Jɔɔn 10
10
Penɔɔni wia sɛɛlii
1“Ií gil n ŋɔ wibii maa tɛɛ ia. Nɛr la maa n wàá sɛɛ ga pelig dominua zuu peeza biini, ka ga bɔduma di tinni tuu de, ŋmɛɛnnɛ a hiŋ. 2Ka nɛr la n ɔɔ ga a dominua zuu la, waabuu a penɔɔni. 3Di penɔɔni himmaa wa ballɔ, a pelig binni daŋ pilli dominua tɛu, ú zuu. A peeza ge daŋ zum u loobii, u ra yir anla n ɛɛ u hora sɔna, á hiŋuu ra lii. 4Di u wa lizi anla n ɛɛ u hora tuŋ, ɔɔ tɔ a seere, a ra hiŋuu. A zum u loobiire. Awiarɛ a ɔɔ ra hiŋuu la. 5Di penɔɔniduma bɛl wa yiraa, a wàá sɛɛ hiŋ a hiŋ. A daŋ chɔ u be, dikuu aŋ waa nɛdumazi loobee zummɛ wia.” 6Sɛɛliirɛ Yeesu ta gunla, ka ba waa u zɛɛ zummɛ.
7U kaa ŋɔ ba be, “Ií gil n ŋɔ wibii maa tɛɛ ia. Minuu pelig dominua la. 8Banla n faa feliŋ ba la, ba ɛɛ ŋmɛɛnaa. Peeza la waa nuuwɛ tɛɛ baa. 9N bɛnnɛ ɛɛ dominua. Gunla peeza n ɔɔ ba dominua di wa zuu, ka bir lii ra nyiŋŋi kooree á di la, gunnɛ nɛ́r la maa n niŋ ba n be wer na lɛɛi n be. 10Winanaa wia lɛi ŋmɛɛŋ ɔɔ ba. U ɔɔ bau wer ŋmɛɛ peeza di ra kpu, di ra chɔgaa. Miŋwaa ballɔɔ nɛ́ra wer na miibɔɔnanii, di kaa wer dɔɔ wia la maa n niŋ gil ba di suma.
11Minuu penɔɔninanii. N daŋ kuu n peeza wia siu.#Ɛzɛk 34:11; Maik 5:4 #Yira 23:1 12Nɛr la n waa penɔɔni himmaa ɛɛwɛ, ka ra nɔɔni peeza la n waa u himmaa hora ɛɛwɛ di ra lɛɛ kebee la, di a hiŋ wa na saŋkarahiŋ n na ba, ɔɔ gil a peezaa ka ra chɔ, a saŋkarahiŋ ba di wa lauri a peeza aŋhina kaali, anla n kawɛɛ la ge maa yaari. 13Kebee wiarɛ a hiŋ ra nɔɔni a peeza. Waa a bila dɔɔwɛ. Awiarɛ ɔɔ chɔ la.
14Minuu penɔɔninanii la. N zum n peezaa, a ge zumiŋ.
15Gunnɛ n ni n mɛɛ gba. N zumuubuu, u ge zumiŋ. N daŋ kuu n peeza wia siu.#Mat 20:28 16N peeza aŋhina haa du liga aŋhina biinii. N daŋ nyiŋŋi a ge bɔr di tɔ a see. A gba daŋ zum n loobii di hiŋiŋ, á maa wa ɛɛ kpaŋ, á binni ge jaa ɛɛ nɛkpaŋ.#Aiza 56:8 17N mɛɛ nɔŋŋi n wiarɛ dikuu min niŋ kuu n peeza la wia siu, ka kaa izi siu biini wia. 18Nɛr maa lɛi niŋ firiŋ ń siu. N himmaanii niŋ siu. N dɔɔ fɔŋŋaa min niŋ wer siu, di kaa dɔɔ fɔŋŋa min niŋ kaa wer izi siu biini. N mɛɛrɛ ŋɔ ń ɛɛ guŋ.”
19Yeesu n ŋɔ wia naa, Jus hina kaa ra di dɔŋa hɔɔzi. 20Nɛkpila maa ŋɔ, “Tinnanchɔgiirɛ ɔɔ ra izuu, u ra chugli. Bɛɛ wiarɛ ii kaa nuu ra tɛuwɛi?”
21Baŋhina ge ŋɔ, “Wiŋɔzi naa, tinnanchɔgii hiŋ wiŋɔzi lɛi, di kaa pɛɛzi, Tinnanchɔgii hiŋ daŋ wer pilli nɛra siweaa?”
Jus hina n vɛɛ Yeesu wia
22Denii Kɔraawiizi Dia Kpai Du U Nonee Hɔpizizeŋ dii Jɛrusalɛm biini la wa hel. Waari saŋaa la. 23Yeesu ra vol Kɔraawiizi Dia jaŋgal la banna yir Solomɔn Jaŋgal la biini, 24di Jus hina ballɔ di wa baruu, di ra pɛɛzuu, “Ɛrɛɛ i haa gil yaa ra bil i wia kennei? Di i ɛɛ Kristoo, ŋɔ yaa be wibii.”
25Yeesu ŋɔ, “N faa ŋɔ ii benii, ka ii waa sɛɛwɛ. N wizenaa la miŋ ɔɔ ra ɛɛ n Mɛɛ fɔŋŋa biini la gba, a dimbuu guŋ daansɛɛ. 26Ka iawaa n waa n peeza ɛɛwɛ wia, ii waa sɛɛwɛ tɛŋ. 27Banla n ɛɛ n himmaa peeza la ɔɔ nuu ra tɛŋ, di ra hiŋiŋ. N zum baabuu, 28di ra tɛɛ baa miibɔɔ la n waa tunaa dɔɔwɛ. Ba wàá siu maa. Nɛr maa wàá wer foozi baa n nonee biini. 29N Mɛɛ la n kpa baa tɛŋ la kpekkoo kaali kummaa. Nɛr maa wàá wer foozi baa n Mɛɛ la nonee biini. 30N ni n Mɛɛ hiŋ ɛɛ kpannɛ.”
31Denii Jus hina la kaa paagi bia bá lɔɔzuu. 32Yeesu ŋɔ, “N ɛɛ wizenaa kpila maanii n Mɛɛ fɔŋŋa biini, ii maa na. A winanaa u bɛlii wiarɛ ii kpa bia ŋɔ ií lɔɔziŋ naanɛi?”
33A Jus hina ŋɔ, “Winanaa wia lɛi yaa ŋɔ ya lɔɔzii. Hiŋ gbɛlli Kɔraawiizi di ŋɔ hìŋ́ newee ɛɛ Kɔraawiizi wiarɛ yaa ŋɔ ya lɔɔzii.”
34Yeesu ŋɔ, “Kɔraawiizi Hɔŋ biini, ba sɛbɔɔrɛ, ‘Ii bɛl maa ɛɛwɔɔ lugɔ Kɔraawiizi.’#Yira 82:6 Ii haa waa de karmɛɛa? 35Di u wetto yir banla um bagli baa u wia la kɔraawiizizi, Kɔraawiizi Hɔŋ ge waa guŋ vɛɛwɛ, 36amɔ, u bie la un lizɛɛ tɛɛ u hiŋ di hum durnya biini la, waa guŋ dɛkkɛa? Ɛrɛɛ ii ge kaa ŋɔ n na gbɛlluubuu, dikuu miŋ ŋɔ n ɛɛ u biere wiai? 37Di u wiɛɛlaa lɛi n na ɛɛ, amɔ, ií gilɛɛ sɛɛ n wia. 38Ka di u wiɛɛlaarɛ n na ɛɛ, ií sɛɛ n wia. Di ii wàá wer sɛɛ tɛɛ miŋwaa himmaa, ka ií sɛɛ di ra tɛɛ n wiɛɛlaa waa. Denii ií wer zum lugɔ Kɔraawiizi du n ninɛɛ, n ge du u ni.”
39Ba kaa ra nyiŋŋi bá lawuu. U kaa foozi ba nonee di lii, 40di kaa gi Jɔɔdan muu la di la bɔr la Jɔɔn n faa ra sɔ nɛra Kɔraawiizi nii la, di ga du de. 41Nɛkpila ba u be de, di ra ŋɔ dɔŋa be, “Jɔɔn la faa waa wizenaa ra ɛɛ. Ka gunla maa uŋ faa ra bagli baal naa wia la, wibiire u faa ra bagli.” 42De hina kpilakpila maa yarduu, di sɛɛ u wia.
Tällä hetkellä valittuna:
Jɔɔn 10: vag
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
