Luka 5
5
Wiithaniwa wa anamasuuza owambeela
(Matewuzhi 4.18-22; Maruku 1.16-20; Zhuwawu 1.35-42)
1Nlabo nimohi Yesu ahiimelaga seresere ya Nyaza ya oGenezareti,#5.1 Ela sowi Nyaza ya oGalileya. athu ajinji yegi ompinyaminya wi yiiwe madhu a Mulugu. 2Oliye ahoonaga mwanddeya miinddi seresere ya nyaza, anamatotaya yahikitagamo, yaahuwaga mathavi eewa. 3Yesu ahigwelaga mmwanddeyani mmohi, waaligi wa Simawu, ahimulobaga wi asusihedhe vang'ono munyaza. Ahikaraatigi, wambeela waasuuziha anamwinji.
4Agamalile owoga, ahimwiirelaga Simawu: <<Susihedha wooddiiha mwaabwinihe mathavi eenyu wi mutote>>.
5Simawu ahaakulaga, wiira: <<Namasuuziha, mahiyu maatene nihilaba kanipile yego. Mbwenye, vowi di nyo munagiruma waabwiniha, miyo gineere orumeedha>>.
6Egabwinihile mathavi, yahipaga somba dhijinji mathaviya yahambeelaga otaleya. 7Yahiiraga etoonyihedho wa akwiiwa yaaligi mmwanddeyani mmohi wi edhe yaakamihedhe. Aliwa yahidhowaga, odhaaliha mwanddeya dhaamiinddidhene ofiyedha ohala vang'ono wi dhibwine.
8Simawu Peduru agoonile nde, ahikokoraga vakukuuve ni Yesu, wiira: <<Nabwiyani, mususe wa miyo vowi gili namathega>>. 9Simawu ni akwaaye yahitikinaga menjivelo a somba dhapiligiisu. 10Tiyago ni Zhuwawu amwaana a Zebedeyo, akwaaye a Simawu teto yahitikinaga vajinjivene. Yesu ahiiraga Simawu: <<Kawoove! Okuma dhiinova odhowa osogolo onaakale namatota a athu>>. 11Mowindo yahisusihedhaga mwanddeya dheewa ode, ohiya dhaatedhene, omuharaga Yesu.
Oyilihiwa wa muliba maredda
(Matewuzhi 8.1-4; Maruku 1.40-45)
12Dhapadduwile ayi, Yesu aaligi nluwa nimohinene, mwahikala mulobwana mmohi anna maredda#5.12 Maredda mu ewogelo ya eGerego kinaagana mareddave mbwenye teto dhiredda dhoohiyana-hiyana dha nikupa na muthu. mwiili waatene. Agamoonile Yesu, ahikokoraga, oworomihedha kove vati, omuloba, wiira: <<Nabwiya, nyo muhukanna owodha, mwafuna mugeelihe>>.#5.12 Mugeelihe Naari wi: mugiyilihe.
13Yesu ahimutapulelaga madada omukahinyana, wiira: <<Gihifuna. Kala oweela!>> Mudhidhi olene maredda yahimmalelaga.
14Yesu ahimuthonga, wiira: <<Onamwaaddele mmohi; mbwenye odhowe weyoonihedhe wa anamakutha ni oveleela mukutho woweelihiwa waawo wona mwalamulele Mozezi, okale onamoona wa athu>>.
15Mowindo, bili ya Yesu yoovuweya vajinjivene, athu ajinji yoodha omvuruwanaga ni oyilihiwa dhiredda dheewa. 16Yesu oopoothowesa odhowa mburo mmohi va yeeka, olobelaga.
Yesu onomuyiliha mulobwana ookwa-yaano
(Matewuzhi 9.1-8; Maruku 2.1-12)
17Nlabo nimohi Yesu eeraga osuuziha, aFarizi ni anamasuuziha a malamulo yahikaraatigi mwemule, yadheelege mirudda dhaatedhene dha oGalileya, dha oZhudeya ni dha oZheruzalemi. Owodha wa Nabwiya waaligi ni oliye wi aayilihe aredda. 18Nuwindo, alobwana amohiwa yahidhaaga yamuthukulege mulobwana mmohi ookwa-yaano emuthebaga vanteteni. Yoosayelaga vomvolowana wi yamurule vameentoni va Yesu. 19Ehoonile vomvolowana ni mwaha wa anamwinji. Yahigwelaga vadhulu va nyuba mwaaligi Yesu. Ovenyihavo mapalipali, okitelihavo ntete vaari va athu, vameentonivene va Yesu.
20Yesu vowoona nroromelo neewa, ahimwiirelaga muliba okwa-yaano ole: <<Mukwaaga, dhoothega dhaawo dhihileveleliwa>>.
21Anamasuuziha a malamulo ni aFarizi yowuubuwelaga: <<Olaya onanyemula dha Mulugu baani? Onalevelela dhoothega, baani? Muluguve, baahi>>.
22Yesu voonona dhoobuweligiisu, ahawiirelaga: <<Mmirimani mweenyu munaanganyedhela ddi? 23Yoohurusa siivi: wiira: <Dhoothega dhaawo dhihileveleliwa>, naari wiira: <Venya weedde>? 24Mbwenye wi munone miyo, Mwaana a Muthu gihikanna othongi mwiilaboni ya vati woolevelela dhoothega>>. Ahimwiirelaga mulobwana ookwa-yaano ole: <<Ginowuwaaddela: Ovenye, othukule ntete naawo, odhowege vaade vaawo>>. 25Mowaaguva ahivenyaga vameentoni veewa, othukula ntete vakonaantiligiiye owelela vaade, amutamaalaga Mulugu. 26Aatene yahitikiniheyaga ni woova, yoomuthithimihaga Mulugu, yiiraga: <<Peeno dhooniliihu sootikiniha>>.
Yesu onomwiithana Leevi
(Matewuzhi 9.9-13; Maruku 2.13-17)
27Dhigeereyile nde, Yesu ahivenyagavo, omoona namakoha-musoko agakaraatile vowaakela korowa, eeriwa Leevi.#5.27 Leevi Naari wi: Matewuzhi. Moone Matewuzhi 9.9. Omwiirela: <<Giharege>>. 28Leevi ahivenyaga, ohiya dhaatedhene, omuharaga.
29Vano Leevi ahimusasanyedhela Yesu mathanga malubale vaade vaaye. Anamakoha-musoko ajinjeene ni athu amohiwa yaaligi vameeza ni aliwa. 30Mbwenye aFarizi ni anamasuuziha a Malamulo yegi wawaaba anamasuuza a Yesu. Yahaakohaga, yiiraga: <<Munaja ni ong'wa ni anamakoha-musoko ni anamathega alubale mwaha wa ddi?>>
31Yesu ahawaakulaga, wiira: <<Agumi kinamurabulela namugu mbwenye aredda. 32Kagidheele wawiithana athu ooharihamo, mbwenye gaadheele anamathega wi etthwaruwe>>.
Yesu onokohiwa mwaha woothuga
(Matewuzhi 9.14-17; Maruku 2.18-22)
33Vevale aFarizi yahiwogaga ni Yesu, wiira: <<Anamasuuza a Zhuwawu enothuga elobelaga dila biili-biili teto anamasuuza a aFarizi enowiirana ndo. Mbwenye aawo enooja, enoong'wa>>.
34Yesu ahawaaddelaga, wiira: <<Akwaaye a namatela enothuga agali vevo namatelaya? Kadhinaandeya! 35Mbwenye nneere ofiya nlabo onavenyihiwiiyevo vaari veewa namatelaya, mudhidhi oyene eneerege othuga>>.
36Nuwindo, Yesu ahaawogelaga musibe ola, wiira: <<Kalivo muthu onatala ecapa ya yoowara exa acapelana yoowara yawale. Eera ndo, enonoongeya, yacapeliwana exa, kinafwaneelela ni yawale. 37Kalivo onamuhela vinyu muxa mmathumbani a makupa awale. Eera ndo, vinyu muxa onotala mathumbaya; onothathiya vinyuya, mathumbaya enonoongeya. 38Moohiyaniha, vinyu muxa onaheliwa mathumba maxa wi dhaatedhene dhilogoleleye. 39Kalivo onamung'wa vinyu awale, amfunaga muxa, vowi oneerege: <Awale dili apama> >>.
Tällä hetkellä valittuna:
Luka 5: tke
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2015, Wycliffe Bible Translators, Inc. All rights reserved.