Suosittuja jakeita Raamatun kirjasta मत्ती 7

Jaa

“मांगदै रहा लागी; तै जाणीं तम्हां सह गल्ल भेटी ज़ेता तम्हैं मांगा। दुआरा रहा टोकदै लागी और सह दुआर जाणअ तम्हां लै खुल्ही।

किल्हैकि ज़ुंण मांगा, तेऊ भेटा और ज़ुंण लोल़अ लागा, तेऊ बी भेटा और ज़ुंण दुआर टोका, तेऊ लै खुल्हा दुआर।

“तैहीता ज़ुंण मेरी गल्ला शूणीं करै तिन्नां मनें, सह हणअ तेऊ समझ़कार मणछा ज़िहअ, ज़ुंण आपणअ घर पाक्कै शाफल़ा प्रैंदै पाक्की ज़ैगा दी बणांआ।

ठीक इहअ ई, ज़िहअ तम्हैं च़ाहा कि होर मणछ तम्हां संघै करे, तम्हैं बी करा तिन्नां संघै तिहअ ई। परमेशरे गूरै बी आसा बधाना दी ईंयां ई ज्ञैन खोज़ै दै।

सह प्रऊल़ आसा सांगल़ी और सह आसा बडी कठण बात ज़ुंण ज़िन्दगी दी पजैल़ा, पर तेसी बाती डेओआ थोल़ै।

“परमेशरा सेटा स्वर्गै डेऊणा लै आसा बडी सांगल़ी बात और सोभी लागा तेसा बाता डेऊणअ। होर बात बी आसा ज़ेथ बडै भारी लोग डेओआ। सह बात आसा खुल्ही। तिंयां रहा तेसा बाता तेभै तैणीं हांढदै लागी ज़ेभै तैणीं तिंयां खुल्ही प्रऊल़ी सेटा निं पुजा पर सह पजैल़ा बनाश करी करै नरकै। खास्सै लोग पेठा तेसा ई प्रऊल़ी बाती।

“ज़ै तम्हैं बूरै हई करै बी आपणैं शोहरू लै राम्बल़ी च़िज़ा दैई सका, तै थारअ स्वर्गे रहणैं आल़अ बाप्पू परमेशर आपणैं मांगणैं आल़ै लै राम्बल़ी च़िज़ा किल्है निं दैई सकदअ? (लुका 11:13)

“होरी लै दोश निं लाणअ, तै निं तम्हां लै बी दोश लागणअ और नां तेते सज़ा पल़े भुगतणीं। किल्हैकि ज़िहअ करै तम्हैं दुजै लै दोशा लांदै लागा। तिहअ ई दोश लागणअ तम्हां लै बी। ज़ेऊ ढाल़ै तम्हैं होरी संघै बर्ताअ करा तेऊ ढाल़ै हणअ तम्हां संघै बी बर्ताअ और तम्हां भेटणअ होर बी खास्सअ।

“पर ज़ुंण मेरी इना गल्ला शूणां और नांईं मंदअ आथी, सह हणअ तेऊ ऐडै मणछा ज़िहअ ज़ुंणी आपणअ घर रेता प्रैंदै बणांअ।

“कसा होरी भाईए होछ़ी-होछ़ी गलती लोल़ै निं लागणअ! सह हणीं दुजे आछी दी पल़ी दी धख ज़ेही घाहे कणीं भाल़णें बराबर। पर आप्पू दैणीं भाल़णीं कि मुंह दी केतरी बडी गलती आसा। किल्हैकि आपणीं आछी दी पल़अ द निं ताखा बडअ शेटू बी शुझदअ। “ज़ै तेरी आपणीं आछी ई आसा शेटू पल़अ द, तै किहअ करै सका तूह आपणैं भाई लै इहअ बोली कि एछ मेरै भाई हुंह काढूं तेरी आछी भितरी पल़ी दी घाहे कणीं पोर्ही?

“झ़ुठै गूरा का रहै चतैन, तिंयां एछा भेडे भेश बणांईं तम्हां सेटा लै। पर भितरी हआ तिंयां धेल़णै च़िरनैं आल़ै भेड़ियै। (यजकेल 22:27) तिन्नां सका तम्हैं तिन्नें कामां का बछ़ैणीं। किल्हैकि कांडै का फेडू और झ़ाकल़ा का अंगूर निं कोहै चोल़दै?

“ठीक इहअ ई हर एक राम्बल़अ बूट दैआ राम्बल़अ फल़ और नकाम्मअ दैआ नकाम्मअ फल़।

तिहअ ई राम्बल़अ बूट निं कधि नकाम्मअ फल़ दैंदअ। नकाम्मअ बूट निं कधि राम्बल़अ फल़ दैई सकदअ।

“ज़ुंण बूट राम्बल़अ फल़ नांईं दैंदअ, सह पाणअ काटी और सह दहणअ झ़ुका लै।