚᒃᐹ ᕿᓚᕈᑎᖓᓄᑦ ᓴᓇᑦᓯᐊᒃᑲᐅᓂᕐᐹᓄᑦ ᓴᓇᔭᐅᓯᒪᔪᒧᑦ. 8ᓴᒡᕕᖕᒥᐅᑕᒥᒡᓗ ᐊᑎᑎᒃᑭᕚ, ᒎᑎᐅᓪᓗ ᐱᔪᒪᔭᖓᓂᒃ ᓇᓚᐅᑦᓯᑦᔪᑏᒃ ᐊᑎᖃᕐᑑᒃ ᔫᕆᒻ ᐊᒻᒪᓗ ᑕᒪᒻ ᓴᒡᕕᖕᒥᐅᑕᖓᓄᑦ ᐃᓕᓪᓗᒋᒃ. 9ᓇᓴᕐᑎᑉᐹᓗ ᓂᐊᖁᐊᓄᑦ ᐃᒻᒧᓯᐅᑎᓯᒪᔪᒥᒃ ᒎᓗᒥᒃ ᓯᕗᒥᐅᑕᖃᕐᑐᒥᒃ ᒎᑎᐅᑉ ᐊᖓᔪᖅᑳᖁᑎᖓᓂᒃ ᓇᓗᓁᒃᑯᑕᕐᒥᒃ ᑍᒫᒃ ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.

10ᒨᓯᓯᐅᑉ ᓇᐹᕐᑑᑉ ᐅᕐᓱᖓ ᒥᖑᐊᕈᑎᒃᓴᖅ ᑎᒍᕚ, ᐅᕐᓱᕐᑎᕐᓗᒍᓗ ᐊᑕᓂᐅᑉ ᓇᔫᑎᕕᖓ ᑐᐱᖅ ᐃᓗᓕᓕᒫᖏᓪᓗ, ᑍᒫᒃ ᐊᑕᓂᕐᒧᑦ ᐊᑐᒐᒃᓴᐅᖁᓪᓗᒋᑦ ᑐᓂᕔᑦ. 11ᐅᕐᓱᒥᒡᓗ ᑐᓂᕐᕈᓯᕐᕕᒃ ᓯᕐᐸᕐᓴᕐᐹ 7ᐃᑐᕐᓗᒍ, ᒥᖑᐊᕐᐹᓗ ᑐᓂᕐᕈᓯᕐᕕᒃ ᑐᓂᕐᕈᓯᕐᕕᖕᒧᓪᓗ ᐊᑐᕐᑕᐅᕙᒃᑐᑦ ᓱᓇᑐᐃᓐᓁᑦ, ᐃᕐᕈᕐᑐᕐᕕᒡᓗ ᑐᓐᖓᕕᖓᓗ ᐊᑐᒐᒃᓴᐅᖁᓪᓗᒋᑦ ᑐᓂᕔᑦ. 12ᐂᕉᓂᓗ ᓂᐊᖁᐊᒍᑦ ᑯᕕᓯᕕᒋᕚ ᓇᐹᕐᑑᑉ ᐅᕐᓱᖓᓂᒃ ᑎᓕᔭᐅᓂᖓ ᐊᑕᓂᕐᒧᑦ ᓇᓗᓁᕐᓗᒍ. 13ᐂᕉᓂᐅᓪᓗ ᐃᕐᓂᖏᑦ ᓯᕗᒧᐊᒃᑎᑉᐰᑦ, ᐅᕕᓂᕈᕐᑎᓪᓗᒋᓪᓗ ᑕᑭᔪᓂᒃ, ᓯᓕᒃᑐᓂᒡᓗ ᑕᑦᓯᕈᓯᕐᓗᒋᑦ, ᓂᐊᖂᓯᕐᓗᒋᓪᓗ ᑍᒫᒃ ᐊᑕᓂᐅᑉ ᒨᓯᓯ ᐱᖁᖕᒪᒍ.

14ᒨᓯᓯᓗ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᑐᓂᕐᕈᓯᕐᐳᖅ ᐊᔪᕐᓃᑦ ᐃᓱᒪᒋᔪᓐᓁᕐᑕᐅᖁᓪᓗᒋᑦ, ᐂᕉᓂᐅᓪᓗ ᐃᕐᓂᖏᑕᓗ ᑐᓂᕐᕈᑎᒃᓴᖅ ᓂᐊᖁᐊᒍᑦ ᐸᑎᒻᒥᕚᑦ. 15ᒨᓯᓯᐅᓪᓗ ᐸᖕᓂᖅ ᑐᖁᑉᐹ, ᐊᐅᖓᑕᓗ ᐃᓚᖓᓂᒃ ᐱᕗᖅ, ᑎᑭᕐᒥᓄᓪᓗ ᑐᓂᕐᕈᓯᕐᕕᐅᑉ ᓇᒡᔪᖏᑦ ᐊᐅᒥᑎᕐᐰᑦ, ᑐᓂᕐᕈᓯᕐᕕᒃ ᐃᑦᔪᕐᓁᑎᑕᐅᖁᓪᓗᒍ ᓴᓗᒻᒪᕐᓴᕐᓗᒍᓗ, ᐊᐅᒡᓗ ᑎᒍᒥᐊᕐᑕᓂ ᑯᕕᕚ ᑐᓂᕐᕈᓯᕐᕕᐅᑉ ᑭᒡᓕᖓᓄᑦ, ᑍᒤᓕᐅᕐᐳᖅ ᑐᓂᕐᕈᓯᕐᕕᒃ ᐊᑐᕐᑕᐅᖁᓪᓗᒍ ᓴᓗᒻᒪᕐᑎᓯᐊᕐᓗᒍᓗ ᐃᑦᔪᕐᓁᑯᓪᓗᒍ. 16ᒨᓯᓯᐅᓪᓗ ᐆᒪᔫᑉ ᑭᒃᓴᐅᑎᖏᑦ ᐃᓗᖏᓪᓗ, ᑎᖑᖓᑕᓗ ᐃᒻᒧᑎᖏᑦ ᑐᓐᓄᐃᑦ ᐲᕐᐰᑦ, ᑕᕐᑐᖏᒡᓗ ᐃᒡᓗᒃᑐᑦ ᑕᕐᑐᕈᑎᖏᓪᓗ ᐃᑯᐊᓪᓚᒃᐰᑦ ᑐᓂᕐᕈᓯᕐᕕᖕᒥ. 17ᐃᒻᒧᒃᓯᐅᒐᐅᓪᓕ ᐸᖕᓂᖓ ᐊᒥᖓᓗ ᐱᖃᓯᐅᑎᓪᓗᒍ ᓂᕿᖓᓗ ᐃᕐᕋᕕᖏᑕᓗ ᐃᓗᖏᑦ, ᐃᑯᐊᓪᓚᒃᐰᑦ ᓄᓇᓖᑦ ᓯᓚᑖᓂ, ᑍᒫᒃ ᐊᑕᓂᐅᑉ ᒨᓯᓯ ᐱᖁᖕᒪᒍ.

18ᒨᓯᓯᓗ ᓰᐱᐅᑉ ᐊᖑᓴᓪᓗᖓᓂᒃ ᑕᒪᐅᓐᖎᕗᖅ, ᐂᕉᓂᐅᓪᓗ ᐃᕐᓂᖏᑕᓗ ᓂᐊᖁᐊᒍᑦ ᐸᑎᒻᒥᕚᑦ. 19ᒨᓯᓯᐅᓪᓗ ᓰᐱ ᑐᖁᑉᐹ, ᐊᐅᖓᓗ ᓯᕐᐸᕐᓴᕈᑎᒋᓪᓗᒍ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ. 20ᒨᓯᓯᐅᓪᓗ ᓰᐱ ᐊᒡᒍᕐᐹ ᓂᐊᖁᐊᓗ ᐃᑯᐊᓪᓚᒡᓗᒍ, ᓂᕿᖏᓪᓗ ᐊᒡᒍᕐᓯᒪᔪᑦ ᑐᓐᓄᖏᓪᓗ. 21ᐃᕐᕋᕕᖏᓪᓗ ᓂᐅᖏᓪᓗ ᐃᒥᕐᒧᑦ ᐃᕐᕈᕐᑐᕐᐰᑦ, ᓰᐱᓗ ᑕᒪᒃᑭᕐᓗᒍ ᑐᓂᕐᕈᓯᕐᕕᖕᒥ ᐃᑯᐊᓪᓚᒃᐹ ᐃᑯᐊᓚᑦᓯᓂᒃᑯᑦ ᑐᓂᕐᕈᑎᒋᓪᓗᒍ, ᑎᐱᖓᓗ ᒪᒪᕆᔭᐅᕗᖅ ᐊᑕᓂᕐᒧᑦ ᑐᓂᕐᕈᑕᐅᖕᒪᑦ ᐃᑯᐊᓪᓔᓂᒃᑯᑦ, ᑍᒫᒃ ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.

22ᓰᐱᐅᓪᓗ ᐊᖑᓴᓪᓗᖓᓂᒃ ᐊᓯᐊᓂᒃ ᑕᒪᐅᓐᖓᕐᓯᒋᕗᖅ ᑖᒃᑯᐊ ᑎᓕᔭᐅᓂᖏᑦ ᐱᓪᓗᒋᑦ, ᐂᕉᓂᐅᓪᓗ ᐃᕐᓂᖏᑕᓗ ᓂᐊᖁᐊᒍᑦ ᐸᑎᒻᒥᕚᑦ. 23ᒨᓯᓯᐅᑉ ᓰᐱ ᑐᖁᑉᐹ ᐊᐅᖓᑕᓗ ᐃᓚᖓᓂᒃ ᐱᕗᖅ, ᐂᕉᓂᐅᓪᓗ ᓯᐅᑎᖓᑕ ᑕᓕᕐᐱᐊᑕ ᐳᕝᕙᖓ ᐊᐅᒥᑉᐹ, ᑯᓪᓗᖓᓗ ᑕᓕᕐᐱᐊ, ᑕᓕᕐᐱᐊᓗ ᐳᑐᒍᖓ. 24ᒨᓯᓯᐅᓪᓗ ᐂᕉᓂᐅᑉ ᐃᕐᓂᖏᑦ ᑕᒪᐅᓐᖓᕐᑎᑉᐰᑦ ᐊᐅᒥᑦᑕᕐᓗᒋᓪᓗ ᓯᐅᑎᖏᑕ ᑕᓕᕐᐱᖏᑕ ᐳᕝᕙᖏᑦ, ᑯᓪᓗᖏᓪᓗ ᑕᓕᕐᐱᖏᑦ, ᐳᑐᒍᖏᓪᓗ ᑕᓕᕐᐱᖏᑦ. ᐊᐅᖕᒧᓪᓗ ᑐᓂᕐᕈᓯᕐᕕᒃ ᓯᕐᐸᕐᓴᕐᐹ ᓴᓂᕋᖏᑎᒍᑦ. 25ᒨᓯᓯᐅᑉ ᑐᓐᓄᐃᑦ ᐲᔭᕐᐰᑦ, ᐸᒥᐊᓪᓗᖓᑕᓗ ᑐᓐᓄᖏᑦ, ᐃᒡᓗᒃᑐᑦ ᑕᕐᑐᕈᑎᖏᒡᓗ ᒥᒥᖓᑕᓗ ᑕᓕᕐᐱᐊ. 26ᐃᕕᐅᔭᒥᒡᓗ ᓂᐊᖂᔭᕐᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐱᕗᖅ ᐊᑕᓂᐅᑉ ᓵᖓᓂᑦ, ᓂᐊᖂᔭᒥᒃ ᓴᓇᓯᒪᔪᒥᒃ, ᐅᕐᓱᒥᒃ ᐃᓚᓯᒪᔪᒥᒃ, ᓯᕙᓕᐊᕆᓯᒪᔪᒥᒡᓗ; ᑖᒃᑯᐊ ᐃᓕᕔᑦ ᑐᓐᓄᐃᑦ ᖄᖏᓐᓄᑦ ᒥᒥᐅᓪᓗ ᖄᖓᓄᑦ. 27ᑖᒃᑯᐊᓗ ᐃᓕᕔᑦ ᐂᕉᓂᐅᓪᓗ ᐃᕐᓂᖏᑕᓗ ᐊᒡᒐᖏᓐᓄᑦ ᐊᐅᓪᓚᕐᑎᑉᐹᓪᓗ ᐊᑕᓂᐅᑉ ᓵᖓᓂ, ᐊᐅᓪᓚᕐᑎᑦᓯᓂᕐᒥᒃ ᑐᓂᕐᕈᑎᒥᒃ ᑍᔭᐅᔪᒥᒃ. 28ᒨᓯᓯᐅᓪᓗ ᑎᒍᒋᕔᑦ ᐃᑯᐊᓪᓚᒃᑎᓪᓗᒋᓪᓗ ᑐᓂᕐᕈᓯᕐᕕᐅᑉ ᖄᖓᓂ ᑐᓂᕐᕈᑎᒃᓮᑦ ᖄᖓᓐᓂ ᑎᓕᔭᐅᔪᑦ ᐱᓪᓗᒋᑦ ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕐᓂᕐᒥᒃ ᑍᔭᐅᓪᓗᓂ. ᑎᐱᖓ ᒪᒪᕐᑑᓪᓗᓂ, ᑐᓂᕐᕈᑕᐅᖕᒪᑦ ᐊᑕᓂᕐᒧᑦ ᐃᑯᐊᓚᑎᑦᓯᓂᒃᑯᑦ. 29ᑐᓂᕐᕈᑎᒃᓴᐅᓪᓗ ᓴᑭᐊᖏᑦ ᒨᓯᓯᐅᑉ ᐱᔭᒃᓴᖏᑦ, ᒨᓯᓯᐅᑉ ᑎᒍᕔᑦ ᐊᐅᓪᓚᕐᑎᑦᓯᓂᒃᑯᓪᓗ ᑐᓂᕐᕈᑎᒋᕔᑦ, ᐊᑕᓂᐅᑉ ᑍᒫᒃ ᐱᖁᓚᐅᕐᒪᒍ.

30ᒨᓯᓯᐅᓪᓗ ᐅᕐᓱᖅ ᒥᖑᐊᕈᑎᒃᓴᖅ ᑎᒍᕚ ᐊᐅᒡᓗ ᑐᓂᕐᕈᓯᕐᕕᖕᒥᑦ ᐱᔪᖅ ᓯᕐᐸᕐᓴᕈᑎᒋᕔᓪᓗ ᐂᕉᓂᒧᑦ ᐊᓐᓄᕌᖏᓐᓄᓪᓗ, ᐃᕐᓂᖏᓐᓄᓪᓗ ᐊᓐᓄᕌᖏᓐᓄᓪᓗ. ᑍᒫᒃ ᐂᕉᓂᐅᑉ ᑎᓕᔭᐅᓂᖓ ᐊᓐᓄᕌᖏᑕᓗ ᓇᓗᓁᒃᑯᑕᖏᑦ ᐱᔭᐅᕗᑦ ᐃᕐᓂᖏᓪᓗ ᑖᒃᑯᐊᓗ ᐊᓐᓄᕌᖏᑦ.

31ᒨᓯᓯᐅᑉ ᐂᕉᓂ ᐃᕐᓂᖏᓪᓗ ᐅᖃᐅᑎᕔᑦ, “ᓂᖀᑦ ᐅᑯᐊ ᐃᒐᓕᕐᓯᒋᒃ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᐊᓂ, ᑕᕝᕙᓂᓗ ᓂᕆᓗᒋᑦ ᓂᐊᖂᔭᓪᓗ ᐃᕕᐅᔭᒦᑦᑐᑦ ᑎᓕᔭᐅᓂᕐᒧᑦ ᑐᓂᕐᕈᑕᐅᔪᑦ, ᑍᒫᒃ ᐱᖁᔨᒐᒪ, ᐂᕉᓂᐅᑉ ᐃᕐᓂᖏᑕᓗ ᑖᒃᑯᐊ ᓂᕿᒋᔭᒃᓴᕆᕔᑦ. 32ᐊᒥᐊᒃᑯᓪᓕ ᓂᖀᑦ ᐃᑯᐊᓪᓚᒃᑕᐅᔪᒃᓴᐅᕗᑦ ᓂᐊᖂᔭᓪᓗ. 33ᑐᐱᐅᓪᓗ ᑲᑎᒪᕕᐅᑉ ᐃᑎᕐᑕᕐᕕᖓ ᕿᒪᖕᓂᐊᕐᓇᓯᐅᒃ ᐅᓪᓗᓂᒃ 7ᓂᒃ, ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᓂᓯ ᓈᒻᒪᒃᓯᖅᑳᕐᑎᓐᓇᒋᑦ, ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᓂᓯ ᐅᓪᓗᓂᒃ 7ᓂᒃ ᐊᑯᓂᐅᑎᒋᓂᐊᕐᒪᑦ. 34ᑕᒪᓐᓇ ᐅᓪᓗᒥ ᐊᑐᕐᑕᐅᕗᖅ ᐊᑕᓂᐅᑉ ᐱᖁᖕᒪᒍ ᐃᓕᑦᓯ ᓴᓗᒻᒪᕐᑎᑕᐅᖁᓪᓗᓯ. 35ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓃᑦᓴᕆᐊᖃᕐᐳᓯ ᐅᓪᓗᒃᑯᑦ ᐅᓐᓄᐊᒃᑯᓪᓗ ᐅᓪᓗᓂᒃ 7ᓂᒃ ᐊᑕᓂᐅᓪᓗ ᐱᖁᔭᖓᓂᒃ ᒪᓕᒡᓗᓯ, ᑍᒤᒃᑯᑦᓯ ᑐᖁᓂᐊᓐᖏᓚᓯ, ᑍᒫᒃ ᑕᕝᕙ ᐱᖁᔭᐅᓯᒪᕗᖓ.” 36ᐂᕉᓂᓗ ᐃᕐᓂᖏᓪᓗ ᐊᑕᓂᐅᑉ ᐱᖁᔭᓕᒫᖏᓐᓂᒃ ᐱᓂᐊᓚᐅᕐᐳᑦ ᒨᓯᓯᐅᑉ ᐅᖃᐅᓯᕆᔭᖏᓐᓂᒃ.

اکنون انتخاب شده:

ᒨᓯᓯ ᐱᖓᔪᖏᑦ 8: EAIB

های‌لایت

کپی

مقایسه

به اشتراک گذاشتن