Genesis 41
41
Joseph Mumiksimman Umialgum Siññaktuŋiñik
1Malġuk ukiuk qaaŋianigmagnik, Pharaoh siññaktuġniqsuq makitavluni siñaani kuugum atiqaqtuam Nile-mik, 2tallimat malġuuvlutiŋ immuliviich, quiñiruat suli niqqaġikhutiŋ, puiñiqsut kuugmi aasii niġiñiagaqsivḷutiŋ ivigaaniñ. 3Tavraasii tallimat malġuuruat allat immuliviich puimammiut; pannauruat suli sauniłhiñaġuŋavlutiŋ. Qaivḷutiŋ makitayyaġniqsut saniġaannun allat immuliviich siñaani kuugum, 4aasii pannauruat immuliviich niġiñiqsut quiñiruanik immulivigñik. Tavraasii umialik iqiiqł̣uni. 5Siqutqiḷgiññami siññaktuvsaalgitchuq allamik. Tallimat malġuuruat palauvaksrat, nauganiŋaruat suli nalautinŋavlutiŋ, nauniqsuat atausimi ivigruami. 6Tavra tallimat malġuuruat allat palauvaksrat nausaġniqsut, amisuurat suli panaqłuŋavlugich nunagluktuam anuġiŋata, 7amisuurat niaquŋisa palauvaksrat iiñiġaich tamatkua naulluataŋaruat. Umialik iqiiŋaruq aasii iḷitchuġivluni siññaktuqtilaamiñik. 8#Dn 2.2.Uvlaaġmagu isumaalutchaŋaruq, tavraasii qaitquŋagaich iluqaisa aŋatkularit suli isumaturuat iñuich Egypt-mi. Uqautigaich siññaktumiñik, aglaan nalliataunnii kaŋiqsipkaġumiñaiñŋagaat.
9Tavraasii wine-nun qaukłiuruam uqallautigaa umialik, “Quliaqtuksrauruŋa uvlupak killukkuaŋatilaamnik. 10Uumitchautiŋaran qaukłiat igariich uvaŋalu, aasii tigutaaqtiłłunuk igluanun qaukłiata munaqsrit. 11Unnuat iḷaŋanni iluqanuk siññaktuŋaruaguk, aasii siññaktuvuk allagiiksuanik sivuniqaqłutik. 12Nutaġaq Hebrew-guruaq itqatigiŋaraqpuk, kivgauruaq qaukłiŋannun munaqsrit. Uqallautiŋaraqpuk siññaktuptignik, aasii mumiksisiŋaraatiguk sunik sivuniqaqtilaaŋiññik. 13Nalautinŋarut ilaata uqaluatun: utiqtinŋagiŋma savaamnun, aglaan tuqunŋagiñ igari.”
14Umialgum qaitqugaa Joseph, aasii tavrauvvaa qaipkaŋagaat tigutaaġvigmiñ. Ilaa umŋiyaanikami suli annuġaatqikhuni, ullautiŋaruq umialgum sivuġaanun. 15Umialgum uqallautigaa, “Siññaktuŋaruaŋa uvva, aasii kia unnii suutilaaŋanik iḷitchuġilaitkaa. Kiliktauruaŋa uvva mumiksiḷḷanivḷutin siññaktunik.”
16Joseph-gum kiugaa, “Uvaŋa piyumiñaitkiga, Umialguruatiin, aglaan God qaitchiñiaqtuq iviġaumanaġlugu mumigñiksraŋanik.”
17Umialik uqallaktuq, “Siññaktuqtuami makitavluŋa siñaani Nile-gum, 18tallimat malġuuruat immuliviich, quiñiruat suli niqqaġikhutiŋ, puiñiqsut kuugmi aasii niġiñiagaqsivḷutiŋ ivigaani. 19Tavra tallimat malġuuruat suli allat immuliviich puimmiut pannauniqsuat suli sauniłhiñaġuŋavlutiŋ. Qiññaġiisigiruanik tainnatun immulivigñik tautuŋaitchuŋa sumipayaaq Egypt-mi. 20Pannauruat immuliviich niġigaich tamatkua quiñiruat, 21aglaan kia unnii nalunayaġaich, qanukkii tainnasuli qiññaŋat ittuq sivuanisun. Tavraasii iqiiqsuŋa. 22Siññaktuġmivḷuŋasuli tallimat malġuuruanik palauvaksrat nauganiŋaruanik suli nalautinŋavlutiŋ, nauniqsuat atausimi nakautami. 23Tavraasii tallimat malġuuruat niaquŋich palauvaksrat nausaġniqsut, amisuurauvlutiŋ suli panaqłuŋavlugi nunagluktuam anuġiŋata, 24aasii tavra amisuurauruat niaquŋich palauvaksrat iiñiġaich tamatkua naulluataŋaruat. Quliaqtuaġigaluaġitka siññaktutka aŋatkulariñun, aglaan nalliataunnii quliaŋitkaich sunik sivuniqaqtilaaŋiññik uvamnun.”
25Joseph uqallaktuq umialigmun, “Malġuuruak siññaktuk sivuniqaqtuk atiruamik; God-im uvva uqallautigaatin qanuq ilaa savagniaqtilaamiñik. 26Tallimat malġuuruat quiñiruat immuliviich tallimat malġuurut ukiut, aasiisuli tallimat malġuuruat nauŋaruat niaquŋich palauvaksrat tallimat malġuuvlutiŋ ukiugummiut; atiruamik sivuniqaqtuk. 27Tallimat malġuuruat pannauruat immuliviich aquvatigun qairuat suli tallimat malġuuruat niaquŋich palauvaksrat panaqłuktaŋich nunagluktuam anuġiŋata tallimat malġuuniaqtut ukiut niqaiḷḷiuġniksrat. 28Ittuq tavra uqallausiptun—God-im uvva iḷitchuġipkaġaatin qanuq ilaa savagniaqtilaamiñik. 29Tallimat malġugni ukiuni atqunaq nauriqpagniaqtut iluqaani nunaŋani Egypt. 30Taaptuma aquagun, tallimat malġugni ukiuni niqaiḷḷiuġnaq inniaqtuq, aasii atqunaaqivlutiŋ nauriqpaŋaniqtiŋ piiguġniaġaat, qanukkii niqaiḷḷiuġnam maqunniaġaa nuna. 31Atqunaaqivlutiŋ nauriqpagniqtiŋ iluqaan piiguġniaġaat, qanukkii aquagun niqaiḷḷiuġniksraq piaġiitpaiññiaqłuni. 32Malġuułługu tavra siññaktuqavich sivuniqaqtuq sivunniutigianiktilaaŋanik God-mun aasii ilaata nalautiyasiuraġaa.
33“Tavra naliġaktuksraurutin iñugmik isumaturuamik suli kaŋiqsimmatiqalluataqtuamik aasii qaukłiḷiutilugu nunami. 34Nalunaiqsiruksraurutinsuli allanik qaukłiuraksranik aasii tallimaŋat (⅕) nauruat piḷugu taapkunani tallimat malġugni ukiuni nauriqpakpata. 35Piraksriġḷugich katitqulugich iluqaisa niqit ukiulluatani qaiñiaqtuani, aasii ataniġnaqutiksriḷḷugich tutquqsitqulugich palauvaksranik inauruani aasii munaġilugich. 36Niqit tutquqsimaniaqtut nunami atuqsaġlugich tallimat malġugni ukiuni niqaiḷḷiuġnaqsikpan Egypt-mi. Tainna pikpata iñuich paniġniaŋitchut.”
Joseph Qaukłiġuqtuq Egypt-mun
37Umialgum suli savaktiŋisa iviġaumagiŋagaat taamna piraksriun, 38aasii ilaata uqallautigai, “Paqitchumiñaitchugut iñugił̣haaqtuamik Joseph-miñ, iñuk God-im iḷitqusianik piqaqtuaq.” 39Umialigum uqallautigaa Joseph, “God-im iḷitchuġipkaŋagaatin iluqaanik taaptumiŋa, tavraasii nalunaitchuq isumattutiqałhaaqtutin suli kaŋiqsimmatiqałhaaqłutillu allaniñ iñugniñ. 40#Ac 7.10.Qaukłiḷiutiniaġikpiñ nunagiramnun, aasii iñugipayaaqtatka kamakkutiqaġniaqtut piraksriqsuutignun. Ataniġnaqutin tugliuniaqtuq kisian uvamniñ. 41Qaukłiksraqtaaġigikpiñ iluqaanun Egypt-mun.” 42#Dn 5.29.Tavraasii Pharaoh-m mattaŋagaa qitiqłiaġutini titiŋaruaq umialgum nalunaiñŋutaŋanik, aasii atipkaqługu Joseph argaŋanun. Annuġaaqługulu ukiłhaaġiksuanik, quŋusiġusiqługulu kaviqsuamik manigmik piḷiamik. 43Aitchuġmigaa tuglianik umialgum aksraktuuraġmi usiaqsiġviksraŋanik, suli ilaata munaqsrimiñik sivulliuqtiksraŋanik nipałłutiŋ, “Piiqsaaġitchi! Piiqsaaġitchi!” Tavra Joseph qaukłiḷiutiŋagaa iluqaanun Egypt-mun. 44Pharaoh-m uqallautigaa, “Uvaŋa umialguruŋa—aglaan kia unnii iluqaani Egypt-mi isaaġumiñaitkai argani naakka qunmuglugi isigani apiġigaluaġnak.” 45-46Pharaoh-m atchiŋagaa Joseph Egypt-miut atqannik Zaphenath Paneah-mik, aasii tuvaaqatiksriñmivḷugu, Asenath-mik, panianik Potiphera-m, aŋaiyyuliqsiqpauruam iniqpaŋani Heliopolis.
Joseph iñuiññaq qulitun (30) ukiuqtutigiŋaruq savautisaqamiuŋ umialga Egypt. Umialgum inauvianiñ aullaqhuni kukiḷuŋaruq iluqaani nunami. 47Nauriqpagman nuna tallimat malġugni ukiuni atqunaq nauripiaġataŋaruq, 48iluqaisa Joseph-gum katiłługich tutquŋagaich nunaaqqiḷḷaani. Nunaaqqiḷḷaani tutquqługich niqiksrat nauruat nunaŋisa avatillaaŋiññi. 49Palauvaksrat iñugiakpaił̣ł̣utiŋ Joseph-gum kisinŋaiŋagaich unnii—qanukkii kisiññaġumiñaiŋarut.
50Niqaiḷḷiuġnaq tikiñŋaiñŋaan, Joseph malġugnik iġñiqaŋaruq Asenath-kun. 51Uqallaktuq, “God-im piiguqtitkai iluqaisa nagliksaaġnitka suli iluqaisa aapagma qitunġaŋi”; tavraasii atchiŋagaa sivulliq iġñini Manasseh-mik.#41.51 Hebrew-t uqaluŋanni Manasseh-m sivuniŋa “piiguqtitkai.” 52Uqallakhunisuli, “God-im miqłiqtuksriñŋagaaŋa nunami siġḷiġniuġvimñi”; tavra atchiġñiġaa tuglia iġñimi Ephraim-mik.#41.52 Hebrew-t uqaluŋanni Ephraim sivuniŋa “miqłiqtuksriñŋagaaŋa.”
53Tallimat malġuuruat ukiut atqunaq nauriqpagviuruat nunaŋani Egypt naanŋarut, 54#Ac 7.11.tavraasii tallimat malġuuruat ukiut niqaiḷḷiuqpagviich isagutivlutiŋ, Joseph uqallausiatun. Niqaiḷḷiuġnaq iḷiŋaruq allani nunapayaani, aglaan niqiqaŋaruq iluqaani nunaŋani Egypt. 55#Jn 2.5.Egypt iñuŋich kaaksiuliaqsigamiŋ nipaallagaqtut umialigmun niqiqaġukhutiŋ. Tavraasii piraksriġaġigaich Joseph-muquvlugich aasii kamagilugu qanuq uqallautikpatiŋ. 56Niqaiḷḷiuġnaq iŋattaqsiŋaruq suli siamiłłuni iluqaani nunami, tavraasii Joseph-gum agmaŋagaich suġalliqpiich aasii tuniuqqaivḷuni palauvaksranik Egypt-miunun. 57Iñuich qaiyaaŋarut Egypt-mun sumiḷḷiqaa nunapayauramiñ tauqsiġiaqhutiŋ palauvaksranik Joseph-miñ, qanukkii niqaiḷḷiuqpagnaq iḷivaił̣ł̣uni sumipayauraq.
Tällä hetkellä valittuna:
Genesis 41: INUPIAQ
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)