Jɔɔn 8
8
Hahsɛnsɛnnii bɛl wia
1Denii Yeesu izi kaali Ɔlivizi Bizeŋ la nyuu. 2Chɔɔzimpikke ni, u kaa ba Kɔraawiizi Dia. Nɛkpila la kaa chaali ba u be. U so di ra bagli baa Kɔraawiizi wia. 3Denii Kɔraawiizi Hɔnzunna ni Farisizi baŋhina kpogli haaŋ bɛl di ba u be, di gil u chi ba maa baambaaŋ. A haaŋ ge ni baal bɛl faa ra sɛmuu, ba lawuu. 4Farisizi la ŋɔ Yeesu be, “Yaa Nabɔma, haaŋ naa ni baal bɛl faa ra sɛmuu, yaa lawuu. 5Moosis Hɔŋ biini, u bagli yaabuu lugɔ di nɛr maa ra ɛɛ guŋ, bá paa bia lɔɔzuu kpu. Ka ɛrɛɛ i ge ŋɔ u wiai?”#Gbɔg 22:24 6Ba pɛɛzuubuu guŋ bá ɛɛu na, di wer na u cholli bɔr, di ŋɔ u wia.
Yeesu siigi ba ni ka togni di kpa u nonibii di ra sɛbi hɛri. 7Ba haa vɛɛ ra pɛɛzuu guŋŋ, u jaa izi chiŋ di ŋɔ ba be, “Hinla maa n waa wichɔgaa dɔɔwɛ, hìŋ́ niŋ feli kpa bii lɔu.” 8Uŋ wa ŋɔ guŋ tuŋ, u kaa togni di ra sɛbi hɛri.
9Uŋ ŋɔ gunla, ba maa biine ra tɛɛ baa chɔgri, ba nabɔnzi izi kaali kpaŋkpaŋa guŋŋ di wa hel bichalli, ba maa kaali ka ka Yeesu ni haaŋ la n faa chigɛ ba maa baambaaŋ la. 10Yeesu izi chiŋ, di a haaŋ bɛnnɛ chigɛ u see. U pɛɛzuu, “Lee ba maa duɛi? Bɛl maa waa kaa hoo ú tɛi chɔgri gɛɛ?”
11U ŋɔ, “Bɛl maa waa hoo, n Dɔɔri.”
Yeesu ŋɔ, “N gba wàá tɛi chɔgri. A la, ka gilɛɛ kaa wàá ɛɛ i wichɔgaa hiŋ, di haŋ lii zinaa di ra la.”
Yeesuu durnya fintina
12Yeesu kaa ra bagli nɛra la, di ra ŋɔ, “N ɛɛ fintinaa di ra chaani durnya. Hinla maa n niŋ hiŋiŋ, hàá ka vol bɔbiri. I daŋ du bɔchaaŋ, di dɔɔ miibɔɔ.”
13Farisizi baŋhina du de, di ŋɔ, “Hinuu ŋɔ i wia. Hinuu kaa di i himmaa daansɛɛ. Awia, karaa i ra kanni.”
14Yeesu ŋɔ, “N di n himmaa daansɛɛrɛ, ka kara lɛi. Wibiire, dikuubɛɛwiai, n zum bɔr la miŋ liwɛɛrɛ, di kaa zum bɔr la minna la. Iabuu waa zum n liiribɔr. Ii waa kaa zum n laŋribɔr ge. 15Durnya zumaarɛ ii kpa di ra binni n wia biini. Miŋwaa waa nɛra wia biini ra binni. 16Ka di n vii ra ŋɔ ba wia, n daŋ wer ŋɔa a deŋli, dikuubɛɛwiai, n bɛŋ lɛi niŋ ŋɔ ba wia gunla baŋ duwɛɛ. N ni n Mɛɛ la n humiŋ labuu niŋ ŋɔ ba wia guŋ. 17Ka ii Gbɔgni ra bagluu lugɔ nɛkpaŋ wiŋɔzi wàá wer lɛɛu. Ka nɛra banɛɛ wiŋɔzi dɔɔ wibiire. 18N di n himmaa daansɛɛrɛ. N Mɛɛ la n humiŋ la kaa ɛɛ n daansɛɛhiŋ jaa.”
19Ba jaa ra pɛɛzuu, “Lee i mɛɛ duɛi?”
Yeesu ŋɔ, “Ii wan zummɛ. Ii waa kaa zum n Mɛɛ ge. Di ii vii zumiŋ, ii vii zum n Mɛɛ gba.” 20Yeesu faa du Kɔraawiizi Dia kebee dauribɔttɛ di ra bagli wia naa. Ka nɛr maa wɔɔ lauwɛ de, dikuubɛɛwiai, u saŋa faa haa waa helle.
Ii wàá wer la bɔr la minna la
21Yeesu kaa ŋɔ nɛra la be, “N daŋ la n laŋribɔr, ii nyiŋŋiŋ guŋŋ wa huhzi, ka siu ni ii wichɔgaa. Ii wàá wer la bɔr la minna la la.”
22Jus hina la jaa ra pɛɛzi dɔŋa, “Unna ŋɔ kennaa alugɔ bɔr la unna la, yaawaa wàá wer la de naa, amɔ, u ŋɔ ú kpu u hinnɛ gɛɛ?”
23Yeesu ŋɔ, “Ii ɛɛ hɛri hinaa. N ge ɛɛ chiŋ hinuu. Ii ɛɛ durnya naa kunaa. N ge waa durnya naa kuŋ ɛɛwɛ. 24Awiarɛ n ŋɔ ii be lugɔ ii daŋ siu ni ii wichɔgaa la. Di ii waa sɛɛwɛ lugɔ n ɛɛ nɛr la miŋ ɛɛwɛnɛ, ii daŋ siu ni ii wichɔgaa.”
25Ba jaa ra pɛɛzuu, “Anɛɛ hinnɛi?”
Yeesu ŋɔ, “Saŋa maanii n na bagli ia guŋ. 26N dɔɔ wikpilaa min niŋ vii ŋɔ di pɛɛzi ia nua, ka màá ŋɔ. Wia la maa miŋ nuuwɛ unla n humiŋ la be, aabuu anna bagli nɛra. U wia dɔɔ wibiire.”
27Yeesu n ŋɔ gunla, nɛra la waa zummɛ lugɔ u Mɛɛ Kɔraawiizi wiarɛ u ŋɔ gunla. 28Yeesu ŋɔ, “A hɔl la iin niŋ lalli Mìŋ́ Newee Biibaal chiŋ, a hɔllɛ ií zum lugɔ n ɛɛ nɛr la miŋ ŋɔwɛɛnɛ. Ii daŋ zum lugɔ maa wiimaa ra ɛɛ n hiŋ ni. Wii la maa n Mɛɛ n bagliŋ ŋɔ ń ŋɔ, gunnɛ aŋ ŋɔ la. 29Unla n humiŋ la du n benii. Waŋ gillɛ ta, dikuubɛɛwiai, n ɔɔ ra ɛɛ wia la n paruubuu.” 30Yeesu n na ŋɔ wia kennaa, nɛkpila yarduu.
Wibii daŋ gil ii dɔɔ iihinaa
31U ŋɔ Jus hina la n yarduu la be, “Di ii ɔɔ gil n wiŋɔzi du ii bampiree di ra hiŋaa, ii daŋ ɛɛ n hiŋra himmaa, 32di wer zum wia la n ɛɛ wibii. A wibii ge daŋ gil ií dɔɔ iihinaa.”#1Pit 2:16
33Ba ŋɔ, “Yaa ɛɛ Abraham naannaa. Nɛr maa waa yaa lauwɛ yoma. Ka ɛrɛɛ wiarɛ i ŋɔ a wibii daŋ gil ya dɔɔ yaa hinaa naanɛi?”#Mat 3:9
34Yeesu ŋɔ ba be, “Ií gil n ŋɔ wibii maa tɛɛ ia. Nɛr la maa n na ɛɛ wichɔgaa, a hiŋ birgi wichɔgaa yonne. 35Yom waa ɔɔ du u dɔɔri dia di ra la. Ka u biilulliiwaa ɔɔ du u benii di ra la. 36Awia, di Mìŋ́ Kɔraawiizi Biibaal wa lɛɛ ia ha, ii daŋ dɔɔ iihinaa, wibii maa. 37N gba zummɔ lugɔ ii ɛɛ Abraham naannaa, ka ii ra nyiŋŋi ií kpuŋ, dikuu n wiŋɔzi n waa bɔr nawɛɛ á chɔɔ ii bampiree wia. 38N Mɛɛ baglaarɛ n na bagli ia la. Ii ge mɛɛ wiɛɛlaarɛ ii ra ɛɛ la.”
39Ba ŋɔ, “Yaa mɛɛrɛ Abraham.”
U ŋɔ, “Di ii vii ɛɛ Abraham biizii, wibii maa, amɔ, ií daŋ vii ra ɛɛ Abraham wiɛɛlaa. 40N bagli iabuu wibii la miŋ nuuwɛ Kɔraawiizi benii, ka ii ra nyiŋŋi ií kpuŋ. Abraham wiɛɛlii lɛi guŋ. Awia, ii mɛɛ lɛi Abraham. 41Ii mɛɛ himmaa wiɛɛlaarɛ ii ra ɛɛ la.”
Ba ŋɔ, “Yaa waa sɛnsɛŋ biizi ɛɛwɛ. Kɔraawiizi bɛnnɛ yaa mɛɛ.”
42Yeesu ŋɔ ba be, “Di Kɔraawiizi vii ɛɛ ii Mɛɛrɛ ɛnɛ maa, ii daŋ vii nɔŋŋiŋ, dikuubɛɛwiai, u benii n lii ka wa du ɛŋ. N himmaa kipar wia lɛi n ba. Kɔraawiizii humiŋ n ba la. 43Ɛrɛɛ wiarɛ ii waa n wiŋɔzi zɛɛ ra zumɛi? Iiŋ waa nyiŋŋi ii nua la wiarɛ. 44Ii lii ii mɛɛ Sitaani benii. U wiɛɛlaarɛ ii ra nyiŋŋi ii ra ɛɛ la. Waabuu nɛkpuuri saŋa maa. Waa wibii ra hiŋ, dikuu uŋ waa wibii maa dɔɔwɛ wia. Kara bɛnnɛ u dɔɔ di ra kanni kara saŋa maa, dikuu guŋ n ɛɛ u manni wia. U benii kara kannaa lii. 45Miŋ ŋɔ wibii tɛɛ ia wiarɛ, ii waa sɛɛwɛ tɛŋ. 46Ii bɛl maa daŋ wer tɛŋ chɔgrɛa? Ii wàá wer. Ka di n na ŋɔ wibii, ɛrɛɛ ii waa sɛɛwɛ tɛnnɛi? 47Nɛr la maa n ɛɛ Kɔraawiizi hor, waabuu ɔɔ ra nuu u wiŋɔzi. Iawaa n waa u biizi ɛɛwɛ wiarɛ ii wàá ra nuu la.”
Yeesu ni Abraham wia
48Jus hina la ŋɔ u be, “Yaa faa ra yiriibuu Samaria hinuu. Wibii maa, gunnɛ. Tinnanchɔgii hinnɛ hiŋ!”
49Yeesu ŋɔ, “Tinnanchɔgii hiŋ lɛi miŋ. N na kpa n Mɛɛrɛ girme guŋ, ka ii ra gbɛlliŋ. 50Miŋ lɛi niŋ nyiŋŋi sɔŋ tɛɛ n hiŋ. Nɛr la n niŋ nyiŋŋi sɔŋ tɛŋ du denii. Waabuu niŋ di nɛra maa seriya. 51Ií gil n ŋɔ wibii maa tɛɛ ia. Unla maa n niŋ hiŋ n baglaa naa, waa ba siwaa.”
52Jus hina la jaa ŋɔ u be, “Yaa waa ŋɔwɛɛa? Tinnanchɔgii hinnɛ hiŋ. Yaa naabaal Abraham siuwɔɔ. Kɔraawiizi dɔgtɛɛzi la maa ge siuzi. Ka hiŋwaa ŋɔ unla maa n niŋ hiŋ i baglaa naa wàá siu? 53Hìŋ́ ɛɛ nɛzeŋ kaali yaa naabaal Abraham gɛɛ? U siuwɔɔ, Kɔraawiizi dɔgtɛɛzi la gba siuzi. Beedee nɛzenne hiŋwaai?”
54Yeesu ŋɔ, “Di n himmaa ra tɛɛ n hiŋ sɔŋ, sɔmpɛɛrɛ. Ka n Mɛɛ labuu ra tɛŋ a sɔŋ. Ii gba ra yiruubuu ii Mɛɛ Kɔraawiizi. 55Ka ii waa u wia zummɛ. Miŋwaa zumuubuu. Di n ŋɔ mɔɔ zummɛ, n ni ia maanii niŋ jaa birgi kara hina. N zumuubuu, di ɔɔ ra hiŋ u nua. 56Ii naabaal Abraham biini faa ɔɔ huuhzuu, dikuu uŋ faa dɔɔ n balaa naa tamii wia lugɔ ú nau. U nau, u bɔra sɔɔni.”
57Jus hina la ŋɔ, “Aa! Haa binni tokkoanɛɛ ni fi gba helle, ka ŋɔ dí i na Abrahamnɛa?”
58Yeesu ŋɔ ba be, “Ií gil n ŋɔ wibii maa tɛɛ ia. Mìŋ́ du de mɔɔ, ka Abraham haa wa du de.” 59Uŋ wa ŋɔ guŋ, ba paagi bia bá lɔɔzuu, ka Yeesu leu ba siwee di lii Kɔraawiizi Dia la biini.
Tällä hetkellä valittuna:
Jɔɔn 8: vag
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
