MATHI 2
2
Kniw thuwna Ktongki Kvel rek
1Tunva kruwng Herod mpha thu Judia ki Bethlehem thung ngi Jisu mṭou mpha thu, asuwn, kniw thuwna ktongki ksing mii rek Jerusalem tha arhang lamda; the lamda, 2“Jehudia rek Kruwng kṭou Mma ava tva thung da? Mleija kniw thuwna ktong tha Mma bursi neenni dei innu, ungta luw kbuk chra kthleng in ping.” 3Kruwng Herod ti hava maryaak mpha thu, kunchul da, ungta Jerusalem thungki mma kurthlo ṭhi rek mii mkheng; 4ungta thiimpu kinreel rek,ava ki mii rek Nowlam chukpu rek, mkheng tu kurbuk da, mmaan hin Khrista ṭou nrang tva thung da kdingi pau khewl lamda. 5Mmaanni mhin the lamda, “Judia ki Bethlehem thungra; mleija ava khulpu rekki mdo kjit dok:
6‘Ungta Judia paam thungki,
O Bethlehem nang ava,
Judia paam kpu rek arlakki mikdil sii ruk kurthuwk pti;
mleija kmii Isreel rek leen kpaal ra,
nah athung ngi paam kpu khat kurjung ra.’ ”
7Ava dilli Herod ti ksing mii rek ava tuprutti ownda, bursi mkandanna mpha ava khewl lamda ungu kminni deida; 8Ungta mma ngi Bethlehem tha hai sii lamda; theda, “Naanni va inra nao ava ktippi athlaam in; ungu aphaak inta, nei ruk va luw kdo hai buk chaak nra, pauna marvan hur pik chaan.” 9Mmaanni kruwng dothe maryaak dok dil thaanni mlam ṭoi nraan tha chet lamda; ungta asuwn, kniw thuwna tha mdo dee in bursi ava ngi nao amna mun ava phada mri du khim khai mdu suk inni ru rit pik lamda. 10Mmaanni bursi mdee in thungta, klin sii ngi kanpa, kheel sii ki kanpa ngi; 11inn ava thu mhailu in thungta nao ava leh mnuh Mery dei lamda, ungta kuwn lamda luw buk chlam da. Ava dilli msumbuwr in pvang lamda; jeering leh reidii ungu myrrh tdit ava Mhin chla tlaaiji down chlam da. 12Ungta mer khat ti mhin inni pau mdo kham pik lam dil kṭoiji, mmaanni Herod hin mdil in kinle kma; lam msik khat lep lamda mpaam thaanni sun lamda.
Egypt tha Mchen
13Tunva mmaanni msun dok inle, asuwn; Mukpu waan tamsii ngi Joseph mer khatti ktardet da ungu theda, “Kardel ra nao ava leh mnuh aṭhira Egypt tha echen in; ungu Neiji akthe pik du khim khai ava tha jiam daat in, mleija Herod ti nao ava mdo aeyo nra kthlaam ra kurthlong nga.” 14Ungta mma ngi kardel da nao ava leh mnuh ṭhida, jaanni Egypt tha sun lamda; 15ungu Herod mdiyo du khim khai ava tha am chdaat lamda. Hava khulpu hin ni Mukpu ngi mdo the dok, “Kchapa ava Egypt thungki kdo own;” dida mdo the ava mkurkhum na kurthuwkda.
Kmorek mdo Eayo
16Ava dilli Herod ti ksing mii rek dohuwn chaak na ava mdee thungta kdung ngi plung pthit da, ungta ksing mii rek hinki mpha mdo dee dok dil kṭoiji, Bethlehem ungu mpaamkowl thungki kum knii ki ngi mkurdu ki psel nao mkheng mdo eayo nraan mii sii da. 17Ava dilli khulpu Jeremiah do the dok ava kurkhum da;
18“Ungta kdung ngi kurnung karbaang da
kṭap krowl khat Ramah thu aryaa da,
Rachel li mnao le tummi ṭap da;
mleija mmaan ma amma leiji,
mii do pthlai ra ava ro me.”
Egypt ki Mkinlet
19Pdainu Herod mdiyo thungta, asuwn; Mukpu waan tamsii ngi Joseph mer khatti Egypt thung ngi ktardet da; theda, 20“Kardel ra nao ava leh mnuh aṭhira; ungta Isreel paam tha hung in, mleija nao ava rinkhu kthlaam mii ava kdiyou kcha a.” 21Ungta mma ngi kardel da nao ava leh mnuh ava ṭhida Isreel paam tha hung lamda. 22Pdainu Arkhelius ava ngi mpah Herod kchang donda Judia paam kpu ngi ka amma tdit maryaak thungta, ava tha mvan rang nga mma ngi ṭi chda, ungta mmer ri pau mdo kham pik dil kṭoiji Galil paamkowl tha thliir chda. 23Ungu mma ngi Nasareth tdit khuwpii khat thung ngi vangda am chda. “Mma ava Nasareth mii khat di donle ku ownra,” dida khulpu rek hin mdo the ava mkurkhumna kurthuwk da.
Tällä hetkellä valittuna:
MATHI 2: LAMKBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.