Matie 20
20
Awa kwa ti yaka vinɔ
1Yezo apa ya: “Lo Lɛngɔ Gbia tɛ Nzapa akpa nga se mɛ nvɛ̃ yaka asi na nda perere nvɛni so mungɔ awa kwa ya, ala li kwa ka yaka vinɔ tɛ ni. 2Lo na la amangbi ya, ni futa la na faranga kɔi, adu faranga mɛ andofuta na zo mɛ ali kwa ti lá kɔi. La lo to la so lingɔ kwa ka yaka tɛ lo. 3Ĩ ti na saa ti gumbaya ti nda perere ko, lo hũnda ambanga mɛ ndɛ̃ mɛ alonga so bɛ kɔdɔrɔ, ta ala ndoli kwa kɔi ma. 4Lo pa hɛ̃ la ya: ‘Ĩ nɔ nga ĩ li kwa ka yaka vinɔ tɛ mbi, ko mbi na futangɔ ĩ na faranga mɛ alengbi.’ Ala yeka da, 5la ala nɔ ka yaka ni. Ĩ ti na bɛ kɔmbitɛ ko, nvɛ̃ yaka ati asi, ali nga bo so. So pɛni, ĩ ti nga na saa ti ta ti ndɔ ko, lo ti lo li nga bo so. 6Ti ndangbani, na nɔ tɛ saa ti kɔ̃ ti ndɔ ko, lo si, lo tã ambanga azi mɛ ndɛ̃ alonga so bɛ kɔdɔrɔ. La lo hũnda la ya: ‘Nda mɛ ato na nda perere, ngbĩi asi na ndɔ, ĩ ngbã so ndo mɛ, ko ta ĩ ndoli kwa kɔi ma nɛ?’ 7Ala gbinya hɛ̃ lo ya: ‘Adu na lo mɛ ya, ta zo kɔi amu e na kwa ma.’ La lo pa hɛ̃ la ya: ‘Wa ĩ nɔ nga ĩ li kwa ka yaka vinɔ tɛ mbi.’
8“Ngoi mɛ ndɔ ĩ de ko, nvɛ̃ yaka apa hɛ̃ kapita tɛ awa kwa tɛ lo ya: ‘Ili awa kwa, mɔ to na ndo ala mɛ mbi mu la na kwa nda ni, mɔ futa la na faranga tɛ la, wa mɔ kɔ nda futangɔ la na ndo ala mɛ mbi mu la na kwa uzu.’ 9La awa kwa ko la ato nda kwa na saa ti kɔ̃ ti ndɔ anɔ, amu faranga tɛ la, zo kɔi kɔi alua faranga kɔi. 10Ngoi mɛ ala mɛ amu la na kwa uzu ĩ nɔ ko, ala da bɛ la ya, ani na rnungɔ faranga ɔngɔ afɔ̃ ani. Kanda zo kɔi kɔi na popo tɛ la alua nga bo faranga kɔi. 11Na ngoi ti ala mungɔ faranga ko, ala ndunguma nvɛ̃ yaka, 12ala pa hɛ̃ lo ya: ‘Awa kwa olo mɛ mɔ mu la na kwa ndani ko, ala li kwa bo na pɛ saa kɔi gɛgɛrɛ, ko mɔ futa la kwɛ kɔi nga ma se mɛ mɔ futa na e ya nɛ? Ta sanga ma, e hũ pɛnɔ ti nzɛ̃ngɔ, na lingɔ kwa lá kɔi zu na lɛ lá mɛ ndosũ baka baka!’ 13Ko nvɛ̃ yaka agbinya hɛ̃ kɔi na popo tɛ la ya: ‘Kwa mbi, ta mbi handa mɔ ma. E na mɔ e mangbi fɛrɛ ya, mɔ li kwa ti lá kɔi, wa mbi futa mɔ na faranga kɔi. Ta seni la ma? 14Wa mu faranga tɛ mɔ, mɔ ɔ lɛ mbi. Zo mɛ mbi mu lo na kwa ndani ko, mbi ye ya mbi hɛ̃ lo faranga nga ma se mɛ mbi hɛ̃ na ni hɛ̃ mɔ. 15Mbi lengbi ti lingɔ ye na faranga tɛ mbi nga ma se mɛ bɛ mbi aye! Bere mɔ ndoli sɔbɛrɛ hɛ̃ la, na lo mɛ ya, mbi nzɔ̃ zo?’ ” 16Yezo apa nga ya: “Na lo ni ko, azi mɛ awa nda ni ko, ala ti gbanda awa li ni, wa azi mɛ awa li ni ko, ala ti gbanda awa nda ni.”
Yezo apa ti fani ta ya ni na kpingɔ ko ni so
(Mar. 10.32-34; Luk. 18.31-34)
17Ngoi mɛ ndo Yezo so ndogwe ka Yeruzalɛmɛ ko, lo mu ava lo sui kɔi ndoni se, lo gwe na la katɛ, lo pa hɛ̃ la na ngoi mɛ ala so ndodɔ nɔ ya: 18“Ĩ ma mbi, gwengɔ e ka Yeruzalɛmɛ lo mɛ. Kai ko, azi na kangɔ mbi Nyi Zo hɛ̃ agbia tɛ awa lungɔ Nzapa na ye, na awa hangɔ ndia. Ala na fangɔ ngbanga li mbi ya, aho mbi. 19Ala na kangɔ mbi hɛ̃ apaganɔ, ko apaganɔ ni na bubangɔ mbi, ala na sɔ̃ngɔ mbi na fimbo, ala nga na gɔngɔngɔ mbi na ndo krusi. Wa na pɛ bi ta ko, mbi so.”
Ta Zaki na Yoanɛ abũnda Yezo na ndo
(Mar. 10.35-45)
20So pɛni, ya Zebedeo ana aya lo ti kɔli anɔ ka tɔ̃nda Yezo, ko ya Zebedeo abɔgɔma tɛrɛ lo na gbɛlɛ Yezo, so hũndangɔ lo na ndo. 21La Yezo ahũnda lo ya: “Ye mɛ mɔ ye nɛ?” Lo gbinya hɛ̃ lo ya: “Ba aya mbi ti kɔli sɛ lo mɛ, wa hɛ̃ nyɔ ya, ngoi mɛ gbanda mɔ diri mɔ ga so lɛngɔ gbia, na popo tɛ la sɛ ko, kɔi adu na ndo kɔti ti mɔ, omɛ ndɛ̃ adu na ndo ti mɔ ti ga.” 22La Yezo agbinya hɛ̃ lo ya: “Ta ĩ hĩnga ye mɛ ĩ ndohũnda ma. Ĩ lengbi ti hũngɔ pɛnɔ mɛ mbi na hũngɔ ni?” Ala gbinya hɛ̃ lo ya: “E lengbi ti hũngɔ ni.” 23Yezo apa hɛ̃ la ya: “Biani, ĩ na hũngɔ ni. Kanda adu lo ti dungɔ na ndo kɔti ti mbi, nga na dungɔ na ndo ti mbi ti ga ko, ta mbi la mbi lengbi ti fangɔ azi mɛ gbanda adu na ndo ni ko ma. Ndo ni ko adu na lo tɛ azi mɛ To mbi alɛkɛ ni hɛ̃ la.”
24Ngoi mɛ ava Yezo mɛ ndɛ̃ sui kɔi ĩ ma so ko, ngɔnzɔ agbɔ̃ la hɛ̃ afɔ̃ la ko sɛ. 25La Yezo aili la zu, apa hɛ̃ la ya: “Ĩ hĩnga ya, agbia tɛ azi ndosɔ na ndo azi tɛ la nga ma se tɛ agbia. Ko akota azi ndofa azi na nguru tɛ la ya, ani agbia ti ndo la. 26Ko na popo tɛ ĩ ko, ale ta adu so ma. Kanda se mbanga zo na popo tɛ ĩ aye dungɔ kotani ko, ale lo du wa lingɔ kwa hɛ̃ ĩ. 27Wa se mbanga zo na popo tɛ ĩ aye nga dungɔ wa li ni ko, ale lo du mbɛ tɛ ĩ. 28Ĩ ba se mɛ ta mbi Nyi Zo mbi ga ge lɛ sese ya, azi ali kwa hɛ̃ mbi ma la. Kanda mbi ga ya, mbi li kwa hɛ̃ azi, ko mbi ka nga tɛrɛ mbi, wa mbi tɔ̃ azi gba na ya siɔ ye.”
Yezo asara lɛ awa ziba sɛ
(Mar. 10.46-52; Luk. 18.35-43)
29Ala ĩ lo ka Yeriko ĩ si ko, azi butu butu aɔ pɛko Yezo. 30Awa ziba sɛ mɛ adunga so tɔ̃ lege ĩ ma ya, Yezo la ndoɔ ko, ala dɛrɛ kɔngɔ ya: “Gbia, Tara Davidi, ma vundu tɛ e!” 31Azi ko abela la, apa hɛ̃ la ya, ala du kpɔ. Awa ziba ĩ ma so ko, ala ti dɛrɛ kɔngɔ kpengbani ya: “Gbia, Tara Davidi, ma vundu tɛ e oo!” 32Yezo ĩ ma so ko, adɔ, alo, aili la, ahũnda la ya: “Ye mɛ ĩ ye ya, mbi li hɛ̃ ĩ nɛ?” 33Ala gbinya hɛ̃ lo ya: “Gbia, e ye ya, mɔ sara lɛ e, wa e hũ ndo.” 34Yezo ama vundu tɛ la, abɔrɔ lɛ la. Bo na ngoi ni ko, ala zu sɛ ahũ ndo, la ala na Yezo aɔ ndoni kɔi.
Tällä hetkellä valittuna:
Matie 20: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.