ᒨᓯᓯ ᓯᑕᒪᖏᑦ 10

ᒪᕐᕉᒃ ᑎᑦᑐᓚᐅᑏᒃ ᓯᐅᓪᕕᕇᒃ

1ᐊᑕᓂᐅᓪᓗ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ: 2“ᒪᕐᕉᖕᓂᒃ ᑎᑦᑐᓚᐅᑏᖕᓂᒃ ᓴᓇᓚᐅᕆᑦ ᐱᒋᓂᐊᕐᑕᕐᓂᒃ; ᓴᓇᓯᒪᔭᕆᐊᖃᕐᐴᒃ ᑲᓱᐊᕐᓯᒪᓗᑎᒃ; ᐊᑐᕆᐊᖃᕐᐹᒃᑭᒃ ᐃᓄᒋᐊᕐᑐᕐᔪᐊᓂᒃ ᕾᖁᔨᑦᔪᑎᒋᓗᒋᒃ ᑕᖕᒫᕐᓯᒪᔪᓪᓗ ᓱᒋᐊᖃᕐᒪᖔᑕ ᓇᓗᓁᕐᓯᑦᔪᑎᒋᓗᒋᒃ. 3ᑕᒪᕐᒥᒃ ᓂᓪᓕᕐᑎᑕᐅᒃᐸᑎᒃ, ᐃᓄᒋᐊᒃᑐᕐᔪᐊᑦ ᑕᕝᕙ ᓵᖕᓂ ᑲᑎᔭᕆᐊᖃᕐᐳᑦ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ. 4ᐊᑕᐅᓯᕐᓕ ᓂᓪᓕᕐᑎᑕᐅᒃᐸᑦ, ᑕᕝᕙ ᓯᕗᓕᕐᑎᑦ ᑭᓯᒥ, ᐃᓴᕆᐊᓕᐅᑉ ᑭᖑᕚᖏᑕ ᓯᕗᓕᕐᑎᖏᑦ ᓵᖕᓂ ᑲᑎᔭᕆᐊᖃᕐᐳᑦ. 5ᐃᖏᕐᕋᖁᔨᓂᕐᒧᑦ ᓂᓪᓕᐊᑎᑦᓯᒍᕕᑦ, ᓯᕿᓂᐅᑉ ᓄᐃᕕᐊᓂᑦ ᑕᖕᒫᕐᓯᒪᔪᑦ ᑕᕝᕙ ᐃᖏᕐᕋᓯᔭᕆᐊᖃᓕᕐᐳᑦ. 6ᐃᖏᕐᕋᖁᔨᓂᕐᒧᑦ ᓂᓪᓕᕐᑎᑦᓯᒃᑲᓐᓂᕈᕕᑦ, ᓂᒋᕐᒥ ᑕᖕᒫᕐᓯᒪᔪᑦ ᑕᕝᕙ ᐃᖏᕐᕋᓯᔭᕆᐊᖃᓕᕐᐳᑦ, ᑍᒃᑯᐊᓗ ᓂᓪᓕᕐᑎᑦᓯᔭᕆᐊᖃᕆᕗᑦ ᐃᖏᕐᕋᖁᔨᓂᕐᒥᒃ. 7ᐃᓄᒋᐊᒃᑐᕐᔪᐊᓪᓕ ᑲᑎᔭᕆᐊᖃᕐᐸᑕ, ᓂᓪᓕᕐᑎᑦᓯᔭᕆᐊᖃᕐᐳᑎᑦ, ᐃᖏᕐᕋᓯᖁᔨᑦᔪᑎᐅᖏᑦᑐᒥᒃ. 8ᑐᓂᕐᕈᓯᕐᑎᑦᓯᔩᑦ ᐂᕉᓂᐅᑉ ᐃᕐᓂᖏᑦ ᑎᑦᑐᓚᐅᑎᓂᒃ ᓂᓪᓕᕐᑎᑦᓯᔭᕆᐊᖃᕐᐳᑦ; ᑕᒪᓐᓇ ᑕᕝᕙ ᐱᖁᔭᖅ ᒪᓕᒋᐊᖃᕐᑕᓯ ᑍᒪᓐᖓᓕᒫᖅ ᑭᖑᕚᕇᓄᑦ.

9“ᐅᓇᑕᕆᐊᕐᑐᓕᕈᑦᓯᓕ ᓄᓇᑦᓯᓐᓂ ᐊᑭᕋᕐᑐᕐᑎᓯ ᐊᑭᕋᕐᑐᕐᓗᒋᑦ, ᓂᓪᓕᐊᑎᑦᓯᔭᕆᐊᖃᕐᐳᓯ ᑎᑦᑐᓚᐅᑎᓂᒃ, ᐃᖅᑲᐅᒪᔭᐅᓂᐊᕐᐳᓯᓗ ᐊᑕᓂᐅᑉ ᒎᑎᑦᓯ ᓵᖓᓂ, ᓴᐳᑎᔭᐅᓗᓯᓗ ᐊᑭᕋᑦᓯᓐᓂᑦ. 10ᐊᒻᒪᓗᑦᑕᐅᖅ ᐅᓪᓗᓂ ᖁᕕᐊᓇᕐᑐᓂ, ᓇᓪᓕᐅᓐᓂᕐᓯᐅᕐᕕᒋᕙᒃᑕᑦᓯᓐᓂ, ᑕᖅᑭᐅᓪᓗ ᐱᒋᐊᓕᕐᓂᖏᓐᓂ, ᑎᑦᑐᓚᐅᑎᓂᒃ ᓂᓪᓕᐊᑎᑦᓯᔭᕆᐊᖃᕐᐳᓯ ᐆᑕᒃᓮᑦ ᑐᓂᕐᕈᑕᐅᑎᓪᓗᒋᑦ ᓮᒪᓂᕐᒧᓪᓗ ᑐᓂᕐᕈᑏᑦ ᑐᓂᕐᕈᑕᐅᑎᓪᓗᒋᑦ; ᑕᒪᒃᑯᐊ ᐃᖅᑲᐅᒪᑦᔪᑎᒃᓴᐅᖕᒪᑕ ᒎᑎᑦᓯ ᓵᖓᓂ: ᐊᑕᓂᐅᒐᒪ ᒎᑎᓯ.”

ᓮᓁᒥᑦ ᐊᐅᓪᓚᓕᕐᓂᖓᑦ

11ᐱᔪᖃᓚᐅᕐᐳᖅ ᐅᓪᓗᐃᑦ 20ᖓᓂ ᑕᖅᑭᐅᑉ ᐂᑉᐸᖓᓂ, ᐊᕐᕌᒍᑉ ᐂᑉᐸᕆᓕᕐᑕᖓᓂ, ᓄᕗᔭ ᖁᒻᒧᐊᓚᐅᕐᐳᖅ ᑐᐱᕐᔪᐊᖅ ᐊᖏᕈᑎᑕᓕᐅᑉ ᖁᓛᓂᑦ. 12ᐃᓴᕆᐊᓕᐅᓪᓗ ᕿᑐᕐᖓᖏᑦ ᐃᓄᖃᖏᑦᑐᒥᑦ ᓮᓁᒥᑦ ᐃᖏᕐᕋᓯᓚᐅᕐᐳᑦ; ᓄᕗᔭᓗ ᓄᖅᑲᕐᓗᓂ ᐃᓄᖃᖏᑦᑐᒥ ᐸᕌᓐᒥ. 13ᑕᕝᕙ ᓯᕗᓪᓕᕐᐹᒥᒃ ᐊᐅᓪᓚᓕᑍᓐᓇᓚᐅᕐᐳᑦ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᒨᓯᓯᒧᑦ ᑕᓯᐅᕐᑕᐅᓪᓗᑎᒃ.

14ᐅᓇᑕᕐᑐᓴᐅᖃᑎᒌᒃᔪᐊᑦ ᔫᑕᐅᑉ ᕿᑐᕐᖓᖏᑦ ᓯᕗᓪᓕᕐᐸᐅᓪᓗᑎᒃ ᐅᓇᑕᕐᑐᒃᓴᐅᖃᑎᒌᒃᑐᑦ ᒪᓕᒡᓗᒋᑦ; ᓈᓲᓂ ᐊᒥᓇᑕᐱᐅᑉ ᐃᕐᓂᖓ ᐅᓇᑕᕐᑐᒃᓴᓄᑦ ᑖᒃᑯᓄᖓ ᐊᖓᔪᖅᑳᖑᓚᐅᕐᐳᖅ. 15ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᐃᓴᑳᕆᐅᑉ ᕿᑐᕐᖓᖏᓐᓄᑦ ᓂᑖᓂᐅᓪ ᔪᐊᕆᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ. 16ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᓯᐳᓗᓂᐅᑉ ᕿᑐᕐᖓᖏᓐᓄᑦ ᐃᓔᐊᑉ ᕼᐃᓘᓂᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

17ᑐᐱᕐᔪᐊᖅ ᑕᕝᕙ ᐲᔭᕐᑕᐅᕗᖅ; ᒌᕐᓲᓂᐅᓪᓗ ᐃᕐᓂᖏᑦ ᒥᕋᕆᐅᓪᓗ ᐃᕐᓂᖏᑦ ᐊᐅᓪᓚᓕᕆᕗᑦ, ᑐᐱᕐᔪᐊᒥᒃ ᐊᒡᔭᕐᓯᓪᓗᑎᒃ.

18ᐅᓇᑕᕐᑐᓴᐅᖃᑎᒌᒃᔪᐊᑦ ᕉᐱᓂᐅᑉ ᕿᑐᕐᖓᖏᑦ ᐊᐅᓪᓚᕆᕗᑦ ᐅᓇᑕᕐᑐᒃᓴᐅᖃᑎᒌᒃᑐᑦ ᒪᓕᒡᓗᒋᑦ; ᐃᓕᓱᕆ ᓯᑎᐅᕆᐅᑉ ᐃᕐᓂᖓ ᐅᓇᑕᕐᑐᒃᓴᓄᑦ ᑖᒃᑯᓄᖓ ᐊᖓᔪᖅᑳᖑᓚᐅᕐᐳᖅ. 19ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᓯᒥᐅᓂᐅᑉ ᕿᑐᕐᖓᖏᓐᓄᑦ ᓯᓘᒥᓕ ᔪᕆᓴᑍᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ. 20ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᒑᑦ ᕿᑐᕐᖓᖏᓐᓄᑦ ᐃᓔᐊᓴᐱ ᑎᐅᐃᓕᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

21ᑖᒃᑯᐊ ᑭᖑᓂᖓᓂ, ᑯᕼᐊᑍᑎᐅᑉ ᑭᖑᕚᖏᑦ ᐊᐅᓪᓚᕆᕗᑦ, ᐊᒡᔭᕐᓯᓪᓗᑎᒃ ᐃᑦᔪᕐᓁᑦᑐᓂᒃ. ᑐᐱᕐᔪᐊᖅ ᓇᑉᐸᕐᑕᐅᔭᕆᕐᐸᓚᐅᕐᒪᑦ ᑖᒃᑯᐊ ᑎᑭᓚᐅᕐᑎᓐᓇᒋᑦ.

22ᐅᓇᑕᕐᑐᓴᐅᖃᑎᒌᒃᔪᐊᑦ ᐃᕗᕅᒥᐅᑉ ᕿᑐᕐᖓᖏᑦ ᐊᐅᓪᓚᕆᕗᑦ ᐅᓇᑕᕐᑐᒃᓴᐅᖃᑎᒌᒃᑐᑦ ᒪᓕᒡᓗᒋᑦ; ᐃᓔᓴᒪ ᐊᒥᕼᐆᑎᐅᑉ ᐃᕐᓂᖓ ᐅᓇᑕᕐᑐᒃᓴᓄᑦ ᑖᒃᑯᓄᖓ ᐊᖓᔪᖅᑳᖑᓚᐅᕐᐳᖅ. 23ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᒫᓇᓯᐅᑉ ᕿᑐᕐᖓᖏᓐᓄᑦ ᒐᒤᓕᓕ ᐱᑕᔪᕆᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ. 24ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᐱᓐᔭᒥᓂᐅᑉ ᕿᑐᕐᖓᖏᓐᓄᑦ ᐊᐱᑖᓂ ᒋᑎᐅᓂᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

25ᐅᓇᑕᕐᑐᓴᐅᖃᑎᒌᒃᔪᐊᑦ ᑖᓐ ᕿᑐᕐᖓᖏᑦ ᑭᖑᓪᓕᕐᐹᖑᓪᓗᑎᒃ ᐊᐅᓪᓚᕆᕗᑦ ᐅᓇᑕᕐᑐᒃᓴᐅᖃᑎᒌᒃᑐᑦ ᒪᓕᒡᓗᒋᑦ; ᐊᕼᐂᓱᕆ ᐊᒥᓴᑍᑉ ᐃᕐᓂᖓ ᐅᓇᑕᕐᑐᒃᓴᓄᑦ ᑖᒃᑯᓄᖓ ᐊᖓᔪᖅᑳᖑᓚᐅᕐᐳᖅ. 26ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᐋᓱᕆᐅᑉ ᕿᑐᕐᖓᖏᓐᓄᑦ ᐸᒊᓕ ᐆᑯᕌᓂᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ. 27ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᓈᑉᑕᓕᐅᑉ ᕿᑐᕐᖓᖏᓐᓄᑦ ᐊᕼᐂᕋ ᐃᓈᓂᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

28ᑖᒃᑯᐊ ᑕᕝᕙ ᐱᓱᒃᑐᑦ ᐃᓴᕆᐊᓕᐅᑉ ᕿᑐᕐᖓᖏᑕ ᑭᖑᓕᕇᖕᓂᖏᑦ, ᐅᓇᑕᕐᑐᒃᓴᐅᖃᑎᒌᑦ ᑭᖑᓕᕇᒃᓗᑎᒃ, ᐃᖏᕐᕋᓯᓕᕐᑎᓪᓗᒋᑦ.

29ᒨᓯᓯ ᕼᐅᐹᐱᒧᑦ ᐅᖃᕐᐳᖅ ᕆᐅᓕᐅᑉ ᐃᕐᓂᖓᓄᑦ ᒥᑎᐊᓂᒥᐅᑕᕐᒧᑦ ᓴᑭᒥᓄᑦ, “ᐊᐅᓪᓚᓕᕋᑦᑕ ᓄᓇᒧᑦ ᐊᑕᓂᐅᑉ ᐅᖃᐅᓯᕆᔭᖓᓄᑦ, ‘ᓄᓇ ᐃᓕᑦᓯᓐᓄᑦ ᑐᓂᓂᐊᕐᐸᕋ,’ ᐅᕙᑦᑎᓐᓄᑦ ᐃᓚᐅᓚᐅᕆᑦ ᑲᒪᒋᑦᓯᐊᕐᓂᐊᕐᐸᑦᑎᒋᑦ; ᐊᑕᓂᖅ ᐊᖏᕐᓯᒪᖕᒪᑦ ᐱᐅᔪᓂᒃ ᐱᓂᐊᕐᓂᕋᕐᓗᓂ ᐃᓴᕆᐊᓕᒧᑦ.”

30ᑖᓐᓇ ᑭᐅᕗᖅ, “ᐃᓚᐅᓂᐊᖏᓐᓇᒪ, ᐊᐅᓪᓚᕐᓂᐊᕐᐳᖓᓕ ᓇᖕᒥᓂᖅ ᓄᓇᓐᓄᑦ, ᐃᓚᓐᓄᑦ ᐃᓅᖃᑎᓐᓄᑦ.”

31ᒨᓯᓯᐅᓪᓕ ᐅᖃᐅᑎᕚ, “ᐊᑏ ᐅᕙᑦᑎᓐᓄᑦ ᐃᓚᐅᑐᐃᓐᓇᓚᐅᕆᑦ, ᖃᐅᔨᒪᒐᕕᑦ ᓇᒧᑦ ᑕᖕᒫᕆᐊᖃᕐᓂᑦᑎᓐᓂᒃ ᖃᐅᔨᒪᔨᒋᓂᐊᕋᑦᑎᒋᑦ. 32ᐅᕙᑦᑎᓐᓄᑦ ᐊᐅᓪᓚᖃᑕᐅᒍᕕᑦ, ᐱᑎᑕᐅᖃᑎᒋᓂᐊᕐᐸᑦᑎᒋᑦ ᐱᐅᔪᓂᒃ ᐊᑕᓂᐅᑉ ᑐᓂᔭᖏᓐᓂᒃ ᐅᕙᑦᑎᓐᓄᑦ.”

33ᑕᕝᕙ ᐊᑕᓂᐅᑉ ᖃᖅᑲᖁᑎᖓᓂᑦ ᐊᐅᓪᓚᕐᐳᑦ ᐃᖏᕐᕋᓪᓗᑎᒃ ᐅᓪᓗᓂᒃ ᐱᖓᓱᓂᒃ; ᐊᑕᓂᐅᓪᓗ ᐊᖏᖃᑎᒌᒍᑎᖓᑕ ᐃᒃᓯᕐᕕᖁᑎᖓ ᓯᕗᓪᓕᐅᑎᑕᐅᓚᐅᕐᐳᖅ ᐃᖏᕐᕋᓪᓗᑎᒃ ᐅᓪᓗᓂᒃ ᐱᖓᓱᓂᒃ, ᑕᖕᒫᕐᕕᒋᓂᐊᕐᑕᒥᖕᓂᒃ ᕿᓂᕐᓗᑎᒃ. 34ᐊᑕᓂᐅᑉ ᓄᕗᔭᖓ ᐅᓪᓗᒃᑯᑦ ᖁᓛᓃᓚᐅᕐᐳᖅ ᑕᖕᒫᕐᓯᒪᕕᖕᒥᑦ ᐃᖏᕐᕋᑎᓪᓗᒋᑦ. 35#ᐃᓐᖏᕈᑦ 68:1.ᑕᕝᕙ ᑍᒤᓕᓚᐅᕐᐳᖅ, ᐃᒃᓯᕐᕕᒃ ᐊᖏᕈᑎᑕᓕᒃ ᐊᐅᓪᓚᕈᑎᔭᐅᓕᕌᖓᑦ, ᒨᓯᓯ ᐅᖃᕐᐸᓚᐅᕐᐳᖅ: “ᐊᑕᓃᖅ, ᒪᑭᓕᕆᑦ! ᐊᑭᕋᑎᑦ ᐊᕙᒻᒧᑦ ᕿᒫᓕᑦ, ᐃᓕᖕᓂᒡᓗ ᐱᐅᒃᓴᖏᑦᑐᑦ ᓵᖕᓂᑦ ᕿᒪᒃᓯᓕᑦ.” 36ᐃᒃᓯᕐᕕᒃ ᓄᖅᑲᕌᖓᑦ ᐅᖃᕐᐸᓚᐅᕐᐳᖅ: “ᐊᑕᓃᖅ, ᐅᑎᓕᕆᑦ, ᐃᓴᕆᐊᓕᐅᑉ ᓈᓴᒐᒃᓴᐅᖏᑦᑐᕐᔪᐊᖁᑎᖏᓐᓄᑦ ᑕᐅᓴᑎᕐᔪᐊᓄᑦ.”

اکنون انتخاب شده:

ᒨᓯᓯ ᓯᑕᒪᖏᑦ 10: EAIB

های‌لایت

کپی

مقایسه

به اشتراک گذاشتن