Matthai 18
18
A Hmisipa Lesyina
(Mar 9:33-37; Luk 9:46-48)
1Capa cuo ning ca ziytuv tie kha Zingsuv'a luo a vaw yite, “Vuoruo pena lie ahungma a lece?” tapata ama hiehriy. 2Zingsuv ta haatiyta pakha kha ku te ama hmielie a padaa khu taata, 3“Biehmisi tana ica chang yi: a thle ungla haatiyta haahingta nama cuo li kieca vuoruo pena luo a ngie khu buo hluo'a va ungciy,” a ta yi 4Cawsaa raw canaw te hingpa haatiyta haahingta a cuopa na vuoruo pena chunglie a lecepa ta a cuo. 5Ahunghmuota kama ming ta hinghaapa haatiy a cuhluopa ca kama naa cuhluotuv tana a cuo,” a ta.
Pasupaliyna
(Mar 9:42-48; Luk 17:1-2)
6“Ahunghmuo cuose hingpa haatiyta pakhakha hing kama ina zangna taata luo a papiesatuv ca a rue lie sacuo rienapa alungtung ciypuo pata riyliy luo thawpa cuo sala a cuota a pha vie aa. 7Chuelyicung cuota ciy a chiysa hringhruo tahematapakieca zangna a papiesatuv hmang na a hluvsa a aw. Hingpa hmang hing a cuo pari aa, cuorasala cahaapaapa a pacuosatuv cuota ca ciy a chiysa hringhruo.
8“Na kuv a cuo li kie na phyi ta na zangna aca papie sa kieca te la thaw tie! Kuv hrahning hne phyi hrahning hneta chuozaa myi chung luo tlapa laata ca kuv hrakha a cuo li kie phyi hrakha aw lipa ta hringna luo a ngiepa ca a pha vie aa. 9Cakhutaa na ming ta na zangnapa aca papie sa kieca, thue la thaw tie. Ming hrahning hneta hell#18:9 Gk Gehenna myi chung luo tlapa laata ca ming hrakha dyi ta hringna luo a ngiepa ca a pha vie aa.
Tuv Viepa Pakhingpuonabie
(Luk 15:3-7)
10Hing haatiyta a ahung hing hmuota mangbung kha ung. Ica chang yi: iema a vetuv avuoming kha vuoruo i Paa hmiekunglie ama aw pari. 11Cawsaa Saacapaa ca a viepa khuo riypatana aa vaw#18:11 Hluo vie caa-uv lieca rina tluo 11 hing aw vyi. 12Tuokhaatama nama rue? Tuv khietuv pakha ta tuv zakha hnyi sala, sakha a vie kieca, sawcakysacaky kha tluocung lie thuse'a te, a viepa sakha kha a va huv aa cuo vama? 13Biehmisi tana ica chang yi: a hmung tiyta a vie lipa sawcakysacaky tie cunglie laa khata a viepa sakha cunglie kha a palung a tluo vie. 14Cahaa cata vuoruo lie a awpa nama#18:14 Hluo vie caa-uv lieca i paa a ta. Paa ta hing haatiyta zaw pakha hing hmuo vie riypa pahya vyi.
A Suepa Uvnu Kaw
15Na uvnu pakhakha ta na cunglie suena a tue kieca vaa la niema seta nama awna lie kha a suenapa kha va chang tie. Na ri a caa ngie kieca na uvnu ta na pacuo sa khu pakhaa tana ta a cuo. 16Cuorasala na ri a caa ngie khing li kieca, ‘bie bangkhuo ca pachangkhyituv pahning a cuo li kie pathung hmie lieta pacu sapa cuose,’ a tapa haata bie bangkhuo caa thyikhyi riypata pakha ma pahning ma a chiy tie yi. 17Iema bie zaw kha a cuhluo khu li kieca, bie bangkhuo kha Khrihsaabuv luo chiykhyi tie. Khrihsaabuv bie kha hmuo a cuhluo khu li kieca, ama ca Jentail ming a cuo li kie ngukhyituv pakha haakhata va rue tie. 18Biehmisi tana ica chang yi: alyi lie nama thlupa ca vuoruo lie zaw thlupa cuo ra'a te, alyi lie nama pa-awpa ca vuoruo lie zaw pa-awpa a cuo ra aa. 19“Biehmisi tana ica chang vie yi: hing alyi lie pahning ta palung a lusa pata thlaa chuo ung cate nama hie kieca, nama hiepa hmang ca vuoruo lie a awpa i Paa ta aca pi'a yi. 20Pahning a cuo li kie pathung i ming ta amaa hmyana lie, ama hrawlie kama i aw ra” a ta.
A Ngiethena
21Cakhutaa Piter ca Zingsuv'a luo kha a vaw te, “Abyipa, i uvnu pakhakha ta i cung lie suena a tue kieca, yi khazaa ma i ngiethe aa? Yi sariy te ma? a ta. 22Zingsuv ta, “Yi sariy cuo vyi. Yi sawsariy-lesariy, a ta.
A Ngiethena A Hnyi Lipa Changtaapa
23Cacuonakawta vuoruo pena ca a sii zaw rehriena cazing kha mang a tingpa siepahruo pakha hne tana aa lu. 24Re a pathupa hneta tuokaa talent#18:24 Talent suokha hing kuliy re a hrietuv pakha ta a hmungpa kung hraa hlyipangaa thavie hne tana aa khing thawhraa a uopa a sii pakha kha ama'a luo ca a maa vaw khyi. 25Lyibuo kha a thung khu li nakawta a byipaapa cata, ama, a napuvnung, a saa zaw hne a hnyipa bangkhuo kha zaa diy pata, lyibuo thung riypata bie a pi yi. 26Cacuonakawta a siipaapa ca a phyi thabaw lie kha a pakhuv pane te, ‘Ngie na chi la naa ngie caw thi tie, ica thung diy aa,’ tapata paa a kie. 27A byipaapa ta ngie a chi nakawta a lyibuo kha a ngiethe te a pathlie. 28Cuorasala a pya pahne ta tuokaa denarii#18:28 Denarii suokha hing kuliy re a hrietuv pakha ta a hmungpa ning kha thavie hne tana aa khing. zakha a uopa a viesaa sii a cuo rapa pakha'a luo kha vaa te, a rue kha hmi te, ‘I naa uopa cakha na pi tie,’ a ta. 29Sii a cuo rapa a viesaapa cata a pakhuv pane te, ‘Ngie na chi la naa ngie caw thi tie, ica thung aa’ a ta. 30Cuorasala khing li pata, a lyibuo a thung diy hluo li thaw a pathla. 31Sii a cuo rapa a viesaa tie ta khapa hmang a cuopa bangkhuo kha ama hmung tiyta ama palung pha li pata ama byipaapa'a luo kha vaa yite ama va chang diy. 32Cacuonakaw a byipaapa cata ku te, ‘Sii pha lipa, paa ina kie nakaw cata inaa uopa bangkhuo icaa ngiethe diy. 33Kama nang ica duepa haakhata na viesaa sii cunglie kha nangduena na hnyi ra riypa cuo vama? ta te, 34a byipaapa ca a hi a haa laalaw nakawta a lyibuo bangkhuo a thung diy hluo li thaw a pathla. 35Cacuonakawta nama uvnu kha pathiypalung hmisi ta namaa ngiethe li pata a cuo kieca vuoruo lie a awpa i Paa ta niema zaw kha cahaa cata a ca tue ra'a yi,” a ta.
Tällä hetkellä valittuna:
Matthai 18: LNT1
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
New Testament in Chin Lautu © Bible Society of Myanmar, 2015.