MATTHAI 4
4
1Cuhnuah Jesuh cu khuachia nih rak tukforh dingin Thlarau nih ramcar ah a hruai. 2Ni sawmli le zan sawmli rawl a ulh hnu ah a rawl a ṭâm. 3Tukforhtu cu a ra i, “Pathian Fapa na si ahcun, hi lung hi changreu i cang dingin nawl pe hna ngat,” tiah a ti. 4Anih nih, “Minung hi rawl lawngin a nung lai lo, Pathian kâ in a chuakmi bia in a nung deuh lai, tiah ṭial a si,” tiah a leh. 5Cu hnu ah khuachia nih khawthiang chungah a kalpi, ṭempal zimah a chiah i 6A sinah, “Pathian Fapa na si ahcun vung zuang tuah, “Zeitintiah nangmah kongah a vanmi a thlah hna lai i na ke lungah nâ khawn nâkhnga lo an kutin an in cawi lai,’ tiah ṭial a si,” tiah a ti. 7Jesuh nih, “BAWIPA na Pathian na hneksak lai lo,” tiah, ‘ṭial a si kha,’ tiah a ti. 8Khuachia nih a sâng ngaimi tlângcung ah a kalpi ṭhân i hi vulei pennâk le a sunparnâk vialte kha a hmuhsak. 9Cun a sinah, “Bawk in naka biak ahcun, hi vialte hi kan pêk lai,” tiah a ti. 10Jesuh nih, “Satan, lo ko in tli! ‘Zeitintiah BAWIPA na Pathian bia law, Amah rian lawng lawng va ṭuan,’ tiah ṭial a si,” tiah a ti. 11Cuhnuah khuachia nih Amah cu a kaltâk i zohhmanh, vancungmi kha ra in an zohkhenh. 12Johan kha thongah thlâk a si ti kha Jesuh nih a theih tikah, Galili ah a kal. 13Nazaret kha chuahtâk in Zebulun Naphtali peng rili kamah a ummi Kapernaum ah a phân i khua a sa. 14Cucu Profet Isaiah nih a rak chim chungmi, 15“Zebulun le Naphtali ram, rihli panhnâk lam, Jordan va ral i a ummi Galili Gentel hna; 16Muihnâk chung i a ummi hna nih a liannganmi ceunâk an hmuh i thihnâk thladem tang i a ummi hna sinah ceunâk a chuak cang” timi a tlin nâkhnga caah a si. 17Cu cân thawkin Jesuh nih, “I ngaihchih u, vanbawi pennâk cu a nai cang” tiah chim hram a thawk. 18Jesuh cu Galili rili pawng i â chawh lio ah, unau pahnih Simon Peter timi le a nau Andria sur an vorh lio kha a hmuh hna; annih cu ngatlaitu an si. 19Cuticun an sinah, “Ka zul u law ngatlaitu in minung tlaitu ah kan ser hna lai,” tiah a ti. 20An sur kha kaltak in an zulh cawlh. 21Cuka cun a kal i unau dang pahnih, Zededi fapa Jeim le Johan anpa Zebedi he tilawng chung i sur an thlawp lio kha a hmuh hna i annih zong a kawh hna, 22an tilawng le anpa kha hmakhat teah kaltâk in an zulh. 23Jesuh nih an sinagog ah cawnpiak in pennâk thawngṭha kha chim in, zawtnâk le fahnâk phunkip chungin mizapi kha damter in Galili ram vialte kha a ṭol. 24Cuticun a thawngpang cu Siria ram vialte ah a thang; zawtnâk le fahnâk phunkip a tuarmi kha an ratpi hna, cheukhat cu khuachia tuahmi, mitlu le mizeng an si i arak damter dih hna. 25Galili ram, Dekapoli, Jerusalem, Judia ram le Jordan tiva ral tiangin mibu tampi an ra i Amah kha an zulh.
Tällä hetkellä valittuna:
MATTHAI 4: HAKABSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.