JOHAN 1
1
Jo Gü Le Thyümi Ngwala
1Sokerikanyu jo le hü, lo jo le Sunggigü zen hü. lo jo le Sunggigü. 2A-le sokerikanyu Sunggigü zen hü. 3Yhun kebin aphu a-no thyü kü, lo thyükelo tsü aphu a-no thyü kemvu nme-e ndi. 4Kerhünronzin le a-ge bin, lo kerhünronzin tsü le temi keben gü. 5Lo keben le kezün nyu gwünben hü, ai kezün gü le a-nyeki kvulo mvula.
6Sunggigü le nikeshü Johan tsekethyü nme le gunryü, 7tsügü genyu temi aphu no tenyenlo nrün genyu keben gü zan zoshwishü titseo zo gunryü. 8A-le keben gü mvu, ai keben gü zan zoshwishü titseo yhun gunkeryü. 9Temi aphu gwün nben titse keben ketsin gü le kazü nyu gunryü.
10A-le kazü nyu yhun, lo a-le kazü thyü shüe kazü nyu keyhun nyu le a-shalo mvula. 11A-le a-npvü a-temi ka gunryü ai a-temi dan le a-zenlo mvula. 12Ai a-zenkelonyu aphu a-kon le, a-zan ka tenyen kelo ju, a-le tsüdan no Sunggigü nyenyu thyülo titse kethyü kekvu pe tsü laso. 13Tsüle tezi nmvue nthyü nmin kendo nyu, nmvue temi kendo nyu mvu, ai Sunggigü kendo ka nnyu kelo.
14Lo jo tsüle thyümin ngwa gunryüo shwikenjün lo ketsin no a-süpvüo agun dan nyu yhun; tson-o Pvügü Nyuche gü le Sunggigü ka a-kegwa hyukelo, a-kegwa tsü nri gunryü.
15Johan ko Jisu rüla zo-o nra sen-o, “Ale kerika asiki gunryü kezhü gü, a-le anye gon, kechamvule a-le a mhundyü hü kethyü genyu, tson-o a-rüla zo kehü tsüle higü mare,” tsonshü.
16Kechamvule ngun aphu a-kegwa nyu tsü shwikenjün kegwa so ge shwikenjün hyu kelo genyu. 17Tejvü gü we Mosa ben nyu kenye shü, ai keso lo ketsin gü we Jisu Khrista ge chwikeryü genyu. 18Temi le thame kae Sunggigü hyu mvu; A-pvü nyun ge kebin Nyuchegü le a-npvü temi tesha keshü gwünzin.
Sunggigü Tanyünyu Gü
(Mt 3:1-12; Mk 1:1-8; Lk 3:1-18)
19Lo Judanyu dan le Jerusalem nyu Levinyu lo peshü dan nipe Johan ki shüo a-ka, “Nle segü la?” tse ketso keshü ka Johan le zokeshü le hi.
20Tsükatsü Johan le zoshwishü, lo zoshü kemvu thyüla mvu; “Ale Khrista gü tsü kemvu,” tsonshü.
21Tsontsin anyugun le, “Tsonlo nle segü la? Nle Elia mon?”
Tsontsin Johan le, “Ale tsügü kemvu.”
“Nle sidyükesha gü le?” anyugun le tson shün.
Lo a-le, “Tsüe kemvu,” tsonla.
22Anyugun le zo, “Tsonlo nle segü yo agun ka zo shüta. Agun le sen gü agun nikeshü nyu ka zoshü nrün genyu. Nle n npvü nle segü le tse hü nla?”
23Johan le nduka Isaya sidyükeshagü le kezo tsü pe kenishü:
“Hagun Npugü tson thyü kenzhü
lo chi!
tson-o chün nyu temi nme le nra sen
kehü khwen gü tsü le a hile.”
24Lo tsüdan tsü le Farisinyu danka nikeshü. 25Tson-o anyugun le a-ketso-o a-ka, “Nle Khrista gü kemvu, lo Elia kemvu, lo sidyükeshagüe mvu yatselo nyu Baptaiz thyü hü nla?”
26Johan le anyugun ka zo, “A we zü nyu hagun baptaiz thyü kehü gwünzin; hagun dan nyu hagun le a-sha kemvu nme le bin. 27A-le asiki ryü zhü, ale a-phaje kephinron-e shwülo kümvu.”
28Tha hidan hi aphu Johan le me Baptaiz kethyü Jordan züri kho Bethani ki thyü hü laso.
Sunggigü Tanyü Nyugü
29Tsüsigü nyü Johan le Jisu le a-ki ryü kezhü hyuo zo, “Hire, kazü kemu sen tinla titse kethyü Sunggigü Tanyü Nyugü! 30Ngüka a-le, ‘Temi nme le asiki ryü zhü nyo, a-le anye gon, kechamvule a-le a mhundyü hü kethyü genyu, tson-o a-rüla zokehü gü tsüle higü hi mare.’ 31Lo ako a-shalo mvula; ai a-no a-khipe Israel nyu tesha titse kethyü genyu, tsügenyu zü nyu me baptaiz thyü gunkeryü gwünzin,” tsonshü.
32Lo tsüntimvule Johan le Jisu rüla zo-o, “Kapu gü le nsu hontse tsangge tsüryüo a-ge binlo kela ale hyu. 33Lo a we le a-shalo mvula; ai zünyu me baptaiz thyülo tseo anikeshü gü le a-npvü aka, ‘Nle Kapu gü le a-ge tsükeryü hyukelo, tsüle Kenshün Kapu nyu me Baptaiz thyüshü nrün gü tsü le.’ 34Lo ako tsü hyulo njüo, ‘Higü hile Sunggigü Nyugü tsekethyü a-zan zoshwishü laso.’ ”
Senthyükelo Keri dan
35Lo tsüsinyü Johan le a-sikethennyu mihvu zen hü. 36Lo a-le Jisu le nda kehü hyushüo, “Hire, lile Sunggigü Tanyü Nyugü so!”
37Johan le senthyükelo hvu le jo tsü shalo njüo Jisu sithen tinla. 38Jisu le rani gü au le a-sithen kehü hyulo njüo au ka, “Hai le nyuthyü hü nla?”
Tsüselo au le a-ka, “Rabi, (a-kon le senkethyü gü,) nle dikipon bin nla?”
39Jisu le au ka, “Ryüta, lo hai npvü hyulo ti.” Tsügenyu au le gungü a-kebin bin hyulo; tson-o au le tsünyü a-zen bin, lo tsüle tegi pezi kevü khoka so.
40Johan jo shashüo Jisu sithen kelo hvu nme le Simon Pitor sikezen gü Andria. 41A-le gungü a-tsagü Simon fülo njüo a-ka, “Agun le Mesia (a-kon le Khrista gü) tsü hyulo laso.” 42Tson-o a-le a-zen-o Jisu ki ryülo.
Jisu le a-nrio zo, “Nle Jona nyugü Simon, nno Kafa.” (A-kon le Pitor thyüla tiso.)
Filip Lo Nathanael Hvu Kokelo
43Tsüsinyü Jisu le Galil nyu gü bin; lo a-le Filip hyu shüo a-ka, “Nle a sithen lo re,” tson. 44Lo Filip tsüko Andria lo Pitor au rünyi Betsaida nyu. 45Lo Filip le Nathanael hyu shü njüo a-ka, “Agun le nduka Mosa le tejvü nyu thu kenjü lo sidyükeshanyue thu pe bin kenjü gü tsü hyulo laso. A-le Josef nyugü Nazaret Jisu tsü le.”
46Nathanael le a-ka, “Nazaret nyu thakegwa le chwiryülo gwa ole?”
Filip le a-ka, “Gunryüo nrishü re.”
47Jisu le Nathanael le a-ki gunryü kezhü hyulo njüo a-rüla zo-o, “Likili, thame kae nku hü kemvu Israel nyu ketsin nme!”
48Nathanael le a-ka, “Nle nyu tsethyüo a shalo la?”
Jisu le a-zo keni-o, “Filip le nkeko mhundyü, nle kherobin hensin ki kebin ka, ale n hyu laso.”
49Nathanael le a-ka, “Rabi, nle Sunggigü Nyugü; nle Israel nyu raja gü.”
50Jisu le a-ka, “Ale kherobin hensin nhyu, tsonzo keshü genyu nle tenyenlo ole? Nle hinyeki-e tha gonkvu kethyü dan me hyuti.” 51Tsüntimvule Jisu le a-ka, “Ale hagun ka zo tsentsü shüti, hagun le tsang khinsheshüo Temi Nyugü soge Sunggigü lilonyu le kükezhü lo tsenryü kezhü hyu ti.”
Tällä hetkellä valittuna:
JOHAN 1: REGSBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
