ROMETE 8
8
Hagau a umna hinkhua
1Hujiahin tuin chu Khrist Jesu a um, tahsa daan a um loua Hagau daan a um zote diingin siamlouhtansahna mawngmawng a umta sih hi. 2Bang jiahin ahiai i chih leh Khrist Jesu a um hinna Hagau daan in sual leh sihna daan a kipan ahung zalensahta hi. 3Ajiahchu tahsa jala haatlouhna jiaha daan in a bawl guallouh chu, Pathian in a tapa ngei, sualna tahsa gilou lim puain, huleh sual thoihna diing a hung sawlin, tahsa a sual um chu siamlouh a tangsahta hi. 4Tahsa daan a pai loua, Hagau daan a pai zaw eihaw a daan dihtatnate suhtaangtunga a um theihna diingin. 5Bang jiahin ahiai i chih leh tahsa daan a umte’n tahsalam silte a lunggulh veu uhi; hizongleh Hagau daan a umte’n chu Hagau lam silte a lunggulh uhi. 6Ajiahchu tahsalam silte lunggulh chu sihna ahi a; hizongleh Hagau lam silte lunggulh chu hinna leh hamuanna ahi. 7Salam lunggulh chu Pathian toh kidouna ahih jiahin; huchu Pathian daan nuaiah a um sih a, um zong a um thei lou him ahi. 8Huchi'n tahsa a umte’n Pathian a kipaahsah thei sih uhi. 9Hizongleh Pathian Hagau nanguh a a um tahzet inchu tahsa a um na hi sih va, Hagaua um na hi zaw uhi. Ahiinlah mi koipouh Khrist Hagau nei lou chu amah a ahi sih hi. 10Huleh Khrist nanguh a a um leh sapum chu sual jiahin a si ahi; hizongleh Hagau chu dihtatna jiahin a hing ahi. 11Hizongleh misi laha kipana Jesu kaithoupa Hagau nanguh a a um inchu misi laha kipana Khrist kaithoupa’n nanguh a um Hagau jiahin na sapum uh sitheite zong a suhing diing hi. 12Hujiahin unaute, bat i nei hi, tahsa daan a um diingin tahsa lahah chu ahi sih. 13Bang jiahin ahiai i chih leh tahsa daan a na um unchu na si diing uhi; himahleh sapum silbawlte Hagau a na suhlup jel unchu na hing diing uhi.
Pathian ta hihna
14Ajiahchu Pathian Hagau puia um photmahte chu Pathian tate ahi uhi. 15Laua um kiit diingin suaah hihna hagau na mu uh ahi sih a; ta hihna Hagau na mu uh ahi zaw hi, hu Hagau jiahin Abba, Pa, chi'n i kikou hi. 16Hagau ngei in eimah hagau toh Pathian tate i hi chih ahung hesah hi. 17Huleh tate i hih inchu, gouluahtute i hi uh; a kawma paahtawi a i um theihna diing a amah i thuaahpih tahzet inchu Pathian gouluahtute, Khrist luahpihtute i hi uhi. 18Bang jiahin ahiai i chih leh tulaia thuaahgimnate chu izawchianga eiuh a loupina suhlata um diing toh tehkaah tham in ka ngai sih hi. 19Ajiahchu silsiam zousiah in kinem mahmahin Pathian tate kilatna diing a ngaahlah mahmah uhi. 20Bang jiahin ahiai i chih leh silsiam zousiahte chu sil thulimlou thuthu a umsah in a umta uh, amahuh ut thu hilouin, kinepna neia amahuh umsahtu jiahin ahi zaw hi, 21Ajiahchu silsiam zousiah zong siatna suaah apat suahtaatsaha um in, Pathian tate noplenna loupi a luut diing ahi uhi. 22Ajiahchu silsiam zousiah tutandongin thuum leh nauveina thuaahin a um uh chih i he uhi. 23Huleh amahuh chauh zong ahi sih a, Hagau gah masa nei eihaw ngei zong, ta hihna, i sapum uh tatna muhna diing ngaah in, eihaw na chiang lungsim in i thuum veu uhi. 24Bang jiahin ahiai i chih leh kinepna in ahi hutdama i um uh; hizongleh muhsa zinga kinep chu kinepna ahi sih hi; mi’n a muhsa zing ah bang diingin a kinem nalailai diviai? 25Hizongleh i muh louh i kineppih inchu kuhkaltahin i ngaah zoveu hi. 26Hutobangmahin, Hagau in i haatlouhnate a panpih jel hi; ajiahchu bangchi banga haamtei diing i hiai chih i he sih a; hizongleh Hagau in thuumna soi guallouhin ahung ngetsah zing hi. 27Huleh Pathian deihzawng banga misiangthoute diinga a ngetsah jiahin, amah lungtang entu in Hagau deihzawng bang ahiai chih a he hi. 28Huleh Pathian lungsiatte, ama’n a guat banga a kouhte diingin, sil zousiah in a hoihna diingun a tongkhawm chiat hi chih i he hi. 29Ajiahchu a heetlawhte chu amah tapa banga um diingin a guatlawh a; a tapa chu unau tampite laha ta masapen ahung hihtheihna diingin. 30Huleh a guatlawhte chu kouh zong a kou a; huleh a kouhte chu siam a tangsah a; huleh siam a tansahte chu a paahtawi hi.
Pathian lungsiatna nasatdan
31Ahihleh hi thute ah bang i soita diai? Pathian i lama apan leh, kua’n ahiai hung dou thei diing? 32Amah tapa ngei zong hawi loua, i bawnva diing a hung pepa in bang diingin sil zousiah a thawnin amah toh ahung pekhawm lou diai? 33Pathian miteelte kua’n ahiai heeh diing? Siamtangsahtu Pathian ahi ngal a. 34Kua’n ahiai siamlouh tangsah diing? A si chu Khrist ahi ngal a; ahi, thou kiit zawta a, Pathian jiatlama um a, hung ngetsahtu zong ahi. 35Khrist lungsiatna a kipan kua’n ahiai hung khen diing? gimthuaahna in ahiai, lungngaihna in ahiai, gawtna in ahiai, kialin ahiai, saguahna in ahiai, lauhuaina in ahiai, namsaau in ahiai hung khen diing? 36Nangmah jiahin nitum in thahin ka um uh; goh diing belaamte banga ngaih ka hi uh, chia gelh bangin. 37Khenlou hial diing; hite zousiah ah ahung lungsiattu jalin gualzoute sanga tungtuang zaw i hi uhi. 38Ajiahchu sihna aha, hinna aha, angelte aha, lalnate aha, silbawltheihnate aha, sil um zingte aha, sil hung um diingte aha, 39Saanna aha, thuuhna aha, ahihlouhleh silsiam dang mawngmawng in zong i Lalpa uh Khrist Jesu a um Pathian lungsiatna a kipan ahung khen thei sih diing chih dihtahin ka he hi.
Tällä hetkellä valittuna:
ROMETE 8: SIMTBSI
Korostus
Jaa
Vertaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.