Gyenesise 13
13
Abram ne Lɔto afia tete
1Yiti Abram fili Misraim hɔle ngwaen dɔ aseɛ ne aso dɔ, ɔne ɔye ne bɔ wanya ye amukoraa, na Lɔto ne ye bɛhɔle. 2Né Abram anya ye nwo tam wɔ nyɛmmoa, ɛdwetɛ ne sikaa kɔkorɛ nu. 3Olili tutena toonn fili ngwaen dɔ aseɛ ne aso oodwuli Betel, na odwuli nekaa bɔ olili moa sili ye ɛtena sua ne, wɔ Betel ne Aye b’afia. 4Oodwuli nekaa bɔ olili moa sili afɔleɛ bokyea ne. Na Abram sɔnene AWURADE berɛ. 5Né Lɔto bɔ ɔne Abram bɛnate ne koso ole mmoaen ne nandwie ne ɛtena sua mɔ. 6Ye sɔ ne ati, né bɛnzo aseɛ bɔ bɛ munyɔ bɛte so ne aso; ofikyɛ né b’anwonya somaa ne mma bɛngora bɛndena mmɔ nu. 7Na edwudwolɛ wale Abram ngaka neafoɛ nemɔ ne Lɔto ngaka neafoɛ nemɔ afia. Na sɔ mmerɛ ne, né Kanaanfoɛ ne Perisifoɛ wɔ sɔ aseɛ ne aso.
8 #
Edw 133.1
Na Abram sele Lɔto kyɛ, “Mesrɛ wɔ, nnɛma aporowaa biala ba me ne wɔ afia, ɔne wɔ ngaka neafoɛ ne me ngaka neafoɛ afia, ofikyɛ yɛbɔ abusua. 9Aso nna aseɛ yeɛ ɔla wɔ nyunu tɛtrɛtɛɛ ye? Mesrɛ wɔ, te wɔ nwo fi me nwo. Na sɛ ɛfa bɛen so a, me wora ngɔfa famaa so; yeɛ sɛ ɛfa famaa so koso a, me wora ngɔfa bɛen so.” 10Lɔto totole ye nye neane Yɔɔdan noa aseɛ frɛtɛɛ ne amukoraa, bɔ ɔkɔ Soa bue nu dɔ ne, na onwuni kyɛ nzue doadoa ye nekaa biala te kyɛ AWURADE turo ne, kyɛ Misraim aseɛ. Ɛhe sili koraka yeɛ AWURADE baasɛkye Sodom ne Gomora ɔ. 11Yiti Lɔto yele Yɔɔdan noa aseɛ frɛtɛɛ ne amukoraa, na ɔfale ye ti bɔle eyia afiteleɛ bue nu dɔ. Na bɛpakyepakyele nu. 12Abram tenane Kanaan aseɛ so, nakoso Lɔto de, ɔtenane Yɔɔdan noa aseɛ frɛtɛɛ nguro nemɔ aso, na oosili ye ɛtena sua pingyele Sodom. 13Né Sodomfoɛ te amumuyɛɛfoɛ, bɔ bɛyɔ bɔne mbirikua mbirikua betia AWURADE ɔ.
Abram tu kɔ Hebron
14Lɔto tele ye nwo fili Abram nwo ne, ye si ye AWURADE sele Abram kyɛ, “Gyina nekaa bɔ ɛwɔ ne, ná ma wɔ nye so nea sorɔ ne ngwaen, eyia afiteleɛ ne atɔleɛ. 15#Aso 7.5; Gal 3.16 Na ngɔfa aseɛ bɔ enwu ye ne amukoraa ngɔma wɔ ne wɔ boso ama afebɔɔ. 16Ngɔma wɔ boso ama kɔta kyɛ aseɛ so mvuture. Na sɛ ebie kora ka aseɛ so mvuture a, ye de ɔkɔhora kɔha wɔ boso ama koso. 17Ma wɔ nwo yɛ nyera, na nate fa aseɛ ne tendenn ne ye tɛtrɛtɛɛ nu, ofikyɛ mebaafa mema wɔ.” 18Yiti Abram tutuli ye ɛtena sua ne, na ɔɔtenane pingyele Mamre eluii mmakaa bɔ bɛwɔ Hebron ne, na osili afɔleɛ bokyea berɛ mane AWURADE.
Tällä hetkellä valittuna:
Gyenesise 13: EBP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Esahie Bible © Bible Society of Ghana, 2018.