1CO 4

परमेश्वर कारभारी

1मंदी मोमलान फक्त ख्रिस्तन सेवक समजायाला यवारनी परमेश्वरदी रहस्य शप्पेतोर कारभारी बनाया मतेदेंक वच्चीनाद. 2इल्ला सुस्ते इदी नक्की उंडाद की, जबाबदारी उंडीनोड कारभारी विश्वासयोग्य उंडाने बेक. 3ना इचांग इदी शेंगेम शिन्नाद माटा उंडाद की मीर लेकाते मन्सुलाला यवाडाना न्यायाधीश नाद न्याय शेयाला, निन स्वता पण नाद न्याय शेयान. 4येनटीक की जरी नाद विवेक नाक दोष इयाद तरी दानता निन निर्दोष ठरास्तान इल्ला लेद. इड प्रभुड उंडाड यवाड नाद न्यायनिवाडा शेशेतोड उंडाड. 5दिनिचांग योग्य वेळ दावा काना मुंची याड नंताक प्रभुड दाड आड नंताक येनटीदुच न्यायनिवाडा शेयाकुंडा. वाडे मोब्बु गडदुला दागिने माटलान यलगुला सुपीच्ची इंगा अंतकरणलोन विचारलान प्रगट शेशी, आप्पुड परमेश्वर तीकेल प्रत्येक मनशीद प्रशंसा आय्यी.

ख्रिस्तन इचांग मुर्खता

6इप्पुड, हे आक्का तम्मुळ्ळालाला, इ माटलाला नाद स्वताद इंगा अपुल्लोनदी उदाहरण आंका मिक शप्पीनान. दिनिचांग की,

पवित्र शास्त्रला राशीने माटलाद उल्लंघन कावाराद आंटे वगा मनशीद पक्ष तिस्केन इंगोगोनकी विरोध शेशी मीर घमंडता निंडी फोवाराद.

7येनटीक की नी दिंटल्या इंगा इंगोगोर दिंटल्या फरक यवाड शेस्ताड? इंगा निक शिक्कालेद इल्ला नी देगार येम उंडाद? जर निक आंता शिक्कीनाद, तर निक शिक्कालेद इल्ला घमंड येनटीक शेस्ताव? 8मीर पहिलाने तृप्त आयनार, धनवान आयनार, मिक इल्ला वाटास्ताद की मोमलान इडशी मीर राजाल आयनार इंगा मीर राजाल आइंटे तर शिंगार आयतुन्या, दिनिचांग की मिम पण मी जताक राजाल आयतुंटीम. 9येनटीक की नाक वाटास्ताद की परमेश्वर मोमलान प्रेषितलान आंदार आयनेंका आ मंदी लेका ठराय मतनाड, यवारदी सच्चेद आज्ञा आय फोयनाद, येनटीक की मिम दुन्यामला स्वर्गदुतला इचांग इंगा मंदी इचांग तमाशा बनाशीनाम. 10मिम ख्रिस्तन इचांग मुर्ख उंडाम, मिक इल्ला वाटास्ताद येम? की मीर ख्रिस्तन संगतीता बुद्धिमान आयनार! मिम अशक्त उंडाम, पण मीर बलवान उंडार! मिक आदर शिक्ताद, पण माद अपमान आयताद! 11इप्पुड नंताक मिम तिनांदे इंगा तागांदे उंडाम, इंगा फाताय शिंगीने चिंध्याल फेटकुंटाम, मंदी मा जताक वाईट वागास्तार इंगा माक निलचेदेंक इल्लु लेद. 12मा शेयता फनी शेशीगास मिम मेहनत शेस्ताम. माद निंदा आयताद आप्पुड मिम वारकी आशिर्वाद इस्ताम. 13यप्पुड माद छळ आयताद, आप्पुड मिम सहन शेस्ताम इंगा यप्पुड माद बदनामी आयताद, आप्पुड पण मिम शिंगारे माटलाडताम, इबद नंताक मिम दुन्याम इचांग गाळ इंगा कचरा लेका उंडाम.

ख्रिस्तद अनुकरण शेशेद पौलदी चेतावनी

14निन मिमलान शिग्गुना केडपेदेंक इदी रायान, पण ना प्रिय बिळ्ळालेका समजाशी मिक चेतावनी इस्तान. 15येनटीक की जरी मिक ख्रिस्तला दहा हजार गुरुल उंटे तरी शेंगेम आब्बागार लेर येनटीक की ख्रिस्त येशुला शुभवर्तमान तीकेल निन मिक जन्म इच्चीनान. 16दिनिचांग निन मिक शेतलु जोडशी शपतान की नाद अनुकरण शेयना. 17दिनिचांग निन तीमथ्यन मी तिकुड आंपीनान. प्रभुला वाड ना प्रिय इंगा विश्वासयोग्य कोडकु उंडाड. यल्ला निन प्रत्येक जागाला प्रत्येक मंडळीला नेरपुतान, आल्ले वाड ख्रिस्तला ना जीवन दावाद मिक ध्यानाम शेशी इच्ची. 18काही मंदी तर इल्ला फुगाशीनार जस्काय निन मी तीकुड वच्चेतोडे लेन. 19पण प्रभुनदी इच्छा उंटे तर निन लगेच मी तिकुड वच्यान इंगा आप्पुड नाक तेल्ची की, यवार घमंडता फुगाशी फोयनार वार यंता बागा उंडार इदी सुशेदेंक लेद, तर वार देगार परमेश्वरदी यंता सामर्थ्य उंडाद इदी निन सुशान. 20येनटीक की परमेश्वरदी राज्य मनशी माटलाला लेद तर परमेश्वर सामर्थ्यला उंडाद. 21मिद येम इच्छा उंडाद? निन मी तीकुड मिक शिक्षा इच्चेदेंक छडी येकेन दावाला, का प्रेम इंगा नम्रता आत्मा जताक दावाला?

اکنون انتخاب شده:

1CO 4: WNT

های‌لایت

کپی

مقایسه

به اشتراک گذاشتن