Matie 25
25
Matɔ tɛ aniɔsia sui kɔi
1La Yezo apa ya: “Lo Lɛngɔ Gbia tɛ Nzapa akpa gbanda nga ma se tɛ amɔsia sui kɔi mɛ alɔ mɔinda tɛ la, zo kɔi kɔi na tɛ lo, anɔ so ngorongɔ kɔli mɛ aye dungɔ na wali. 2Na popo tɛ la ko, ambanga okɔ̃ adu awa buba, kanda ambanga mɛ ndɛ̃ okɔ̃ adu tɛ la awa ndara. 3Amɔsia mɛ awa buba alɔ amɔinda tɛ la, kanda ta ala mu ndo kpɔ̃ ti zɔngɔ na mɔinda, abata ma. 4Amɔsia mɛ awa ndara alɔ ambenda na kpɔ̃ ya ni, alɔ nga amɔinda tɛ la. 5Ta kɔ wali aga ndo hiɔ ma, ko langɔ agbɔ̃nɔ amɔsia ko sui kɔi zu, ala langana.
6“Ĩ ti na bɛ bi ko, ala ma zo ade kɔngɔ ya: ‘Kɔ wali la ga oo! Ĩ si, ĩ nɔ ĩ ngoro lo!’ 7Amɔsia ko sui kɔi ĩ ma so ko, ala zingɔ, ala lɛke amɔinda tɛ la. 8Amɔsia mɛ awa buba ahũnda afɔ̃ la mɛ awa ndara ya: ‘Ĩ tɔ̃ kpɔ̃ tɛ ĩ yakere hɛ̃ e, e sa na ya amɔinda tɛ e, ta sanga ma, tɛ e kpɔ̃ ni awɛ, ko amɔinda ni ndomingɔ.’ 9Amɔsia mɛ awa ndara akɛ̃ ya: ‘Ipɔ, ta e tɔ̃ kpɔ̃ hɛ̃ ĩ ma, ta sanga ma, ta kpɔ̃ ni adu sĩ ya, alengbi na amɔinda tɛ e na tɛ ĩ ma. Ĩ nɔ ka tɛ awa kangɔ kpɔ̃, ĩ vɔ̃ tɛ ĩ.’ 10Amɔsia mɛ awa buba ahã nɔ, anɔ so vɔ̃ngɔ tɛ la kpɔ̃ ni. Ngoi mɛ ala dɛ kai ko, kɔ wali asi ge pɛko la. La amɔsia mɛ okɔ̃ alɛkɛ tɛrɛ la, ana kɔ wali abombi, ali ya da ti yenga ti mungbingɔ. Ala ĩ li ka ya da wɛ ko, ato nyɔ da pɛko la gbɛ na ta kɛrɛrɛ. 11Ĩ ninga so pɛni ko, amɔsia mɛ fɛrɛ anɔ so vɔ̃ngɔ kpɔ̃ aga, adɛrɛ kɔngɔ ya: ‘Gbia, gbia, zi hɛ̃ e nyɔ ngise!’ 12La kɔ wali agbinya hɛ̃ la ya: ‘Mbi pa hɛ̃ ĩ ti bɛta tɛnɛ ya, ta mbi hĩnga ĩ ma.’ ”
13Yezo ĩ kɔ nda matɔ ko wɛ ko, lo pa nga hɛ̃ azi ya: “Wa ĩ du na kpengba lɛ, ta sanga ma, ta ĩ hĩnga lá, nga na ngoi ti gangɔ tɛ mbi Nyi Zo ma.”
Matɔ tɛ awa kwa ota
(Luk. 19.11-27)
14Yezo apa ya: “Lo Lɛngɔ Gbia tɛ Nzapa akpa gbanda nga ma se tɛ zo kɔi mɛ aye gwengɔ fɔnɔ. Uzu ti lo ɔngɔ ko, lo ili awa kwa tɛ lo, lo kangbi la na nwa tɛ lo. 15Lo mu wɔrɔ ngbangbo kɔ̃, lo hɛ̃ zo ti uzu, lo mu wɔrɔ ngbangbo sɛ, lo hɛ̃ zo ti sɛ, lo mu wɔrɔ ngbangbo kɔi, lo hɛ̃ zo ti ta. Lo hɛ̃ ndo wɔrɔ hɛ̃ zo kɔi kɔi, lo ha na se kɔdɛ tɛ zo. La zo ni ko amu lege aɔ. 16Lo ĩ ɔ, ta ĩ ninga ma ko, wa kwa rnɛ alua wɔrɔ ngbangbo kɔ̃, amu wɔrɔ tɛ lo, ato nda dɛngɔ buze. Lo ĩ dɛ buze ko, lo lua wɔrɔ mɛ ndɛ̃ ngbangbo kɔ̃, lo kpã na ndo omɛ gbia tɛ lo ahɛ̃ lo. 17Wa kwa mɛ alua wɔrɔ ngbangbo sɛ, ade nga buze nga ma se tɛ fɔ̃ lo. Lo lua wɔrɔ ngbangbo sɛ, lo kpã na ndo omɛ gbia tɛ lo ahɛ̃ lo. 18Ko wa kwa mɛ alua wɔrɔ ngbangbo kɔi, amu tɛ lo wɔrɔ ni, agɛ̃ du, ahɔndɛ da.
19“Gbia tɛ awa kwa ko ala ka lege fɔnɔ tɛ lo kpa kpa kpa, ko lo diri lo ga. Lo ili awa kwa tɛ lo, lo tonda dikɔngɔ nwa mɛ ndo lo zia na ti la lo ɔ. 20Wa kwa mɛ ndo alua wɔrɔ ngbangbo kɔ̃ asi gbɛlɛ gbia tɛ lo, afa lo na wɔrɔ mɛ ndɛ̃ ngbangbo kɔ̃ mɛ lo lua. Lo pa ya: ‘Gbia, mɔ hɛ̃ ndo mbi wɔrɔ ngbangbo kɔ̃, wa ba wɔrɔ mɛ ndɛ̃ ngbangbo kɔ̃ mɛ mbi lua ndo ni, na ngoi mɛ mbi dɛ buze lo mɛ.’ 21Gbia tɛ lo apa hɛ̃ lo ya: ‘Mɔ li nzɔ̃ni, mɔ nzɔ̃ wa kwa, mɔ li ye na seni. Mɔ li aye mɛ yakereni na seni, na lo ni ko, mbi na hɛ̃ngɔ mɔ ye mɛ ngbondoni nvɛni. Ga e na mɔ e saba ndoni kɔi.’ 22So pɛni, wa kwa mɛ ndo alua wɔrɔ ngbangbo sɛ asi gbɛlɛ gbia tɛ lo, afa lo na wɔrɔ mɛ ndɛ̃ ngbangbo sɛ mɛ lo lua. Lo pa ya: ‘Gbia, mɔ hɛ̃ ndo mbi wɔrɔ ngbangbo sɛ, wa ba omɛ ndɛ̃ ngbangbo sɛ mɛ mbi lua ndo ni, na ngoi mɛ mbi dɛ buze lo mɛ.’ 23Gbia tɛ lo apa hɛ̃ lo ya: ‘Mɔ li nzɔ̃ni, mɔ nzɔ̃ wa kwa, mɔ li ye na seni. Mɔ li aye mɛ yakereni na seni, na lo ni ko, mbi na hɛ̃ngɔ mɔ ye mɛ ngbondoni nvɛni. Ga e na mɔ e saba ndoni kɔi.’
24“So pɛ la zu ko, wa kwa mɛ alua wɔrɔ ngbangbo kɔi asi gbɛlɛ gbia tɛ lo, apa ya: ‘Gbia, mbi hĩnga ya, mɔ wa zaga, mɔ ndozɔnɔ tɛ mɛ ta mɔ la mɔ kĩ ma, mɔ ndokɔ tɛ mɛ ta mɔ la mɔ lu ma. 25Mbi kpɛ ndo mbɛtɔ tɛ mɔ, la mbi nɔ, mbi hɔndɛ nwa tɛ mɔ ka gbɛ sese. Wa ba ye tɛ mɔ lo mɛ.’ 26Gbia tɛ lo agbinya hɛ̃ lo ya: ‘Mɔ siɔ wa kwa, mɔ wa ndɛkɔ! Mɔ hĩnga ya, mbi ndozɔnɔ tɛ mɛ ta mbi la mbi kĩ ma, mbi ndokɔ tɛ mɛ ta mbi la mbi lu ma. 27Se mɔ hĩnga so ko, ale mɔ bata nwa tɛ mbi ka ya da mɛ andobata na faranga, ya na ngoi mɛ mbi diri ko, mbi lua faranga tɛ mbi, mbi lua nga faranga mɛ ndɛ̃ na ndo ni.’ 28La gbia apa hɛ̃ awa kwa tɛ lo mɛ ndɛ̃ ya: ‘Ĩ mu wɔrɔ ko ngbangbo kɔi ti lo, ĩ hɛ̃ wa kwa mɛ alua wɔrɔ ngbangbo kɔ̃. 29Ta sanga ma, zo ko na ye ko, na hɛ̃ngɔ lo ye mɛ ndɛ̃ ma wo ma, ko lo ti lua ye aɔ ndoni. Kanda zo ko la na nyi ye ko, na mungɔ nyi ye ni ko ti lo. 30Wa tɛ wa kwa olo mɛ ta kwa tɛ lo da ma ko, ĩ mu lo, ĩ bi ka gegi ka ya mbingo. Kai ko, lo to gbanda to, lo dema nga gbanda tɛre lo.’ ”
Ngbanga ti nda ni gbɔ
31Yezo apa ya: “Ngoi mɛ gbanda mbi Nyi Zo mbi ga nga ma gbia, ndoni kɔi na aangelo zu ko, mbi du gbanda na ndo ngɛndɛ tɛ mbi ti ndima. 32Abombi gbanda azi zu so gbɛlɛ mbi, ko mbi kangbi ya la, nga ma se mɛ wa batangɔ angasã ngbaga ndokangbi na ya angasã ngbaga na abɛta angasã. 33Mbi kpã gbanda abɛta azi na ndo kɔti ti mbi, ko mbi kpã ala mɛ ndɛ̃ na ndo ti mbi ti ga. 34Wa mbi Gbia, mbi pa gbanda hɛ̃ abɛta azi mɛ na ndo kɔti ti mbi ya: ‘Ĩ mɛ To mbi Nzapa asunu ĩ ko, ĩ ga, ĩ li ge Kɔdɔrɔ Gbia mɛ ndo lo lɛkɛ na lo tɛ ĩ, na ngoi mɛ ndo lo li na sese. 35Ta sanga ma, gwɛ̃ agbɔ̃ ndo mbi, ko ĩ hɛ̃ ndo mbi tɛ mbi tɛ. Gwɛ̃ ngu agbɔ̃ ndo mbi, ko ĩ hɛ̃ ndo mbi ngu mbi nyɔ. Mbi si ndo ka tɛ ĩ nga ma wa ndɛ̃, ko ĩ yamba ndo mbi. 36Mbi ndo ndumbu, ko ĩ yu ndo mbi na bɔngɔ. Tɛrɛ mbi asɔ ndo, ko ĩ za ndo mbi. Abi ndo mbi bɔlɔkɔ, ko ĩ nɔ ndo ĩ ba mbi.’
37“Ko abɛta azi ahũnda gbanda mbi ya: ‘Gbia, gwɛ̃ agbɔ̃ ndo mɔ, ko e hɛ̃ mɔ ye mɔ tɛ lá wa? Bere gwɛ̃ ngu agbɔ̃ ndo nga mɔ, ko e hɛ̃ mɔ ngu mɔ nyɔ lá wa? 38Mɔ si ndo ka tɛ e nga ma wa ndɛ̃, ko e yamba mɔ lá wa? Bere mɔ ndo ndumbu, ko e yu mɔ na bɔngɔ lá wa? 39Tɛrɛ mɔ asɔ ndo, bere abi ndo mɔ bɔlɔkɔ, ko e nɔ e ba mɔ lá wa?’ 40Ko mbi Gbia, mbi gbinya gbanda hɛ̃ la ya: ‘Mbi pa hɛ̃ ĩ ti bɛta tɛnɛ ya, ngoi zu mɛ ndo ĩ li aye ni ko na tɛrɛ zo mɛ yakereni na popo tɛ azi mɛ adu nga ma ayata mbi ko, adu ndo mbi la ĩ li aye ni ko na tɛrɛ mbi.’
41“So pɛni, mbi Gbia, mbi pa nga gbanda hɛ̃ azi mɛ na ndo ti mbi ti ga ya: ‘Ĩ ɔ lɛ mbi, ĩ du azi mɛ Nzapa azónga ĩ! Ĩ nɔ ka ya wá ti kaka mɛ ndo alɛkɛ na lo tɛ Satana na aangelo tɛ lo! 42Ta sanga ma, gwɛ̃ agbɔ̃ ndo mbi, ko ta ĩ hɛ̃ ndo mbi tɛ mbi tɛ ma. Gwɛ̃ ngu agbɔ̃ ndo mbi, ko ta ĩ hɛ̃ ndo mbi ngu mbi nyɔ ma. 43Mbi si ndo ka tɛ ĩ nga ma wa ndɛ̃, ko ta ĩ yamba ndo mbi ma. Mbi ndo ndumbu, ko ta ĩ yu ndo mbi na bɔngɔ ma. Tɛrɛ mbi asɔ ndo, ko ta ĩ za ndo mbi ma. Abi ndo mbi bɔlɔkɔ, ko ta ĩ nɔ ndo ĩ ba mbi ma.’ 44Ko ala gbinya gbanda hɛ̃ mbi ya: ‘Gbia, gwɛ̃ tɛ, bere gwɛ̃ ngu agbɔ̃ ndo mɔ, bere mɔ si ndo ka tɛ e nga ma wa ndɛ̃, bere mɔ ndo ndumbu, bere tɛrɛ mɔ asɔ ndo, bere abi ndo mɔ bɔlɔkɔ, ko ta e za ndo mɔ ma lá wa?’ 45Ko mbi Gbia, mbi gbinya gbanda hɛ̃ la ya: ‘Mbi pa hɛ̃ ĩ ti bɛta tɛnɛ ya, ngoi zu mɛ ndo ta ĩ li aye ni ko na tɛrɛ zo mɛ yakereni na popo tɛ azi mɛ adu nga ma ayata mbi ma ko, adu ndo mbi la ta ĩ li aye ni ko na tɛrɛ mbi ma.’ 46Ko ato gbanda la ka ndo ti etumbu ti kaka, kanda tɛ abɛta azi ko, ala gwe gbanda ka ndo ti du ti kaka.”
Tällä hetkellä valittuna:
Matie 25: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.