مَرقُس 2
2
عیسی فِلِجی شِفا بِریَر
مَتّیٰ ۹:۱-۸؛ لوقا ۵:۱۷-۲۶
1عیسی بیرنَچه گوندِن سُنگ کَفَرناحوما قایدیپ گِلِنده، اُنونگ اُیدِدیگی باراداقی خابار یایرادی. 2شُندا اُل یِره شِیله بیر کَن آدام اویشدی، حتّیٰ قاپینینگ آغزیندا دورماغا-دا یِر یُقدی. عیسی اُلارا خودایینگ خوش خابارینی واغیظ اِدیَردی. 3شُل واقت دُرت آدام بُلوپ اُنونگ یانینا بیر فِلِجی گُتِریپ گِتیردیلِر. 4آداملاردان یانگا تیغین-تیغین دُلودیغی اوچین، اُلار عیسانینگ یانینا یاقینلاشیپ بیلمِدیلِر. شُنونگ اوچین اُلار عیسانینگ بُلیان جایینینگ بامینی سُکوپ، فِلِجی دوشِگی بیلِن دِشیکدِن آشاق سالّادیلار. 5عیسی اُلارینگ ایمانینی گُروپ، فِلِجه: «اُغلوم، سِنینگ گونَه‌لِرینگ باغیشلاندی» دییدی. 6اُل یِرده اُتوران دین عُلَمالارینگ کَبیری ایچیندِن: 7«بو آدام نَمه اوچین بِیله کِپلِیَر؟ اُل خودایا دیل یِتیریَر! گونَه‌لِری یِکه خودایدان باشغا کیم گِچیپ بیلِر؟» دییّپ فیکرلِندیلِر. 8عیسی دِرِّو اُلارینگ نَمه فیکر اِدیَندیگینی روحوندا دوشونوپ: «نَمه اوچین یورِگینگیزَه بِیله فیکرلِر گِتیریَرسینگیز؟ 9فِلِجه هایسینی آیتماق آنگسات: ”گونَه‌لِرینگ باغیشلاندی“ دییمِکمی یا-دا ”تور، دوشِگینگی آل-دا، یُری“ دییمِک؟ 10اِمّا سیز اینسان اُغلونینگ یِر یوزونده گونَه‌لِری باغیشلاماغا-دا ایختییارینینگ باردیغینی بیلیپ قُیونگ» دییدی. سُنگرا اُل فِلِجه: 11«سانگا دییَّرین، تور، دوشِگینگی آل-دا، اُیونگه گیت» دییدی. 12اُل هِم یِریندِن توردی-دا، دِرِّو دوشِگینی آلیپ، هِمّه‌لِرینگ گُزونینگ اُوونده چیقیپ گیتدی. هِمّه‌لِر حایران قالدیلار. اُلار: «بیز بِیله زادی آصلا گُرمَندیک» دییشیپ، خودایی اُودیلِر.
عیسی لاوینی چاغیریار
مَتّیٰ ۹:۹-۱۳؛ لوقا ۵:۲۷-۳۲
13عیسی یِنه دِریانینگ کِنارینا گیتدی. هِمّه حالاییق اُنونگ یانینا گِلدی، اُل هِم اُلارا اُورِتمَگه باشلادی. 14عیسی شُل یِردِن گِچیپ باریارقا، مالییات آلیپ اُتوران حَلفینینگ اُغلی لاوینی گُروپ، اُنگا: «مِنینگ ایزیما دوش!» دییدی. اُل هِم توروپ، اُنونگ ایزینا دوشدی.
15اُل یِرده بیرنَچَه مالییات آلیانچیلار#۲:۱۵ اُل زاماندا مالییات آلیانچیلارینگ آدی تِلِکه تانیلیپدی، چونکی باج آلییاردیلار. و گونَه‌کَرلِر-ده باردی. بیر گون عیسی لاوینینگ اُیونده ساچاق باشیندا اُتیرقا، اُلار هِم گِلیپ، اُنونگ شَگیرتلِری بیلِن بیرلیکده عیسی بیلِن اُتوردیلار. اُنونگ ایزینا دوشِنلِرینگ سانی قاتی کَندی. 16فَریسی‌لِر#۲:۱۶ فَریسی‌لِر – یَهودیلِرینگ دُلاندیریان مِجلیسینده گویچلی آداملاریدیر. فَریسی‌لِر خودایینگ شِریغاتینی آداملارا یِرینه یِتیرمِگی اُورِدیَردیلِر، اِمّا اُز آیدیان قانونلارینی قُشیپ هِم خالقا اُورِدیَردیلِر. و دین عُلَمالار عیسانینگ گونَه‌کَرلِر هِم مالییات آلیانچیلار بیلِن ناهار اییّپ اُتورانینی گُرِنلِرینده، اُنونگ شَگیرتلِریندِن: «نَمه اوچین اُل مالییات آلیانچیلار و گونَه‌کَرلِر بیلِن ناهار اییَّر؟» دییّپ سُرادیلار. 17عیسی مونی اِشیدِنده، اُلارا: «طِبیب ساغ آداملارا دَل-ده، مِریضلِره گِرِکدیر. مِن دُغری آداملاری دَل-ده، گونَه‌کَرلِری توبا چاغیرماغا گِلدیم» دییدی.
آرازا توتمالیمی؟
مَتّیٰ ۹:۱۴-۱۷؛ لوقا ۵:۳۳-۳۹
18یحیانینگ شَگیرتلِری و فَریسی‌لِر آرازا توتیاردیلار. کَبیر آداملار گِلیپ، عیسادان: «نَمه اوچین یحیانینگ و فَریسی‌لِرینگ شَگیرتلِری آرازا توتیارلار-دا، سِنینگ شَگیرتلِرینگ بُلسا آرازا توتانُق؟» دییّپ سُرادیلار. 19عیسی اُلارا: «داماد یانلارینداقا، اُندا-دا طُویونگ میهمانلاری آرازا توتیارلارمی نَمه؟ یُق، داماد آرالارینداقا، اُلار آرازا توتوپ بیلمِزلِر آخیرین. 20اِمّا داماد اُلاردان آلینجاق گونلِری گِلِر، اینه، شُندا اُلار آرازا توتارلار.
21«هیچ کیم کُهنه لِباسا تَزه پارچادان یاما سالماز. یُغسا تَزه یاما کُهنه لِباسدان قُپوپ، ییرتیق یِری خاص بیدِرِک بُلوپ گُرنِر. 22هیچ کیم تَزه شِرابی کُهنه مِشیکلِره قویماز. یُغسا شِراب مِشیکلِری بُوسوپ، دُکولِر، مِشیکلِر-ده ضایالانار. تَزه شِراب تَزه مِشیکلِره قویولیاندیر» دییّپ جُغاپ بِردی.
سَبَّت گونی بارادا سُراق
مَتّیٰ ۱۲:۱-۸؛ لوقا ۶:۱-۵
23بیر سَبَّت گونی عیسی بوغدایلیغینگ آراسیندان گِچیپ باریاردی. اُنونگ شَگیرتلِری یُلدا باریارقالار، بوغدای باشلارینی یُلماغا باشلادیلار. 24فَریسی‌لِر عیسی: «سِراِت، نَمه اوچین اُلار سَبَّت گونی قاداغان اِدیلِن زادی اِدیَرلِر؟» دییدیلِر. 25عیسی اُلارا: «داوود بیلِن یانینداقیلار آچ هِم مَحتَج قالانلاریندا، داوودینگ نَمه اِدِندیگینی آصلا اُقیمادینگیزمی؟ 26اُل باش کاهینی آبیاتارینگ زاماندا خودایینگ اُیونه گیریپ، کاهینلاردان باشغالارا قاداغان اِدیلِن هُدورلِنِن چُرِکلِرینی اییدی و یانینداقیلارا هِم بِردی» دییّپ جُغاپ بِردی.#۱ سموئیل ۲۱:۱-۶ 27سُنگرا عیسی اُلارا: «آدام سَبَّت گونی اوچین دَل-ده، سَبَّت گونی آدام اوچین یارادیلدی. 28شُنونگ اوچین اینسان اُغلی حتّیٰ سَبَّت گونونینگ-ده حُکومداریدیر» دییدی.
Tällä hetkellä valittuna:
مَرقُس 2: TUKIR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Turkmen Truth