SILBAWLTE 20
20
Paul Makedonia gam, Greece gam leh Troas khua ah
1Huleh buaina a daih nungin, Paul in nungjuite a kawmah a kou a, amahuh a aangkawi a, kampha in a ha a, Makedonia gam a diingin a chiahta hi. 2Huleh hu gam vel a totsuaah a, a kawmva hasotna thu tampi a soi zohin, Greece gam a tungta hi. 3Huleh huah ha thum a taam a. Huleh, Judate’n amah a guuhtaan jiahin Syria gam lama kuang a a pai diing laiin, Makedonia gam lehtot kiit a tumta hi. 4Huleh Beria khua a Sopater, Thessalonika khuate: Aristarkha leh Sakundate, Derbe khua a Gaia leh Timothi; huleh, Asia gam a Tikika leh Trophima in Asia gam dongin a tonpih uhi. 5Hite chu ka ma vah ana chiah va, Troas khua ah ahung na ngaah uhi. 6Huleh keiuh chu tanghou tolsohlouh nite zohin Philippi khua apat kuang in ka pai va, ni ngaa nungin a kawmvah Troas khua ah ka tungva; hu ah ni sagih ka taam uhi.
Eutika kaihthohna
7Huleh, hapta ni masapenin, nungjuite tanghou balkeeh diing a ahung kikhop laiun, Paul in a jing a chiah a tup jiahin a kawmvah thu a soi a; huleh, jan khang dongin a soizop hi. 8Huleh pindan tungnunga a kikhopna vah khawnval tampi a um a. 9Huleh a min Eutika kichi tangval khat kotta ah a tou a, tuitahin ana ihmu hi: Paul in thu a soi sawt taatluat jiahin, ana ihmukha a, innsawng thumna apatin a kesuh a, a sisa in a tawm uhi. 10Huleh Paul a kumsuh a, a tungah a bohkhum a, a poma, Lauthawng sih un, ajiahchu a hing nalai hi, a chi a. 11Huin pindan tungnunga a kaltouh kiit phetin, tanghou a balkeeh a, a ne a, sawttah khovaah dongin a kawmvah thu soi in a houlim a, huchi'n a chiahta hi. 12Huleh amahun tangvalpa chu a hing in ahung pui va, lungmuan tahzetin a lungmuangta uhi.
Mileta a zinna
13Huleh keiuh chu kuang lamah kana chiah masa va, Assos zuanin kuang in ka chiah va; Paul tuansah diing ka sawm uh; ama'n a keeng a chiah a tup jiahin huchi bangin a chi mawng ahi. 14Huleh Assos khua a ahung kituahpih tahin, ka tuangsahta va, Mitilene khua ka tungta uhi. 15Huleh hu apatin kuang in ka chiah kiit va, a jingni in Kios zawn ka tungva; huleh a jingni in Samos ka tungva, Trogiliam ah ka taam uh; a jingni in Mileta khua ka tung uhi. 16Ajiahchu Paul in Asia gam a um sawt a ut louh jiahin, Ephesa khua kuang a chiah kheel a tupsa him ahi a; ahihtheih leh Jerusalem khua ah Pentikost nia um a tum a, a kin chiah ahi.
Ephesa kouhtuam upate kawma Paul vaihaahna thusoi
17Huleh Mileta khua a kipanin Ephesa khua ah mi a sawl a, kouhtuam upate a va kousah a. 18Huleh amahuh a kawma ahung tunun, ama’n a kawmvah, Asia gam a ka hung chiil ni masani apat na kawmva ka um sungsiah a ka umdan na he uhi, 19Thunuaigolhtah leh Judate’n ahung jebawl jiah va mittui tampi leh, sil hahsa ka tunga hung tungte thuaah kawmin Lalpa nna ka tong hi. 20Huleh nanguh phattuamna diing sil bangmah ka iim sih a, ka hung hesah veha, vaantaang lah leh inn chinah ka hung thuhilh veu hi. 21Judate leh Grikte kawmah zong, Pathian lama lungsim kisiih thu leh, i Lalpa Jesu Khrist lama ginna thu ka hesah jel hi. 22Huleh tuin ngai un, lungsima chiah louthei loua ka kiheet jiahin Jerusalem khua ah chiah diing a kisa ka hi, hu muna ka tunga sil hung tung diingte ka he sih hi; 23Hagau Siangthou in, kaanna leh hahsatna in ahung ngaah hi chia, khochina ahung heetsah veute chauh ka he hi. 24Hizongleh ka kitaidemna kipaahtaha ka taitung theihna diing leh Lalpa Jesu apat a ka muh Pathian lungsiatna tanchinpha heetsah diing natohna ka toh zoh theihna diingin hi silte khat mahin ahung hihliing sih a, ka hinna zong ittahin ka ngai sih hi. 25Huleh tuin ngai un, nanguh zousiah Pathian gam thu soi a ka vaahlehnate’n ka meel na mu nawn sih diing uh, chih ka he hi. 26Hujiahin mi zousiah sisanah ka siang ahi chih tuni in ka hung hesah ahi. 27Ajiahchu Pathian thuguat zousiah na kawmvah phuandoh louha iim ka nei sih hi. 28Hujiahin Pathian kouhtuam, Amah sisana a leite vaah diingin Hagau Siangthou in houtu a ahung siamna pawlte zousiah leh nanguh tungah pilvaang un. 29Ajiahchu ka chiah nung chiangin ngei giloute na lahvah ahung luut diing a, pawlte a hawi sih diing uh chih ka he hi; 30Nanguh lah ngei ah zong nungjui pawlte amahuh lama kaimang diingin thu tuam soi na hung um diing uhi. 31Hujiahin kiveeng un, huleh, kum thum sung zet mittui luang pum a suun leh jana mi chin taihilh ka tawp louhdan he zing un. 32Huleh tuin unaute, hung siama hung khang sah thei a, huleh, mi lungsim siangthousate laha goutan pethei Pathian leh, a khotuahna thu kawmah nanguh ka hung kemsah hi. 33Kuamah dangka, sana, silh leh teen ka eeng ngei sih hi. 34Hi khutte’n keimah leh ka lawite taahsap luang a tongkhe jel chih nanguh ngei in na he uhi. 35Bangkim ka bawl taphot na juih diingun ka hung ensah vehta hi, huchibanga tonggim leh Lalpa Jesu thu he zing kawmin mi haatloute na panpih diing uh ahi; Amah ngei in, 'Laah sangin, piah hi vangpiahna sangzaw ahi,' a chih khuh, a chi a. 36Huleh huchibang thu a soi zohin a khupdina, a bawnun a haamteikhawm uhi. 37Huleh a bawnun hah kahin a kap va, Paul a ngawngkawi va, a tawp va, 38A meel a muh nawn louh diing uh thu a soi chu a lungkhampih diah uhi. Huleh kuang mun tanphain ava hata uhi.
Tällä hetkellä valittuna:
SILBAWLTE 20: SIMTBSI
Korostus
Jaa
Vertaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.