MATEO 19
19
Juk tapukiy diborsyupaq
1»Susederqan Jesús key palabrakunata usharir, karupákurerqan Galileyapita i eywarqan Judea ládunkunapa Jordanpa wak tsinpanta. 2I qatiyarqan allápa atska nunakuna, i tseychow kachakátserqan. 3Tseynam shayámorqan peyman farisewkuna, tentarnin i nirnin: —¿Ollquta permitishqaku warminta qarqurinanpaq ima kawsapapis?
4Pey, yaskirnin, nerqan: —¿Manaku leyiyarqonki qallananchow ruraqqa, ollquta i warmita rurarqan? 5I nerqan: Keynowpam nuna jaqirenqa teytanta i mamanta, i juntakanqa warminman, i ishkan kayanqa juk eytsalla. 6Tseymi ishkeynatsu kayan, sinowqa juk eytsallana; tseyreykur, Dyos juntanqantaqa, nuna ama rakitsuntsu.
7Niyarqannam: —¿Imanirtaq, Moyses mandarqan diborsyu kartan qoykur, qarqurinanpaq?
8»Peynam nerqan: —Chukru shonqiykikunareykurmi Moyses permitiyashorqeyki warmikikunata qarquriyaneykipaq; qallananchowqa manam tseynowtsu karqan. 9I noqam niyaq meyqanpis warminta qarqoqqa, lluta wátanakiyreykur, i jukwan kasakun, olteronyanmi i pipis qarqushqawan kasakoqqa, olteronmi.
10Disípulunkunana niyarqan: —Ollqupa tseynow kondisyonnin warminwan karqa, manam kombyenintsu kasakiy.
11Tseynam pey nerqan: —Manam llapantsu keyta chaskita pwediyan, sinowqa, taqeykunata qoshqa kaqllam. 12Kayanmi ewnukukuna tseynow yurishqakuna mamanpa pachanpita, i kayanmi ewnukukuna nunakunapa rurashqa, i kayanmi ewnukukuna kikinkunapa rurakáyashqa syelukunapa reynun kawsareykur. Keyta chaskita pwedeqqa, chaskitsun.
Jesús bendisin wamrakunata
13Tseynam chátsiyarqan wamrakunata, peykunaman makinkunata churananpaq, i Dyosta mañakunanpaq i disípulukunana piñapáyarqan. 14Peru Jesús nerqan: —Jaqiyey wamrakuna noqaman shayámunanta; i ama micháyeytsu; peykunapam syelukunapa reynunqa.
15I peykunaman makinkunata churarirna, ewkorqan tseypita.
Jesús i kapoqyoq jobin
16Tseynam shamorqan juk i nerqan: —Alli mayestru ¿ima allitataq rurashaq wiñey kaweyní kananpaq?
17Pey nerqan: —¿Imanirtaq alli nimanki? Pípis kantsu alliqa sinowqa juklleyllam: Dyos. Kaweyman yeykita munarqa, wardey kamatsikiykunata.
18Nerqan: ¿Meyqankunata? I Jesús nerqan: —Ama wanutsinkitsu. Ama olteron keytsu. Ama suwakiytsu. Ama willakiytsu ulikur. 19Onrey teyteykita i mameykita; i kuyankim nuna mayikita kikikitanow.
20Jobinnam nerqan: —Key llapantam wardarqó jobin keynípita. ¿Ima mastaq pishipuman?
21Jesusnam nerqan: —Alli keyta munarqa, eywey, rantikiy kapushoqnikita, i waktsakunata qoykiy, i syeluchowmi tesorikiy kapushunki; i shamiy i qatimey.
22Jobinnam key palabrata wiyarir, ewkorqan llakishqa, allápa atska kapoqninkuna kaptin.
Rikeysakunapa peligrun
23Tseynam Jesús nerqan disípulunkunata: —Tseqeypam niyaq, sasatam yeykonqa juk kapoqyoq syelukunapa reynunman. 24Yapeymi niyaq, mas fasilmi juk kamélluta awja nawinpa pasatsi, juk riku Dyospa reynunman yeykunan.
25Disípulunkuna, keyta wiyarir, mantsakáyarqan jatunpa, nirnin: —¿Pitaq, salbashqa keyta pwedenqa?
26I rikáriyarna Jesús, nerqan: —Nunakunapaqqa sasam key; Dyospaqqa llapanpis fasilllam.
27Tseynam Pedru yaskirnin, nerqan: —Kaq key, noqakuna llapanta jaqiriyarqó, i qatiyarqoq; ¿imákunaraq, kayápamanqa?
28I Jesús nerqan: —Tseqeypam niyaq trokakeychow, Nunapa Tsurin gloryanpa tronunchow táriptin, qamkuna qatiyámaqkuna kaqpis táriyankim chunka ishkey tronukunaman, Israyelpa chunka ishkey purwanta jusgayaneykipaq. 29Meyqanpis wayikunata jaqimushqa kaq, ó wawqinkunata, ó paninkunata, ó teytanta, ó mamanta, ó warminta ó tsurikunata ó chakrakunata, jutireykur, chaskinqa juk pachak mastam, i eredanqa wiñey kaweytam. 30Peru atskaq puntachow kaqkunam qepachow kayanqa, i qepakunam puntachow.
Tällä hetkellä valittuna:
MATEO 19: QUEAN
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Quechua Ancash New Testament © Peruvian Bible Society, 1992.