Jɔɔn 9
9
Nyuŋŋi bɛl chaai wia
1Yeesu ni u hiŋra ra la di wa na nyuŋŋi bɛl. Ban luluu maa, gunnɛ u nyuŋŋi. 2Yeesu hiŋra pɛɛzi Yeesu, “Yaa Nabɔma, Baal naa himmaa wichɔgaa wiarɛ u nyuŋŋi gɛɛ u maa ni u mɛɛ wichɔgaa wiarɛ u nyuŋŋɛi?”
3Yeesu ŋɔ, “U himmaa wichɔgaa wia lɛi. U maa ni u mɛɛ gba wichɔgaa wia lɛi. Kɔraawiizii gillɛ u nyuŋŋi, ka ú wer bagli u fɔŋŋa u ni. 4A wesso yaa n aah siwii di ra hum unla n humiŋ la huma, dikuubɛɛwiai, bɔr haa chaanɔɔrɛ filaŋkeŋ. Ka di bɔr wa biroo, nɛr maa wàá ka wer hum. 5Miŋ haa du durnya naa, n ɛɛ fintinaa di ra chaani durnya.”#Jɔɔn 8:12
6Uŋ wa ŋɔ guŋ tuŋ, u puuzi nuuhaari ha hɛri di koozaa, ka kpaa di faa baal la siwee, 7ka ŋɔ u be dí ú izi la pol la banna yir Silɔam, di ga sam u siwee. A pol sɔŋ zɛɛrɛ, Ba Humimbuu. Nyuŋŋi la izi di la ga sam u siwee. Uŋ wa sammɛ tuŋ, u siwee pilli. U bir ba.
8Denii u barii hina ni banla n zummɛ lugɔ u faa ɛɛ nyuŋŋii, di ra suŋŋi kuna la nau, di ra pɛɛzi dɔŋa, “Baal naa lɛi ɔɔ faa so di ra suŋŋi kuna laa?” 9Baŋhina ŋɔ, “Ɛɛh. Waabuu.”
Baŋhina ge ŋɔ, “Waa lɛi, ka u liubuu werge maa.”
U himmaa ge ra ŋɔ, “Minuu.”
10Ba ra pɛɛzuu, “Ka ɛrɛɛ i kaa wer di ra na naanɛi?”
11U ŋɔ, “Baal la banna yir Yeesu labuu ɛɛ kpɛchɛgaa faa n siwee, ka ŋɔ n be dí n la pol la banna yir Silɔam la, di ga sam n siwee. N la ga samaa. Miŋ wa samaa tuŋ, a jaa pilli.”
12Ba ŋɔ, “Lee u duɛi?”
U ŋɔ, “Maa zumɔu.”
Farisizi n pigzi u chaai wia
13Denii ba lawuu la Farisizi la be. 14Ba Heezaa Hɔpizii genii Yeesu ɛɛ kpɛchɛgaa faa a baal siwee a pilli la. 15Farisizi la kaa pɛɛzuu gunla aŋ ɛɛwɛ u jaa wer di ra na. U ŋɔ, “U kpa kpɛchɛgaarɛ faa n siwee, n samaa di jaa wer ra na.”
16Denii Farisizi la baŋhina ra ŋɔ, “Kɔraawiizi be hinuu lɛi, dikuubɛɛwiai, ɔɔ ra chɔgi yaa Heezaa Hɔpizii labuu.”
Baŋhina ge pɛɛzi, “Wichɔgɛɛri daŋ wer ɛɛ wizenaa naa dɔŋaa?” Ba waa nuukpaŋ dɔɔwɛ.
17Ba kaa pɛɛzi baal la, “Ka i ge, uŋ pilli i siwee, bɛɛ nɛdeere i ge ra yiruuwɛi?”
U ŋɔ, “Kɔraawiizi dɔgtɛɛ bɛllɛ.”
18Ka Jus hina nabɔnzi la faa waa sɛɛwɛ lugɔ a baal faa nyuŋŋɔɔrɛ ka kaa wer ra na. Awia, ba yir u maa ni u mɛɛ. Ba ba. 19Ba pɛɛzi baa, “Ii biibaallɛ keŋ? Amɔ, wibiire iin luluu maa gunnɛ u nyuŋŋia? Ka ɛrɛɛ a ɛɛ u jaa ra na filaŋkennei?”
20Ba ŋɔ, “Yaa biibaallɛ. Yaa kaa zum lugɔ yaa n luluu maa, gunnɛ u nyuŋŋi. 21Ka gunla aŋ ɛɛwɛ u ra na filaŋkeŋ, yaa waa zum. Yaa waa zum nɛr la n pilli u siwee tɛu ge. Ií pɛɛzi u himmaa na. U helloo, u daŋ wer bagli ia.” 22Ba ge n na ɔm Jus hina nabɔnzi la wiarɛ ba ŋɔ guŋ, dikuubɛɛwiai, a Jus hina faa ɛɛ nuukpannɛ di ŋɔ lugɔ di nɛr la maa wa ŋɔ lugɔ Yeesu ɛɛ Kristoo, ba daŋ duŋŋi a hiŋ ba jaamaa dia biini zuui. 23Awiarɛ u maa ni u mɛɛ ŋɔ, “U helloo. Ií pɛɛzi u himmaa!”
24Ba kaa yir a baal la n faa nyuŋŋɛɛ la, di ŋɔ u be, “Binni Kɔraawiizi, ka ŋɔ wibii tɛɛ yaa. Yaawaa zummɔ lugɔ baal la n chaai la ɛɛ wichɔgɛɛrii.”
25U ŋɔ, “Di wichɔgɛɛrii gɛɛ wichɔgɛɛri lɛi, maa zum. U keŋ bɛnnɛ n ge zum. N siwee faa waa na, ka filaŋkeŋ a jaa ra nau.”
26Ba kaa pɛɛzuu, “Ɛrɛɛ u ɛɛ di wer pilli i siwee hinnɛi?”
27U ŋɔ, “Miŋ teŋ bagli ia a maa tuŋ, ii waa sɛɛwɛ. Ɛrɛɛ wiarɛ ii kaa ŋɔ ń ŋɔ ií nuuwɛi? Ii gba ra nyiŋŋuu ií birgi u hiŋra gɛɛ?”
28Denii ba ra chagzuu di ra ŋɔ, “Hinuu ɛɛ u hiŋri. Yaawaa ɛɛ Moosis hiŋraa. 29Yaa wettoo zum lugɔ Kɔraawiizi faa ŋɔ wiarɛ Moosis be. Ka baal naawaa, yaa waa zum bɔr la maa un liwɛɛ.”
30A baal ŋɔ, “Gooŋga! U wettoo wa pilli miŋwaa siwee, ka iabuu ŋɔ ii waa zum bɔr la un liwɛɛ? 31Yaa maa zummɔ lugɔ Kɔraawiizi waa ɔɔ nuu ra tɛɛ wichɔgɛɛra. Ka di nɛr la maa ra jaamuu di ra ɛɛ u kipar, u daŋ nuu ra tɛɛ a hiŋ. 32Ka saŋa maa, miŋwaa haa waa nuuwɛ lugɔ nɛr maa wette pilli nɛr siwee baŋ luluu u biifulli maa u nyuŋŋi. 33Di Kɔraawiizi be lɛi u lii, u vii wàá wer ɛɛ wii naa.”
34Ba ŋɔ, “I ni i wichɔgaarɛ ba lul, ka i ge wa ŋɔ í bagli yaaa?” Ba duŋŋuu ba jaamaa dia biini zuui.
Duma biini nyuŋŋaa wia
35Yeesu n wa nuuwɛ baŋ duŋŋuu la, u ba wa nyiŋŋuu. Uŋ wa nau, u pɛɛzuu, “Hiŋwaa yardi Mìŋ́ Newee Biibaal labuuwaa?”
36U bir pɛɛzuu, “N nabɔma, bagliŋ a hiŋ, ń wer yarduu.”
37Yeesu ŋɔ, “I na a hinnɛ. I nuubuu ra ŋɔ wia filaŋkeŋ la.”
38U ŋɔ, “N Dɔɔri, n yardiibuu!” Ka jaa togni di jaamuu.
39Yeesu ŋɔ, “N ba durnyaa ń wa di durnya seriya, bánla n waa na, bá wer na, ka banla n na na ge, bá nyuŋŋi.”
40Farisizi baŋhina du u be di nuu guŋ. Ba pɛɛzuu, “Amɔ, yaa nyuŋŋɔɔrɛ gɛɛ?” 41Yeesu ŋɔ, “Di ii vii nyuŋŋɔɔrɛ, ii faa waa wichɔgaa dɔɔwɛ. Ka iiŋ ɔɔ ŋɔ lugɔ ii ra nau la, awiarɛ ii wichɔgaa haa du ii ni la.”
Tällä hetkellä valittuna:
Jɔɔn 9: vag
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
