Matthai 10
10
Lucuotuv Hlyihning
(Mar 3:13-19; Luk 6:12-16)
1Zingsuv ta ziytuv hlyihning tie kha ku yite a pyalyipa thlaapa tie papya khuna hne pasana bangkhuo patluo sa khuna kha a pi yi. 2Hingpa hing lucuotuv hlyihning tie ming ta a cuo: pakhana ta Simon (Piter ama tapa paa) hne a nuta Andru; Zebedi saacapaapa Jeim hne a nuta Johan; 3Filip hne Bartholomew; Thomas hne ngukhyituv Matthai, Alfeas saacapaapa Jeim, hne Tadias;#10:3 Hluo vie caa-uv lieca Lebbias a cuo li kie Lebbias ama tapa Tadias a ta. 4Phangcuo Simon hne Zingsuv a lyituv Judas Iskariot ta ama cuo.
Hlyihning Tie Rehriena
(Mar 6:7-13; Luk 9:1-6)
5Zingsuv ta pahraahlyihning tie kha pathlie yite a raw luo haahingta bie a taa yi: “Jentail ming ruo luo cuose, Samaria ming khy luo cuose a ngie kha ung. 6Cuorasala Israel mingphang chung taata a viepa tuv zaw'a luo kha vaa tie ung. 7Vaa ungla thuophaabie kha va phu tie ung, ‘Vuoruo pena ca aa ngie tli!’ 8A pasapa kha patluo sa tie ung, a thiypa kha pathu pakhaa ung, caahminghmaa#10:8 Caahminghmaa tapa biesuo hing pasana phangphang tana zaw a cuo khu ta a pasapa kha pathe sa ungla khuevuo kha papya tie ung. Niema ca a selawpa ta nama hmung, cacuonakaw a selawpa ta pi tie ung. 9Siy, ngu hne thiyhring tuokaa kha a cake kha ung. 10Khy tlawna riypa sahrie, buohryi zunghning, phyipakaw hne khuecahryi zaw kha a phya kha ung. Rehrietuv ca amaa hupa kha ring riypa ama cuo. 11Tuokhaapa khypuv cuose khyta cuose namaa ngie tiyta palung tluosa pata ingtlung caa pa-awpa tie'a luo kha a ngie ungla nama si hluo li ama ing lie kha va aw ung. 12Ama ingchung luo namaa ngie tiyta bie a chang ung. 13Capa ing ca aa phuv kieca ama cunglie diena tlung sala, aa phuv li kieca diena ca niema'a luo vya kaa se. 14Pakhakha ta niema kha ca cuhluo lipa yi ta, nama bie zaw kha naa a thlie li kieca, khapa ing a cuo li kie khy kha nama sise tiyta nama phyipazaa lie buvcing kha a cakhawsue siy tie ung. 15Biehmisi tana ica chang yi: Bierinapa ning thueta ca Sodom hne Gomorrah khy khana capa khy laa cata a diy vie aa.
A Vaw Riypa Hrisaathieruena
(Mar 13:9-13; Luk 21:12-17)
16Naathlie tie ung! Cahnie hraw luo pathliepa tuv haatana niema kha ica pathlie yi. Cacuonakawta pariy haata sing ungla thuvruv haata nama nang ne se. 17A raaring tie ung! Bierina zung luo ca chiykhyi'a yite apungna-ing lie kha asung ta aca tuv'a yi. 18Kama kawlieta iema hne Jentail ming cunglie tehte cuo riypata uvtuv byi hne siepahruo hmie luo kha aca chiykhyi'a yi. 19Bierina zung luo aca chiykhyi tiy yi ta tuokhaatama i ri aa tapa hne khaapa ma i ri aa tapa kha nama palung rie thyi kha se. Na ri riypa ca khapa cuo lie kha pi pata na cuo aa. 20Bie a rituv hing niema cuo va ungciy, cuorasala nama Paa'a taata Thlaapa ta niema hmuo pata bie a ri patana a cuo. 21Uvcanu mamaa kha thie riypata malie kuv luo a pi'a yite, nung hne paa zaw ta saata kha cahaa cata ama tue aa, saata zaw khata nung hne paa kha a du'a yite thie riypata malie kuv luo kha ama pi aa. 22Kama kawlieta cawsaa mekaa ta aca hue'a yi. Cuorasala a chuona te ta a ang pathla khupa ca khuo pata ama cuo aa. 23Khy kha lieta hrisaathieruena nama ang kieca khy hrang luo kha a ruo tie ung. Biehmisi tana ica chang yi: Cawsaa Saacapaa aa zuv hluo ta Israel ruo khy bangkhuo hing patlung diy hmuo'a va ungciy.
24“Siengaachie ca a saya laata le vie vyi, sii zaw a byipaapa laata le vie vyi. 25Siengaachie pakha ca a saya tluv a ta kieca aa de, sii pakha zaw a byipaapa tluv a ta kieca aa de. Ingchungkhue lie a luv ce kha Beelzebul ama ta kieca, ingchungkhue ming changchiy ca khatluv tama thuo pachipa ama cuo aa,” a ta.
Ahungma Ciy Riypa
(Luk 12:2-7)
26Cacuonakaw iema kha ciy kha ung. Pahruvpa bangkhuo hing pahawpa cuo'a te, a paruv ta tuepa bangkhuo hing pachang pata a cuo aa. 27A zingna chunglie ica changpa yi hing a khena chunglie va ri ungla a paruv ta nama thyipa kha ingcung taata phu tie ung. 28Pangpa dyi thie khu te thlaapa a thie khu lipa kha ciy kha ung, pangpa hne thlaapa a suohning ta hell#10:28 Gk Gehenna chunglie a thie khupa kha ciy vie tie ung. 29Mingbaw sahning ca piesepa suokha tana ama zaa cuo vama? Cuorasala khapa mingbaw sakha kha hmuo nama Paa pachang li pata alyi luo tla'a vyi. 30Nama luv lie nama suobuv hmuota a ri diy. 31Cacuonakawta nama thlaa zang kha se, niema ca mingbaw a hluvpuv laata nama sungnaa vie.
32“Cacuonakawta cawsaa hmielie kama naa cuokhyipa ahunghmuota vuoruo i Paa hmiekunglieta i cuokhyi ra aa. 33Cuorasala malie hmielie naa thawpa ca vuoruo i Paa hmielie ama zaw kha i thaw ra aa,” a ta.
Diena Cuo Li Pata Zueziy
(Luk 12:51-53; 14:26-27)
34“Alyi luo diena phya riypatana aa vaw tapata na rue kha ung. Diena phya riypata a vaw va ang, cuorasala zueziy phya riypatana i vaw.
35I vaw hnuochuopa ca
saacapaa kha paa padu sa riypa,
sacanung kha nung padu sa riypa hne,
munung kha navaapa nung
padusa riypatana a cuo.
36Nama carie tie ca
nama chungkhue cawsaa mamaapa
khatana ama cuo aa.
37“Kama laata a paa a cuo li kie a nung a due viepa ca kama hneta a phuv vyi; a saacapaa a cuo li kie a sacanung a due viepa ca kama hneta a phuv vyi. 38Ahunghmuo cuose a vieluo kha a puv pata kama hnang naa ziy lipa ca kama hneta a phuv vyi. 39Ahunghmuo a hringnapa kha pabang a khingpa ca a hringnapa kha pahli'a te, cuorasala kama cuota a hringnapa a pahlipa ca hringna kha a hmung aa.
Lawmuo
(Mar 9:41)
40“Niema caa cuhluopa ca kama kha na cuhluo te, kama naa cuhluopa ca kama naa pathliepa kha a cuhluo. 41Profet kha profet a cuo nakaw ta a cuhluopa ca profet lawmuo kha hmung'a te, aa dangpa cawsaa kha aa dang nakawta a cuhluopa ca a dangna lawmuo kha a hmung aa. 42Biehmisi tana ica chang yi: ahunghmuo cuose hing lieta a cawcepa pakha hing kama naa ziytuv a cuo nakawta tiy cakaapa nuokha a pipa ca lawmuo kha hmung li pata aw'a vyi,” a ta.
Tällä hetkellä valittuna:
Matthai 10: LNT1
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
New Testament in Chin Lautu © Bible Society of Myanmar, 2015.