Exodus 5
5
Moses-lu Aaron-lu Sivuġaanugmagnik Umialgata Egypt-gum
1Tavra Moses-lu Aaron-lu Pharaoh-muŋaruk aasii uqallakłutik, “Ataniq, God-iŋat Israel-gum kiŋuvaaŋisa, uqallaktuq, ‘Aullaqtitkich iñugiratka, niqinaqiyumaut nunagluktuami nanġautiqaġlutiŋ uvamnun.’”
2“Kiña uvva Ataniq?” Pharaoh uqallaniqłaktuq. “Summan naalaġniñiaqpigu suli aullaqtillugich Israel-gum kiŋuvaaŋich? Nalugiga uvaŋa Ataniq; suli aullaqtinniaŋitkitka Israel-gum kiŋuvaaŋich.”
3Moses-guvlu Aaron-guvlu kiugaak, “God-ikput, Hebrew-guruaguut,#5.3 Hebrew-guruallu Israel-gum kiŋuvaaŋiḷḷu atausiurut iñuŋich. niptaŋaruq uvaptignun. Aullaqtitchigut iglauluta piŋasuni uvluni nunagluktuamun aitchuiyumaugut ikipkaiḷuta Ataniġmun God-igiraptignun. Tainna piŋisuaġupta, God-im tuqunniaġaatigut nagliksaaġnaqtuatigun naŋirrutikun naagga aŋuyagnikun.”
4Pharaoh-m uqallautigaik Moses-lu Aaron-lu, “Uqaqpisik uvva iñuich savaŋisaaquvlugich? Savaaŋiññuktitqiksigik!” 5Isumaruq inna, “Ilivsi uvva iñugiaksił̣haaŋarusi Egypt-miuniñ. Aasii uvva savaŋaiqugitin!”
6Taaptumani uvlumi Pharaoh-m piraksriġñiġaich kivgauruanun tiliuqtauruallu kivgallu aŋalatchiriŋich, 7“Aitchuqtuŋaiqsigik iñuich ivigruanik katchiksraliuġutiksraŋiñik. Ilimignigli paqillugich piyumagaich. 8Aglaan allaŋŋuġaluaġnagu iñugiaktilaaŋat katchiksraliaŋisa sivuanisun, atausiuramik-unnii inuqtinnasigik. Iqiasuutupiaġataqtut, suli uvva tainnamik apiqsruqtaġaanŋa aullaqtitquvlutiŋ aitchuisukłutiŋ ikipkautitigun God-imignun! 9Siġġaqipkaqsigik suli aptapkaġlugiḷḷu, naalaġniviksraqaŋitchumaut sagluuqtuanik.”
10Kivgauruanun tiliuqtillu kivgallu aŋalatchiriŋich anivḷutiŋ uqallautigaich Israel-gum kiŋuvaaŋich, “Pharaoh uqallaktuaq ivigruanigguuq aitchutqigñiaŋitkaasi. 11Ilivsiññigguuq ivaqłiġiaġlusi sumiḷḷiqaa pisaqtusi, aglaan savaavsi iñugiaktilaaŋat katchiliuġnikun allaŋŋuġniaŋitchuq.” 12Tavraasii iñuich ivaqłiġiaŋaniqsut ivigruat iḷakuŋiññik sumipayauraq Egypt-mi. 13Kivgauruanun tiliuqtiksraqtaaguruat katchuŋaiqłutiŋ savaktinnialagaich taipkunatun iñugiaktigiruanik naatchitquvlugich, uvlutuaġman ivigruanik sivuani piqaqtinmatun. 14Egypt-miut kivgauruanun tiliuqtiksraqtaaguruat anaullaġniġaich Israel-gum kiŋuvaaŋich aŋalatchirich, qaunaksriliutiratik savaaŋannun. Apiġigaich, “Summan imña naatchiḷḷaiqpisi taipkunatun iñugiaktigivlugich katchiksrat sivuani piusivsiktun?”
15Tavraasii aŋalatchirit Pharaoh-mugniqsut aasii iŋiqsruġvigivlugu, “Summan uvva tainna aŋalatpisigut, Umialguruatiin? 16Savaktauruat aitchulaitkait ivigruanik, naaggauvva piraksriġaatigut katchiksraliuquvluta! Aasii suliuvva anaullaqsiġmiugut. Uvva ilvich iñutin patchisaurut.”
17Pharaoh-m kiugai, “Iqiasuksiññaqłusiuvva aullaġuktusi patchisigivlugu aitchuisaqtuaġniaġnivlusi ikipkaiḷusi Atanivsiññun. 18Utiġitchi savaavsiññun! Ivigruaksriññiaŋitkaasi, aglaan tainnatun suli iñugiaktigilugich katchiksraliuġniaqtusi.” 19Aŋalatchirich kaŋiqsirut iłuiḷḷiuġutiqpagmun tikisilaamignik uqallausiaqaqamiŋ tainnatun suli iñugiaktigilugich katchiksraliuquvlugich uvlutuaqpan sivuanisun.
20Aniḷḷaġmiŋ, kasuġaik Moses-lu Aaron-lu, utaqqiritiŋ. 21Uqallaktut Moses-mullu Aaron-mullu, “Atanġumtuq tautugliuŋ savaaqsik aasiiñ tatavsaġlusik uumigiliqsinnavsigut muayuguliqtitaallapta Pharaoh-mun qaukłiŋiñullu. Patchisiksraniktitkisi uvva tuqutquvluta.”
Moses Uqamayuktuq Ataniġmun
22Tavra Moses utitqigñiqsuq Ataniġmun uqaqłuni, “Ataniiq, uvva summan aŋalamaqłukpigich iñutin? Summan imña tiliraġma mauŋa? 23Ullakapkuqaŋa Pharaoh uqaqłuŋa uqaluksrirrutignik, nagliksaaqtitaġillakkaich. Aasii uvva qanuŋaitchutin ikayuqsaġlugich!”
Tällä hetkellä valittuna:
Exodus 5: INUPIAQ
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)