Naṉ. 2

1Nuní̱ tura, nayaimpincha nuṉkancha tura ashí nui̱ irunainia nunasha najanak amukmiayi. 2Ni takatrí̱n takas amuk siati tsawant jeamia nú tsawantinkia ayampramiayi. 3Kame nú tsawant mash najanak amuk ayampra asa “Ju̱ka shiir tsawantaiti” tímiayi. Tura shuar nú tsawantai̱ áyamuk Winia enentáimtursarat tusa tesamiayi.

Áishmaṉ shiir ajanam apujsamu

4Nayaimpisha tura nuṉkasha atsuinia jú̱nis najankamuiti.

Uunt Yus nayaimpincha tura nuṉkancha najankamia nui̱ṉkia 5Uunt Yus tuke yumin yútumtikiachu asamtai kampunniusha nuyá̱ araksha atsuarmiayi. Núnisaṉ aents atsá asa takakmastincha atsumiayi. 6Túmaitiat nuṉkaya̱ yuraṉkim takuniar ashí nuṉkan ukatuk sanamtikmiayi.

7Nuyá̱ Uunt Yus nuṉká ju̱yu̱ri̱n naner áishmaṉkan najanamiayi. Tura ni nuji̱i̱n umpuí iwiaaku mayái̱ eṉketram iwiaaku ajasmiayi.

8Nuyá̱ Uunt Yus etsa̱ jintiainmaani̱ Eten nuṉkanam ajan ajammiayi. Tura áishmaṉkan najanamia nuna nui̱ apujsamiayi. 9Tura ashí numi shiir íi ajamainian tura yú ajamainniasha Uunt Yus tsapamtikiamiayi. Nu ajanam ajapén tuke iwiaaku pujutai̱ numincha tura chíkichkia péṉkersha tura yajauchisha nekatai̱ numincha awajsámiayi.

10Tura Eten nuṉkanmaya̱ entsa jíinmiayi. Tura nu entsa tsukatskari̱ṉkia nu ajan ukatmiayi. Túrasha nú entsak tseṉker kuatru ajasmiayi. 11Emka tseṉke̱ṉka Pisun náartiniuyayi. Nú entsaka Awiira kuri írunna nu nuṉkanmaani̱ téntaki̱ naṉkaamamiayi 12Nu nuṉkanmaya̱ kuri tí peṉkerauyayi. Nu nuṉkanmasha numí puári̱sha núnisaṉ únise kayasha iruniarmiayi. 13Chíkich entsasha Kijiunauyayi. Nu entsasha Kus nuṉkanmaani̱ téntaki̱ naṉkaamamiayi. 14Chíkich entsaka Tíkrisauyayi. Nu éntsaka Asiria nuṉkanam nantu tatainmaani̱ naṉkaamauyayi. Tura chíkichkia Yúpratis náartiniuyayi.

15Kame takakmak wainkiat tusa Uunt Yus áishmaṉkan Eten ajanam 16apujas chichareak “Ashí numi ajanam írunna ju̱na nere̱ páchitsuk yúatnuitme. 17Antsu yuar péṉker tura yajauch nekatai̱ numí nere̱ṉka yúashtiniaitme. Ántutsuk yuamka nekas jakattame tájame” tímiayi.

18Nuyá̱ Uunt Yus chichaak “Áishmaṉ niṉki pujustin péṉkerchaiti. Tuma asamtai niya ániunak nin péṉker yaintkiat tusan najatattajai” tímiayi. 19-20Kame Uunt Yuska ashí yajasmancha tura ashí nanamtinniasha nuṉkaja̱i̱ najankamiayi. Tura najanak ni naari̱ aṉkant aṉkant anairat tusa Ataṉ pujamunam ikiankamiayi. Tura Ataṉsha ashí taṉkuncha ashí nanamtinniasha ashí yajasmancha aṉkant aṉkant ni náari̱n anairamiayi. Tura Ataṉ anairamia nuke ni náari̱ṉkia áiniawai. Tuma ai̱ṉ niya ániuk nin péṉker yáiṉtinkia peṉké atsumiayi. 21Tuma asamtai Uunt Yus Ataṉkan ti ikiantramiayi. Tura kanarmatai ni pae̱n ukunchín jurus wárik ichimiámiayi. 22Tura nú pae̱n achik Uunt Yus nuwa̱n najana áishmaṉkan itiarmiayi. 23Nuyá̱ Ataṉ nuwa̱n wainiak chichaak

“Maa, ju̱sha ti nekas winia aya̱shru ukunchí̱ aya̱shtin najanamuiti.

Tura áishmaṉnumia̱ najanamu asa nuwa̱ tunattawai” tímiayi.#2:23 Áishmaṉ Ipríu chichamja̱i̱ṉkia ish tutainti tura núwa̱ka íshaj tutainti.

24Wats Yus nuna tura asamtai áishmaṉsha ni aparí̱ya̱ nukurí̱ya̱sha kanakí̱ ni nuwe̱ja̱i̱ṉ tsaniṉ pujustiniaiti. Jímiaraitiat chikichík aya̱shtinia áintsaṉ ajasártiniaiti. 25Tura Ataṉ ni nua̱ri̱ji̱a̱i̱ mai̱ misú áiniayat natsannaicharmiayi.

اکنون انتخاب شده:

Naṉ. 2: jiv

های‌لایت

به اشتراک گذاشتن

کپی