JOHAN 1
1
Thiyu ju Shih Kam
1Atankih ching Thiyu lakheah, Thiyu ju Thrünpuh lung lakheah tüsho Thiyu ju Thrünpuh lakheah. 2Atankih chingnü api Thrünpuh lung lakheah. 3Lüpdükhi api hode thrün tüsho thrüna lakhi ching api mübede tümü she mülakheah. 4Api kheak rhangdung lakheah, tüsho rhangdung ju mihtsürü ayin lakheah. 5Ayinnü amiting ching tahchoh, tüsho amitingnü ju müyihdokhuk.
6 #
Mt 3.1; Mk 1.4; Lk 3.1,2 Thrünpuh kilimnü athiyikhi mihtsürü khülang amung Johan lakheah. 7Ha mihtsürü ju api hode alala kinshihpü ayin thiyumütsan thsüpü arü. 8Api ju ayin yung, tüshe ayin thiyumütsan thsüpü arüshih.
9Thiyuro ayin ju mihtsürü aban kilim ayin jihkhi alomi ching arükheah. 10Api alomi ching lakheah, alomi ju api hode thrün, tüsho alominü api mümükheah. 11Api nihbuh lomi lim arü, tüshe nihbuh mihtsürünü api müleangkhi. 12Tüshe api leangkhirü ahihkhüh kilim, api mung ching kinrü kilim she apinü Thrünpuh tsührü kampü alim jih: 13Arübo thiyihnü yung, shih lümkhinü yung, mihtsürü lümkhinü yung tüshe Thrünpuh hode zübe.
14Thiyu ju shih kam tüsho isa bolung la, tüsho mihmüthsüm le thiyuronü mide alakhi lapkhiung tsührü müretah isanü ngü. 15Johannü api thiyumütsan thsüde tüsho zhide tha, “Inü thade alabuh ju ha, ‘Shepü I dunglim arüchonü I kheaknü atobe, tümüde api I müngühnü alakheah.’ ” 16Tüsho api kim khiukkhi ching isanü müngühmühi kheaknü müngühmühi leangkhi. 17Tümüde yakzan ju Mosa hode jih, tüshe Jisu Khrista hode amüthsüm tüsho thiyuro arü. 18Shenü she tümü kim ching she Thrünpuh müngü. Abuh khüh kheak lakhi lapkhiung tsührünü lang api khipkhit.
Johan Baptijihbuh Yusheak
(Mt 3.1-12; Mk 1.1-8; Lk 3.1-18)
19Kheakü ha Jirusalem ching Jihudarünü amükeamrübo le Levirübo ki api she a de akeopü thiyichoki Johan thiyumütsan lakheah. 20Apinü müreanglode khipkhitde tha, “I Khrista yung.” 21Tüsho arünü api ki keo, “Dale tüsho she a? Nü Elija a shi?” Apinü alo, “I a yung.” Arünü keo, “Nü wukihrü a shi?” Tüsho apinü alo, “Yung.” 22Judüki arünü api ki tha, “Isanü isa thiyirü ki alopü thsüde nü she a? Nü dünkheak nünü küde thacho?” 23Apinü alo, “I ju Isaia wukihrünü athakhi nangde ‘Sunglo ching azhikhi düsheak khülang: Atungpuh limro mukhiungarihdo thsüjang.’ ”
24Kheakü thiyia larübo ju Pharisirü kilimnü alakheah. 25Tüsho arünü api ki keokhide tha, “Nü ju Khrista, Elija yungsho wukihrü she yungsho tümü thsüde nünü bapticho?” 26Johannü arü ki alo, “Inü nüsa kenü baptichoh, nüsanü mümükheahkhi khülang nüsa bolung zhiplah. 27Shepü I dunglim arüchonü ajingkhümpü zhi she inü atrünjihpü müthülün.” 28Harübo Johannü baptide alapung Jordan hobah Bethani ching dünji.
Thrünpuh Namfimihnunu
29Ashidopü Johannü api kilim Jisu arüde ngü, tüsho tha, “Kheahang, alomi neak hande atsokhi Thrünpuh namfimihnunu! 30Ha inü athabuh ju ah, ‘I dunglim arükhi mihtsürü I kheaknü atobe, tümüde api I müngühnü alakheah.’ 31Inü api mümükheah tüshe api Israel ki akhiuka huhpü lah, jumonü inü kenü baptide arü.” 32Tüsho Johannü thiyumütsan thsüde tha, “Yinmi chingnü müthrithrümpü nangde me akikhi inü ngü tüsho api ju anihbuh kheak la. 33Inü api mümükheah, tüshe shepünü kenü baptipü I thiyikheanü I ki tha, ‘Me akibah api kheak lade shepü nünü angükhea, api ju Amüsüh Menü baptijihbuh lah.’ 34Tüsho ha Thrünpuh tsührü ah de inü ngü tüsho thiyumütsan thsü.”
Akhuhbe Jisu Jingyanrübo
35Kheaküshe ashidopü, Johannü ajingyanrü mahne bebah zhip. 36Tüsho api tsahde alachoki Jisu kheak kheahde tha, “Thrünpuh namfimihnunu kheahang!” 37Jingyanrü mahnenü apinü athakhi so, tüsho anenü Jisu dunglim yan. 38Judüki Jisunü rholo tüsho ane api dunglim yande ngübah tha, “Nüke tümü yimcho?” Anenü api ki tha, “Rabbi (amütsan Thsangyurü), nü küching lacho?” 39Apinü ane ki tha, “Arübah kheahang.” Anenü yübah api lapung kheah, tüsho ju nimung api lung la (ju anirelim 4 king ngüm lakheah). 40Johannü athakhi sobah Jisu dunglim yankhi mahne lung khülang ju Simon Peter niurü Andria lakheah. 41Apinü akhuhde akhiung Simon ngübah api ki tha, “Isanü Messia ngüdo” (amütsan Khrista). 42Tüsho apinü anihbuh Jisu kilim bedarü. Küyimki Jisunü api kheak kheahkhea, apinü tha, “Nü a Jona tsührü Simon ah. Nü Kephas de ajihbah (amütsan Lung Khülang).”
Jisunü Philip tüsho Nathanael Jikhi
43Ashidopü Jisunü Galilee ching yüpü pungkhi, tüsho apinü Philip ngübah api ki tha, “I dunglim yanang.” 44Kheakü Philip ju Andria le Peter büne kiuto Bethsaida chingnü alakheah. 45Philipnü Nathanael ngübah tha, “Mosa yakzan ching tüsho wukihrübonü thrüta lakhi Josep tsührü Nazarethrü Jisu isanü ngüdo.” 46Nathanaelnü api ki tha, “Nazareth chingnü tümükhüh atsü akhiukkhukba de?” Philipnü api ki tha, “Arübah kheahang.” 47Jisunü Nathanael api kilim arüde ngü, tüsho api dünkheak tha, “Kheahang, amülim mülakhi thiyuro Israelrü!” 48Nathanaelnü api ki tha, “Küde thsah nünü I mükheahla?” Jisunü api ki alojihde tha, “Philipnü nü müjiyide, nü khubasodung khüp binchoki inü nü ngükheah.” 49Nathanaelnü alo tüsho api ki tha, “Rabbi, nü a Thrünpuh tsührü ah! Nü Israel kiulongthsüpuh!” 50Jisunü alo tüsho api ki tha, “Inü nü khubasodung khüp binkhi ngüdo de athamonü nünü kincho de? Nünü harü kheaknü atobe ngübah.” 51Tüsho apinü anihbuh ki tha, “Atsütsü inü nü ki thachoh, ha dunglim nünü yinmi khimshuhbah Thrünpuh yunirübo Mihtsürü Tsührü kheak yükihla akila dükhi ngübah.”
Tällä hetkellä valittuna:
JOHAN 1: YIMCBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
