Marko 11
11
Yezo asi ka kɔdɔrɔ ti Yeruzalɛmɛ
(Mat. 21.1-11; Luk. 19.28-40; Yoa. 12.12-19)
1Ngoi mɛ Yezo na ava lo ĩ doli na Yeruzalɛmɛ, ka kɔdɔrɔ se mɛ ili ni la Bɛtɛfaze na Betania ko, ala si na ndo hɔtɔ mɛ ili ni Olivie. La Yezo ato ava lo sɛ na kwa ka gbɛlɛ lo ya: 2“Ĩ nɔ ka kɔdɔrɔ ko la ka gbɛlɛ ĩ. Bo na ngoi mɛ ĩ si kai ko, ĩ na hũngɔ nyi punda mɛ agbe lo na gu kɛkɛ, ta zo kɔi ade ako ndo lo ma. Ĩ zara lo, ĩ ga na ni ge. 3Wa se zo ahũnda ĩ ya: ‘Ĩ ndozara lo ya nɛ?’ ko, ĩ gbinya hɛ̃ lo ya: ‘Gbia tɛ e aye kongɔ ndo ni, ko io na diringɔ na ni bo lo hiɔ mɛ.’ ”
4La ava Yezo anɔ, asi kai, ahũ nyi punda so gegi, agbe lo gbengɔ na tɛrɛ lege, so nyɔ da. Ala zara ni. 5Azi mɛ so ndo ko ĩ hũ so ko, ala hũnda la ya: “Ye mɛ ĩ ndoli nɛ? Ĩ zara nyi punda ni ya nɛ?” 6Ava Yezo agbinya hɛ̃ la nga ma se mɛ fɛrɛ Yezo apa na ni hɛ̃ la. La azi ko azia ava Yezo, ala mu nyi punda ni, 7anɔ na ni hɛ̃ Yezo. Ala u akota bɔngɔ tɛ la na ndo nyi punda ni, la Yezo ako ndo ni. 8Azi gba ahãna akota bɔngɔ tɛ la tɛrɛ la, agbala na ndo lege. Ambanga mɛ ndɛ̃ aga na ambambu kɛkɛ mɛ ala fara ka yaka, asa na ndo lege ya, lo ɔ ti ndo ni. 9Azi mɛ ndodɔ nɔ na gbɛlɛ Yezo, na ala mɛ ndoga pɛko lo adɛrɛ kɔngɔ ya: “E gonda Nzapa! Gbia Nzapa asunu bɛ zo ko la tɛrɛ gangɔ na ili lo Nzapa ma ke! 10Nzapa asunu bɛ zo mɛ aga so lɛngɔ gbia, nga ma se mɛ ndo kotara e Davidi ale na gbia ma ke! É gonda Nzapa mɛ ka yayu!”
11Yezo ĩ si ka Yeruzalɛmɛ ko, lo li ka ya kota da Nzapa. Lo ĩ baba ndo zu mɛ so tɔ̃nda lo ko, lo na ava lo sui kɔi ndoni sɛ agwe ka Betania, ta sanga ma, ndɔ ade ndo wɛ.
Yezo azonga kɛkɛ mɛ ili ni la figie
(Mat. 21.18-19)
12Ĩ la bu nda ĩ de, ala ĩ zia Betania wɛ ko, gwɛ̃ agbɔ̃ Yezo. 13Ko lo hũ kɛkɛ mɛ ili ni la figie, na kugbe li ni, ka yɔngɔrɔni. Lo nɔ ya ni ba bere figie ni ale. Ko ngoi mɛ lo ĩ si ka tɔ̃ ni ko, lo tã gi kugbe, ta sanga ma, ta adu ndo ngoi mɛ figie ndole na ni la ma. 14La lo pa hɛ̃ figie ni ya: “Ta mɔ ti le gbanda bɛ gbɔ ya, azi atɛ le mɔ ma!” Ko ava lo ama ndo tɛne mɛ lo tɛnɛ.
Yezo ali ka ya kota da Nzapa
(Mat. 21.12-17; Luk. 19.45-48; Yoa. 2.13-22)
15Ala nɔ asi ka Yeruzalɛmɛ. Yezo ĩ li ka ya kota da Nzapa, lo ĩ hũ awa kangɔ ye, na awa vɔ̃ngɔ ye ko, lo to nda tomangɔ la. Lo tukia mɛsa tɛ awa tongbingɔ faranga, na kiti tɛ awa kangɔ ambipa. 16Lo kɛ̃ ya, ta zo amu ye aɔ na ni ti ya gbágbá ti kota da Nzapa ma. 17So pɛni, lo ha la na tɛnɛ ya: “Buku tɛ Nzapa apa ya: ‘Azi na pangɔ ya, da tɛ mbi Nzapa adu da mɛ azi zu mɛ na lɛ sese na sambelangɔ mbi da.’ Kanda tɛ ĩ ko, ĩ gbinya ni ati nga ma do tɛnɛ mɛ awa nzĩ ndobere da!”
18Agbia tɛ awa lungɔ Nzapa na ye, na awa hangɔ ndia ĩ ma so ko, ala gi kɔdɛ ya, ani ho Yezo. Ko mbɛtɔ tɛ lo agbɔ̃ ndo la, ta sanga ma, azi butu butu abema ndo sĩ na lo tɛnɛ mɛ lo ha na la. 19Ndɔ ĩ de ko, Yezo na ava lo alo so ya kɔdɔrɔ ni ko aɔ.
Kɛkɛ figie mɛ aulɛ
(Mat. 21.20-22)
20Ĩ da na nda perere, na ngoi mɛ ala so ndoɔ ko, ala hũ kɛkɛ figie. Figie ni ato ka li ni, aulɛ zu, asi ka mbatana ni. 21Petro ada bɛ lo na lo mɛ biri asi, la lo hũnda Yezo ya: “Wa hãngɔ lo tɛ Nzapa, ba kɛkɛ figie mɛ biri mɔ zónga ni lo aulɛ zu.” 22La Yezo apa hɛ̃ ava lo ya: “Mbi pa hɛ̃ ĩ ti bɛta tɛnɛ ya, ale ĩ ye lo tɛ Nzapa na bɛ ĩ kɔi. 23Na lo ni ko, ĩ lengbi ti nɛngɔ hɛ̃ hɔtɔ olo ya: ‘Hã so ndo mɛ, mɔ ti ka ya kota ngu.’ Se ta ĩ dɛ kitɛ ka ya bɛ ĩ ma, ko se ĩ ye na bɛ ĩ kɔi ya, tɛnɛ mɛ ĩ tɛnɛ na tingɔ na seni ko, tɛnɛ ni na tingɔ na seni, nga ma se mɛ ĩ pa na ni. 24Nda mɛ mbi pa hɛ̃ ĩ ya, ngoi mɛ ĩ ndosambela Nzapa so yɔngɔ ye ka ti lo ko, ĩ ye na bɛ ĩ kɔi ya, ĩ lua ye ni wɛ, ko lo na hɛ̃ngɔ ye ni biani. 25Ngoi mɛ se ĩ lo ndozu so sambelangɔ Nzapa, ko se ĩ hĩnga ya, mbanga zo ali ĩ siɔni ko, í ka lɛ ĩ ndo siɔ ye tɛ lo, wadila To ĩ Nzapa mɛ ka yayu aka nga lɛ lo ndo siɔ ye tɛ ĩ. [ 26Kanda se ta ĩ ka lɛ ĩ ndo siɔ ye tɛ afɔ̃ ĩ ma ko, ta To ĩ Nzapa mɛ ka yayu aka nga lɛ lo ndo siɔ ye tɛ ĩ ma.]”
Zo mɛ ahɛ̃ nyɔ hɛ Yezo ya lo li na aye na?
(Mat. 21.23-27; Luk. 20.1-8)
27Yezo na ava lo adiri ka Yeruzalɛmɛ. Ngoi mɛ Yezo so ndofɔnɔ ka ya kota da Nzapa ko, agbia tɛ awa lungɔ Nzapa na ye, na awa hangɔ ndia, nga na akangba ti kɔdɔrɔ anɔ ka tɛ lo, 28ahũnda lo ya: “Mɔ lua nyɔ ti lingɔ na aye olo ka ti na? Zo mɛ ahɛ̃ mɔ nyɔ ti lingɔ ye mɛ mɔ ndoli na?” 29Yezo agbinya hɛ̃ la ya: “Mbi na hũndangɔ ĩ bo na ndo kɔi. Se ĩ gbinya hɛ̃ mbi, wadila mbi di ili zo mɛ ahɛ̃ mbi nyɔ ti lingɔ na aye ni.” 30La lo hũnda la ya: “Ĩ di hɛ̃ mbi zo mɛ ato Yoanɛ ya, lo hɛ̃ azi batisimɔ. Nzapa la ato lo, bere azi la ato lo? I gbinya hɛ̃ mbi.” 31Ala ĩ ma so ko, ala to nda bimbingɔ tɛnɛ ka popo tɛ la ya: “Se e gbinya hɛ̃ lo ya: ‘Nzapa la ato Yoanɛ’ ko, lo na hũndangɔ e ya, wa ta e ye ndo lo tɛ Yoanɛ ma ya nɛ? 32Wa se e pa nga ya, azi la ato lo ko, ta na lengbingɔ nga ma!” (Mbɛtɔ tɛ azi mɛ so ndo ko butu butu agbɔ̃ la, ta sanga ma, azi zu aye ndo lo tɛ Yoanɛ ya, Yoanɛ adu beta wa pangɔ nyɔ Nzapa.) 33La ala gbinya hɛ̃ Yezo ya: “Ta e hĩnga ma.” Ko Yezo apa hɛ̃ la ya: “Wa ta mbi nga na dingɔ hɛ̃ ĩ zo mɛ ahɛ̃ mbi nyɔ ti lingɔ na aye ni ma.”
Tällä hetkellä valittuna:
Marko 11: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.