Mt 5
5
Ayëgëlë ya nkol a yob
Lk 6,20-26
1Ayen angayen minkunda mi bod, ndò angabed a nkol a yob; atòbò a si, ndò bëyègè boe bëngasubu nyè babi. 2Ndò angayaè anyu angayëgëlë bò, nyè na:
Bësombòg mvòm
3Bësombòg mvòm, e ba bënë mëbua a nsisim#5,3 Mëbua a nsisim: E bod bayëm na Zamba etam ṅnyè anë dzam bò na bëbugëban, tò a nyòl, tò a nsisim. Bafidi ki bò bëben., Amu edzoe ya yob yawoge ai bò.
4Bësombòg mvòm, e ba bënë a mëlunga, Amu bayi bò vòli nnëm.
5Bësombòg mvòm, e ba bënë evovoe#5,5 Evovoe a nnëm ai a nyòl yazu ai mvòm. Messias azu ki ai ngul, ai abui biduṅ. Azu ai evovoe., Amu si-ndon yayi bò ngab-elig dzaban.
6Bësombòg mvòm, e ba bawog zie ai ekode asu sosoo, Amu bayi dzie.
7Bësombòg mvòm, e ba bënë nnëm ngòl, Amu bayi bò yen ngòl.
8Bësombòg mvòm, e ba bënë nnëm mfuban, Amu bayi yen Zamba.
9Bësombòg mvòm, e ba benë bod bë mvoè, Amu bayi bò loe na «Bòn bë Zamba».
10Bësombòg mvòm, e ba bëbëlë efëma asu sosoo, Amu edzoe ya yob yawoge ai bò.
11Mina bësombòg mvòm, eyòṅ bënkag mina, bëfëmë mina, bëdzoo mina kan abe asë asu dama. 12Taan, mifono, amu maan man mënë abui a yob. Nala ngò bëngafëm e bëprofet bëmbë mina osu.
Nku ai mfyè
Mk 9,50; Lk 14,34
13Mina minë nku si. Ngë nku wasole, bayi wò bad kidi ai dze? Wasëki fë ai mfi, hë na bakub wò a nsëṅ, bod bëngakòòdò wò ai mëkol. 14Mina minë mfyè si. E tisòn enë a nkol a yob, esëki dzam sòbò. 15Ndò fë, bakad ki koe alamba, bëngatele dò a enòṅ asi; batele dò a etelëga a yob, asu yë na avë e bod bësë bënë a nda mfyè. 16Mfyè waan ofyè a mis më bod nala, asu yë na bëyen mimbëmbë mi mam miabò, bëvë esya waan ya yob olugu.
Mvende
17Mibë kë tsog na masò na mazu vaè mvende ngë bëprofet. Mandzë sòṅ na mavaè, masò dzala#5,17 Yesus abaala mvende, dzam da abëlë ngul ya avaè e dzi esë yasëki fë ai mfi.. 18Bëbëla emen, makad mina na, osusua yë na yob ai si bialod, tò ekanga dzia ziṅ, tò man atòn ziṅ ya ekanga ayi ki lod, së na mam mësë mëmana dzalëban. 19E nyò osë ayi vaè dzidzia ya mëmvende mënë ntòg ma, ayëgëlë fë bod abò nala, bayi nyè loe na «e mod mvua» a edzoe ya yob. E nyò ki ayi bò ngë ki ayëgële mò, bayi nyè loe na «e mod nënë» a ayòṅ ya yob. 20Amu makad mina na, ngë sosoo waan andzëki lod e nyò bësaṅa bëkalara ai bëfarisea, mianganyian ki a edzoe ya yob.
Olun
Lk 12,58
21Mingawog na bëngadzo ai bëtara na: Të wawoe. E nyò awoe, ayean ai nda-mëdzo. 22Mfa wama, makad mina na, e mod osë awog olun ai manyaṅ, ayean ai nda-mëdzo. E nyò adzo ai manyaṅ na «Raka»#5,22 Evoe nlo. ayean ai nda-mëdzo nen. E nyò adzo na «Okukud», ayean ai ebe ndoan. 23Ngë wakë hm tuni efaè dzoe a alatar, abog te wakë tsog we na manyòṅ abëlë mëliṅëna ai wa, 24ligi efaè dzoe osu alatar hala, otari kë kom ai manyòṅ, abog te hm ozu kë tuni efaè dzoe. 25Tam kui kiṅ dzia ai e mod abelë ai wa adzo, ntye osë ongëlë ai nyè a zen, asu yë na aza kalan wa a mò më ntsigi-ntol, ntsigi-ntol ny'akalan wa a mò më mod bisye, bëwoa wa a nda-mimbog. 26Bëbëla emen, makad wa na, wayi ki kui hala, së na omana dugan ekola esë.
Bisog
27Mingawog na bëngadzo na: «Të waandaman alug». 28Ma makad mina na, e mod osë abëbë mininga mis yë na atam nyè, mod te andaman ya alug ai nyè a nnëm woe. 29Ngë e dis doe ya mbo-nnomo labò na oku mbëg, tui dò#5,29-30: Yesus adzo ki na mod otsig wò, ngë ki na otye dis doe. Ayi na alëdë na mod wayean tub nsëm oyab., owoa dò oyab. Anë ai mfi na odzaè edzoo dzoe dzia alodo na nguma nyòl woe owoaban a mod mbimbi. 30Ndò fë, ngë wò woe ya mbo-nnomo waandëgëlë wa, tsigi wò, owoa wò oyab. Anë ai wa mfi na edzoo dzoe dzia edzaṅa lodo anë nguma nyòl odzaṅa mbimbiṅ ete.
Asoe mininga
Lk 16,18
31Bëngadzo fë na: «Ngë mod asoe ngal, avaa nyè kalara maan».#5,31 Em 24,1.. E kalara yë na basoe nyè. 32Ma makad mina na: «E nyò osë asoe ngal, ngë së ki adzo ebòn ai mod mfë, mod te asogolo ngal a bisog; ndò fë e nyò alug e mininga anë ntsaman ai nnom, mod te abò ya bisog».
Të wakani sòṅ
33Mingawog fë na bëngadzo ai bëtara na: «Të wakani evoe sòṅ, okpaèn e mëtiṅ ongalig Nti» #5,33* Bl 19,12. 34Ma makad mina na, të wakanikani sòṅ ; tò a yob, amu yob onë etoa ntomba Zamba, 35tò a si, amu enë etëlë mëkol dzie, tò ki a Yerusalem, amu anë tisòn nkukuma nen 36tò a nlo woe, amu wasëki dzam bò na kòṅ esil dzoe dzia efum ngë ki na evin. 37Nkòbò waan obò hë owe, owe, ngë ki na kokoa, kokoa. E dzi yabëdëban a yob hala yasò abë Mbe.
Të wabò bivudëga
Lk 6,29
38Mingawog na bëngadzo na: «Dis labudan ai dis, asoṅ labudan ai asoṅ#5,38 Mb 21,24. Baloe e mvende nyi na mvende bivudëga. Dzam da mvende yadzo na mod wayean dugan e mod mbòg hë abim nyè abò wa. Ngë atui wa dis, wayean nyè tui hë dis dëda. Nala watyan na mod wayean ki bag dzom ziṅ a yob..» 39Ma makad mina na, të mialuman ai Mbe. Dzam da, ngë mod abimi wa a amaṅ ya mbo-nnomo, lëdëgë fë nyè e di avòg. 40E nyò ayi na akë ai wa a nda-mëdzo na anòṅ wa ewòman, dzoge fë nyè kod dzoe. 41Ngë mod ayag na owulu ai nyè taṅ mëkol akuda, wulugu ai nyè bakuda bëbè. 42Ngë mod adzaè wa, vaa nyè, ngë adzaè wa ekola, të walum nyè mvus.
Odiṅi minziziṅ mie
Lk 6,27.32-36
43Mingawog na bëngadzo na: Odiṅi manyòṅ#5,43 Bl 19,18 Mfag ya onë na «osiṅi nziziṅ woe», nala wasëki ntilan a Bibel. Ebug te engasò a mëtum ya mëngasò Yuden kidi., osiṅi nziziṅ woe. 44Ma makad mina na: Diṅan minziziṅ mian, mikogëlan asu e ba bafëm mina 45asu yë na mibò bòn bë esya waan ya anë a yob, amu abò na nlo-dzobo woe akui asu bëbe ai mimbëṅ, anoege mvëṅ asu bësosoo ai bod bë dzongo. 46Amu ngë miadiṅ hë e bod badiṅ mina, maan mëfe mibëlë ete? Bënòṅò bë ntòlò babò nala a? 47Ngë miasug hë babënyòṅ, dze miadaṅ bò ete? Bëhaiden babò nala a? 48Tòbëgan a saaṅ anë mbol Tara waan ya yob anë a saaṅ.
Tällä hetkellä valittuna:
Mt 5: NTE12
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
MKPAMAṄ AMVOE Nouveau Testament en langue Ewondo © Bible Society of Cameroon, 2012.