Dyénésis 40
40
Dad kna i dad to bnilanggù
1Kafnge én, nun satu lifan i harì di Idyif, i gal mebe i binun di kenen, na nun satu lifanan gal tmaga fan. Na satu duh gamsalà ale di amula, dunan harì di Idyif. 2Na too flabè Faraon di lwe to ganlal ani. 3Taman fbilangguan ale ditù di gumnè i ulu di dad to gal munung déén di gumilanggù ku Dyosif. 4Na Dyosif blé i ulu di dad gal munung, di dad ganlal atù gine, du kenen mgimò saligla. Na too mlo ale bnilanggù déén. 5Na satu butang, kamna i to gal mebe binu, na kamna i to gal tmaga fan, na sahal i knala, na sahal i gumtatek i knala.
6Na di klauy Dyosif dale di flafus, dilean sebe nun gamsamuk nawala. 7Taman snalekan ale, “Tan kè i gamsamuk i nawayu?” 8Tmimel ale, manla, “Kamna gami, bay landè gamtulen gami ku tan i gumtatek i dad knami ani.” Na man Dyosif, “Alò Dwata fakay mlé gnagan di satu to, du fye kenen mubad i dad kna. Na sa kun, ku fakay tulenyu deg ku tan i knayu.” 9Na i gal mebe binu i muna tmulen i knan ku Dyosif, manan, “Ani i knagu, teengu di munagu i walad grép, 10na di walad atù nun tlu fangan funa dmoon, mulek, munge, na mbaling taga i dad bungen. 11Na i tabù Faraon nagotgu, na kafnge én, mifò agu i dad bunge grép, na fanlàgu i yéélan di tabù, na blégu tabù ku Faraon.”
12Na man Dyosif, “Gadègu i gumtatek i knam ani, na ani i dunan, i tlu fanga gumtatekan tlu duh. 13Du kubu kadang i tlu duh, fatlo ge Faraon, na nlifetan i salaam, falwaan ge di bilanggù, na fasfuléan ge di tagnè nimoam. Lêman ge mebe i binu di kenen. 14Kadang di kafye kagkaham lêman, toom agu fandam, na kandom agu. Begam tnulen Faraon gablà di deg, du fye began agu falwà di bilanggù ani. 15Hae, du tì agu tangal mdà di mawag banwe i gumnèmi gami dad to Hibru, na balù landè mgimògu sasè dini, bay knean dini agu bnilanggù di banwe Idyif.”
16Na di kaklinge i to gal tmaga fan i harì, too fye gumtatek i kna i to gal mebe binu, manan di ku Dyosif, “Nun sa deg kna. Smudù agu kun i tlu balyas fan. 17I balyas too sangal tah nun dee bung fan kene Faraon, bay knaan i dad anuk di bnas.”
18Na tmimel Dyosif kenen, manan, “Ani i gumtatek i knam, i tlu balyas dunan tlu duh. 19Kafnge tlu duh fatlo ge Faraon, na faklangan i ulum, fatlawéngan i laweham di kayu, na ungadam knaan i dad anuk di bnas.”
20Na di gatlun duh, fimò Faraon i fista i kdee dad ton nun glal, du duh ksutan. Na fatlon i to gal mebe i binu na i to gal tmaga fan ditù di muna i dad dademe ganlalan. 21Na i to gal mebe binu, fasfulé Faraon di tagnè nimoan, na lêman kenen mebe binu di ku Faraon. 22Kabay i to gal tmaga fan, fatlawéng Faraon. Na i kdee gman Dyosif di dale tagdohò.
23Kabay i to gal mebe binu gamlifet ku Dyosif.
Tällä hetkellä valittuna:
Dyénésis 40: ITD
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2014, Wycliffe Bible Translators, Inc. All rights reserved.