ᒨᓯᓯ ᓯᑕᒪᖏᑦ 5

ᐅᒃᐱᕐᓂᖅ ᐱᓪᓗᒍ ᓴᓗᒤᑦᑐᑦ ᐃᓛᒃᑰᕐᑎᑕᐅᓂᖏᑦ

1ᐊᑕᓂᕐᓗ ᐅᖃᓚᐅᕐᐳᖅ ᒨᓯᓯᒧᑦ, ᐃᒤᓕᓪᓗᓂ, 2“ᐃᓴᕆᐊᓕᐅᑉ ᕿᑐᕐᖓᖏᑦ ᐱᖁᓚᐅᒃᑭᑦ ᑕᖕᒫᕐᓯᒪᕕᖕᒥᑦ ᐊᐅᓪᓚᕐᑎᑦᓯᖁᓗᒋᑦ ᐸᕐᑎᕐᑐᓕᒫᓂᒃ, ᒪᕿᖃᑦᑕᕐᑐᓕᒫᓂᒡᓗ, ᑐᖁᖓᔪᒥᒡᓗ ᐊᒃᑐᕐᓯᓂᕐᒥᖕᓄᑦ ᓇᕐᕈᓇᕐᓯᓯᒪᔪᓕᒫᓂᒃ. 3ᑕᒪᕐᒥᒃ ᑍᒤᑦᑐᑦ ᐊᐅᓪᓚᕐᑎᑕᒃᓴᕆᕙᓯ ᐊᖑᑎᑦ ᐊᕐᓁᓪᓗ; ᓄᓇᓖᑦ ᓯᓚᑖᓃᑦᓴᕆᐊᖃᕐᐳᑦ, ᑕᖕᒫᕐᓯᒪᕕᖕᒥᓂᒃ ᓇᕐᕈᓇᕐᓯᑎᑦᓯᖁᓇᒋᑦ, ᑖᒃᑯᐊ ᐊᑯᓐᓂᖓᓐᓂ ᐃᓂᖃᕋᒪ.” 4ᐃᓴᕆᐊᓕᐅᑉ ᕿᑐᕐᖓᖏᑦ ᑍᒤᓕᐅᓚᐅᕐᐳᑦ, ᑕᖕᒫᕐᓯᒪᔪᑦ ᓯᓚᑖᓄᑦ ᐊᐅᓪᓚᕐᑎᓪᓗᒋᑦ; ᐊᑕᓂᐅᑉ ᒨᓯᓯ ᐅᖃᐅᑎᓚᐅᕐᒪᒍ, ᐃᓴᕆᐊᓕᐅᑉ ᕿᑐᕐᖓᖏᑦ ᑍᒤᓕᐅᓚᐅᕐᐳᑦ.

ᖃᕿᐊᓕᕐᓃᑦ ᐅᑎᕐᑎᑕᐅᓂᕐᓗ

5 # ᒨᓯᓯ ᐱᖓᔪᖏᑦ 6:1-7. ᐊᑕᓂᖅ ᐅᖃᕐᐳᑦ ᒨᓯᓯᒧᑦ ᐃᒤᓕᓪᓗᓂ, 6“ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᐅᑎᓚᐅᒃᑭᑦ: ‘ᐊᖑᑎᑦ ᐊᕐᓁᓪᓘᓐᓃᑦ ᐊᔪᕐᑐᓕᒃᐸᑕ ᐃᓄᐃᑦ ᐊᔪᕐᑐᓕᓂᕆᕙᒃᑕᖏᓐᓄᑦ ᐊᑕᓂᕐᒧᑦ ᑲᔪᓯᖃᑦᑕᖏᓐᓂᕐᒧᑦ, ᑍᒤᓕᐅᕐᑐᖅ ᐸᓯᔭᒃᓴᐅᕗᖅ, 7ᑕᕝᕙ ᖃᕿᐊᓕᕆᐊᖃᕐᐳᖅ ᐊᔪᕐᑐᓕᓂᕆᓚᐅᕐᑕᒥᓂᒃ; ᓱᓇᒥᒡᓗᒋᑦ ᐅᑎᕐᑎᑦᓯᔭᕆᐊᖃᓕᕐᐳᖅ ᐊᔪᕐᑐᓕᓂᕆᓚᐅᕐᑕᒥᓂᒃ, ᑕᓪᓕᒪᐅᓕᓂᖓᑕ ᐊᕕᒃᑐᕐᓂᖓᓂᒃ ᐊᑕᐅᓯᕐᒥᒃ ᐃᓚᒃᑲᓐᓂᕐᓗᒍ ᐱᐅᖏᑦᑐᓕᕝᕕᒋᓚᐅᕐᑕᓂ ᑐᓂᓯᕕᒋᓗᒍ. 8ᐃᓄᒡᓕ ᐃᓚᖃᖏᑉᐸᑦ ᐅᑎᕐᑎᑦᓯᕕᐅᔪᒃᓴᒥᒃ ᐊᔪᕐᑐᓕᓂᖅ ᐱᓪᓗᒍ, ᐊᔪᕐᑐᓕᓂᕐᒧᑦ ᐅᑎᕐᑎᑦᓯᒍᑎ ᑐᓂᔭᐅᔭᕆᐊᖃᕐᐳᖅ ᐊᑕᓂᕐᒧᑦ ᑐᓂᕐᕈᓯᕐᑎᑦᓯᔨᒧᑦ ᑐᓂᓗᒍ, ᐃᓚᓗᒍᓗ ᓰᐱᒥᒃ ᐊᖑᓴᓪᓗᕐᒥᒃ ᐃᓱᒪᒋᔭᐅᔪᓐᓁᕈᑎᒃᓴᒥᒃ, ᑖᑦᓱᒧᖓ ᑕᕝᕙ ᐃᓱᒪᒋᔪᓐᓁᕐᕕᐅᓂᐊᕐᐳᖅ. 9ᑐᓂᕐᕈᑕᐅᔪᓕᒫᑦ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ ᐃᑦᔪᕐᓁᓐᓂᕐᒧᑦ, ᑐᓂᕐᕈᓯᕐᑎᑦᓯᔨᒧᑦ ᑐᓂᔭᐅᔪᑦ, ᑖᑦᓱᒪ ᐱᒋᕔᑦ. 10ᐊᖑᑎᑦ ᐊᑐᓂᑦ ᐃᑦᔪᕐᓁᑦᑐᖁᑎᓂ ᓇᖕᒥᓂᖅ ᐱᒋᕔᑦ; ᐃᓄᐃᓪᓗ ᓱᓇᑐᐃᓐᓇᕐᒥᒃ ᑐᓂᕐᕈᓯᕐᑎᑦᓯᔨᒧᑦ ᑐᓂᔭᖏᑦ ᑐᓂᕐᕈᓯᕐᑎᑦᓯᔨᐅᑉ ᐱᒋᕔᑦ.’”

ᐊᕐᓁᑦ ᐅᐃᒥᖕᓂᒃ ᐊᓯᓐᓂᐊᕐᐸᒃᑐᑦ

11ᐊᑕᓂᖅ ᒨᓯᓯᒧᑦ ᐅᖃᕐᐳᖅ, ᐃᒤᓕᓪᓗᓂ, 12“ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᕐᕕᒋᒃᑭᑦ ᐃᒤᓕᓗᑎᑦ: ᐊᖑᑎᐅᑉ ᓄᓕᐊᖓ ᕿᒤᒃᐸᑦ ᐅᐃᒥᓂᒡᓗ ᐊᓯᓐᓂᐊᕐᓗᓂ. 13ᐊᖑᑎᒥᒡᓗ ᐊᓯᐊᓂᒃ ᐃᓐᓇᖓᖃᑎᖃᕐᓗᓂ, ᐅᐃᖓ ᖃᐅᔨᑎᓐᓇᒍ, ᑕᕝᕙ ᐃᒻᒥᓂᒃ ᐃᑦᔪᕐᓇᕐᑎᑉᐳᖅ, ᖃᐅᔨᔭᐅᖏᓐᓇᒥ ᐊᓯᒥᓄᑦ ᓁᐱᑕᐅᒐᓂᓗ. 14ᐅᐃᖓᓕ ᓯᖕᓇᓕᕐᐸᑦ ᓄᓕᐊᓂ ᐸᓯᓗᒍ ᐊᕐᓇᖅ ᐃᒻᒥᓂᒃ ᐃᑦᔪᕐᓇᕐᓯᑎᑉᐸᑦ ᐅᕝᕙᓘᓐᓃᑦ ᐅᐃᖓ ᓯᖕᓇᓕᕐᐸᑦ ᓄᓕᐊᓂ ᐸᓯᓗᒍ ᓄᓕᐊᖓ ᐃᑦᔪᕐᓇᕐᓯᓯᒪᓐᖏᑎᓪᓗᒍ, 15ᑕᕝᕙ ᓄᓕᐊᓂ ᑐᓂᕐᕈᓯᕐᑎᑦᓯᔨᒧᑦ ᐂᑎᑕᒃᓴᕆᕚ. ᓇᖕᒥᓂᕐᓗ ᑐᓂᕐᕈᓯᕐᓗᓂ ᓂᐊᖂᔭᒃᓴᒥᒃ ᐹᕐᓕᒥᒃ 2ᓖᑕᑐᑦ ᐅᖁᒤᑎᒋᔪᒥᒃ; ᐅᕐᓱᒥᒃ ᐃᓚᖏᓪᓗᒍ, ᑎᐱᑦᓯᐊᕆᒃᑐᒥᒡᓗ ᕗᕌᑭᓐᓴᓐᓯᒥᒃ ᐃᓚᖏᓪᓗᒍ, ᑐᓂᕐᕈᑕᐅᖕᒪᑦ ᓯᖕᓇᓂᖅ ᐱᑦᔪᑎᒋᓪᓗᒍ, ᑐᓂᕐᕈᑕᐅᖕᒪᑦ ᐃᖅᑲᐅᒪᓂᖅ ᐱᑦᔪᑎᒋᓪᓗᒍ, ᐱᐅᖏᑦᑐᓕᓂᕐᒥᒃ ᐃᖅᑲᐅᒪᑦᔪᑕᐅᖕᒪᑦ.

16“ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐊᕐᓇᖅ ᕾᑎᑕᒃᓴᕆᕚ, ᐊᑕᓂᐅᓪᓗ ᓵᖓᓄᑦ ᐱᑎᑦᓴᕆᐊᖃᕐᐹ. 17ᑐᓂᕐᕈᓯᕐᑎᑦᓯᔨ ᐃᒥᕐᒥᒃ ᐃᑦᔪᕐᓁᑦᑐᒥᒃ ᐱᔭᕆᐊᖃᕐᐳᖅ ᒪᕐᕋᕕᓂᕐᒥᒃ ᐃᒪᖃᐅᑎᒥᒃ, ᐳᔪᕐᓗᖕᒥᒡᓗ ᑐᐱᕐᔪᐊᑉ ᓇᑎᖓᓂᑦ, ᐃᒥᕐᒧᑦ ᐃᓕᓗᒍ. 18ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐊᕐᓇᖅ ᐊᑕᓂᐅᑉ ᓵᖓᓂ ᓂᑯᕕᑎᓪᓗᒍ, ᓂᐊᖁᖓᓗ ᐅᓖᕐᓗᒍ ᐃᖅᑲᐅᒪᓂᕐᒧᓪᓗ ᑐᓂᕐᕈᑎ ᑖᑦᓱᒧᖓ ᑐᓂᓗᒍ, ᓂᐊᖂᔭᒃᓴᖅ ᓯᖕᓇᓂᖅ ᐱᓪᓗᒍ ᑐᓂᕐᕈᑎ ᑐᓂᕐᕈᓯᕐᑎᑦᓯᔨ ᐃᒥᕐᒥᒃ ᑎᒍᒥᐊᕆᐊᖃᕐᐳᖅ ᒪᒤᓕᑎᓯᒪᔪᒥᒃ ᐃᑦᔪᕐᓇᕐᑎᑦᓯᔪᒥᒃ. 19ᑐᓂᕐᕈᓯᕐᑎᑦᓯᔨᐅᑉ ᐊᕐᓇᖅ ᐊᖏᕐᑎᑦᓴᕆᐊᖃᕐᐹ ᐅᖃᐅᑎᓗᒍ, ‘ᐊᖑᒻᒧᑦ ᑐᑎᒃᑕᐅᓚᐅᖏᒃᑯᕕᑦ, ᐅᐃᖕᓂᒡᓗ ᓴᓗᒤᑦᑐᓕᓂᕐᒧᑦ ᕿᒤᓚᐅᖏᓪᓗᑎᑦ, ᐅᐃᖕᓂᑦ ᐱᒋᔭᐅᑎᓪᓗᑎᑦ, ᕿᓚᕈᑦᔮᓕᕆᑦ ᐃᒥᕐᒥᑦ ᓴᓗᒤᑦᑐᒥᑦ ᐃᑦᔪᕐᓇᕐᑎᑦᓯᔪᒥᑦ. 20ᕿᒤᓚᐅᕈᕕᓪᓕ ᐅᐃᖕᓂᑦ ᐱᒋᔭᐅᑎᓪᓗᑎᑦ, ᐃᓕᖕᓂᒡᓗ ᓴᓗᒤᓕᑎᓚᐅᕈᕕᑦ ᐊᖑᒻᒧᑦ ᐅᐃᕕᑦ ᐊᓯᐊᓂᒃ ᐃᓐᓇᖓᖃᑎᖃᓚᐅᕈᕕᑦ,’ 21ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐊᖏᒻᒪᕆᖕᓂᕐᒧᑦ ᐱᑎᑕᒃᓴᕆᕚ ᐃᑦᔪᕐᓇᕐᑎᑕᐅᓂᖅ ᐱᓪᓗᒍ, ᐊᕐᓇᒧᑦ ᐅᖃᕐᓗᓂ, ‘ᐊᑕᓂᐅᑉ ᐃᑦᔪᕐᓇᕐᑎᓪᓕᑎᑦ, ᐃᓅᖃᑎᕕᑦ ᐊᑯᕐᖓᓐᓂ ᐊᖏᒻᒪᕆᖕᓂᕐᒧᑦ, ᓇᓕᒃᑳᕕᓪᓗ ᐊᑯᓐᓂᖓ ᓱᕈᕐᑎᓪᓕᐅᒃ, ᓈᖅᑯᕐᑐᓯᑎᓪᓗᑎᓪᓗ; 22ᐃᒥᕐᓗ ᐅᓇ ᐃᑦᔪᕐᓇᕐᑎᑦᓯᔪᖅ ᓈᕐᓄᑦ ᐱᓕ, ᓈᖅᑯᕐᑐᓯᓕᕆᑦ ᓇᓕᒃᑳᒃᑭᒡᓗ ᓱᕈᕐᓗᑎᒃ.’#5:22 ᓇᓕᒃᑳᒃᑭᒡᓗ ᓱᕈᕐᓗᑎᒃ ᑐᑭᓕᒃ ᕿᑐᕐᖓᕐᑖᕈᓐᓁᓪᓕᓕᕆᑦ ᐊᕐᓇᖅ ᑭᐅᓗᓂ, ‘ᐂᒤᓐ, ᑍᒤᓕᕐᓕ.’

23“ᑐᓂᕐᕈᓯᕐᑎᑦᓯᔨᐅᑉ ᐃᑦᔪᕐᓇᕐᑎᑕᐅᓃᑦ ᒪᒃᐱᕐᑐᒐᕐᓄᑦ ᑎᑎᕋᕐᑕᒃᓴᕆᕔᑦ, ᐃᕐᕈᕐᑐᕐᓗᒋᓪᓗ ᐃᒥᕐᒧᑦ ᒪᒤᓕᑎᓯᒪᔪᒧᑦ. 24ᐊᕐᓇᖅ ᐃᒥᕐᒥᒃ ᐃᑦᔪᕐᓇᕐᓯᑎᓯᒪᔪᒥᒃ ᐃᒥᕐᑎᑦᓴᕆᐊᖃᕐᐹ, ᐃᒥᖅ ᑎᒥᖓᓄᑦ ᐃᑎᕈᓂ ᑎᒥᖓ ᖃᓯᓕᓇᕐᑐᒥᒃ ᐃᒃᐱᖕᓂᕐᓂᐊᕐᐳᖅ. 25ᑐᓂᕐᕈᓯᕐᑎᑦᓯᔨᐅᑉ ᓂᐊᖂᔭᒃᓴᖅ ᓯᖕᓇᓂᕐᒧᑦ ᑐᓂᕐᕈᑕᐅᔪᖅ ᐊᕐᓇᒥᑦ ᑎᒍᓗᒍ, ᐊᑕᓂᐅᑉ ᓵᖓᓂ ᐃᓵᒃᑕᕈᑎᔭᕆᐊᖃᕐᐹ, ᑐᓂᕐᕈᓯᕐᕕᖕᒧᐊᕐᓗᒍᓗ. 26ᑐᓂᕐᕈᓯᕐᑎᑦᓯᔨ ᑐᓂᕐᕈᑎᒥᑦ ᐊᒡᒐᖕᒥᓄᑦ ᑎᒍᓯᓗᓂ, ᐊᔪᕐᓂᕐᒥᒃ ᐃᖅᑲᐅᒪᑦᔪᑎᒥᒃ, ᐃᑯᐊᓚᑎᑕᒃᓴᕆᕚ ᑐᓂᕐᕈᓯᕐᕕᖕᒥ, ᑭᖑᓂᖓᒍᑦ ᐊᕐᓇᖅ ᐃᒥᕐᒥᒃ ᐃᒥᕐᑎᓕᕐᓗᒍ. 27ᐃᒥᕐᒥᒃ ᐃᒥᕐᑎᒃᑯᓂᐅᒃ ᑕᕝᕙ ᐃᒤᑦᑑᓕᕋᔭᕐᐳᖅ, ᐃᒻᒥᓂᒃ ᓴᓗᒤᓕᑎᓯᒪᒍᓂ ᐅᐃᒥᓂᒃ ᐊᓯᓐᓂᐊᕐᓯᒪᒍᓂ, ᐃᒥᖅ ᑎᒥᖓᓄᑦ ᐃᑎᕐᑐᖅ ᑖᓐᓇ ᖃᓯᓕᓇᕐᓂᐊᕐᐳᖅ, ᓈᖅᑯᕐᑐᓯᓗᓂ, ᓇᓕᒃᑳᖓᓗ ᓱᕈᕐᓗᓂ,#5:27 ᓇᓕᒃᑳᖓᓗ ᓱᕈᕐᓗᓂ ᑐᑭᓕᒃ ᕿᑐᕐᖓᕐᑖᕈᓐᓁᓪᓕᓗᓂ ᐊᕐᓇᕐᓗ ᐃᓅᖃᑎᒥ ᐊᑯᕐᖓᓐᓂ ᐃᑦᔪᕐᓇᕐᓯᓂᐊᕐᐳᖅ. 28ᐊᕐᓇᕐᓕ ᐃᒻᒥᓂᒃ ᓴᓗᒤᓕᑎᓯᒪᖏᒃᑯᓂ, ᓴᓗᒪᑦᓯᐊᕈᓂᓗ, ᑕᕝᕙ ᕿᓚᕈᑦᔮᕐᓯᒪᓂᐊᕐᐳᖅ ᕿᑐᕐᖓᕐᑖᕈᓐᓇᕐᓂᐊᕐᓗᓂᓗ.

29“ᑕᒪᑦᔭ ᐱᖁᔭᖅ ᓯᖕᓇᓂᐅᑉ ᓇᓛᓄᑦ, ᓄᓕᐊᖅ ᐅᐃᒥᓄᑦ ᐱᒋᔭᐅᓗᓂ, ᕿᒤᒃᐸᑦ ᐃᒻᒥᓂᒡᓗ ᓴᓗᒤᓕᑎᓪᓗᓂ, 30ᐅᕝᕙᓘᓐᓃᑦ ᐊᖑᑦ ᐊᓂᕐᓂᕐᒧᑦ ᓯᖕᓇᓂᕐᒧᑦ ᑎᑭᑕᐅᒃᐸᑦ, ᓄᓕᐊᓂ ᐸᓯᓕᕐᓗᒍ ᓯᖕᓇᓗᓂ; ᑕᕝᕙ ᐊᕐᓇᖅ ᐊᑕᓂᐅᑉ ᓵᖓᓄᑦ ᐱᑎᑦᓴᕆᐊᖃᕐᐹ, ᑐᓂᕐᕈᓯᕐᑎᑦᓯᔨᐅᓪᓗ ᐱᖁᔭᖅ ᒪᓕᒡᓗᒍ ᐱᓂᐊᕐᕕᒋᔭᕆᐊᖃᕐᐹ. 31ᐊᖑᑦ ᐊᔪᕐᓂᕐᒥᑦ ᐸᓯᔭᒃᓴᐅᓂᐊᖏᓚᖅ, ᐊᕐᓇᐅᓪᓕ ᐸᓯᔭᒃᓴᐅᓂᓂ ᐊᑐᕐᓂᐊᕐᐹ.”

اکنون انتخاب شده:

ᒨᓯᓯ ᓯᑕᒪᖏᑦ 5: EAIB

های‌لایت

کپی

مقایسه

به اشتراک گذاشتن