GENESIS 1
1
Diospa unanchasqankunamanta
1Tukuy imapa qallariyninpi cielokunata hinaspa kay pachata Dios unanchaptinmi 2kay pacha karqa mana formayoq hinaspa mana imayoq. Uku-uku tutayaq lamar qocham karqa, Diospa Espiritunpas yakukunapa hawanpim muyurqa.
3Chaymi Dios nirqa:
—¡Rikurichun achkiy! —nispa.
Hinaptinmi achkiy karqa. 4Achkiytam Dios sumaq kasqanta qawarqa. Hinaptinmi achkiymanta Dios rakirqa tutayayta. 5Achkiytamá Dios suticharqa punchawwan, tutayaytañataq tutawan. Hinaptinmi tardeykuqmanta paqarinnintin tardeykuqkama karqa punta kaq punchaw.
6Chaymantam Dios nirqa:
—¡Altoman urayman yakukuna rakinaq vacio kachun! —nispa.
7Diosmi rurarqa altopi rakinaq vaciota, rakirqam rakinaq vaciopa ukunpi kaq yakukunata rakinaq vaciopa hawanpi kaq yakukunamanta. Hinaptinmi chayna karqa. 8Chay altopi rakinaq vaciotamá Dios suticharqa cielokunawan hinaptinmi tardeykuqmanta paqarinnintin tardeykuqkama karqa iskay kaq punchaw.
9Chaymantam Dios nirqa:
—¡Cielokunapa ukunpi yakukuna huk hawaqllaman huñunakuchun hinaptin chaki kaqñataq rikurichun! —nispa.
Hinaptinmi chayna karqa. 10Diosmi chaki kaqta suticharqa allpawan, chay huñunasqa yakukunatañataqmi suticharqa lamar qochawan. Sumaqllaña chaykuna kasqanta qawaspanmi 11Dios nirqa:
—¡Allpamanta wiñamuchun tukuy rikchaq plantakuna, muhuyoq plantakuna hinaspa ruruq sachakuna sapakama rurunman hina, rurunpitaq kachun murun! —nispa.
Hinaptinmi chayna karqa. 12Allpamantam plantakuna wiñamurqa sapakama rurunman hina muhuyoq chaynataq ruruq kaqkunapas sapakama rurunman hina muruyoq. Chaymi Dios qawarqa sumaqllaña kasqanta 13hinaptinmi tardeykuqmanta paqarinnintin tardeykuqkama karqa kimsa kaq punchaw.
14Chaymantam Dios nirqa:
—¡Cielokuna rakinaqpi achkiqkuna kachun punchawtawan tutata rakinanpaq chaynapi tiempokuna, punchawkuna hinaspa watakuna kananpaq, 15cielokuna rakinaq vaciopiyá achkiqkuna kachun kay pachapa hawanman kanchamunanpaq! —nispa.
Hinaptinmi chayna karqa. 16Chaymi Dios iskay hatun achkiqkunata rurarqa. Hatun kaq achkiqtam rurarqa punchawpi munaychakunanpaq, taksa kaq achkiqtañataq tutapi munaychakunanpaq. Rurarqataqmi lucerokunatapas. 17Chaykunatamá Dios churarqa cielokuna rakinaq vaciopi kay pachata kanchamunanpaq 18chaynapi punchawpipas hinaspa tutapipas munaychakunanpaq, chaynataq tutayaytawan punchawta rakinanpaq. Diosmi qawarqa chaykunaqa sumaqllaña kasqanta. 19Hinaptinmi tardeykuqmanta paqarinnintin tardeykuqkama karqa tawa kaq punchaw.
20Chaymantam Dios nirqa:
—¡Yakukunapi paqarimuchun yakupi kawsaq urukuna, paqarimuchuntaqyá kay pachapa hawanpi pawaqkunapas! —nispa.
21Diosmi unancharqa yakupi hatun animalkunatawan yakupi paqarimuq qasqonpa puriq imaymana rikchaq urukunata castanman hina, unancharqataqmi raprayoq llapallan alton pawaqkunatapas castanman hina. Diosmi qawarqa chaykunaqa sumaqllaña kasqanta. 22Tukuy chaykunata bendecispanmi nirqa:
—¡Achkallataña miraspayá lamar qochapi yakukunaman huntaychik, mirachuntaqyá kay pachapi alton pawaqkunapas! —nispa.
23Hinaptinmi tardeykuqmanta paqarinnintin tardeykuqkama karqa pichqa kaq punchaw.
24Chaymantam Dios nirqa:
—¡Allpapi kawsananpaq animalkuna rikurimuchun castanman hina: uywa animalkuna, qasqonpa puriqkuna hinaspa tukuy rikchaq purun animalkuna! —nispa.
Hinaptinmi chayna karqa. 25Diosmi rurarqa sapakamata castanman hina: purun animalkunata, uywa animalkunata hinaspa allpapi qasqonpa puriq animalkunata. Diosmi qawarqa chaykunaqa sumaqllaña kasqanta.
26Chaymantam Dios nirqa:
—¡Runata rurasun ñoqanchikman rikchakuqta, ñoqanchik kaqllata chaynapi challwakunapi, alton pawaqkunapi, uywa animalkunapi, purun animalkunapi hinaspa kay pachapi qasqonpa puriq animalkunapi munaychakunanpaq! —nispa.
27Diosmi runata unancharqa.
Kikinman rikchakuqtam rurarqa.
Qaritawan warmitam unancharqa.
28Paykunata bendecispam Dios nirqa:
“Wawa-churiyoqyá kaychik,
kay pachamanyá huntaychik,
munaychakuychikyá lamar qocha challwakunapi,
munaychakuychikyá alton pawaq animalkunapi.
Munaychakuychikyá allpapa hawanpi,
llapallan qasqonpa puriq animalkunapi.”
29Chaymantam Dios nirqa:
—Qoykichikmá kay pachapi llapallan muhuyoq plantakunatawan muruyoq plantakunatapas mikunaykichikpaq. 30Pastotañataqmi qoni llapallan kawsaq animalkunaman, kay pachapi llapallan purun animalkunaman, alton pawaqkunaman hinaspa allpapi llapallan qasqonpa puriq animalkunaman —nispa.
Hinaptinmi chayna karqa. 31Diosmi qawarqa lliw rurasqankuna sumaqllaña kasqanta hinaptinmi tardeykuqmanta paqarinnintin tardeykuqkama karqa soqta kaq punchaw.
Tällä hetkellä valittuna:
GENESIS 1: QUEAYA87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään