Lukas 23
23
Philaj Taug Yexus Zaj
(Mathais 27:1-2, 11-14; Malakaus 15:1-5; Yauhas 18:28-38)
1Tagnrho cov neeg uas tuaj sablaj ntawd txawm sawv thiab coj Yexus mus cuag Philaj. 2Lawv komtxim rau Yexus hais tias, “Peb ntes tau tus txivneej no thaum nws tabtom ntxias kom peb haivneeg yuamkev. Nws txwv tsis pub lawv them se rau Xixas thiab Nws khav hais tias Nws yog tus Mexiyas uas yog vajntxwv.”
3Philaj nug Yexus hais tias, “Koj puas yog cov Yudais tus vajntxwv?”
Yexus teb tias, “Yog li koj hais.”
4Ces Philaj hais rau cov thawj povthawj hlob thiab cov neeg coob-coob ntawd hais tias, “Kuv tsis pom tus Txivneej no muaj ib yam dabtsi uas yuav txaus muab Nws teemtxim li.”
5Tiamsis lawv yimhuab hais tawv-tawv tias, “Nws tej lus qhia ua rau sawvdaws muaj kev kubntxhov thoob lub xeev Yudas. Nws pib qhia pem Kalilais thiab zaumno twb tuaj txog rau hauv no lawm.”
Helauj Taug Yexus Zaj
6Thaum Philaj hnov lawv hais li ntawd, nws nug lawv seb tus txivneej ntawd puas yog neeg Kalilais. 7Thaum Philaj paub tias Yexus tuaj pem cheebtsam uas Helauj kav tuaj, ces nws txawm xa Yexus mus cuag Helauj, rauqhov lub sijhawm ntawd Helauj kuj tabtom nyob rau hauv lub nroog Yeluxalees thiab.
8Thaum Helauj pom Yexus, nws zoosiab kawg li, rauqhov nws yeej xav pom Yexus los ntev lawm. Los ntawm qhov uas nws tau hnov txog Yexus lub moo, nws xav pom Yexus ua qeeyam txujci tseemceeb. 9Helauj nug Yexus ntau yam, tiamsis Yexus tsis teb li. 10Cov thawj povthawj hlob thiab cov xibhwb uas qhia Kevcai txawm txav zog mus rau pem hauvntej kom Yexus hnyav kawg li. 11Helauj thiab nws cov tubrog thuam Yexus thiab ua saib tsis taus Nws; lawv txawm muab ib lub tsho ntev uas zoonkauj heev rau Nws hnav thiab xa Nws rovqab mus rau Philaj. 12Txij hnub ntawd los ces Helauj thiab Philaj txawm rov ua phoojywg lawm; yav tas los nkawd yog yeebncuab.
Txiavtxim Muab Yexus Tua
(Mathais 27:15-26; Malakaus 15:6-15; Yauhas 18:39—19:16)
13Philaj hu cov thawj povthawj hlob, cov thawjcoj thiab cov pejxeem tuaj, 14thiab hais rau lawv tias, “Nej coj tus txivneej no tuaj rau kuv thiab hais tias Nws ntxias kom cov pejxeem yuamkev. Zaumno kuv twb taug Nws zaj tabmeeg nej sawvdaws lawm, thiab kuv tsis pom tias Nws tau ua ib qho txhaum rawsli tej uas nej kom Nws ntawd. 15Helauj los kuj tsis pom Nws muaj ib qho txhaum li thiab, Helauj thiaj xa Nws rov los rau peb. Tus txivneej no yeej tsis tau ua ib qho txhaum uas tsimnyog tuag li. 16Yogli ntawd, kuv yuav kom luag muab Nws nplawm thiab tso Nws mus.” 17#23:17: Tej phau qub muaj nqe 17 no ntxiv rau: Rawsli ibtxwm, txhua zaus uas ua kevcai Hla Dhau, Philaj yuavtsum tso ib tug neeg raug txim rawsli cov pejxeem thov (saib Malak 15:6).
18Cov neeg coob-coob ntawd qw ibtsaug nrov-nrov hais tias, “Muab Nws tua povtseg! Tso Npalanpas los rau peb!” ( 19Tus Npalanpas no raug kaw rau hauv tsev lojcuj vim kev ntxeev nomtswv hauv nroog thiab kev tua neeg.)
20Philaj xav tso Yexus, nws thiaj rov hais rau cov neeg coob-coob ntawd ib zaug ntxiv. 21Tiamsis lawv yimhuab qw nrov hais tias, “Muab Nws ntsia rau saum ntoo khaublig! Muab Nws ntsia rau saum ntoo khaublig!”
22Philaj rov hais rau lawv ua zaum thib peb hais tias, “Vim licas? Nws tau ua txhaum dabtsi? Kuv tsis pom Nws tau ua ib qho txhaum uas tsimnyog tuag li! Yogli ntawd, kuv yuav kom luag muab Nws nplawm thiab tso Nws mus.”
23Tiamsis cov neeg coob-coob ntawd tas zog qw nrov-nrov kom Philaj muab Yexus ntsia rau saum ntoo khaublig. Thaum kawg lawv lub suab qw ntawd tau kovyeej Philaj. 24Yogli ntawd, Philaj thiaj txiavtxim rau Yexus rawsli lawv thov. 25Thiab Philaj tau tso tus neeg uas lawv thov rau lawv, tus uas raug kaw rau hauv tsev lojcuj vim kev ntxeev nomtswv thiab kev tua neeg. Ces Philaj txawm muab Yexus cob rau lawv rawsli lawv siab nyiam.
Yexus Raug Ntsia Rau Saum Ntoo Khaublig
(Mathais 27:32-44; Malakaus 15:21-32; Yauhas 19:17-27)
26Thaum cov tubrog tabtom coj Yexus tawm mus, lawv txawm ntsib ib tug txivneej hu ua Ximoos uas yog neeg Kulenes uas tabtom tuaj pem yajsab tuaj. Lawv ciali muab nws ntes thiab kom nws kwv tus ntoo khaublig lawv Yexus qab mus.
27Muaj neeg coob-coob raws Yexus qab; nyob rau hauv cov neeg ntawd muaj ib co pojniam tau tsa suab hlo quaj nrov-nrov rau Yexus. 28Yexus tig mus saib lawv thiab hais tias, “Cov pojniam uas nyob hauv Yeluxalees 'e, nej tsis txhob quaj tabncuab Kuv, tiamsis ciali quaj tabncuab nej thiab nej tej menyuam. 29Rauqhov yuav muaj ib hnub uas neeg yuav hais tias, ‘Cov pojniam uas ibtxwm xeeb tsis taus menyuam, cov pojniam uas tsis tau xeeb dua menyuam thiab tsis tau pub dua mis rau menyuam noj li, yog cov uas muaj kev kajsiab tshaj!’ 30Lub sijhawm ntawd, yuav muaj neeg hais rau tej roob siab hais tias, ‘Ciali nphau los tsuam peb!’ Thiab yuav hais rau tej povroob hais tias, ‘Ciali pob los txhub peb!’ #Hauxe 10:8; Tshwm 6:16 31Yog lawv twb ua li no rau tsob ntoo uas tseem nyoos, thaum tsob ntoo qhuav lawm lawv ho yuav ua licas rau?”
32Lawv kuj coj ob tug txivneej uas yog neeg muaj txim, mus tua uake nrog Yexus thiab. 33Thaum lawv mus txog ntawm qhov chaw uas hu ua “Pobtxha Taubhau,” lawv txawm muab Yexus ntsia rau saum ntoo khaublig nrog rau nkawm tubsab, ib tug nyob ntawm Nws sab xis thiab ib tug nyob ntawm Nws sab laug. 34Yexus hais tias, “Txiv, thov Koj zamtxim rau lawv, rauqhov lawv tsis paub tias lawv ua dabtsi.”#23:34: Tej phau ntawv qub uas xuas tes sau, tsis muaj Yexus hais tias, “Txiv, thov Koj zamtxim rau lawv, rauqhov lawv tsis paub tias lawv ua dabtsi.” #Nnkauj 22:18
Lawv muab Yexus cev ristsho los twv seb leejtwg yuav tau yam twg. 35Tej neeg sawvdaws sawv ibcag ntsia, tiamsis cov Yudais cov thawjcoj thuam Yexus hais tias, “Nws twb cawm tau lwmtus; yog tias Nws yog tus Mexiyas uas Vajtswv xaiv tiag, Nws kuj cawm Nws tuskheej!” #Nnkauj 22:7
36Cov tubrog los kuj thuam Yexus thiab, lawv muab cawv txivhmab qaub los cev rau Yexus haus, #Nnkauj 69:21 37thiab hais tias, “Yog Koj yog cov Yudais tus vajntxwv tiag, ciali cawm Koj tuskheej los mas!”
38Lawv sau ib co lus uas muab ntsia ncaj ntawm Nws taubhau rau saud hais tias, “Tus no yog cov Yudais tus Vajntxwv.”
39Ib tug tubsab uas raug ntsia rau saum ntoo khaublig txawm txobthuam Yexus hais tias, “Koj tsis yog tus Mexiyas lov? Ciali cawm Koj tuskheej thiab cawm wb kom dim los mas!”
40Tiamsis tus neeg muaj txim uas nyob sab tod txawm cem hais tias, “Koj tsis ntshai Vajtswv lov? Koj raug txim tibyam nkaus li Nws thiab. 41Wb raug txim li no yeej tsimnyog lawm, vim tej kev txhaum uas wb tau ua los; tiamsis tus txivneej no tsis tau ua dabtsi txhaum li.” 42Nws txawm hais rau Yexus hais tias, “Yexus 'e, thaum Koj rov los rau hauv Koj lub tebchaws, thov Koj nco txog kuv thiab.”
43Yexus hais rau nws hais tias, “Kuv qhia tseeb rau koj hais tias hnubno koj yuav tau nrog Kuv nyob hauv qhov chaw uas tau zoo kajsiab lug.”
Yexus Txoj Kev Tuag
(Mathais 27:45-56; Malakaus 15:33-41; Yauhas 19:28-30)
44-45Thaum tavsu, lub hnub ciali tsis ci lawm, ua rau thoobplaws lub tebchaws txawm ciali tsausntuj nti mus txog rau thaum peb teev hnubqaij. Daim ntaub uas dai hauv lub Tuamtsev txawm ntuag rhe ua ob daig. #Khiav 26:31-33 46Yexus hu nrov-nrov hais tias, “Txiv 'e, Kuv muab Kuv tus ntsujplig tso rau hauv Koj txhais tes!” Nws hais li ntawd tagnrho xwb ces Nws txawm tusiav nrho lawm. #Nnkauj 31:5
47Thaum tus thawj tubrog pawg pua pom li ntawd, nws qhuas Vajtswv hais tias, “Tseeb tiag lau, tus no yeej yog ib tug neeg zoo!”
48Thaum cov neeg uas tuaj nyob uake saib tej xwmtxheej ntawd tau pom tej ntawd lawm, lawv txawm rovqab mus tsev thiab ntaus hauvsiab pigpoog. 49Tiamsis tagnrho cov neeg uas yeej ibtxwm paub Yexus, nrog rau cov pojniam uas nrog Yexus tuaj pem lub xeev Kalilais tuaj, lawv sawv deb-deb ntsiantsoov tej no. #Lukas 8:2-3
Faus Yexus
(Mathais 27:57-61; Malakaus 15:42-47; Yauhas 19:38-42)
50-51Muaj ib tug txivneej hu ua Yauxej tuaj pem lub zos Alimathias hauv lub xeev Yudas tuaj. Nws yog ib tug neeg zoo uas sawvdaws hwm, thiab yog ib tug uas tosntsoov Vajtswv lub Tebchaws yuav los. Txawm nws yog ib tug thawjcoj hauv lub Koomhaum qibsiab, los thaum lawv sablaj yuav txiavtxim rau Yexus, nws yeej tsis pomzoo tej uas lawv ua ntawd. 52Nws mus cuag Philaj thiab thov Philaj muab Yexus lub cev rau nws. 53Ces nws thiaj muab Yexus lub cev txo, muab ib chaws ntaub mag qhwv thiab muab tso rau hauv ib lub qhovntxa uas twb yeej txaug tau rau hauv ib phab pobzeb, uas yeej tsis tau muaj leejtwg coj tej tuag mus tso rau hauv li. 54Hnub ntawd yog Hnub Npaj, vim twb yuav txog hnub Xanpataus.
55Cov pojniam uas nrog Yexus tuaj pem Kalilais tuaj, kuj nrog Yauxej mus thiab lawv pom lub qhovntxa thiab pom tias luag muab Yexus lub cev tso licas huv tibsi. 56Lawv rov mus tsev thiab mus npaj tej tshuaj tswqab thiab tej roj tswqab uas yuav nqa mus pleev Yexus lub cev. #Khiav 20:10; 2Kev 5:14
Hnub Xanpataus lawv so rawsli Kevcai tau xaaj tseg lawm.
Tällä hetkellä valittuna:
Lukas 23: MWW2022
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2022 United Bible Societies. All rights reserved.