Matthai 25
25
Lesaa Pahraa Pakhingpuonabie
1“Vuoruo Pena ca hinghaa-hingtana a cuo aa. Napuv a chiypa satliepa#25:1 Hluo vie caa-uv lieca napuv a chiypa satliepa hne a lesaanung a ta daw riypata ama myi-ing hne a pyapa lesaa#25:1 Hluo vie caa-uv lieca lesaapathepa a ta. pahraa hne tana aa lu. 2Iema hrawlie papangaa ca a ngaapa cuo yite a hrangpa papangaa ca a singpa ama cuo. 3A ngaapa tie ca myi-ing kha a cyi yite myitiy a cyi vayi. 4A singpa tie ca ama myi-ing hne myitiy pangkha ama rawpa pung kha amaa cyipuo. 5Napuv a chiypa satliepa ca a vya chiy haa nakawta lesaa zaw ca tluv yite amaa hmung. 6“Zuocang a chiypa khiy ta, ‘Napuv a chiypa satliepa na a vaw tli! Thu ungla va daw tie ung,’ tapata ama khi. 7Lesaa pahraa tie ca thu yite ama myi-ing kha ama vya pachie. 8Catiyta ta a ngaapa tie ta a singpa tie kha, ‘Myitiy malie pibuo thi tie ung, tahematapakieca ma myi-ing na a thiy'a nang,’ ama ta. 9Cuorasala a singpa tie ta, ‘Cuo the'a vyi, niema hne kiema hne malie a zu pakhaw the'a vyi, chadaw luo kha cakuo ungla nama vaa calyi patana a pha vie aa,’ ama ta. 10A ngaapa lesaa tie myitiy ama vaa calyi chung ta napuv a chiypa satliepa ca vya chiy te, a ting pacie pata a awpa papangaa tie hneta achiyhie saduona luo kha a ngie yite ingchiy kha ama khaa. 11“Cakhutaata cata lesaa hrangpa tie ca vya chiy yite, ‘Abyipa, abyipa, malie kya pahaw tie,’ ama ta. 12Cuorasala ama ta, ‘niema kha ca pachang hrahring vayi ang,’ a ta yi. 13Cacuonakawta a raaring pata huo tie ung, tahematapakieca a ning hne a cuo#25:13 Hluo vie caa-uv lieca Cawsaa Saacapaa aa vawna riypa a ning hne cuo kha a ta. kha pachang va ungciy.
Talent Kaw Pakhingpuonabie
(Luk 19:11-27)
14Vuoruo Pena ca khy tlawna luo a tha'a nang nakawta a sii zaw kha ku yite a hnyipa mangchiy riypata bie a taa siypa cawsaa pakha hne tana aa lu. 15Ama hmang tue khuna cyicuo zi ta tuokaa kha a pi yi: pakha kha talent suopangaa, pakha kha talent suohning, pakha kha talent suokha lawta a pi yi. Cakhutaa ca khy tlawna luo ca aa tha. 16Talent suopangaa a hmungpapaa cata a tuokaa cata sung kha pali te, a hrangpa talent suopangaa amie a hmung. 17Cahaa cata talent suohning a hmungpapaa ta a hrangpa talent suohning amie a hmung ra. 18Cuorasala talent suokha a hmungpapaa khata alyi kha cu te a byipaapa tuokaa kha a nu. 19“Cuo syipuv khu taata capa sii tie ama byipaapa ca vya chiy pakhaa te ama tuokaa hmuonapa kha a sieta tah a tue khyi yi. 20Tuokaa talent suopangaa a hmungpapaa kha hmie luo vya pya te a mie talent suopangaa a vya pi. Abyipa, kama kha tuokaa talent suopangaa ina za pi ciy. ‘Mang tie! talent suopangaa i pamie,’ a ta. 21A byipaapa ta, ‘A pha ciemuo, a phapa hne zangtluo aa tlapa sii, nama ca hmang cawta kawlie zangtluo a tlapa tana na cuo, hmang hluvpuv mangchiytuv tana ica chi aa, zaa ngie la na byipaapa palungtluona hing zaa hraw ra tie,’ a ta. 22Cakhutaa tuokaa talent suohning a hmungpapaa kha hmie luo vya pya ra te, ‘Abyipa, kama kha tuokaa talent suohning ina za pi ciy; mang tie! talent suohning i pamie,’ a ta. 23A byipaapa ta, ‘A pha ciemuo, a phapa hne zangtluo aa tlapa sii, nama ca hmang cawta kawlie zangtluo a tlapa tana na cuo, hmang hluvpuv mangchiytuv tana ica chi aa, zaa ngie la na byipaapa palungtluona hing zaa hraw ra tie,’ a ta. 24Cakhutaata tuokaa talent suokha a hmungpapaa kha a hmie luo vya pya ra te, ‘Abyipa, nama ca cawsaa tateta-iepa, saciy na vaa lina lie sa hrie cate, ciy na cyi li na lie kha a thyipaa a pahriypa na cuopa kha ica pachang; 25cacuonakawta ca ciy ang te na tuokaa talent suokha ca alyi chunglie i nu, na huopa hing a la tie,’ a ta.
26A byipaapa ta, ‘A pha lipa hne a thaathiypa sii, saciy i vaalina lie sa hrie ang te, ciy i cyi lina hmang lie thyipaa i pahriy tawpa napa chang sasaw cuo vama? 27Cacuokieca i vya kaa thueta i tuokaa hne amie hne i hmung riypata i tuokaa ca tuokaa-ing lie na za chi riypa muo a cuo ta. 28Cacuonakawta hingpapaa taahingta tuokaa kha la ungla, talent suohraa a hnyipapaa kha pi tie ung. 29Tahematapakieca a hnyipa tie ca chachiypa cuo'a yite, a hlyi nate ta ama hnyi aa; cuorasala khaapahmuo a hnyi lipa ca a hnyi tlakuopa kha hmuo chuv pata a cuo aa.
30Hingpa thlahnena a hnyi lipa sii hing ale khyzingna luo, caana hne haariena hmang luo kha thaw tie ung,’ a ta.
Mingphang Zaw Bieripana
31Cawsaa Saacapaa ca a rungnaana hne avuoming bangkhuo hneta a zuv tiyta, a byithude rungnaapa cunglie ca a tu'a te, 32mingphang bangkhuo ca a thaa lie pahmyapa ama cuo aa. Tuvkhietuv ta tuv ca mie'a taata a chepa haata mingphang bangkhuo kha phuvhning ta a che'a yi. 33Tuv tie kha a cacuo luota chi'a yite mie tie kha a cavyi luota a chi'a yi. 34Siepahruo ta a cacuo luota a awpa tie kha, ‘I paa ta thluechiy a pipa tie, a vaw tie ung. Chuelyi hruothu baataata niema cuota ting ciepa Pena ru hing vya cu tie ung. 35Tahematapakieca i nang diy te sa ina pi ungciy, i tiy hrie te tiy ina pi ungciy, khyche cuo ang te ing inaa patlung sa ungciy, 36abuv-ase riypa i hnyi li ning caw ina pi ungciy, pasa ang te ina mangsang ungciy, thaw tla ang te ina ve ungciy,’ a ta'a yi. 37Cawsaa aa dangpa tie ta, ‘Abyipa, khaapa ning ma na nang diy te sa maca pi, na tiy hrie te tiy maca pi buo? 38Khaapa ning ma khyche cuo cate maacaa patlung sa, abuv-ase riy hnyi li pata aw cate caw maca pi buo? 39Khaapa ning ma pasa cate a cuo li kie thaw lie aw cate maca ve buo?’ ama ta aa. 40Siepahruo ta, ‘Biehmisi tana ica chang yi: Hing i uvnu zaw hrawlie ta nutaacepa a cuo zaw a cunglie nama tuepa ca kama cunglie nama tuepa tana a cuo,’ a ta'a yi. 41Cakhutaa a cavyi luota a awpa tie kha, ‘Niema, chie sapa tie, i thaa taahingta pya ungla Setaa hne aa vuoming cuota ting ciepa a thiy buo lipa myi chung luo kha cakuo tie ung. 42Tahematapakieca i nang diy te sa na pi va ungciy, i tiy hrie te tiy na pi va ungciy; 43khyche cuo ang te naa patlung sa va ungciy, abuv-ase riy hnyi li pata aw ang te caw na pi va ungciy; i pasa ning hne thaw i tla ning zaw na ve va ungciy,’ a ta yi. 44Cakhutaa iema ta, ‘Abyipa, kha tiy ning ma na nang a diy, na tiy a hrie, khyche ta na cuo, abuv-ase riy hnyi li pata na aw, na pasa, thaw na tla pata ca hmung pate caa byase khing li pata ma aw buo?’ ama ta aa. 45Cakhutaa ama ta, ‘Biehmisi tana ica chang yi: nutaacepa cawsaa pakha naa bya khing lipa kha, kama inaa bya khing lipa ca tana a cuo, a ta'a yi. 46Cakhutaa, capa tie ca chuozaa duotena ruo luo kha si'a yite, cawsaa a dangpa tie ca chuozaa hringna luo kha ama si aa,’ a ta.
Tällä hetkellä valittuna:
Matthai 25: LNT1
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
New Testament in Chin Lautu © Bible Society of Myanmar, 2015.