Yohane 17
17
Yesu mampekakaengaahe topeguruNa
1Karoona Yesu mopahawe ope-ope iti, mengoami hai mekakae, Nauli, “UmaNgku, hawemi tempona! Popeawamide AnaMu bona AnaMu mampopeawa woriKo Uma. 2NuweimoNa kuasa motadulakoi ope-ope tauna bona tauna au NuweimoNa, ina Kukiraiahe katuwo maroa au bara mokahopoa. 3Au Kutunggai hai ‘katuwo maroa au bara mokahopoa’ iami: Moisahe kaOiona Pue Ala au tou, au bara ara karoduaNa, hai moisa worihe Yesu Kerisitu au Nutudu mai i dunia. 4Uma, Kupatongawami peawaNa tuwoMu i dunia ide i poparooNgku bago au NuweiNa. 5Ido hai Kuperapi bona Nupopeawa suleNa himbela hai peawaMu, nodo peawaNta hangko damani dunia ide rapopewali.
6Uma, tauna au NuweimoNa hangko i dunia ide, Kupopaisaamohe kahemaMu. Mewalimohe KiraMu; Nuhuhuhe Iriko bona Kukadipurahe, hai mampeulaimohe NgkoraMu. 7Ide-ide, raisami hinangkana au NuweiNa, batena hangko Irio, Uma. 8Kupahaweamohe ope-ope lolita au NupahaweaNa. Lolita iti radokomi, hai ide-ide tou-tou mpuu raisami Iko hangko IrioNa mai. Rapoinalaimi kaOiona au motuduNa.
9Kupekakaeahe topeulaNgku iti. BaraNa mampekakaea ope-ope tauna i dunia. Au Kupekakaea, batenda pea tauna au NuweimoNa, lawi kiraMumohe. 10Ope-ope tauna au mewali kiraNgku, kiraMu worimohe. Hai ope-ope tauna au mewali kiraMu, kiraNgku worimohe. Ihirami au mopatongawa peawana tuwoNgku.
11Ina mesulemoNa Irio Uma, barapoNa mahae i dunia ide. Agaiana topeulaNgkuhe ide, i dunia manihe. O UmaNgku au malelaha, Kuperapi Nukampaihe hai kuasana hangaMu au NuweimoNa. Nukadipuramohe bona hampepekiri peahe, nodo Oio hai Iko hampepekiriKe. 12TempoKu mani hihimbela hai ihira, Iko au mokampaihe hai kuasana hangaMu au NuweimoNa. Kukampaihe datihe ara au matanta. Batena pea hadua au matanta, iami au ina molambi rugi bona tepabukei apa au teuki i lalu Sura Malelaha.#Pta. 55:13-16; 109:4-5
13Ide-ide, ina mesulemoNa Irio Uma. Ope-ope ide Kuuli i tempoKu mani hihimbela hai ihira i dunia ide bona buke kamatananda au ralambi hangko Iriko. 14Kupahaweamohe lolitaMu, ido hai rakahihihe tauna au bara mepoinalai, lawi barahe hampepekiri hai ihira, himbela hai Iko baraNa hampepekiri hai tauna iti. 15Bara Kuperapi bona topeulaNgku Nualamohe hangko i dunia ide. Agaiana Kuperapi bona Nupeparaihe hangko i Datu Tokadake.#17:15 Datu Tokadake: Potasere ntanina: au kadake. 16Iko baraNa hampepekiri hai tauna au bara mepoinalai, nodo wori topeguruNgku barahe hampepekiri hai ihira. 17Kuharunga Nupamalelahahe, hai Nupopewalihe kiraMu anti paturoMu au tou. NgkoraMu Uma, itimi au tou. 18Nodo Iko, NutuduNa mai i dunia. Nodo wori ihira, Kutuduhe lao i tauna ntanina i dunia. 19Uma, Kuhuhumi tuwoNgku au malelaha Irio bona mobundu irihira, hai ane rapeulaiNa i katou-touana, mewalihe kiraMu au malelaha.
20Bara peahe topeguruNgku au Kupekakaea. Agaiana mampekakaea worina tauna au ina mepoinalai Iriko hangko i posabinda. 21Kuperapi bona ihira ope-ope hampepekiri. Nodo Uma mohintuwu hai Iko, hai Iko mohintuwuNa hai Uma, Kuperapi bona ihira wori mohintuwu hai Ikita bona ope-ope tauna ina mampoinalai kaOiona au motuduNa.
22Kuweimohe peawa au NuweiNa bona mewalihe hampepekiri, nodo Ikita hampepekiriKe. 23Iko mohintuwu hai ihira, hai Oio mohintuwu hai Iko bona ihira ina mewali mpuuhe hampepekiri. Ane nodo, ope-ope tauna ina moisa kaOiona au motuduna hai kaNupokaahinda tauna au mepoinalai Iriko nodo kaNupokaahiNgku.
24Uma, peundeaKu bona ihira au NuweimoNa ina maida hihimbela hai Iko i paidaaNgku bona moitahe peawaNgku. PeawaNgku iti NuweimoNa, lawi NupokakaiaNa hangko damani dunia ide rapopewali. 25O UmaNgku au manoto, baraKo raisa tauna i dunia ide. Agaiana Iko, KuisaKo. Hai ope-ope tauna au mepoinalai Iriko moisa kaOiona au motuduNa. 26Kupopaisaamohe kahemaMu, hai batena Kupahawe liliu kahemaMu bona mampokaahihe ranganda nodo kaNupokaahiNgku, hai bona mohintuwuhe hai Iko.”
Tällä hetkellä valittuna:
Yohane 17: NPY
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
