Dyénésis 43
43
Faloh Dyékob Bénhamin salu di Idyif
1Na too matnù i kbitil di banwe Kanaan. 2Na di kti fali trigu nebe dad ngaan mdà di Idyif, man Dyékob di dale, “Samfulê gamu di Idyif, na mayad gamu gito fali.”
3Tmimel Dyuda, manan, “I to atù laan gami fasfulê ditù di kenen, silang ku faginmi i twalimi. 4Ku faginam gami moon Bénhamin, na salu gami ditù mayad fali. 5Kabay ku laam faloh kenen magin gami, landè kibòmi salu ditù, du i to atù toon man gami nang samfulê di kenen, silang ku faginmi i twalimi.” 6Tmimel Israél, dunan Dyékob, manan, “Tan kè duenyu tmulen kenen nun twaliyu? Too gamu mlé deg ksamuk nawa.”
7Tmimel ale, “I duenmi tmulen kenen, du fnadlugan snalek gablà di gami na i dad malaymi. Snalekan, manan, ‘Mto fa kè i màyu sadni? Na nun fa dademe flanekyu?’ Tatì alò tnimelmi i dad salekan. Làmi sa fandam ku manan gami too fagin i twalimi ani samfulê di kenen.”
8Na man Dyuda di maan, “Faginam gami twalimi Bénhamin, du fye mdà gami nan, du fye kdee ito, na i dad ngaito là mati malnus. 9Agu sa mifat ku Bénhamin, én i fakangta ge. Na ku làgu gebe samfulê, agu sa kmakif i salàgu, kel di kfatigu. 10Ku laam klen moon i kmanmi dun di ge, na balù talwe dulê gami nan moon samfulê di Idyif.”
11Na man i màla, “Ku landè dademe kfagu fakay nan, bay mebe gamu i dad too fye bunge di tanaito, du bléyu di gubirnador atù. Mebe gamu dad bulung mdà di kayu, tukay tnab, dad anag, na dad bunge i dad kayu fistasio na aleméndras. 12Na nebeyu i filak fulê di gamu, na tananùyu fa salngad i kbong filak di muna nebeyu. Na fulêyu i fisus i teenyu di tah i sakuyu, du ken gsalà i gumkahla dun. 13Na faginyu sa nan i twaliyu, na faflal gamu samfulê di to di Idyif. 14Na dmasal agu di Dwata Too Mtulus, du fye too nun kakdo i ganlal gamu, na falohan moon i twegeyu Simyon na Bénhamin magin gamu mulê. Kabay ku ani kfagu Dwata mwè i dad ngàgu ani di dagu, kaman sa!”
15Taman faflal mdà dad ngà Dyékob salu di Idyif, na faginla Bénhamin, na nebela i bong filak gine, na i dad bléla ku Dyosif. Kakella ditù, salu ale di kenen. 16Na di kite Dyosif i twalin Bénhamin magin dale, manan di saligan, “Faginam dad lagi ani ditù di gumnègu. Kmatê ge lmanaf na tnagayu, na mimò gamu knaan, du kmaan ale kadang di safédgu di ltu duh ani.” 17Na mimen i saligan, na faginan i dad flanek Dyosif ditù di gumnean. 18Na di kfagin dale ditù di gumnè Dyosif, too ale likò, na stulen ale, manla, “Faginan ito dini, du mdà di filak fulê na gkah di lam i sakuito. Kenan ito kanfè, na nimoan ito dad lifanan, na nwean dad dongkiito.”
19Taman kakella di gufusuk i gumnè Dyosif, manla di saligan, manla, 20“Tabyà, begam gami fanlinge. Salu gami dini di muna, du mayad fali. 21Na di dalanmi mulê, gilè gami di dalan, na nukalmi sakumi na teenmi filak i bayadmi fali di lam i sakumi. Na taman lêmanmi nebe samfulê. 22Na nebemi dademe filak du bayadmi lêman fali. Làmi gadè ku simto mkah filakmi déén di sakumi.”
23Na tmimel i salig ani, manan, “Nangyu fsamuk i nawayu, na nang gamu likò. I Dwata fnangamfùyu na i màyu i too mkah kè filak di lam sakuyu. Gamu sa mfun dun, du tagamdawat agu sa i filak bayadyu fali.”
Kafnge én, fafngé i salig ani Simyon mdà di bilanggù, na faginan déén di dale. 24Na fagin ale i salig Dyosif di lam i gumnè, na banlén ale yéél du alob i blìla, na fafkaanan i dad dongkila. 25Na tulenan dale, kmaan ale kadang di saféd Dyosif. Taman di klola fatan, fnatlagadla i bléla kenen.
26Di kulê Dyosif, bléla nan dad nebela kenen, na lkuad ale di munan, du nafèla kenen. 27Na snalek ale Dyosif, manan, “Tan i kagkahyu? Na di muna, i kdiniyu, tulenyu gablà di màyu. Na man, i màyu too tua, tan i kagkahan, mto fa kenen?” 28Na tmimel ale, manla, “I màmi i lifanam, mgal sa fa beg.” Na lêman ale lkuad, du nafèla kenen.
29Na di kfalê Dyosif, teenan i twalin Bénhamin, too tingà i yéan, na manan, “Ani kè i sangal twaliyu i gmanyu deg?” Na léan man ku Bénhamin, “Tò, kayègu ku Dwata i mlé di ge kafye.”
30Kafnge én, fan mngel Dyosif, du bong kakdon i twalin, na too nun klehewan di kiten kenen. Taman du là gadnanan i kngelan, gasilan ale tnagak déén, na fusuk di lam i sibayan na mngel.
31Kafnge én, di kagadnanan i lwakan, naloban i bawehan, na samfulê di safédla, na manan di dad saligan, “Malel gamu i knaan.”
32Stani i dad gukmaanla, du mahal i lamisa Dyosif, na i dad flanekan lê mahal i dale lamisa, na lê mahal i lamisa i gukmaan i dad to di Idyif, i dademela kmaan, du i dad to di Idyif ani, i ukumla là ale mayè kmaan di saféd i dad to Hibru, du too sasè di dale. 33I lamisa gukmaan i dad flanek Dyosif, déén di muna i kenen gukmaan. Na snadfél Dyosif ale fsudeng, fandà di twege kel di sangal twali. Na di kitela i kibò fsudeng dale, seye ale du too ale tikeng. 34Fafwè Dyosif i knaan i dad flanekan di lamisa gukmaanan. Na di kdeela, fafalbongan alel Bénhamin lime dulê i kalbongan. Na kdeela kmaan, na minum kel di kabsolla. Na too ale lehew klola kmaan na minum.
Tällä hetkellä valittuna:
Dyénésis 43: ITD
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2014, Wycliffe Bible Translators, Inc. All rights reserved.