SILBAWLTE 15
15
Jentel Khristiante leh Mosi Daan
1Huleh mi kuate aha Judia gam apatin a hungsuh va, Mosi daan banga zeh na tan louh uleh hutdam na hi thei sih diing uh, chi'n unaute a hilh va. 2Huleh Paul leh Barnaba chu amahuh toh hahnial a, a kinial va, a kikhin jiahun, Paul leh Barnaba chu a lahva kuate aha toh hu thubuai tungah, Jerusalem khua a sawllehte leh upate kawma chiah tou diingin a guat va. 3Huin kouhtuamte’n amahuh chu a va thah va, amahun Jentelte lunghei kiitdan thu soi jel in, Phoenicia gam leh Samaria gam a tawn suaahuh; huchi'n, unaute zousiah nasatahin a kipaahsah uhi. 4Huleh Jerusalem khua a tunun kouhtuamte leh sawllehte leh upate in ana kipaahpih va, huleh, Pathian in amahuh zang a a silbawlte zousiah a soi uhi. 5Hizongleh Pharisai pawl a gingtu kuate aha a kipan va, Jentelte chu a zeh uh tan a, huleh Mosi daan jui diing a zong hilh ngei diing ahi, a chi uhi.
Jerusalem khua a kikhawmpi
6Huin sawllehte leh upate chu hu thu ngaihtuah diingin a kikhawm va. 7Huleh naahtaha a kinial nungun, Peter a kipan a; a kawmvah, Mite leh unaute, Jentelte’n keimah kama tanchinpha ja a, a gintaatna diing va, Pathian in nidang laia, i lah vapat ahung guatdan na he uhi. 8Huleh lungsim hetu Pathian in eihaw ahung piah bangmahin Hagau Siangthou a kawmvah a pia a, a heetpihta hi. 9Huleh eihaw leh amahuh khentuam nei louin, ginna in a lungsim uh ahih siangthou hi. 10Huchi'n i pulepate leh eihawn zong i zoh louhsa uh namkol chu tuin nungjuite ngawng a baat tum a bang diinga Pathian ze-et na hi viai? 11Hizongleh amahuh tobangin, eihaw zong Lalpa Jesu Khrist khotuahna jiaha hutdam diing hi in i kigingta uhi, a chi a. 12Huin mipi zousiah a sipta va, Barnaba leh Paul in Pathian in amahuh zanga. Jentelte laha chiamchihna leh sillimdang a bawlthu a soi uh a ngaikhia uhi. 13Huleh a soi zohun, Jakob in a soi a, Mite leh unaute, ka thu ngai un; 14Pathian in amah min paw diing a, a lah vapat mi honkhat ladoh diingin a masa in Jentelte a veh hi chih thu Simeon in a soita hi. 15Huleh, hi thu leh zawlneite thu a kituaah hi; 16Hizohchiangin, ka hung kiit diing a, David biahbuuh puuhsa ka bawl kiit diing; a siatnate ka bawl kiit diing a, huchi'n ka tungding diing hi. 17Midangte leh Jentel ka min a kikou zousiahte’n Pathian a hawl na diingun, Hi silte zousiah bawlpa Lalpa’n a chi hi, chih gelh bangin. 18A silbawlte zousiah chu khovel siam chiil apatin Pathian heet ahi. 19Hujiahin, Jentelte laha Pathian lama kiheite chu suhbuai dah lei chih ka ngaihdan ahi. 20Milim biahna, sil niin neehte, kingaihte, sa heehlup leh sisan neehte tawpsan diingin a kawmvah gelh lehang ka chi zaw hi. 21Ajiahchu nidanglai apatin Mosi in khaw chinah a thu hilhtu a nei jela, kikhopna inn chinah khawlni tengin a thu chu sim ahi veu hi, a chi a.
Jentel Khristiante kawma lehkhathot
22Huin sawllehte leh upate chu kouhtuam zousiah toh, a lahva mi teel a, Paul leh Barnaba toh Antiok khua a chiahsah hoih a sa va; a teelte uh min chu Juda, a min dang Barsaba, a chih uh leh Silas ahi va, amahuh chu unaute laha houtu ahi uhi. 23Huleh hichibangin lehkhathot chu a gial va a khut vah a thot uh; Sawllehte leh upate leh unaute’n Antiok khua leh Syria leh Silisia gam a um Jentel unaute chibai a buuh uhi. 24Ka lahva kipatin mi kuate aha in, zeh na tan va, huleh daan zong na juih diing uh ahi, chia thu soi in, nanguh ahung subuai va, na lungsim uh a mangbangsah uh chih ka he va; a kawmvah lah thu bangmah ka pe ngal sih va; 25Hujiahin lungsim munkhat pua a ka kikhop un, mi teeldoh a, ka deihtah uh Barnaba leh Paul, 26Lalpa Jesu Khrist min jiaha sih khawhsa loua umte geel toh na kawmva hung sawl diingin hoih ka sa uhi. 27Huchi'n Juda leh Silas ka hung sawl uhi, amahun zong hi thu ka min ahung hilh diing uh. 28Ajiahchu, Hagau Siangthou leh kei un, hi thu poimohte chih louh puaahgih dang bangmah na tungva ngah louh hoih ka sa uhi. 29Milim biahna sa neeh bang, sa heehlup neeh bang leh kingaih bang tawp leh uchin ka chi uhi; hi haw na tawp uleh nanguh diingin a hoih diing hi. Damtahin um un, chi in. 30Huchi'n a sawlkheta va, Antiok khua a tungva; huleh, mipi a koukhawm va, lehkhathot chu a peta uhi. 31Huchu a sim zohun, hamuanna thu jiahin a kipaah mahmahta uhi. 32Huleh Juda leh Silas zong zawlnei ahi va, thu tamtahin unaute chu aha muan va, a sukip uhi. 33Huleh hu a sawttah a um nungun amahuh chu hamuangtahin unaute lah apat sawllehte kawmah a chiahsahta uhi. 34Silas in chu hu muna um tadih hoih a sa hi. 35Paul leh Barnaba ahihleh Antiok khua ah Lalpa thu hilh leh soi in a um zing va, midang tamtahte toh zong.
Paul leh Barnaba a kikhen uh
36Huleh ni bangzat aha nungin Paul in Barnaba kawmah, i chiah kiit diing a, khochina Lalpa thu i soina zousiah a unaute va vehni, bang chi'n a um viai chih i va en diing, a chi a. 37Huleh Barnaba in John, a min dang Mark chu a kawmvah pui a tum a. 38Hizongleh amah, Pamphilia gam a amah uh kiihsan a, natohna a amahuh toh chiah loupi a kawmva pui diing chu Paul in hoih a sa sih hi. 39Huchi'n nasatahin a kinialta va, huleh a kikhen va; Barnaba in Mark a pui a, Cyprus gam ah kuang in a chiahta hi. 40Huleh Paul in Silas a teel a, unaute’n Pathian hehpihna a, a kolsah nungun a chiahkheta hi. 41Huleh kouhtuamte sukip jelin Syria leh Silisia gam a tawnsuah uhi.
Tällä hetkellä valittuna:
SILBAWLTE 15: SIMTBSI
Korostus
Jaa
Vertaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.