Matiu 11
11
E Jon a Tsonun Baptais mere Iesu
(Luk 7:18-35)
1A pöata te hala hakapa neia e Iesu u raranga tara maloto na huol a katunun tsitsilo i tanen, ba nonei e lana mena hihatutsna tara man taun i taren.
2Na tara pöata te kaia e Jon a Tsonun Baptais tara karabus. Ba nonei e hengo nena a man toukui te katoe e Iesu. Ba nonei e hala mera namei u katunun tsitsilo i tanen u raranga tere Iesu. 3Ba nori emi poeier tere Iesu, “Nonei alö a katuun tego lama, tsi alam ego hahalosi a tabina katuun?”
4Be Iesu e ranga palis ranen me poeiena, “La mula batena hateimi e Jon a ka te tare mula limiou na ka te hengoe mula limiou. 5U katuun u kiou e tara poutsur, na u katuun u mou omi e tataala poutsur, nu katuun u toba e gogoso poutsur, na u talinga tupu e hengo poutsur, nu katuun ti mate e töatöa poutsur. Na u Bulungana u Niga e lauama turu katuun papala. 6Na esi a katuun te hamana nitöa uana i tar e sasaala nou!”
7Na pöata ti la poutsia u katunun tsitsilo tere Jon, be Iesu e tanian ranga hatei ranei u katuun e Jon me poeiena, “Alimiou i la sile mula egona tareiam a saha ka tara makum a palaka? Toum romana u nga te gagas mena te pihu mena neien a lomolomo? 8Tsi alimiou u la sile mula tegona tara menami u katuun te ka meier u hasobö u niga koru? Kaba a mar katuun teka e kana tara mar luma a nigan töa tere king. 9Tsi alimiou u la sile mula tegona tara menami a propet? Aa, alia e hatei ragou limiou e Jon a propet hamana. 10E Jon nonei a katuun te hatei nena u Buku u Göagono,
‘Alia e Sunahan e halana gou a tson sösöata ranga te mam nanoulö,
tena hamatsköenou a maroro i tamölö.’
11“Na lia e hatei hamana ragou limiou, e Jon a Tsonun Baptais nonei te pan balana turu katuun hoboto ti poseir te ka ria turu tsiktsiki. Kaba a katuun papala koru tara Nipepeito tere Sunahan nonei te pan bala has nena e Jon. 12Na tara man pöata tere Jon a Tsonun Baptais bate noana i romana, u katunun hiatatung i tagala sil korui a Nipepeito tere Sunahan, ba nori e torohana hatagala sil haser tegi tasu uen i tanen. 13Na i mam tara pöata tere Jon a Tsonun Baptais, na turu propet hobotora i manasa, na lo tere Mosis, i hatein a Nipepeito tere Sunahan i mamuna te butuia e Jon. 14Na te hamane mia limiou u raranga i taren, alimiou e atei silemiou e Jon nonei e Elaitsa tego lama. 15Esi te kamena u talinga ega hengo!
16“Alia go mar ranga merai u katuun te kar i romana ime? Alimiou e hererami a galapien te gum ria tara man makumun töana bate hia kukur, 17‘Alam e kohi bera mulo limiou kaba limiou ema sani mulei! Na lam e köma hase mula u hahuri, kaba limiou ema tabe mulei!’ 18E Jon a Tsonun Baptais e lama kaba nonei ema nou ii nema ua hase ii ta uain. Ba nori e poeier nonei a katuun a momolö. 19Na lia tu butun Katunuma e nougu na e uagu. Kaba nori e poeier alia a katuun a nounou pala, na uaua pala. Na e kapiena has raiegu u katuun te lulueier a takis na u katuun u omi. Kaba a man markato turu katuun tere Sunahan e haröto nena te mana uana a niatei i tanen.”
A man pala ti hahamana
(Luk 10:13-15)
20Be Iesu e tanian ranga sisi rena u katuun tara man taun te katoe men a man mirakol a man parpara. Taraha, nori ima tori polasa banai a man markato a man omi i taren. 21Ba nonei e poeiena, “A nomi pan koru e butu noua i tamilimiou u katunura tara taun i Korasin na i Betsaida! Sanena e Sunahan te katoeia a man mar mirakol teka tara taun i Taia na i Saidon, nori sanena i solon harötein tegi tori polasa ba menaien a man markato a man omi i taren, bate hasoger u hasobön mou bate göagöaeier u köahu. 22Na lia e hatei ragou limiou, turu lanin hahuna tere Sunahan, a nihahuna i tamilimiou u katunura i Korasin na i Betsaida e pan bala nanou a nihahuna turu katunura i Taia na i Saidon. 23Na limiou u katunura i Kapenium e tatei soloseiemiou a peisa milimiou i kolö, kaba e Sunahan e lapo ba has ranoua limiou i hel! Sanena e Sunahan te katoe u mar mirakol teka tara taun i Sodom, a taun i Sodom sanena e ka noa hasina i romana. 24Na lia e hatei ragou limiou, turu lanin hahuna tere Sunahan, a nihahuna i tamilimiou u katunura i Kapenium e pan bala nanou u nihahuna turu katunura i Sodom.”
La uamuma i tar bate husa miou
(Luk 10:21-22)
25Nonei tara pöata teka be Iesu e poeiena, “O Tamar, alö e Tsunono pan mia i Kolö na i puta. Alia e haniga uagu i tamölö te hamous mena milö a manka teka turu katuun te poeier e ka mer a niatei, bate haröto namen turu katuun papala tema atei balari. 26Aa, O Tamar, alö e markato uam turu ngil peisa i tamölö.
27“A mamanaka hoboto teka e Tamar te hale meien lia. Na e möa ta taina ta katuun tega atei sileiou lia, a Pien Tson tere Sunahan. E Tamar puku lahas. Na e möa has ta katuun tega atei sil e Tamar. Alia puku lahas a Pien Tson i tanen te atei silegen, na eresi tu onarilia te haröto ragoui lia e Tamar.
28“La uamuma i tar, alimiou hoboto te kui hatagala koru miou, bate söate miou a nitiama a kapan koru. Alia e hahusa ragou limiou. 29Lueiam a toukui i tar balia te hatuts ragou limiou, taraha alia e ron hala puteiegu a peisar na e tori tami has gia turu katuun hoboto. Ba limiou tena tatei husa mou batena sabe hase mou a nigumgum a niga te ka nitöana. 30Taraha a toukui i tar e hahan kana, na nitiama te hale gilia lö e gigahana.”
اکنون انتخاب شده:
Matiu 11: HLA 2020
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active) Wycliffe Bible Translators, Inc. All rights reserved.