ROMETE 6
6
Khrist toh kipumkhatna leh sualna kituah louhdan
1Ahihleh bang i soita diai? Hehpihna a pun semna diingin sual ah i um zing diing uh adiai? 2Um zing lou hial diing. Eiuh sual lama sisate bangchi’n sual ah i hing thei nalai lai diai? 3Eiuh Jesu Khrist a baptis a um photmahte chu a sihna ah baptis in i um uh ahi chih he lou na hi viai mah? 4Hujiahin Pa loupina in misi laha kipan Khrist a kaihthoh banga eihaw zong hinna thah a i hin theihna diingin a sihna ah baptisma in amah toh vui in i um uhi. 5Ajiahchu a sihna kibatpiha amah toh i na kizop taah uleh, a thohkiitna kibatpihin zong i kizop diing uhi. 6Hikhu he leh uchin, sualna sapum suhmangthaia a um theihna diingin, tu apat a sual natonga i um nawn louhna diingin i mihing lui uh amah toh kilhbehin a umta hi, chih. 7Ajiahchu koipouh sita sa chu sual apatin a zalenta hi. 8Huleh Khrist toh i sih taah a ahihleh, amah toh hin zong i hinkhawm diing uh ahi chih i gingta hi. 9Khrist chu misi laha kipan kaihthoh in a um a, a si nawn sih diing chih he in; sihna in a tungah thu a nei nawnta sih hi. 10Bang jiahin ahiai i chih leh a sihna chu sual lam thu ah khatvei si ahi a; hizongleh a hin ahihleh, Pathian lamah a hing ahi. 11Huchimahbangin nanguh zong sual lam thu ah sisa in kingai unla, hizongleh Pathian lamah chu i Lalpa uh Jesu Khrist jalin hingin kingai un. 12Hujiahin na sapum uh si thei ah, a utzawng na juih na diingun sual in vaihawm sih heh. 13Na sapum hiangte uh zong dihtatlouhna vanzat diingin sual kawmah pephal sih un; ahihvangin misi laha kipana hing kiit bangin Pathian kawmah kipia unla, na sapum hiangte u’zong dihtatna vanzat diingin Pathian kawmah pe phal zaw un. 14Ajiahchu sualin na tungvah thu a neita sih diing hi; bang jiahin ahiai i chih leh daan nuaia um na hi sih va, hehpihna nuaia um na hi zaw uhi.
Suaah umdan apat etsahna
15Ahihleh bang chita diing? Daan nuaia um hilou a, hehpihna nuaia um i hih jiahin i sual diing uh ahi diai? 16Sual hial lou diing Sihna diing a sual suaah hiin, dihtatna diing a thumanna suaah hitaleh, koi kawm pouh ah zong thumang diing a suaah a na kipiah unchu, a thu na manpa uh suaah na hi uh chih na he sih viai mah? 17Hizongleh Pathian kawmah kipaahthu um heh, sual suaah ana himah zong leh uchin, nanguh hung kipia kihilhna thudan chu lungtang tahun na juita uhi. 18Suala kipan hahdoha um in, dihtatna suaahte na hung hita uhi. 19Na tahsa uh haat louh jiahin mihing daan in ka soi ahi; na sapum hiangte uh sianthou louhna leh giitlouhna kawma suaah diing a nana piah bangun, tuin na sapum hiangte uh sianthouna diingin dihtatna kawmah suaah diingin pia un. 20Ajiahchu sual suaahte na hih laiun dihtatnalam apat nana zalen uhi. 21Ahihleh tua na sil zumpihte vah hulaiin gah bang ahiaileh na neih uh? Hu silte tawpna lah sihna ahi ngal a. 22Hizongleh tuin sual apat zalensaha um a, Pathian suaahte na hung hih nungun, sianthouna khopin na gah uh na nei va, huleh a tawpna ah kumtuang hinna toh. 23Ajiahchu sual man sihna ahi a; hizongleh Pathian silthawnpiah chu i Lalpa uh Jesu Khrist jalin kumtuang hinna ahi.
Tällä hetkellä valittuna:
ROMETE 6: SIMTBSI
Korostus
Jaa
Vertaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.