Matie 27
27
Anɔ na Yezo ka gbɛlɛ Pilato
(Mar. 15.1; Luk. 23.1-2; Yoa. 18.28-32)
1Na nda perere nvɛni ko, agbia zu mɛ awa lungɔ Nzapa na ye, na akangba ti kɔdɔrɔ agbe lingo ya, aho Yezo. 2Ala hɛ̃ nyɔ, agbe lo, anɔ na lo ka tɛ Pilato mɛ gbia tɛ leta.
Yudasi aho trrɛ lo
(Awa Pangɔ Kwa 1.18-19)
3Ngoi mɛ Yudasi mɛ wa kangɔ Yezo ĩ hũ ya, afa ngbanga li Yezo ya aho lo ko, lo wa bɛ lo. La lo diri na faranga sui ta ni hɛ̃ agbia tɛ awa lungɔ Nzapa na ye, na akangba ti kɔdɔrɔ. 4Lo pa hɛ̃ la ya: “Mbi li siɔni la mbi ka zo mɛ ta ali siɔ ye ma ya aho lo!” Ala gbinya hɛ̃ lo ya: “Oko ta aba e ma, aba bo mɔ!” 5Yudasi asa faranga ni na ya kota da Nzapa, asi agwe. So pɛni, lo nɔ, lo to li kpu ka tɛrɛ kɛkɛ, lo to nda kpu ni na gɔ̃ lo, lo yenga, lo kpi.
6Agbia tɛ awa lungɔ Nzapa na ye alɔ faranga ni, apa ya: “Ta ndia tɛ e aye ya, e sa gi tɛrɛ faranga mɛ na ya sandugu ti faranga ti kota da Nzapa ma, ta sanga ma, adu faranga mɛ ahɛ̃ ya, aho na zo.” 7Ala ĩ mangbi wɛ ko, ala mu faranga ni, avɔ̃ na yaka tɛ kɔli kɔi mɛ wa sɔ̃ngɔ ta, ya yaka ni adu ndo ti hɔngɔ na awa ndɛ̃. 8Nda mɛ ade bo aili yaka ni na lá olo mɛ ya “Yaka ti mɛnɛ” la. 9La tɛnɛ mɛ ndo Yeremia wa pangɔ nyɔ Nzapa atɛnɛ ati na seni. Tɛnɛ ni lo mɛ: “Ala mu faranga ko sui ta, faranga mɛ ndo awa Izrayɛlɛ aye ya, ani hɛ̃, wa aka na lo, 10avɔ̃ na yaka tɛ kɔli kɔi mɛ wa sɔ̃ngɔ ta, nga ma se ko ndo Gbia Nzapa ahɛ̃ na nyɔ lo hɛ̃ mbi.”
Pilato ahũnda Yezo na ndo
(Mar. 15.2-5; Luk. 23.3-5; Yoa. 18.33-38)
11Asi na Yezo ka gbɛlɛ Pilato, la Pilato ahũnda lo ya: “Mɔ kota gbia tɛ Ayuda?” Yezo agbinya hɛ̃ lo ya: “Tɛnɛ ni la mɔ tɛnɛ.” 12So pɛni, ngoi mɛ gbia tɛ awa lungɔ Nzapa na ye, na akangba ti kɔdɔrɔ ĩ vɔ̃ to tɛrɛ lo ko, ta lo gbinya tɛnɛ bɛ kɔi ma. 13La Pilato ahũnda lo ya: “Ta mɔ ma to zu mɛ azi mɛ avɔ̃ tɛrɛ mɔ ma?” 14Ta Yezo agbinya tɛnɛ kɔi hɛ̃ Pilato ma. Pilato ĩ hũ so ko, abema sĩ nvɛni.
Afa ngbanga li Yezo ya aho lo
(Mar. 15.6-15; Luk. 23.13-25; Yoa. 18.39—19.16)
15Na ngoi yenga ti Lipandasi kɔi kɔi tɛ Ayuda ko, Pilato ndozi mbanga wa bɔlɔkɔ kɔi mɛ Ayuda aye ya azi lo. 16Ko so ndo ni ko, mbanga wa bɔlɔkɔ kɔi mɛ azi ahĩnga lo sĩ ndo da, ili lo la Yezo Barabasi. 17La Pilato ahũnda azi butu butu mɛ abombi tɛrɛ la so ndo ko ya: “Zo mɛ ĩ ye ya, mbi zi lo hɛ̃ ĩ na? Yezo Barabasi, bere Yezo mɛ andoili lo ya Kristo?” 18Pilato ahũnda la so, ta sanga ma, lo hĩnga nzɔ̃ni ya, ala ga na Yezo hɛ̃ ni, na lo mɛ ya, ala ndoli sɔbɛrɛ hɛ̃ lo.
19Ngoi mɛ Pilato ade so ya da ngbanga ko, ya lo ato kwa hɛ̃ lo ya: “Ta kɔli olo ali siɔ ye ma, ko ta mɔ yɔrɔ nyɔ mɔ na ya tɛnɛ tɛ lo ma. Ta sanga ma, na bi mɛ fɛrɛ ko, mbi hũ suma na lo tɛ lo, ko li mbi afɔnɔ sĩ nvɛni.”
20Agbia tɛ awa lungɔ Nzapa na ye, na akangba ti kɔdɔrɔ awa azi ko butu butu ya, ala pa hɛ̃ Pilato ya, lo zi Barabasi, wa aho Yezo. 21Pilato ati amu tɛnɛ, ahũnda la ya: “Na popo tɛ la sɛ ko, zo mɛ ĩ ye ya, mbi zi lo hɛ̃ ĩ na?” Ala gbinya hɛ̃ lo ya: “Zi hɛ̃ e Barabasi!” 22Pilato ahũnda la ya: “Wa ye mɛ ĩ ye ya, mbi li na Yezo mɛ andoili lo ya Kristo nɛ?” Ala zu agbinya hɛ̃ lo ya: “Agɔngɔ lo ndo krusi!” 23Pilato ahũnda la ya: “Ko siɔ ye mɛ lo li nɛ?” Ala dɛrɛ kɔngɔ kpengbani ya: “Agɔngɔ lo ndo krusi!” 24Ngoi mɛ Pilato ĩ hũ ya, ni ha gba, ko azi ndotɔmbɔkɔ bo tɔmbɔkɔ ko, lo mu ngu, lo kpo na ti lo so gbɛlɛ azi ko butu butu, lo pa hɛ̃ la ya: “Ta nda kwá tɛ kɔli olo tɛrɛ mbi ma! Oko aba ĩ!” 25Azi ko butu butu agbinya hɛ̃ lo ya: “E ye bo ya, nda kwá tɛ lo aminya na li e, nga na li aya e!” 26La Pilato azi Barabasi hɛ̃ la. Lo hɛ̃ nyɔ, aturugu asɔ̃ Yezo na fimbo. Ala ĩ sɔ̃ Yezo wɛ ko, lo hɛ̃ Yezo hɛ̃ la ya, ala nɔ agɔngɔ lo ndo krusi.
Aturugu abuba Yezo
(Mar. 15.16-20; Yoa. 19.2-3)
27Ambanga aturugu tɛ Pilato amu Yezo, anɔ na lo ka ya ngbo mɛ da tɛ Pilato da, ko aturugu zu aka Yezo kɛrɛre. 28Ala hãna abɔngɔ tɛrɛ lo, amu yɔngɔrɔ bɔngɔ mɛ bengbani ngbã ngbã ngba ayu na lo. 29Ala ngo bilo ti kĩ, abi li lo nga ma se tɛ gbia. Ala mu nga ngómbé, akpã na kɔti ti lo. So pɛni, ala kuku so lɛ lo, abuba lo, apa hɛ̃ lo ya: “Kota gbia tɛ Ayuda, zengba oo!” 30Ala kuku solo tɛrɛ lo, amu ngómbé ni ti lo, asɔ̃ na li lo. 31Ngoi mɛ ala ĩ buba lo wɛ ko, ala hã bengba bɔngɔ ni tɛrɛ lo, ala mu abɔngɔ tɛ lo, adiri ayu na lo. Ko ala mu lo, asi na ni ya, ani nɔ ĩ gɔngɔ lo ndo krusi.
Agɔngɔ Yezo ndo krusi
(Mar. 15.21-32; Luk. 23.26-43; Yoa. 19.17-27)
32Ngoi mɛ ala ĩ lo so ya kɔdɔrɔ ĩ si ko, ala tengbi na kɔli kɔi mɛ wa kɔdɔrɔ ti Sirɛnɛ, ili lo Simɔ. Ala hɛ̃ lo nyɔ ya, lo yɔ krusi tɛ Yezo. 33Ala nɔ, asi na ndo mɛ andoili ya Gɔlgɔta, alengbi ya: “Ndo ti kpokpo li zo.” 34Ko ala mu kana mɛ ade ya ni na ngɔnzɔ ti bɛ sa, ahɛ̃ Yezo ya, lo nyɔ. Yezo ĩ tara ko, lo kɛ̃ nyɔngɔ ni.
35La aturugu agɔngɔ lo ndo krusi. Ala to zeke so kangbingɔ na bɔngɔ tɛ lo na tɛrɛ la. 36So pɛni, ala dunga so ndo ko ya, ani bata lo. 37Asu mbɛti ti nda kwa tɛ lo, akpã so ta li lo na ndo krusi. Mbɛti ni lo mɛ: “Kɔli olo adu Yezo mɛ Kota Gbia tɛ Ayuda.” 38Aturugu agɔngɔ nga ndo awa nzĩ sɛ na ndo krusi mɛ ndɛ̃ osɛ, kɔi na ndo kɔti ti Yezo, kɔi na ndo ga.
39Azi mɛ ndo aɔ ti ndo ko ĩ hũ lo ko, ala sɔ̃ li la, ae lo, aguru lo, 40apa ya: “Ee! Mɔ la mɔ pa ndo ya, mɔ kara kota da Nzapa, ko mɔ ti wa ni na ya bi ta! So tɛrɛ mɔ nvɛni! Se mɔ du Nyi Nzapa ko, mɔ lo ka ndo krusi, mɔ zu ge tise!” 41Se mɛ nga agbia tɛ awa lungɔ Nzapa na ye, na awa hangɔ ndia, nga na akangba ti kɔdɔrɔ ae na Yezo la. Ala pa ya: 42“Lo so ndo azi mɛ ndɛ̃, ko ta lo lengbi ti songɔ tɛrɛ lo nvɛni ma sia? Lo la kota gbia tɛ awa Izrayɛlɛ? E ye ya, lo lo bo na olo ka ndo krusi lo zu, wadila e ye lo tɛ lo. 43Lo kpã bɛ lo zu na ndo Nzapa, ko lo pa ya, ni Nyi Nzapa. Wa e ba bere Nzapa aye songɔ lo bo na olo mɛ!” 44Ko se mɛ nga awa nzĩ mɛ ndo agɔngɔ la ndo krusi so tɔ̃nda Yezo aguru na lo la.
Yezo akpi
(Mar. 15.33-41; Luk. 23.44-49; Yoa. 19.28-30)
45Ĩ ti na bɛ kɔmbitɛ ko, mbingo avũ kpi kpi kpi, amu lɛ sese zu. Mbingo ni aninga ngbĩi ati na saa ota ti pɛ bɛ kɔmbitɛ. 46Ĩ ti na saa ota ko, Yezo adɛ kɔngɔ kpengbani ya: “Eli, Eli, lɛma sabakatani?” Alengbi ya: “Nzapa tɛ mbi, Nzapa tɛ mbi, mɔ dɔ mbi mɔ zia ya nɛ?” 47Ambanga azi na popo tɛ azi mɛ ndo so ndo ko ĩ ma so ko, ala pa ya: “Lo ndoili Elia!” 48Bo na ngoi ni ko, mbanga zo kɔi so popo tɛ la, akpɛ amu nzunzu, ado na kpekpe kana, agwa na li kɛkɛ, aye ka ndozu hɛ̃ Yezo ya lo sũ. 49Ambanga mɛ ndɛ̃ apa hɛ̃ fɔ̃ la ko ya: “Ku, e ba hĩ, bere Elia na gangɔ songɔ lo!” 50Yezo ati adɛ kɔngɔ kpengbani, la lo kpi.
51Bo na ngoi ni ko la ma bɔngɔ lau mɛ ndo amu afa na ya kota da Nzapa, ato ka ndozu asungbi kpoa, azu ka tise. Sese ayingi kpu kpu kpu, akokɛnɛ tɛ́nɛ asungbi, 52nyɔ du sɛndɛ azizi, la azi tɛ Nzapa mɛ ndo akpili aso na pɛ kwá. 53Ala lo ka ya du sɛndɛ asi, ko na ngoi mɛ Yezo ĩ so na pɛ kwá ko, ala gwe ka Yeruzalɛmɛ, ko azi ma wo ma ahũ ndo la.
54Mbanga wa Roma mɛ gbia tɛ aturugu, ana aturugu ndo so ndo ko so ndobata Yezo. Ala ĩ hũ se mɛ sese ayingi na ni, nga na aye zu mɛ asi ko, mbɛtɔ agbɔ̃ la siɔni, la ala pa ya: “Lo ndo Nyi Nzapa biani!” 55Awe ma wo ma aga nga ndo so ndo ko, ala longa ka yɔngɔrɔni so ndoba Yezo. Ala to nda ɔngɔ ndoni kɔi na Yezo ka sese ti Galilea, ko ala ndoza nga ndo lo. 56Ambanga awe mɛ ndo aga nga lo mɛ: Maria wa Magadala, na ta ayangambi tɛ Zebedeo, nga na Maria mɛ ta Zaki, lo mɛ nga ta Yozɛfu.
Mbanga kɔli kɔi abɔ kinda tɛ Yezo (Mar. 15.42-47; Luk. 23.50-56; Yoa. 19.35-42)
57Ngoi mɛ ndɔ ĩ de ko, mbanga kɔli kɔi aga. Ili lo Yozɛfu, lo wa kɔdɔrɔ ti Arimatea, lo wa nwa, lo ye nga ndo lo tɛ Yezo. 58Lo nɔ ka tɛ Pilato, lo hũnda lo ya, se lo ye ko, ni mu kinda tɛ Yezo, ni nɔ ni hɔ. La Pilato ahɛ̃ nyɔ ya, ahã kinda tɛ Yezo ka ndo krusi, ahɛ̃ Yozɛfu. 59La Yozɛfu amu fana bɔngɔ ti hɔngɔ na kinda, agana na kinda ni, 60anɔ akpã ka ya fana du sɛndɛ tɛ lo nvɛni mɛ lo gɛ̃ na tɛrɛ tɛ́nɛ. So pɛni, lo bilingi kota tɛ́nɛ, lo vĩ na nyɔ du sɛndɛ ni, la lo gwe. 61Maria wa Magadala na Maria mɛ ndɛ̃ ndo so ndo ko, ala dunga so mbage lɛ sɛndɛ ni.
Aturugu abata sɛndɛ tɛ Yezo
62Ngoi ti lɛkɛngɔ tɛrɛ na lo ti lá ti wɔngɔ tɛrɛ ĩ ɔ, ĩ la bu nda ĩ de ko, agbia tɛ awa lungɔ Nzapa na ye, nga na Afarizeo anɔ ndoni kɔi ka tɛ Pilato. 63Ala pa hɛ̃ lo ya: “Malo gbia, bɛ e ada na tɛnɛ mɛ ndo Yezo mɛ wa nvɛnɛ apa na ngoi mɛ ndo lo dɛ lɛ lo ngɛ̃. Lo pa ndo ya, se ni kpi, na pɛ bi ta ko, ni so. 64Wa hɛ̃ nyɔ, abata sɛndɛ tɛ lo bi ta, so ava lo anɔ anzĩ kinda tɛ lo, apa nga hɛ̃ azi ya, lo so na pɛ kwa. Ta so ma ko, nvɛnɛ mɛ ava lo na pangɔ na ɔngɔ ndo omɛ Yezo apa.” 65Pilato apa hɛ̃ la ya: “Ĩ ba aturugu la, ĩ mu la, ko ala nɔ abata sɛndɛ ni. Ĩ nɔ í bata sɛndɛ ni nzɔ̃ni.” 66La ala ɔ. Ala ĩ si kai ko, ala lɛkɛ kota tɛnɛ mɛ avĩ na nyɔ du sɛndɛ ni, amu ndã, aminya na popo ni ya, se zo azi ko, ani liĩnga. La ala kpã aturugu ya, ala bata ni.
Tällä hetkellä valittuna:
Matie 27: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.