Genesis 14
14
Inyagel nen Abram si Lot
1Saray apatiran arari a di Amrafel na Babilonia, Arioc na Elasar, Kedorlaomer na Elam, tan Tidal na Goiim 2et akibakal irad limaran arari a di Bera na Sodoma, Birsa na Gomorra, Sinab na Adma, Semeber na Ziboiim, tan say ari na Bela (o Zoar). 3Sarayan limaran ari nankakasakey ira tan impanoolup da ray sondalo ra ed Patar na Sidim ya Inatey a Dayat natan. 4Labinduay taon la ran walad silong na pakaoley nen Kedorlaomer, balet diad kumalabintalon taon nilabanan da. 5Diad kumalabinapat taon si Kedorlaomer, saray ararin kakaiba to, tan saray sondalo ra et linma ran linmaban ed saramay limara. Diad inyakar da tinalo da ray Refaita ed Astarot-Carnaim, saray Zuzita ed Ham, saray Emita ed Save-kiryataim. 6Tinalo da met iray Horeo diad kapalandeyan na Edom, tan inosilan da ra ya anggad Elparan, diad samput na kalawakan. 7Insan ira amoliktar, pinmawil irad Cades (Enmispat nen saman), sinakop da ray amin a dalin na saray Amalecita, tan tinalo da ray Amorreo a manaayam ed Hazazontamar.
8Tinipon na saray ari na Sodoma, Gomorra, Adma, Zeboim, tan Bela ed patar na Sidim iray sondalo ra tan akilaban irad 9saray ari na Elam, Goiim, Babilonia, tan Elasar; limara laban ed apatira. 10Dakel diman iray maawang a bobun na alkitran, et nen ibabatikan day bakal ira may ari na Sodoma tan Gomorra naplag irad saraman a bobun, balet akabatik ed kapalandeyan ira may taloran ari. 11Inala na apatiran arari iray amin a walad Sodoma tan Gomorra, pati saray kakanen, insan la ra tinmaynan. 12Manaayam diman si Lot a kaanakan nen Abram, kanyan inala ra met tan amin a kayaryan to.
13Balet walay toon akabatik tan imbaga to ra yan amin ed kinen Abram a Hebreo, a manaayam ed abay na saray masanton kiew nen Mamre ya Amorreo. Si Mamre tan di Escol tan Aner ya agagi to et kagampi ray Abram. 14Nen nadngelan nen Abram ya adakep si kaanakan to, tinawag ton amin iray totoo ton sarag day mibakal tan akatipon na talon lasus tan labinwalon lalaki. Inosilan to ya anggad Dan ira may apatiran arari. 15Kasabi tod man, impankadwa to ray totoo to, dinogpaan dad labi iray kalaban da tan tinalo da ra. Inosilan to ran anggad Hoba a walad baybay na Damasco, 16tan abawi to ray amin ya asamsam da. Abawi to met si Lot tan saray kayaryan to, pati saray bibii tan arum ni ran totoon adakep.
Binindisionan nen Melkisedek si Abram
17Nen pinmawil si Abram, kayari ton tinalo si Kedorlaomer tan saramay arum ya arari, inabet na ari na Sodoma diad Patar na Save (tatawagen met na Patar na Ari). 18Inabet met nen Melkisedek ya ari na Salem tan pari na Sankatageyan a Dios. Inawitan toy Abram na tinapay tan alak, 19binindisionan to, tan inkuanto, “Say Sankatageyan a Dios ya amalsay tawen tan dalin et bindisionan to komuy Abram. 20Nagalang komun so Sankatageyan a Dios ya angiter ed sikay pananalod saray kalaban mo.” Inter nen Abram ed kinen Melkisedek so kakaplo na amin ya asamsam to.
21Inkuan na samay ari na Sodoma ed kinen Abram, “Kayaryan mo la tay asamsam mo; ipawil mo labat ed siak iray amin a totook.”
22Inmebat si Abram, “Sambaan kod Katawan, say Sankatageyan a Dios a Manamalsay tawen tan dalin, 23ya ag kon balut mangala na antokaman a kayaryan mo, anggan tinebey o sakey a bariber na sandalya. Ag mon balut nibagad satan, ‘Siak so nampayaman ed Abram.’ 24Anggapoy alaen kon para siak. Say birbiren ko labat a nalak saray inaakan na totook. Balet abuloyan yo ray kakaibak a di Aner, Escol, tan Mamre a mangalay betang da.”
Tällä hetkellä valittuna:
Genesis 14: MBBPAN83
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Maung a Balita Biblia © Philippine Bible Society, 1983