SILBAWLTE 28
28
Malta a kaidohna: guul tuhna silmah
1Huleh a suahtaat phetun, hu tuikual gam chu Malta ahi chih a heta uhi. 2Huleh a gam mimawlte’n lungsiattah zetin ahung na lungsiat va; guah a zut jiah leh a dap jiahin mei a chih va, ka bawnun ahung na kipaahpih uhi. 3Huleh Paul in sing lomkhat a tom a, meia a vah leh, meisa hulin guul khat ahung pawtdoh a, a khut a tu a, a kikhaidenta hi. 4Huleh a gam mimawlte’n guul a khuta kikhaiden a muhun, Hipa hi tualthat ahi ngei diing, tui khang lian apat suahta mahleh phubalatu in a hin phal nawnlou ahita, a chi va. 5Huleh ama’n ganhing chu meiah a thingkhia a, bangmah a chi sih hi. 6Ahihvangin amahun chu, ahung pawm aha, ahihlouhleh thakhata puuh a sipah diing a gingta in a ngaah va; hizongleh, sawtpi a ngaah va, bangmah a chih louhtahin, a lungsim uh a heng va, amah chu pathian ahi, a chizawta uhi.
Publia pa suhdamna silmah
7Hu mun chu hu tuikuala hausapa a min Publia a chih uh gam ahi a; hupa in ahung na kipaahpih a, ngainatahin ni thum ahung zintungsah hi. 8Huleh hichi ahung hi a, Publia pa chu nattun leh eehsi in ana lum a; Paul a kawmah ava luut a, a haamteia, a tungah a khut a nga a, a sudamta hi. 9Huchibanga a bawl zohin, hu tuikual gam a midang natna nei zousiah zong a hung va, a dam chiatta uhi. 10Amahun nasatahin ahung paahtawi va; huleh ka chiah diingun ka poimoh zousiah uh kuang ah a koih uhi.
Paul Rome zuana a chiah jelna
11Huleh ha thum nungin Alexandria kuang, phalbi sungteng tuikuala taam, a chiamchihna Kastor leh Pollax a chihun ka chiahta uhi. 12Huleh Siraka ah ka kinga va, hutah ah ni thum ka taam uhi. 13Huleh hu apatin ka paikual va, Rhegium ka tungva; huleh, nikhat nungin sim huih ahung nunga, a jing kiit in Puteoli ka tung uhi. 14Hua unaute ka mu va, a kawmva ni sagih taam diingin ahung hou va; huchi’n Rome lam zuanin ka chiah jelta uhi. 15Huleh unaute’n ka tanchin uh a jah tahun, hu a kipanin Appii dawlmun leh Zinbuuh thumte chianga hung dawn diingin a hung va; Paul in amahuh a muh in, Pathian kawmah kipaahthu a soi a, a hamuangta hi. 16Huleh Rome ka tunun, sepaih zahoutu in mitaangte chu veengtu sepaih houtupa kawmah a pekhia a; hizongleh Paul chu a veengtu sepaih khat toh amah chauh a, a um a phalsah hi.
Rome khua a Paul in Judate a kimuhpih
17Huleh hichi ahung hi a, ni thum nungin Paul in Juda houtu haw a kou khawma; amahuh ahung kikhop tahun, a kawmvah, Mite leh unaute, Juda nam leh i pulepate uh daan tungah bangmah ka bawlsiat a um louh vangin, Jerusalem a kipanin Romemite kawmah mitaanga piahkhiah ka hita hi. 18Ahung etdih zohun, sihna khop hial ka tunga bangmah a um louh jiahin hah ahung gua va. 19Hizongleh, Judate’n huchu a nial jiahun Kaisar kawmah ka thu tut lou thei ka hita sih ahi; ka chipihte heehna a bawl chu hi louin. 20Hi thu jiaha nanguh toh kimuhtuaha kihoulim diingin ka hung kou ahi; Israelte kinepna jiaha hi khainianga kaan ka hi ngal a, a chi a. 21Huleh, amahun a kawmah, Na tanchin Judia gam a kipanin lehkhathot in ka mu sih uh, unaute kuama’n zong hi a hungin na tung thubuai bangmah ahung ensah sih va, soi zong ahung soi ngei sih uhi. 22Hizongleh na ngaihdan chu nangmah apat ka ja nuam uhi; ajiahchu hi pawl hi gam chin a soisiat a, a um uh ka he uhi, a chi va. 23Huleh ni a guat va, hu a tunni in a kawmah mi tampi ahung va; jingkala kipat nitaahlam dongin a kawmvah Pathian gam thu hilhchianin a hesah a, Mosi daan lehkhabu thu leh zawlneite lehkhabu thuin, Jesu lamah amahuh a zawlzawl hi. 24Huleh khenkhat in thu kisoi chu a gingta va, khenkhat in a gingta sih uhi.
Paul in Jentelte lam a nga
25Huleh amahuh a kithugual theih louh phetun, Paul in thu khat a soi zohin a paikheta uhi. A thusoi chu hih ahi, Hagau Siangthou in zawlnei Isaiah kama i pulepate uh kawma a soi chu a dih ngei mai, 26Hi mite kawmah chiah inla va soi in, Ja chu na ja na diing va, a ngaihna na he sih diing uh; muh chu na mu na diing va, na hedoh sih diing uh; 27Ajiahchu Hi chite lungtang a taahta a, a bil uh a ngongta a, a mit uh a siingta uhi; huchilou inchu a mit un a mukha diing va, a bil un a jakha diing va, a lungtang un a hesiamkha diing uh, huchi'n ahung kiheikiitkha diing uh a, ke’n ka na sudamkha diing hi, a chih chu. 28Hujiahin Pathian hutdamna thu chu Jentelte kawma sawl ahita chih he un, amahun zaw ngai zong a ngaikhe diing uhi, a chia. 29Huleh hi thute a soi zohin, Judate chu a pawtkheta va, amahuh lahah nasataha kinialna a nei uhi.
Rome a kum nih a um
30Huleh Paul chu kum nih pumlum luahman a kipiah inn ah a um a, a kawma chiah photmah ana kipaahpih a, 31Pathian gam thu a soi a, Lalpa Jesu Khrist thu haangsantahin a hilh jela, kuama’n amah a khaam sih uhi.
Tällä hetkellä valittuna:
SILBAWLTE 28: SIMTBSI
Korostus
Jaa
Vertaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.