Matthai 13
13
Saciy A Vaatuv Pakhingpuonabie
(Mar 4:1-9; Luk 8:4-8)
1Capa ning ngiethie cata Zingsuv ca ing taakhata pya te riyliy kielie kha a tu. 2A vya hmyasuepa cawsaazaapuv kha ama hluv tuv nakawta sawkawpalaw chung luo kha kie te aa tu, zaapuv ca ngiekuo lie kha amaa tu. 3Pakhingpuonabie a hluvsa kha hmuo te a pacuvpa yi ca: “Naa thlie tie ung! Saciy a vaatuv pakha saciy vaa riypata a si. 4Saciy kha a vaa tiyta, chekha ca luopuv lie tla te pavaa ta amaa haa. 5Chekha ca alyi a cawta dyi a aw napa lungdaa lieta ama tla. A lyi kha a chaa li nakawta saciy ca a pu paluo. 6Ning kya chiy te sadaa kha a e ca a thariy aa thuv li nakawta aa uv diy paluo. 7Saciy chekha ca a ahling hraw luo kha ama tla. Ahling khata kya le te a kalaa. 8Saciy chekha ca alyi pha napa lie kha tla te a che ta le zakha, a che ta le sawcaruv, a che ta le sawthung ama vyi. 9Naa#13:9 Hluo vie caa-uv lieca thyina naa a hnyipa ca a ta. a hnyipa ca thyi tie ung,” ta te a pachuo sa.
Pakhingpuonabie Siyluo
(Mar 4:10-12; Luk 8:9-10)
10Cakhutaa ziytuv tie ca Zingsuv'a luo kha a vaw yite, “Khaapanakawma cawsaa kha bie na chang tiy yi ta pakhingpuonabie ta na chang yi?” tapata ama hiehriy. 11Zingsuv ta, “Niema ca vuoruo pena kaw bieparuv pachang khuna kha pi pata nama cuo, cuorasala iema ca cuo vayi. 12A hnyipa kha pichiy hryly pata cuo'a te, cuorasala a hnyi lipa kha a hnyi tlakuopa hmuo lapa pata a cuo aa. 13Iema'a lie pakhingpuonabie i hmuonapa siyluo ca, ‘a mang ca mang raalaa yite hmung vayi, naa ca thlie raalaa yite thyi vayi, a pachang zaw pachang ra vayi.’ 14Cacuonakaw profet Isaiah ta a ripa profet-biephu ca ama cunglie a tling.
Naa ca nama thlie aa,
cuorasala thyi the buo va ungciy,
A mang ca nama mang aa,
cuorasala hmungpasie buo va ungciy.
15Tahematapakieca ama palung ca ping te,
ama naa ta thyi khu li pata
ama ming kha ama pasing;
Caca ama ming kha hmung li pata,
ama naa zaw thyi li pata,
ama palung ta pachang the li pata,
Kama'a luo kha amaa vya pali
the li riypa hne,
Kama ta i patluosa li
riy'apa yi khatana a cuo.
16Cuorasala niema ca thluechiypa tana nama cuo, tahematapakieca nama ming ta hmung te nama naa ta a thyi. 17Biehmisi tana ica chang yi: profet hluvpuv hne cawsaa aa dangpa tie hluvpuv zaw ta niema nama hmungpa hing ama za hmung khing hringhruo, cuorasala za hmung vayi, ama za thyi khing hringhruo, cuorasala za thyi vayi.
Zingsuv Ta Saciy Vaatuv Pakhingpuonabie A Pasie Sa
(Mar 4:13-20; Luk 8:11-15)
18“Cakhutaa, saciy a vaatuv pakhing-puonabie siyluo hing naathlie tie ung. 19Luopuv lie a tlapa saciy ca cawsaa pakha ta vuoruo pena kaw kha thyi raalaa te a siyluo a pachang li tiyta, a pha lipapaa kha a vaw te ama palung chunglie tuvpa saciy ca a lapa yi. 20Lungdaa cunglie a tlapa saciy ca vuoruo pena kaw kha ama thyi pahne ta palung tluosa pata a cuhluopa tie kha ama cuo. 21Cahaapaapa cawsaa zaw chunglie ca aa thuvpuv ta hruo a thla li nakawta a syi ru vyi. Capa bie kawlie ruvnaana hne hrisaathieruena aa vaw pahne ta amaa palise paluo. 22Ahling hrawlie a tlapa saciy tapa ca vuoruo pena kaw kha thyi raalaa te cuorasala hing chuelyi khysatungbangna kaw, hne sue hne thiy khingnapa ta capa bie ca a kalaa nakawta, thyipaa hnyi khu vayi. 23Alyi phanapa lie a tlapa saciy tapa ca vuoruo pena kaw kha thyi te a siyluo zaw a pachangpa kha ama cuo. Thyipaa kha hnyi te chekha ta le zakha, chekha ta le sawcaruv, chekha ta le sawthung ama vyi.
Lubi Pakhingpuonabie
24Zingsuv ta pakhingpuonabie hrangpa kha a chang yi: “Vuoruo pena ca a lu chunglie saciypha a vaa papaa hne tana aa lu. 25Cawsaa bangkhuo amaa hmung chung khata, cariepa pakha a vaw te saciy hrawlie kha lubi ciy vaa te dya a ruo se. 26Cacuonakawta sakung ca kya le te a uv tiyta lubi kung ca aa kya luo ra. 27Ingziypa a sii zaw ca a vaw yite, ‘Abyipa, na lu lie kha saciy phapa na na vaa cuo vama? Cacuokie khaapa taata ma lubi hing ama kya pu?’ ama ta. 28Ama ta, ‘Hing hmang a tuetuvpa ca ma cariepa na a cuo,’ a ta yi. Iema ta, ‘lubi hing ma va phie'a maw? ama ta. 29Ama ta, ‘phie'a va ungciy, tahematapakieca lubi nama phie pata sakung kha phiepuo pathlyi'a kie ungciy. 30Sa hrie tiy a ta nate le hne thluo yi se. Sa hrie cuo thueta sa a hriepa tie kha, lubi ca pakhaw ungla myipung luo thaw riypata cataw tie ung, cuorasala sa ca sa-ing luo kha raw tie ung, i ta'a yi, a ta,” a ta yi.
Uotuo Ciy Pakhingpuonabie
(Mar 4:30-32; Luk 13:18-19)
31Zingsuv ta pakhingpuonabie hrangpa kha a chang yi: “Vuoruo pena ca cawsaa pakha ta uotuo ciy kha la te a lu lie a vaapa hne tana aa lu. 32Saciy hrawlie ta a cawcepa saciy ta a cuo, cuorasala a kya le tiyta sakung hrawlie a lecepa ta a cuo, pavaa zaw kha a vaw yite ace lieta buv amaa vya tue,” a ta.
Thiynung Pakhingpuonabie
(Luk 13:20-21)
33Zingsuv ta pakhingpuonabie hrangpa suokha a chang kalie yi: “vuoruo pena ca canung pakha ta la te muomuo beke zungkha lie a pyapa, capa muomuo a pathu sa diypa thiynung a cawta hne tana aa lu,” a ta.
Pakhingpuonabie Hmuona
(Mar 4:33-34)
34Zingsuv ta hingpa hmang bang-khuo hing zaapuv kha a chang tiy yi ta pakhingpuonabie kha a hmuo, pakhingpuonabie hmuo li pata suokha hmuo chang vayi. 35Hinghaahingta a ripa ca profet ta#13:35 Hluo vie caa-uv lieca profet Isaiah ta a ta. a ripa a tlingna riypatana a cuo.
Pakhingpuonabie hmuopa ta
iema kha bie i chang'a yi;
Chuelyi hruothu baataata
za nupa hmang kha i phu aa,” a ta.
Zingsuv Ta Lubi Pakhingpuonabie Siyluo A Ri
36Cakhutaata, Zingsuv ca cawsaa-zaapuv kha thuse yite ingchung luo a ngie. Catiyta ziytuv tie kha ama'a luo a vaw yite, “Lu chunglie lubi pakhingpuonabie a siyluo kha malie chang tie,” ama ta. 37Zingsuv ta, “Saciypha a vaatuv ca Cawsaa Saacapaa ta a cuo. 38Lu ca chuelyicung ta a cuo; saciypha ca vuoruo pena a cutuv zaw ta ama cuo. Lubi ca cawsaa pha lipapaa saata zaw ta ama cuo. 39Saciy pha lipa a vaatuv cariepa ca Setaa ta a cuo. Sa hrie cuo ca chuelyi cuochuona cuota cuote sa a hrietuv tie ca avuoming ta ama cuo. 40Lubi ca pakhaw yite myipung luo ama hmaw pahaakhata chuelyi cuo chuo thue ca a cuo ra aa. 41Cawsaa Saacapaa ta a avuoming kha za pathlie'a yite, a pena chunglie phalina a tuetuv bangkhuo hne cawsaa a pasue satuv bangkhuo kha pahmya'a yite, 42caana hne haariena a awnapa myipung chung luo kha ama thaw aa. 43Cakhutaata aa dangpa ca ama Paa pena chunglie kha ning haata ama khe aa. Naa a hnyipa ca thyi tie ung,” a ta.
Pakhingpuonabie Suothung
44“Vuoruo pena ca lu chunglie ama nupa sue sungnaapa hne tana aa lu. Cawsaa pakha ta a hmung tiyta nu siy te, palung tluosa pata ing luo kaa te, a hnyipa bangkhuo kha zaa te capa lu ca a calyi,” a ta.
45“Vuoruo pena ca palelungvaa phapa a huvpa sung a palipa pakha hne na aa lu. 46Palelungvaa muosung ciemuopa kha a hmung tiyta a hnyipa bangkhuo kha zaa te capa palelungvaa ca a calyi,” a ta.
47“Vuoruo pena ca tiyliy chung luo vaa yite ngaa phangtling a pa-uopa asue hne tana aa lu. 48Ngaa a bi pahne ta asue kha ngiekuo luo a da pathla yite, a tu yite ngaa kha ama che, a phapa tie kha ama sawpaa chung luo pasuo yite a chiepa tie ca ama thaw. 49Cuo chuonapa ning thueta ca capa haa ca tana a cuo aa. Avuoming kha vaale'a yite cawsaa phapa hraw taata cawsaa chiepa kha pache'a yite, 50caana hne haariena a awnapa myipung chung luo kha ama thaw aa,” a ta.
Suethiy A Thaapa Hne A hlungpa
51Zingsuv ta, “Hingpa bangkhuo hing nama thyi the ma?” a ta yi. Iema ta, “Ma thyi the,” ama ta. 52Caacuonakaw Zingsuv ta, “Vuoruo pena cuota cawpa pata a cuo tlipa phungbie saya ca, a suethiy china ing chung taata suethiy thaapa hne suethiy hlungpa a papyapa ingziypa hne tana aa lu,” a ta yi. 53Zingsuv ca pakhingpuonabie bangkhuo a chang khu taayita capa hmang taacata a pya.
Nazareth Khy Lie Zingsuv Cuhluo Vayi
(Mar 6:1-6; Luk 4:16-30)
54A khy luo kha vaa te apungna-ing lie kha a pacuv yi ca ama kharue ta haasa te, “Hingpa cawsaa hingta hingpa singna hne hmang tue khuna hing khaapa taata ma a hmung? 55Lettamaapa saacapaapa khata cuo vama? A nung kha Mary ama ta cuo vama? Jeim, Josef, Simon hne Judas kha a nuta zaw cuo vayi ma? 56A sieta zaw bangkhuo hinglie hingna ama aw diy cuo vama? Khaapa taata ma hingpa bangkhuo hing a hmung aa? ta yite, 57Zingsuv ca cuhluo khu vayi. Cuorasala Zingsuv ta, “Profet ca a khy lie hne a ingchungkhue lie ri li pata hmangting lieta ama pa-uvsathyi,” a ta. 58Zangna ama hnyi li nakawta capa lieca kharuehaa hmang a hluvsa tue vyi.
Tällä hetkellä valittuna:
Matthai 13: LNT1
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
New Testament in Chin Lautu © Bible Society of Myanmar, 2015.