Jon 10
10
A tsonun taratara kap a niga turu sipsip
1Be Iesu e poeiena, “U mana koru alia e hatei hamana ragou limiou, a katuun te raman tasuna tara tamana tara ololon sipsip bate aroho tuun na tara tana makum, nonei a katuun a kopkop. 2Kaba a katunun pepeito kap turu sipsip e roron tasu silana tara tamana. 3Na katunun pepeito kap tara tamana e kalata nanei a katuun teka a tamana. U sipsip hoboto e atei siler temar ling uana a runguna a katunun pepeito kap i taren, na nonei e atei sil hoboto rena a man sipsip i tanen ne ngö has raneien a man tötöa a man solo i taren ba nori te kukutie ren bate lakasar. 4Pöata te halakasa hakapa hoboto relalen a man sipsip i tanen ba nonei te mammam ranen ba u sipsip i tanen te kukute ren taraha nori e atei siler a mar ling tara rungunen. 5U sipsip i tanen ema tatei kukutieri a tana katuun, nori e bus ba naroien, taraha nori ema hengo mareieri u mar ranga tara tana katuun.” 6E Iesu e kato u haharuei teka turu katuun, kaba nori ima atei sile ii aha te ranga naien.
E Iesu e here nei a katunun pepeito kap a niga turu sipsip
7Be Iesu e pei lelena i taren, “U mana koru alia e hatei hamana koru ragou limiou, u katuun e hererari u sipsip na lia e heregi a tamana tara ololon sipsip. 8U katuun#10:8 U propet u gamogamo. ti mam na moulia, nori u kopkop na u gamogamo kaba u sipsip ima hengo raien. 9Alia a tamana turu sipsip. A katuun te sila noua tara tamana teka ena niga nou, taraha alia e tara kap nagouen. Nonei e tatei tasu nama romana bate lakasa poutsuna batena höata lana. 10A kopkop e la sil tuun lase nama tegomi kop uu bate atung hamate rena u sipsip. Alia u la silema tegimi lu menai u katuun a nitöatöa, a nitöatöa a niga nitöa.
11“Alia e heregi a katunun pepeito kap a niga turu sipsip te tatei mate sil rena u sipsip i tanen. 12A katunun kui tuun e bus ba rena u sipsip tara pöata te la nama a muki a hie, taraha nonei ema tue ranei u sipsip na nonei ema katunun pepeito kap hamana has uanei turu sipsip. Ba muki a hie tena kotokoto rena u sipsip bate rura ranen. 13Nonei e busmena, taraha nonei a katunun kui tuun batema hakats sil tala ranei u sipsip. Na e markato has uana turu katuun u gamogamo tema pepeito kap haniga rari u katuun i tar.
14-15“Alia e heregi a katunun pepeito kap a niga turu sipsip te atei sil rena u sipsip i tanen na u sipsip i tanen e atei sil hase ren. Alia e atei sil regu u katuun te hamana uar i tar ba nori te atei sil hase riou lia. Na e markato has uana iesana tere Tamar. Nonei e atei sile noulia na lia e atei sil hase gen. Na lia e mate sil ragou u katuun i tar. 16A palair u katuun has i tar e ka ria ielesala tara ololon sipsip i tar. Alia ena peigi has ragumen romana ba nori te hengoe riou u raranga i tar. Bate ka menou a töa puku a heis sipsip na töa puku a katunun pepeito kap i taren. 17E Tamar e ngil korue noulia, taraha alia e haniga negu tego mate uu lia ba lia te töatöa pouts gou. 18E möa ta katuun ga antunan atung hamate naiou lia turu ngil i tanen. Alia peisa te hala nagou a peisar tara tou mate. Alia e ka megu a nitagala tego haniga uu lia ba u katuun te atung hamatie riou lia, na lia e ka has megu a nitagala tego töatöa pouts uu lia. Nonei a ka te ranga mei lia e Tamar tego katoi lia.”
19U Jiu i hengoein u raranga teka ba nori e lu kate ria a peisaren a huol a pala. 20U katuun u parpara i pei, “U liliahanei e ka mer a katuun teka na nonei e momolöna. Aha te hengo sile mien limiou?” 21Kaba palai i pei, “E möa. A katuun te ka mena a liliahanei ema tatei ranga uanei teka. A liliahanei e antunan kato hakalata hasena a matakiou? E möa!”
U Jiu i tori tsugani e Iesu
22-23Tara pöata teka a kannou pan tara Luman Lotu Pan#10:22-23 A kannou pan teka i kato meia u mamana u hiningal tara pöata ti kalata meia a Luman Lotu Pan i Jerusalem. egi kato poneia i Jerusalem. A pöatan hamuri poni be Iesu e tataala lana i rehina Luman Lotu Pan turu kake ti ngöei u kaken oho tere Solomon. 24Ba u Jiu e gono hahise ren me poeier i tanen, “Alam e mate las memou te hahaloso uamou lam. Hatei hamatskö ramou lam, alö e Mesaia te hala nema e Sunahan tsi e möa?” 25Be Iesu e poeiena i taren, “Alia u hatei raiou limiou, kaba alimiou ema hamane milia. A man mirakol na man hiharöto te katoe gulia tara solo tere Tamar te hatei nena te mana uana u raranga i tar. 26Kaba alimiou ema hamane milia, taraha a limiou ema sipsip uami i tar. 27U katuun i tar e hengo mareier a mar ranga i tar. Alia e atei sil ragen, na nori e kukute hase riou lia. 28Alia e hala ragouen a nitöatöa te ka nitöana ba nori tema tatei tia roi romana. E möa ta töa ta katuun tega antunan gul ba rai lia u katuun i tar. 29E Tamar e hala rai lia u katuun teka na nonei e pan bala nena a mamanaka hoboton töa ne möa ta katuun ga antunan lu baraien i limana e Tamar. 30E Tamar na lia a töa puku a katuun.”
31Ba u Jiu e lu poneier a man hatu tegi ti menaien e Iesu. 32Kaba e Iesu e pei i taren, “Alia u haröto rai limiou a mamana toukui a niga tere Tamar. Ga saha mar toukui te katsin titi hatu memi limiou alia?” 33Ba u Jiu e palise ren me poeier, “Alam ema ti hatu memoi lö tu kato mei lö a toukui a niga. E möa. Alam e raharaha mem te ranga homi mena milö e Sunahan. Taraha, alö a katuun tuun, kaba alö e kato here nami a peisamölö e Sunahan.” 34Be Iesu e palis ranen me poeiena, “I koloto hakapa naia turu Buku u Göagono i tamilimiou te pei mei e Sunahan, ‘Alimiou e heremi u sunahan.’ 35Na u ranga turu Buku u Göagono ema antunan kapa nei. Na e Sunahan e pei nori u katuun ti halarai u raranga tere Sunahan i herei u sunahan. 36Alimiou e antunan ranga hasimiou bate peimiou, a katuun te kato hagöagoni e Tamar me tula mena meien i puta e ranga homi nena e Sunahan te pei mena neien, ‘Alia a Pien tere Sunahan.’ Ge hana ba limiou te mar ranga uamiou teka? 37Tema katoe gi lia a man toukui tere Tamar, möa tala tu hamane moulia. 38Kaba te katoegien lia, noahasina tema hamane milimiou alia, hamana mia tara toukui i tar ba limiou te atei sile mou e Tamar e kana i tar na lia e ka has gia i tanen.” 39Ba nori e katsin pile kap lel pon naren, kaba nori ma pile sabe naien. 40Ba nonei e la pouts uana i hapalana a Ramun i Jodan mena kana tara han te baptais mam ia e Jon. 41A katuun a para i lauama i tanen me hiararangar me poeier, “E Jon ema haröto nai tu mirakol, kaba a mamanaka te hatei naien tere Iesu e manana.” 42Ba u katuun u parpara teka e hamana uar tere Iesu.
اکنون انتخاب شده:
Jon 10: HLA 2020
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active) Wycliffe Bible Translators, Inc. All rights reserved.