Luka 2
2
Zingsuv Puvna Kaw
(Mat 1:18-25)
1Capa cuo ning ca Siepahruo Awkastas ta Rom uvna ruo chung bangkhuo lie cawsaa mingluv ri riypata naw a papya. 2Capa mingluv rina ca a yikhanapa mingluv rina cuote Kuirinias kha Siria ruo uvtuv a cuo ningta a cuo. 3Cawsaa bangkhuo ca mingluv rina lie ming khung riypata ama khy cyicuo luo kha ama si. 4Josef zaw Galilee pe Nazareth khy taata Siepahruo David khypuv, Judea pe Bethlehem khy luo kha a si. Tahematapakieca ama ca David ciypathla ta a cuo nakawta a cuo. 5A pahaa ciepa hne nu hnyi riypata a mangkhuo nguoluopa Mary hne khata mingluv rina lie ming khung riypata ama si. 6Bethlehem lie ama aw ning khata nu aw tiy a ta. 7Sahrangta, saacapaata ca sa te pang ta a pahlaw khu taata cue hraky chunglie kha a pazie, tahematapakieca khyche banglaa lie kha iema cuota hmang aw va tli.
Tuvkhietuv Tie Hne Avuoming
8Capa hrawlie, ruo chunglie kha zuo ta ama tuv mangchiy yite ruo lie a ripa tuvkhietuv tie ama aw. 9Abyipa avuoming pakha iema'a lie kha a luo te, Abyipa rungnaana ca ama cunglie a za khe nakawta ama ciy hringhruo. 10Cuorasala avuoming ta iema kha, “Ciy kha ung, Cawsaa bangkhuo cuota palungtluona lepuv a cuopa thuophaapa na ica za phya yi. 11Ata ning hing David khy chunglie niema caa khuotuv Abyipa Messiah#2:11 Or Khrih ca a puv tli! 12Hingpa hing niema cuota pamangsana ca a cuo aa: haaseta pakha ca pang ta pahlaw'a yite cue hraky chunglie ama paziepa kha nama hmung aa,” a ta. 13Sungkhabala ta vuoruo rieka phuv lepuv ca avuoming hneta zaa luo yite Khazing kha hlaa ta ama pathuosa.
14“A suocepa vuoruo lie khiy
Khazing ca pathuo sa pata cuo mangsue;
A duepa zaw awnapa alyi lie hing
diena aw mangsue!” ama ta.
15Avuoming ta thuse yite vuoruo luo ama kaa khu pahne ta tuvkhietuv tie ca pakha hne pakha kha, “Bethlehem luo kha vaa ung sala, hing a cuo nguoluopa hmang, Abyipa ta malie a changpa hing va mang'a ungpuv,” amaa ta. 16Cacuonakawta si pahraa yite Mary hne Josef hne cue hraky lie ama pathlingpa haaseta kha ama va hmung. 17Ama hmung tiyta haaseta kaw avuoming ta a ripa kha iema ca ama chang. 18Tuvkhietuv tie ta ama ripa a thyipa bangkhuo ca ama kharue a haasa. 19Cuorasala Mary ca capa bie bangkhuo kha a palung chunglie khung te a rue syalya pari. 20Tuvkhietuv tie ca kaa yite avuoming ta ama changpa dala haata ama hmungpa hne ama thyipa kawlie kha Khazing ca ama pathuosa.
Zingsuv Ca Ming Ama Paphya
21Ning cari khu taata, haaseta vangdaw te tiy a ta ning kha a nung ta a phya hluo taata avuoming ta ama za ri ciepa ming, Zingsuv tapa kha ama paphya.
Zingsuv Biena-ing Luo Ama Chiykhyi
22Moses phungbie haata a pathesana cuo kha a vya tling tiyta haatiypa ca Abyipa hmie luo chiykhyi riypata Jerusalem luo kha ama sikhyi. 23(Abyipa phungbie caa-uv chunglie, “Nama sahrang, capaasaata bangkhuo kha Abyipa'a luo na nama pi aa”), tapata aa cape. 24Abyipa phungbie lie a tapa haata, thuvruv sahning a cuo li kie valale sahning ta hriykhung a rina tue riypata ama sipa ta a cuo.
25Khapa cuo ning kha cawsaa pakha, a ming Simeon ama tapa kha Jerusalem khy lie a za aw. Ama ca cawsaa a dangpa, Khazing a ciyzaapa, Israel ming khuona hmung riypa cuo kha a huo nguoluopa cuote Thlaapa Pathe ta a awpuopa a cuo. 26Thlaapa Pathe ta Abyipa Messiah na hmung hluo li thiy'a vaciy a ta. 27Thlaapa ta a chiy te Simeon ca Biena-ing chung luo kha a ngie. Phungbie haata tuepa riypata a nung hne a paa ta Zingsuv kha Biena-ing luo amaa ngiekhyi ca, 28Simeon ta haatiypa ca a paw te Khazing kha a pathuosa:
29Abyipa, ata ning hing na changtaapa#2:29 Gk sii ca
na biekuona haata,
hnaanguota tah i hringna na pakhung sa tli,
30tahematapakieca i ming ta
na khuona kha i hmung tli.
31Mingphang bangkhuo hmiekunglie
na tingtuopa khuona ca,
32Jentail ming bangkhuo cuota
na khingna a paluosatuv khena hne
Na cawsaa Israel ming rungnaana
a phyatuv tana a cuo,” a ta.
33A nung hne a paa ca haatiypa kaw a ripa kha ama thyi tiyta ama kharue a haa hringhruo. 34Cakhutaata Simeon ta thluechiy pi yite a nung Mary kyihuo khata, “Hingpa haatiypa hing Israel ming a hluvpuv a maa liena riypa hne ama thuna riypata Khazing ta lieriyuopuopa na a cuo. Ama ca Khazing'a taata a zuvpa pahmungsana hne 35cawsaa hluvpuv ta ama palung chunglie ama ruepa aa luona riypata amaa du riypa a cuo aa. Cakhutaata na palung hrahring kha zueziy ta aca daw aa,” a ta.
36Capa ning ca Asher phang Fanuel sacanung, profet nung Anna zaw kha a za aw ra. Ama ca nungpuvsa tli te, kung sariy chung dyi a navaapa hne khy ama za sahne khu taata, 37kung sawcari hne kung paliy te a nunghlyipa ta a cuo. Biena-ing kha thuse buo li pata chung hne zuo ta Khazing kha abie te sa uv te thlaa a chuo. 38Capa cuota ning caci cata vya chiy te Khazing kha pathuosa te Khazing ta Jerusalem hya a pazang sa pakhaa riypa a huopa tie bangkhuo'a lie kha haatiypa kaw ca a ri.
Nazareth Luo Ama Kaa
39Josef hne Mary ca Abyipa phungbie ta tue riypa a tapa bangkhuo kha ama patlung khu taata Galilee pe, ama khy Nazareth luo kha ama kaa. 40Haatiy ca kya le te a kya cahra; singna hne bi te Khazing'a taata hmiephaa a hmung.
Biena-ing Chunglie Haatiy Zingsuv
41A nung hne a paa ca kung tating ta Lawsena Pyi ning kha Jerusalem luo ama tlaw taw. 42Zingsuv kung hraa hlyihning a ta ning kha ama tue tawpa haata pyi luo ca ama tlaw pakhaa. 43Pyi a chuo taata ing luo kha ama kaa, cuorasala haatiy Zingsuv ca Jerusalem lie a ngaa siy te a nung hne a paa ta pachang vayi. 44Zaapuv hrawliena a kya si rale tapata ama rue nakawta ning kha chung ama kya si. Cakhutaakyalyata ama tieriy hne ama viesaa hrawlie kha ama huv. 45Ama hmung li taata ama huv riypata Jerusalem luo kha ama kaa. 46Ningthung khu taata Biena-ing chunglie ama hmung. Pacuvtuv tie hne khata a tupakhaw yite ama bie kha naathlie te bie zaw a za hiehriy nguoluo yi. 47A bie a thyipa bangkhuo ca a sing zya hne bie a paliena zya yi kha ama nang ta a uosa. 48A nung hne a paa ca ama hmung tiyta ama nang ta uo te, a nung ta, “I sapaa, khaapanakawma hinghaahingta malie na tue? Mang tie, na paa hne kama ca ma thlaa zangsa pata ma ca huv hing,” a ta. 49Ama ta, “Khaapanakawma ina huv ungciy? I Paa ing lieca i aw riypata a cuopa kha pachang va ung cama?” a ta yi. 50Cuorasala khaapama a ri tapa kha pachang vayi. 51Cakhutaata Zingsuv ca iema hne khata Nazareth luo za kaa te ama ri a ngiesa pata a aw. A nung ca hing hmang bangkhuo hing a palung chunglie a pari diy.
52Zingsuv ca singna hne kya lethawle te Khazing hne cawsaa hmielie kha hmiephaa a hmung.
Tällä hetkellä valittuna:
Luka 2: LNT1
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
New Testament in Chin Lautu © Bible Society of Myanmar, 2015.