संत.लुकास 24

ईसु जिवीःड बिरिःड नेनाय

(संत.मत्‍ती 28:1–10; संत.मरकुस 16:1–18; संत.जोहन 20:1–10)

1तेकर सथाअ रेनअः पहिल हिला एतवार निदवारे हिंकु आउराईत आकु सपड़ाव लआ बढ़ियाँ सोहों जिनीस के आगु केते, मारघटा हीःग नेनाकु। 2तब हुंकू मारघटा रेनअः दुवारते रअः टुकू ओचोः ओना नेल लअकु, 3तेकर हुंकू भीतरी बोलो केते; परभु ईसु आला होड़ो के काकु नाम लआ। 4तेकर हुंकू सोंचाय केनाकु ची दो नेलेपे लवकाः गेन्दरअ सोलोंग केते बनहोंड़ होड़ हुंकू दुबाःड़े हीःग केते तिगुः नाकिन दो हुंकू छकित नाकु। 5तेकर हुंकू बोरो केते, ओत पखा बोहोअ गाड़ा केदाकु, हिमीन रे हुंकिन, “आपे जिवीःड उनी के गोएःग उनकु ताला रे एता लःअय दांड़ाः दियापे मेन केते हुंकू के कंहड़ीओ लिकुआ किन? 6#सं.मत्‍ती 16:21; 17:22,23; 20:18,19; सं.मर 8:31; 9:31; 10:33,34; सं.लुका 9:22; 18:31–33हुनी नोआँड़े कनियाँ हुनी दो जिवीःड बिरिःड नाय। गलील रे थिनाय हिमीन रे एतान कंहड़ीओ थिलपेआय होना के उयहारे पे, 7नोःआँ जरूरी एदनाअ ची, ‘हुनी दो मनवा होपोन पापीकु आला तीः रे सःब ची कोआय, तेकर कुरूस तेङ रे गोएःग कोआय, हेतरअ पे रोज रे जिवीःड बिरिःड कोआय’” मेन केते कंहड़ीओ थिलपेआय।

8तब होले हुंकू ईसु आला कंहड़ी के उईहार लअकु, 9तेकर मारघटा दुबाःड़े तरअः रूवाड़ केते, हुंकू गारहो चेला ताय के आउर एटाअ होड़ जामेकु के होना बात के उदूः लिकुआकु। 10मरियम, मगदलिनी रिनी, तेकर जोअना तेकर याकुब आली एंगाते, मरियम आउर एटाअ गाती आउराईतकु नोःआँ कंहड़ी के प्रेरितकु के उदूः लिकुआकु। 11बकिर आउराईतकु आला कंहड़ी हुंकू के गाम लकान आदा नेना, तेकर हुंकू आला कंहड़ी के काकु बिसवास लआ। 12बकिर पतरस बिरिःड केते, मारघटा ठाँव रे नीर सेन नेनाय; तेकर कोयोअ केते गेन्दरअ भाईर के दोहो लआ नेल लःअय। तेकर जे हुयाव थिना के आएंग आला मन रे चाकीतोःते ओड़ाअ ताय सेन नेनाय।

ईम्माऊस सेनोः होरा रे चेला ताय लोः

(संत.मरकुस 16:12–13)

13हेन हिला गी बनहोंड़ चेला ताय किन ईम्माऊस नुमू रेनअः डिही सेनोः केनाकिन, होना जिरोसलेम तरअः चाईर कोस लंका ताहिना। 14हुंकिन नोःआँ हुयाव नेना जामा बात के कंहड़ी ईदी केनाकिन। 15तेकर हुंकिन कंहड़ी हेतरअ कुली उपड़ीनोः केनाकिन, हिमीन रे ईसु आएंग गी हेनाःड हीःग केते हुंकिन लोः गातीः नाय; 16बकिर हुंकिन नेल केते, होः ककिन चिचिनहा दाड़ी लिया। 17हुनी, “आबेन सेनोः-सेनोः, नोःआँ एतान कंहड़ी ताना बेन?” मेन केते कुली लिकिनाय।

तेकर हुंकिन उदास ते तिंगुः नाकिन। 18बकिर हुंकिन रे कलयोपस नुमू रिनी मिहोंड़, “आम जिरोसलेम रे परदेसी हेके, जे होला मनधेर हुयाव नेना, होना बात के आम एकला गी काम पाड़ी ताना एतान?” बेता लियाय।

19हुनी, “एतान बात?” मेन केते कुली लिकनाय।

हुंकिन “नासरत रिनी ईसु बारे, जे परमेसर हेतरअ जामे होड़कु आला मड़ांग रे कामी हेतरअ कंहड़ी रे सवांगिया आगमजानी थिनाय,” बेता लियाकिन। 20“तेकर आले आलकु बड़े पुरोहितकु हेतरअ नेताकु हुनी के गो-गोएःग ची लःअय हुकूम एमा लियाकु, तेकर कुरूस तेङ रे रकाःब केते गोएःग लियाकु। 21बकिर आले नुई इसराइलीकु के छुटकारा एम केआय मेन केते आसरा थिनाले! नोःआँ जामा हुयाव नेना, होना बात रअः तिसिंग पे रोज हेके। 22हेतरअ आले के थोड़ेक आउराईतकु छकित ची तदलेआकु; जे निदवारे मारघटा ठाँव रे सेन थिनाकु। 23तेकर हुंकू हुनी आला गोएःग होड़ो के काकु नाम लआ तेकर रूवाड़ हीःग नेनाकु। हेतरअ आले सिरमादूत के दर्सन रे नेल लिकिनले, हुंकिन हुनी जिवीःड एदानिया बेता लेले-आकिन मेन केते कंहड़ीओ लेलेआकु। 24तेकर आले आलकु थोड़ेक गातीकु होः मारघटा ठाँव रे सेन नेनाकु, तेकर आउराईतकु आला कंहड़ी लकान नेल लअकु बकिर ईसु के काकु नेल लिया।”

25तेकर हुनी, “ए बोकाकिन, आगमजानीकु आला जामा कंहड़ी के बि-बिसवास रे केटेःग मन रिनकिन! 26ख्रीस्त नोःआँ जामा के सहाव केते हेतरअ आएंग आला महिमा रे बोलोयोः जरूरी का ताहीना एतान?” बेता लिकिनाय। 27तब ईसु मुसा तरअः सुरू केते जामे आगमजानीकु आला, जामा धरम पुथी मेसे तरअः आएंग बारे लिखा लअः कंहड़ी रेनअः मने समझाव लिकिनाय।

28तेकर हुंकू हिमने रे सेनोः केनाकिन डिही सोदोर नेना कु, हेतरअ ईसु मड़ांग सेनोः लकान नेनाय; 29बकिर हुंकिन, “दु आलिंग लोः ताहीनोः मे, आयुबोः ताना हेतरअ बोंगा हासुरोः तनाय” मेन केते रूवाड़ लियाकिन। तेकर हुंकिन लोः ताहिनोः लःअय बोलो नेनाय। 30तेकर हुनी हुंकिन लोः जोजोम दुड़ूः नेनाय, हिमीन रे लाःड सःब केते, धन्यवाद लःअय; हेतरअ होना के केचाअ केते हुंकिन के एमा लिकिनाय। 31हिमीन रे हुंकिन आला मेःड उघड़ाव ना, हेतरअ हुनी के चिनहा किदयाकिन तेकर हुनी हुंकिन आला मेःड तरअः छपीत नाय। 32तेकर हुंकिन, “हुनी होरा रे आलांग लोः बाते केनाय हेतरअ धरम पुथी रेनअः माने समझाव लेएङ केनाय, हिमीन रे आलांग आला मन का ललाईतोः केना एतान?” मेन केते कंहड़ीयोः तनाकिन।

33हुंकिन हिमीन रेगी बिरिःड केते जिरोसलेम रूवाड़ नेनाकिन, तेकर हुंकू गारह प्रेरितकु हेतरअ गाती ताकु के जुमाव उनकु नाम लिकुआकिन 34तेकर हुंकू, “साथेगी परभु जिवीःड बिरिःड तनाय! हेतरअ सिमोन नेल तदियाय” मेनोः केनाकु।

35हिमीन रे हुंकिन होरा रे हुयाव नेना, तेकर एता लकान लाःड के केचाअ-गेकेनाय हिमीन रे हुनी के एता लकान चिनहा लियाकिन, के हुंकिन हुंकू के उदूः लिकुआकिन।

ईसु चेला ताय लोः देखार नेनाय

(संत.मत्‍ती 28:16–20; संत.मरकुस 16:14–18; संत.जोहन 20:19–23; प्रेरित.कामी 1:6–8)

36हुंकू नोकान कंहड़ी केनाकु हिमने रेगी, ईसु आएंग गी हुंकू आला तलारे हीःग केते तिंगुः नाय, हेतरअ “आपे के सानती भेटाअः” बेता लिकुआय।

37बकिर हुंकू घबराव नाकु हेतरअ बोरोः नाकु, हुंकू मुवाँ आतमा के नेल दियाबु नोकान सोंचाव लअकु। 38तेकर हुनी हुंकू के, “एता लःअय बोर तनापे? हेतरअ आपे मन रे एता लःअय संदेह दापे? बेता लिकुआय। 39ईङ आला तीः, हेतरअ जांगा तिंग के नेलेपे, ईङ गी हेके, ईङ के छुवाँव केते नेलीङपे। ईङ रे नेलदापे लकान मुवाँ आतमा रे सिकार, हेतरअ जांग का ताहिनोआँ।”

40नोकान कंहड़ी केते हुनी आएंग आला जांगा तीः ताय के हुंकू के उदूः लिकुआय। 41तेकर हुंकू रिझते काकु बिसवासे केना, हेतरअ हुंकू छकितोः केनाकु; दो हुनी हुंकू के, “नोआँड़े आपे दुबाःड़े जोजोम लःअय जहान एदनाअ एतान?” मेन केते कुली लिकुआय। 42हुंकू हुनी के सुनूम रे इसिन लिनी हाकु खांड़ा के एमा लियाकु, 43हेतरअ हुनी होना के तेला केते आकु मड़ांग रे जोम लःअय।

44तेकर हुनी, “मुसा आला कनहुन रे आगमजानीकु हेतरअ भजन सिरिंग रेनअः पुथी रे जे लिखा लअः एदनाअ, होना जामा पुरायोः एदनाअ, नोःआँ कंहड़ी के आपे लोः ताहिनिंग हिमीन रेगी कंहड़ीओ ताही लिपीईंग” बेता लिकुआय।

45हेतरअ हुनी धरम पुथी समझअ लःअय बुधी ताकु के खोलाव लःअय, 46-47तेकर हुनी हुंकू के निआँ लकान लिखा ताना “ख्रीस्त बिपाईत सहाव केआय हेतरअ पे रोज रे गोएःग उनकु तरअः जिवीःड बिरिःड कोआय, हेतरअ हुनी आला नुमू तरअः जिरोसलेम तरअः सुरू केते, जाईत रे पाप छमा लःअय मन रूवाड़ रेनअः परचार केआकु मेन केते कंहड़ी लःअय। 48आपे नोःआँ बात रिनकु गोवाह हेके। 49#प्रे.कामी 1:4तेकर नेलेपे बाबा तिंग पबितर आतमा एमोअ लःअय वादा तदाय, होना के ईङ आपे तेङ रे कुलगोःडियीङ, हिना लःअय जब तक आपे सिरमा तरअः पबितर आतमा रआ सवांग कापे नामेआँ जगुत, आपे निआँ जिरोसालेम रेपे ताहिनोः” बेता लिकुआय।

ईसु सिरमा रकाःब नेनाय

(संत.मरकुस 16:19–20; प्रेरित.कामी 1:9–11)

50 # प्रे.कामी 1:9–11 तेकर हुनी बैथनिया जगुत बाहरी ते ईदी लिकुआय, हेतरअ तीः ताय के आलगाव केते हुंकू के आसीस एमा लिकुआय। 51तेकर हुंकू के आसीस एमा याःते हुंकू तरअः आलगे नेनाय, हेतरअ सिरमा रकाःब नेनाय। 52तेकर हुंकू हुनी के आराधना केते, पुरा रिझते जिरोसलेम कु रूवाड़ नेनाकु, 53तेकर हुंकू रोज बड़े बिनती ओड़ाअ सेन केते परमेसर आला धन्यवाद यअते समय बिताय केनाकु।

اکنون انتخاب شده:

संत.लुकास 24: ASR

های‌لایت

کپی

مقایسه

به اشتراک گذاشتن